བོད་རང་སྐྱོང་ལྗོངས་ཟེར་བས་བལ་ཡུལ་གཞུང་དང་འབྲེལ་འདྲིས་ཀྱིས། བོད་དང་བལ་ཡུལ་ཀྱི་ས་མཚམས་སུ་ཁེལ་བའི་བལ་ཡུལ་གྱི་རྫོང་ཁག་བཅོ་ལྔར་དངོས་ཤུགས་བརྒྱུད་གསུམ་ཐོག་ནས་རོགས་སྐྱོར་བྱ་རྒྱུ་ཡིན་ལུགས་བསྒྲགས་འདུག
དེ་རིང་ཕྱི་ཚེས་ ༦ ཉིན་བལ་ཡུལ་ཀ་ཐི་མན་ཌུ་ཆ་འཕྲིན་(KATHKMANDU TIMES POST) གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ལམ་བོད་རང་སྐྱོང་ལྗོངས་ཟེར་བའི་གཞུང་གིས་བལ་ཡུལ་བྱང་བརྒྱུད་ཀྱི་བལ་བོད་མཐའ་མཚམས་ཀྱི་དོལ་པོ་དང་། རུ་སུ་ཝ། མདོ་ལ་ཁ་སོགས་ཚུད་པའི་རྫོང་ཁག་ ༡༥ ནང་དཔལ་འབྱོར་དང་སྤྱི་ཚོགས་ཡར་རྒྱས་སོགས་ཀྱི་སླད། འབྱུང་འགྱུར་ལོ་ལྔའི་རིང་ལོ་རེར་རྒྱ་སྒོར་ས་ཡ་ ༢༠ ལྷག་གི་རོགས་དངུལ་སྤྲད་ནས། བོད་བལ་ས་མཚམས་ཀྱི་མང་ཚོགས་རྣམས་ཀྱི་འཚོ་བ་ལ་རོགས་འདེགས་བྱ་རྒྱུ་ཡིན་ལུགས་བསྒྲགས་འདུག
གནད་དོན་དེའི་ཐད་ལྷ་སའི་བལ་ཡུལ་གཞུང་ཚབ་ཁང་ནས་བསྒྲགས་གཏམ་ཞིག་སྤེལ་བའི་ནང་། འདི་ལོའི་ཕྱི་ཟླ་ ༤ ཚེས་ ༢༣ དང་ ༢༤ ཉིན་གཉིས་རིང་བོད་ཀྱི་རྒྱལ་ས་ལྷ་ས་རུ། བལ་ཡུལ་གཞུང་སྲིད་འཛིན་སྐྱོང་ལས་ཁུངས་ཀྱི་ཟུང་དྲུང་ཀ་མེལ་ (Kamal Prasad) དང་བོད་རང་སྐྱོང་ལྗོངས་ཟེར་བའི་ཕྱི་སྲིད་ལས་ཁུངས་ཀྱི་སྤྱི་ཁྱབ་འགན་འཛིན་པདྨ་དབྱངས་འཛོམས་གཉིས་ཀྱི་གཙོ་སྐྱོང་འོག རོགས་སྐྱོར་མ་དངུལ་ཞུ་འཆར་གྱི་ཚོགས་འདུ་ཐོག་མ་དེ་འཚོགས་པ་བརྒྱུད། བོད་རང་སྐྱོང་ལྗོངས་ནས་དངོས་ཤུགས་བརྒྱུད་གསུམ་གྱི་ཐོག་ནས་བལ་ཡུལ་གྱི་མཐའ་མཚམས་མི་མང་ལ་མཐུན་རྐྱེན་ཡར་རྒྱས་གཏོང་ཐབས་སོགས་ཚུད་པའི་རོགས་པ་གང་འདྲ་བྱེད་དགོས་མིན་ཐོག་ལ་གྲོས་བསྡུར་བྱུང་ཡོད་སྐོར་སོགས་གསལ་འདུག
ཉེ་ཆར་བལ་ཡུལ་གྱི་སྲིད་བློན་གཞོན་པ་ལྷ་སར་སྐྱོད་སྐབས། བོད་རང་སྐྱོང་ལྗོངས་སྲིད་གཞུང་ཟེར་བས་བལ་གཞུང་གི་འཛིན་སྐྱོང་དང་ཡར་རྒྱས་གཏོང་ཐབས་སོགས་ལ་དམིགས་ནས་རྒྱ་སྒོར་ས་ཡ་ ༢༠ ཡིས་རོགས་དངུལ་སྤྲད་དེ་བལ་ཡུལ་བྱང་བརྒྱུད་ཀྱི་རྟ་དཔལ་ལྗོངས་(Taplejung) དང་། སོ་ལུ་ཁམས་བུ་(Sankhuwasabha)། མདོ་ལ་ཁ་(Dolakha) ། སིན་དྷུ་དཔལ་མཆོག (Sindhupalchok) ། རུ་སུ་ཝ་(Rasuwa) ། མུ་སི་ཐང་། དོལ་པོ་སོགས་ཚུད་པའི་རྫོང་ཁག་ ༡༥ ཡི་ནང་སློབ་གྲྭ་གསར་འཛུགས་དང་། སྨན་བཅོས་ལྟ་སྐྱོང་། ཉི་གློག་གསར་འཛུགས་སོགས་ཁུལ་དེའི་མི་མང་གི་འཚོ་བར་རོགས་འདེགས་བྱ་རྒྱུ་ཡིན་ལུགས་ཁས་བླངས་ཡོད་པ་མ་ཟད། རྒྱ་ནག་གཞུང་གིས་འདས་པའི་ལོ་ཤས་རིང་བོད་དང་བལ་ཡུལ་གྱི་མཐའ་མཚམས་ཁུལ་དུ་ཡོད་པའི་མི་མང་གི་འཚོ་བའི་གནས་བབ་ཡར་སྐྱེད་ཀྱི་ཐད་ལ་རོགས་སྐྱོར་མང་དག་ཅིག་གཉེར་ཡོད་ལུགས་བསྒྲགས་འདུག
འདི་ལོའི་ཕྱི་ཟླ་ ༣ ཚེས་ ༢༥ ཉིན་བལ་ཡུལ་གྱི་སྲིད་བློན་གཞོན་པ་དང་ཕྱི་སྲིད་བློན་ཆེན་ན་རཱ་ཡན་ (Narayan Kaji Shrestha) ཟེར་བ་བོད་རང་སྐྱོང་ལྗོངས་ཏེ། བོད་ཀྱི་རྒྱལ་ས་ལྷ་སར་བསྐྱོད་དེ་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་དྲུང་ཆེ་ཝང་ཅུན་ཀྲིན་(Wang Junzheng) དང་ཐུག་འཕྲད་བྱས་ཏེ། བོད་དང་བལ་ཡུལ་བར་གྱི་ས་མཚམས་ཁག་ཏུ་འཕྲད་བཞིན་པའི་དཀའ་ངལ་དག་སེལ་ཐབས་དགོས་པའི་འབོད་སྐུལ་བྱས་ཡོད་ཅིང་། དེ་བཞིན་ཕྱི་ཟླ་ ༣ ཚེས་ ༢༦ ཉིན་བལ་ཡུལ་གྱི་སྲིད་བློན་གཞོན་པས་རྒྱ་ནག་གི་རྒྱལ་ས་པེ་ཅིན་དུ་ཕྱི་སྲིད་བློན་ཆེན་ཝང་ཡེ་(Wang Yi) དང་ཐུག་འཕྲད་བྱས་ཏེ། རྒྱ་ནག་གཞུང་གིས་རྒྱུད་གཅིག་དང་ལམ་གཅིག་ཟེར་བའི་འཛུགས་སྐྲུན་གྱི་ལས་གཞིའི་འོག་ནས་བལ་ཡུལ་གཞུང་ལ་རོགས་འདེགས་བྱ་རྒྱུ་དང་། ཕྱོགས་གཉིས་ཀྱི་འབྲེལ་ལམ་སྔར་ལས་ཇེ་ཆེར་བཏང་ནས། བལ་ཡུལ་གྱིས་རྒྱ་ནག་ལ་འཚོང་མུས་ཡིན་པའི་རྩྭ་སྐམ་དང་། གླང་ཤ་བཙོས་མ། སྨན་རྩྭའི་རིགས་ཀྱི་ཕྱིར་འདྲེན་སྔར་ལས་ཇེ་མང་དུ་གཏོང་དགོས་པའི་རེ་འདུན་བཏོན་ཡོད་པ་མ་ཟད། རྒྱ་ནག་གཞུང་གིས་བལ་ཡུལ་གྱི་བྱང་བརྒྱུད་ཁུལ་དུ་རོགས་འདེགས་དང་འཛུགས་སྐྲུན་གྱི་ལས་གཞི་སྤེལ་དགོས་པའི་རེ་འདུན་བཏོན་འདུག
དེ་བཞིན་བལ་ཡུལ་ཀ་ཐི་མན་ཌུ་ཆ་འཕྲིན་གསར་ཁང་གིས། ཕྱི་ལོ ༢༠༡༨ ལོར་རྒྱ་ནག་རྒྱལ་ཡོངས་འཛུགས་སྐྲུན་མཉམ་ལས་ལྟེ་གནས་ཁང་(China International Development Cooperation Agency) ཟེར་བ་ཞིག་གིས་རྒྱ་ནག་གི་ཕྱི་སྲིད་ལས་དོན་དང་འབྲེལ་ནས་བལ་ཡུལ་བྱང་བརྒྱུད་ཀྱི་རྫོང་ཁག་ཡར་རྒྱས་གཏོང་བའི་ལས་གཞིར་བལ་ཡུལ་དཔལ་འབྱོར་བློན་ཆེན་ལས་ཁུངས་ཀྱིས་མཉམ་འབྲེལ་ས་ཡིག་བརྒྱབ་ཡོད་ཀྱང་། ད་བར་རྒྱ་བལ་གཉིས་མཉམ་ལས་ཀྱི་ལས་དོན་གང་ཡང་མགོ་འཛུགས་བྱེད་མ་ཐུབ་པར་ལྷག་ཡོད་སྐོར་དང་། ཕྱི་ལོ་ ༢༠༢༢ ཙམ་ནས་རྒྱ་ནག་གཞུང་གིས་བལ་ཡུལ་གྱི་བྱང་བརྒྱུད་གཙོས་བལ་བོད་མཐའ་མཚམས་ཁུལ་དུ་ཡར་རྒྱས་གཏོང་རྒྱུར་རོགས་རམ་བྱ་རྒྱུ་ཡིན་པའི་ཁས་ལེན་བྱས་ཡོད་སྐོར་སོགས་གསལ་འདུག
ཚེ་རིང་རྣམ་རྒྱལ་གྱིས་བསྒྱུར། རྩོམ་སྒྲིག་པ་སྐལ་བཟང་སྦྱིན་པ།
