རྒྱ་གར་གྱི་སྲིད་བློན་ཟུར་བ་ནཱ་རཱ་སིམ་ཧ་ (Narasimha) དམ་པ་མཆོག་གི་རྗེས་དྲན་ཞི་བདེ་གཟེངས་རྟགས་(Narasimha Rao Memorial Award) ཞེས་པ་དེ་༧གོང་ས་མཆོག་ལ་འབུལ་ལམ་ཞུས།
པར་དབང་། དཔལ་ལྡན་དགའ་ལྡན་ཕོ་བྲང་།
ཟླ་འདིའི་ཕྱི་ཚེས་ ༨ ཉིན་བཞུགས་སྒར་རྒྱལ་བའི་ཕོ་བྲང་དུ། ༸གོང་ས་རྒྱལ་བ་རིན་པོ་ཆེ་མཆོག་ལ་ རྒྱ་གར་གྱི་སྲིད་བློན་ཟུར་པ་ནཱ་རཱ་སིམ་ཧ་ (Narasimha) དམ་པ་མཆོག་གི་རྗེས་དྲན་གཟེངས་རྟགས་ (Narasimha Rao Memorial Award) ཞེས་པ་དེ་འབུལ་ལམ་ཞུས་ཡོད་པ་དང་། སྐབས་དེར་མགོན་པོ་གང་ཉིད་མཆོག་གིས། དཀའ་ངལ་ཚང་མའི་རྐྱེན་རྩ་ནི་གཞན་ལ་སྐྱོན་འཛུགས་བྱ་རྒྱུ་མ་ཡིན་པར། རང་ཉིད་ཀྱི་མ་རིག་པའི་བློ་ལ་བརྟེན་ནས་བྱུང་གི་ཡོད་པའི་བཀའ་སློབ་བསྩལ།
རྒྱ་གར་གྱི་སྲིད་བློན་ཟུར་པ་ནཱ་རཱ་སིམ་ཧ་ (Narasimha) དམ་པ་མཆོག་གི་དགེ་རྩ་ཚོགས་པའི་ཚོགས་མི་ཁག་ཅིག་གིས་༧གོང་ས་མཆོག་ལ་མཇལ་ཁ་ཞུས་གྲུབ་མཚམས་བོད་མིའི་གསར་འགོད་པ་ཁག་ཅིག་ལ་བརྗོད་དོན། ཕྱི་ལོ ༢༠༢༡ ལོ་ནི་སྲིད་བློན་ཟུར་པ་ནཱ་རཱ་སིམ་རའོ་དམ་པ་ཁོང་དགུང་ལོ་བརྒྱ་འཁོར་བའི་དུས་དྲན་ཡིན། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ལ་དམ་པ་ཁོང་གི་རྗེས་དྲན་གཟེངས་རྟགས་དེ་ཉིད་ཕུལ་འདོད་ཆེན་པོ་ཡོད་ཀྱང་། ནད་ཡམས་ཀྱི་དབང་གིས་ཕུལ་ཐུབ་མེད་སྟབས། ད་རེས་༧གོང་ས་མཆོག་ལ་ཞི་བདེའི་གཟེངས་རྟགས་དེ་འབུལ་བཞེས་ཆེད་བཅར་ཡོད་པ་ཙམ་མ་ཟད། ༧མགོན་པོ་གང་ཉིད་མཆོག་གིས་འཛམ་གླིང་ནང་ཞི་བདེའི་རང་གཟུགས་མཚོན་གྱི་ཡོད་སྟབས་ཞི་བདེའི་གཟེངས་རྟགས་དེ་འབུལ་བཞེས་མཛད་ཡོད་སྐོར་གསུངས་སོང་།
རྒྱ་གར་རྒྱལ་ཡོངས་འཇིགས་སྐུལ་རིང་ལུགས་འགོག་རྒོལ་ཚོགས་པའི་ཚོགས་གཙོ་སྐུ་ཞབས་སིན་བྷེ་ཏཱ་(Maninderjeet Singh Bitta) ལགས་ཀྱིས། སྐུ་ཞབས་ནཱ་རཱ་སིམ་རའོ་ལགས་ཀྱིས་རྒྱ་གར་རྒྱལ་ཁབ་ཀྱི་ཞི་བདེ་བརྟན་ལྷིང་དང་དཔལ་འབྱོར་ཐད་ཞབས་འདེགས་རླབས་ཆེན་བསྒྲུབས་ཡོད་པར་བརྟེན། འདི་ལོའི་ཕྱི་ཟླ་ ༣ པའི་ནང་ཁོང་ལ་རྒྱ་གར་གྱི་ཆེས་མཐོའི་སྤྱི་དམངས་གཟེངས་རྟགས་ (Bharat Ratna) འབུལ་བཞེས་མཛད་ཡོད་པ་དང་། གཟེངས་རྟགས་དེ་ཉིད་༸གོང་ས་མཆོག་གི་བྱིན་རླབས་ལ་བརྟེན་ནས་ཐོབ་ཡོད་པས། ཐེངས་འདིར་མགོན་པོ་༸གང་ཉིད་མཆོག་ལ་བཀའ་དྲིན་རྗེས་དྲན་མཚོན་ཆེད་དུ་ཞི་བདེའི་གཟེངས་རྟགས་དེ་འབུལ་ལམ་ཞུས་ཡོད་སྐོར་བརྗོད་སོང་བ་དང་། དེ་བཞིན། དགེ་རྩ་ཚོགས་པའི་ཚོགས་མི་ (Bala Latha) ལགས་ཀྱིས་སྐུ་ཞབས་ནཱ་རཱ་སིམ་རའོ་ལགས་ནི་ཞི་བདེ་ལ་དགའ་མོས་ཆེན་པོ་གནང་མཁན་གྱི་གང་ཟག་ཅིག་ཡིན་སྟབས། ཁོང་དང་༧གོང་ས་རྒྱལ་བ་རིན་པོ་ཆེ་མཆོག་རྣམ་གཉིས་ཀྱི་བར་རྒྱལ་སྤྱིའི་ཞི་བདེའི་གནད་དོན་སྣ་ཚོགས་ཐོག་དམ་ཟབ་ཀྱི་འབྲེལ་བ་ཡོད་པ་དང་། ༸གོང་ས་མཆོག་ནི་རྒྱལ་སྤྱིའི་ཁྲོད་ཞི་བདེའི་ཕོ་ཉ་ཞིག་ལ་ངོས་འཛིན་གནང་གི་ཡོད་པ་ཙམ་མ་ཟད། སྲིད་བློན་དམ་པ་དེ་ཉིད་ཀྱིས་ཀྱང་༸གོང་ས་མཆོག་ལ་དད་གུས་དང་དགའ་མོས་ཆེན་པོ་གནང་གི་ཡོད་པར་བརྟེན། ད་རེས་ཞི་བདེའི་གཟེངས་རྟགས་འབུལ་བཞེས་མཛད་ཡོད་སྐོར་བརྗོད་སོང་།
ཐེངས་འདིར་༧གོང་ས་མཆོག་ལ་ཞི་བདེའི་གཟེངས་རྟགས་འབུལ་ལམ་ཆེད། རྒྱ་གར་གྱི་སྲིད་བློན་ཟུར་པ་དང་ཆེས་མཐོའི་སྤྱི་དམངས་གཟེངས་རྟགས་ (Bharat Ratna) བཞེས་མྱོང་མཁན་ནཱ་རཱ་སིམ་རའོ་དམ་པ་དེ་ཉིད་ཀྱི་བུའི་བུ་ (N V Kashyap) ལགས་དང་། རྒྱ་གར་རྒྱལ་ཡོངས་འཇིགས་སྐུལ་རིང་ལུགས་འགོག་རྒོལ་ཚོགས་པའི་ཚོགས་གཙོ་སྐུ་ཞབས་ (Maninderjeet Singh Bitta) ལགས། དེ་བཞིན་དགེ་རྩ་ཚོགས་པའི་འགན་འཛིན་ལྷན་ཚོགས་ཀྱི་མི་སྣ་ཁག་ཅིག་བཅས་ཕེབས་འདུག
གསར་འགོད་པ། སྐལ་བཟང་སྦྱིན་པ།
