རྒྱ་ནག་འཛམ་གླིང་གི་གསར་འགོད་པ་བཙོན་འཇུག་བྱེད་མཁན་ཆེ་ཤོས་དེ་རེད་འདུག

རྒྱ་ནག་གཞུང་གིས་གསར་འགོད་པ་དང་བོད་ནང་གི་བོད་མིའི་རང་དབང་སོགས་ལ་དམ་དྲག་ཤུགས་ཆེན་བྱེད་བཞིན་ཡོད་སྟབས། བོད་དེ་འཛམ་གླིང་གི་རང་དབང་ཆེས་མེད་ས་ཞིག་ཡིན་སྐོར་བརྗོད་འདུག

ཁ་སང་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས། ཕྱི་ལོ་ ༢༠༢༤ ལོའི་རྒྱལ་སྤྱིའི་གསར་འགོད་རང་དབང་གི་སྙན་ཐོ་བཏོན་འདུག་ཅིང་། སྙན་ཐོའི་ཁ་བྱང་དུ་ཆབ་སྲིད་ཀྱི་གནོད་ཤུགས་འོག་ཚུད་བཞིན་པའི་གསར་འགྱུར་ལས་རིགས་ཞེས་འཁོད་པའི་ནང་། སྲིད་གཞུང་ཁག་གིས་གསར་འགོད་རང་དབང་སྲུང་སྐྱོབ་བྱེད་ཐུབ་ཀྱི་མེད་ཅིང་། ཆབ་སྲིད་པ་ཚོས་འོས་བསྡུའི་དྲིལ་བསྒྲགས་སོགས་ལ་དམིགས་ནས་ཆེད་དུ་གསར་འགོད་པར་ཁྱད་གསོད་དང་གནས་ཚུལ་རྫུན་བསྒྲགས་སོགས་བྱེད་བཞིན་པའི་སྐོར་བརྗོད་འདུག

འདི་ལོའི་གསར་འགོད་རང་དབང་སྙན་ཐོའི་ནང་། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས། འཛམ་གླིང་རྒྱལ་ཁབ་དང་ས་ཁུལ་མི་འདྲ་བ་  ༡༨༠ ཡི་གསར་འགོད་རང་དབང་གནས་བབ་སྐོར་ལ་ཞིབ་འཇུག་བྱས་ཏེ། རྒྱ་ནག་ནི་འཛམ་གླིང་གི་གསར་འགོད་པ་བཙོན་འཇུག་བྱེད་མཁན་ཆེ་ཤོས་དེ་ཡིན་པ་གསལ་སྟོན་བྱས་འདུག་ལ། གསར་འགོད་རང་དབང་ཆེས་སྡུག་ཤོས་ཀྱི་རྒྱལ་ཁབ་བཅུ་ནི་ཨེ་ཊི་རེ་ཡ། སི་རེ་ཡ་དང་ཨབ་གྷ་ནེ་སི་ཐན། བྱང་ཀོ་རི་ཡ། ཨི་རན། ཊར་ཀེ་མན་སི་ཐན། ཝི་ཏི་ནམ། རྒྱ་ནག་དང་འབར་མ་ཨི་ཇབ་ཊི་བཅས་ཡིན་པ་མངོན་འདུག ཡང་འཛམ་གླིང་གི་གསར་འགོད་རང་དབང་ལེགས་ཤོས་ཀྱི་རྒྱལ་ཁབ་ལྔ་ནི་དང་པོ་ནོར་ཝེ་དང་ཌན་མག སི་ཝི་ཌན། ནེ་ཐར་ལན་ཌི། ཧྥི་ལན་ཌི་བཅས་ཡིན་པ་གསལ་འདུག

འདི་ལོར་འཛམ་གླིང་གི་མི་མང་ཕྱེད་ཀ་ཙམ་གྱིས་འོས་བསྡུའི་ནང་ཆ་ཤས་ལེན་གྱི་ཡོད་སྟབས། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཆབ་སྲིད་ཀྱི་གནོད་ཤུགས་འོག་གསར་འགྱུར་ལས་རིགས་དང་སྤྱི་དམངས་ཀྱི་ཐོབ་ཐང་ལ་ཉེན་ཁ་འཕྲད་བཞིན་པའི་ཉེན་བརྡ་དང་འབྲེལ། ཕྱི་ལོ་ ༢༠༢༤ ལོའི་རྒྱལ་སྤྱིའི་གསར་འགོད་རང་དབང་གི་ཚད་གཞི་ ༧ དང་ཚགས་ ༦ ལ་བསགས་ཡོད་པ་ཕྱི་གསལ་བཟོས་འདུག་ལ། དམིགས་བསལ་མཉམ་འབྲེལ་རྒྱལ་ཚོགས་ལྟ་བུའི་རྒྱལ་སྤྱིའི་ཚོགས་སྡེ་ཁག་གིས། གསར་འགོད་རང་དབང་སྲུང་སྐྱོབ་བྱེད་པར་ཆབ་སྲིད་ཀྱི་མངོན་འདོད་མེད་པ་དང་། འདས་ལོ་ནས་ཨི་ཟི་རལ་དང་པ་ལི་སི་ཐན་བར་དམག་འཁྲུག་ཤོར་རྐྱེན་འོག གསར་འགོད་པ་ཁྱོན་ ༡༠༠ ལྷག་ཨི་ཟི་རལ་གྱིས་འདས་གྲོངས་སུ་བཏང་ཡོད་པ་ཐེར་འདོན་བྱས་འདུག

རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་རྩོམ་སྒྲིག་འགན་འཛིན་ཨན་ནེ་ (Anne Bocandé) ལགས་ཀྱིས། སྲིད་གཞུང་ཁག་དང་ཆབ་སྲིད་ཀྱི་ཚོགས་སྡེ་ཁག་གཞན་དག་གིས་གསར་འགོད་རང་དབང་སྲུང་སྐྱོབ་བྱེད་པའི་འགན་འཁྲི་ཇེ་ཉུང་དུ་བཏང་ཡོད། ཅེས་དང་། ཆབ་སྲིད་ཀྱི་དབང་ཤེད་ལ་བརྟེན་ནས་གསར་འགོད་པར་ཁྱད་གསོད་དང་བརྙས་བཅོས་སོགས་བྱེད་བཞིན་ཡོད། ཅེས་བརྗོད་འདུག

ཡང་ཨ་རིའི་རང་དབང་ཁང་པས། ཕྱི་ལོ་ ༢༠༢༤ ལོའི་འཛམ་གླིང་གི་རང་དབང་གི་གནས་བབ་སྐོར་གྱི་སྙན་ཐོ་བཏོན་པའི་ནང་། འདས་པའི་ལོ་གཅིག་རིང་འོས་བསྡུ་དང་དམག་འཁྲུག་སོགས་ཀྱི་རྐྱེན་གྱིས་འཛམ་གླིང་རྒྱལ་ཁབ་ ༥༢ ཀྱི་རང་དབང་ཉམས་དམེས་སུ་ཕྱིན་ཡོད་པ་དང་། རྒྱལ་ཁབ་ ༢༡ གི་རང་དབང་ཡར་རྒྱས་ཕྱིན་ཡོད་པ་གསལ་འདུག་ལ། ལྷོ་ཨ་མེ་རི་ཁའི་རྒྱལ་ཁབ་ཨེ་ཁའུ་ཌོར་(Ecuador) ནང་འོས་བསྡུའི་དབང་ཆ་འཐབ་རྩོད་དང་འབྲེལ་ནས། ནག་ཚོགས་ཁག་ཅིག་གིས་རྒྱལ་ཁབ་དེའི་ལས་བྱེད་དང་ཆབ་སྲིད་འོས་མི་འགའ་འདས་གྲོངས་སུ་བཏང་ཡོད་པ་དང་ཁེམ་བྷོ་ཌི་ཡ་དང་པོ་ལན་ཌི། ཊར་ཁེ། ཛིམ་བྷ་བྷེའུ་བཅས་ཀྱིས་འོས་བསྡུའི་རྗེས་བསྐྱར་དུ་དབང་ཆ་འཐབ་རྩོད་བྱས་པ་ལ་བརྟེན་ནས། ཕྱེད་རང་དབང་གི་ཁྱབ་ཁོངས་སུ་མར་ལྷུང་ཡོད་ཅིང་། དཀྱིལ་ཤར་ཡུལ་གྲུའི་རྒྱལ་ཁབ་ (Azerbaijan) ཀྱི་ས་ཁུལ་ (Nagorno-Karabakh) དུ་སྲིད་དབང་སྒེར་གཅོད་དང་འབྲེལ་ནས་འཐབ་འཁྲུག་ཚབས་ཆེན་བྱུང་བ་ལ་བརྟེན། འཛམ་གླིང་གི་རང་དབང་ཆེས་ཞན་པའི་རྒྱལ་ཁབ་ཏུ་ངོས་འཛིན་བྱས་འདུག

དེ་བཞིན། ཆབ་སྲིད་དང་སྤྱི་དམངས་ཀྱི་ཐོབ་ཐང་མེད་པའི་རྩོད་རྙོག་དང་ཡུན་རིང་ས་ཁོངས་བདག་དབང་རྩོད་བཞིན་པའི་ས་ཁུལ་གྱི་ཁྲོད་དུ། བོད་དང་ཧོང་ཀོང་། ཨུ་རུ་སུའི་དམག་འཁྲུག དེ་བཞིན། པ་ལི་སི་ཐན་དང་ཨི་ཟི་རལ་གཉིས་བར་གྱི་རྩོད་རྙོག དེ་བཞིན། རྒྱ་གར་གྱི་ཁྱབ་ཁོངས་སུ་གནས་པའི་ཀ་ཤི་མིར་སོགས་ས་ཁུལ་མི་འདྲ་བ་ ༡༥ འཁོད་འདུག་ཅིང་། ས་ཁུལ་དེ་དག་ནི་འཛམ་གླིང་ཆེས་རང་དབང་ཞན་པའི་ས་ཁུལ་ཡིན་པར་མ་ཟད། མི་གྲངས་ས་ཡ་ ༤༥ ལྷག་ལ་གཞི་རྩའི་རང་དབང་དང་རང་ཐག་རང་གཅོད་བྱེད་པའི་ཐོབ་ཐང་སོགས་མེད་པ་རེད་འདུག་ལ། དེའི་ཁྲོད་རྒྱ་ནག་གཞུང་གིས་བོད་དང་ཧོང་ཀོང་ལ་རང་དབང་ཏོག་ཙམ་ཞིག་ཡོད་པ་དེའང་དྲག་གནོན་དང་རྡོག་རོལ་བཏང་སྟེ་མེད་པར་བཟོ་བཞིན་ཡོད་པའི་ཁར། བོད་ནི་ཕྱི་ལོ་ ༢༠༠༥ ནས་འཛམ་གླིང་ནང་རང་དབང་ཆེས་མེད་ས་ཞིག་ཡིན་སྐོར་དང་། འདས་པའི་བཅུ་ཕྲག་འགའི་རིང་རྒྱ་ནག་གཞུང་གིས་བོད་ས་ཡོངས་ལ་དབང་སྒྱུར་བྱས་ཏེ། བོད་མིས་ཆབ་སྲིད་ཀྱི་མངོན་འདོད་སྤུ་ཙམ་ཡང་གླེང་མི་ཆོག་ཅིང་། བོད་མི་སྟོང་ཕྲག་མང་པོར་ཆབ་སྲིད་ཀྱི་སློབ་གསོ་ཟེར་བ་སྤྲོད་བཞིན་པ་དང་བཙན་གྱིས་གནས་སྤོར་བྱེད་བཞིན་པ། ད་དུང་ལས་བཟོའི་སྦྱོང་བརྡར་ཟེར་བའི་མིང་འོག་ནས་བོད་མི་མང་པོར་དམར་ཤོག་གི་ལྟ་གྲུབ་སློབ་འཁྲིད་བྱེད་བཞིན་པ་སོགས་བོད་ནི་འཛམ་གླིང་གི་རང་དབང་ཆེས་མེད་པའི་རྒྱལ་ཁབ་ཅིག་ཡིན་པ་གསལ་བོར་བསྟན་འདུག

ད་དུང་རྒྱ་ནག་གཞུང་གིས་ཐའེ་ཝན་གྱི་མང་གཙོའི་འོས་བསྡུར་ཐེ་གཏོགས་བྱས་ཏེ། ཕྱི་ལོ་ ༢༠༢༤ ལོའི་ཟླ་ ༡ པོའི་ནང་གི་ཐའེ་ཝན་སྲིད་འཛིན་གྱི་འོས་བསྡུར་ཆེན་མོར་ཐབས་ཇུས་གསུམ་གྱི་ཐོག་ནས་ཤུགས་རྐྱེན་སྤྲོད་ཐབས་བྱས་ཡོད་པ་དང་། ཧོང་ཀོང་ནང་ཉེས་ཅན་པ་རྩིས་སྤྲོད་ཟེར་བའི་ཁྲིམས་ལག་བསྟར་བྱས་ཏེ་ཧོང་ཀོང་གི་མང་གཙོ་དང་འགྲོ་བ་མིའ་ཐོབ་ཐང་། གསར་འགོད་རང་དབང་སོགས་ལ་དྲག་གནོན་ཚབས་ཆེན་བཏང་ཡོད་སྐོར་སོགས་ཀྱང་བཀོད་འདུག

གསར་འགོད་པ། སྐལ་བཟང་སྦྱིན་པ།