ལྡི་ལིར་རྒྱ་ནག་གཞུང་ཚབ་པ་གསར་པ་བསྐོ་གཞག་བྱས་འདུག 

རྒྱ་དཀར་ནག་བར་རྩོད་རྙོག་མང་པོ་བྱུང་སྟེ་འདས་པའི་ཟླ་གྲངས་ ༡༨ ཙམ་འགོར་རྗེས་གཞི་ནས་རྒྱ་ནག་གཞུང་གིས་ཞུ་ཧྥེ་ཧོང་ཟེར་བ་ཞིག་རྒྱ་གར་རྒྱལ་ས་ལྡི་ལིའི་རྒྱ་ནག་གཞུང་ཚབ་པར་བསྐོ་གཞག་བྱས་འདུག

རྒྱ་གར་གྱི་རྒྱལ་ས་ལྡི་ལིར་ཡོད་པའི་རྒྱ་ནག་གཞུང་ཚབ་པ་བསྐོ་བཞག་མ་བྱས་པར་ལོ་གཅིག་དང་ཕྱེད་ཀ་ལྷག་ཕྱིན་ཡོད་པ་དང་། དེ་རིང་ཕྱི་ཚེས་ ༩ ཉིན་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཨབ་གྷན་སོགས་སུ་གཞུང་ཚབ་བྱེད་མྱོང་བའི་ཞུ་ཧྥེ་ཧོང་(Xu Feihong) ཟེར་བའི་རྒྱ་མི་ཞིག་བསྐོ་གཞག་བྱས་ཡོད་འདུག རྒྱ་གར་གྱི་འོས་བསྡུ་ཆེན་མོ་འགྲོ་བཞིན་པའི་སྐབས་དང་ཁེལ་ཡོད་སྟབས། ཆབ་སྲིད་པ་མང་པོ་ཞིག་གིས་རྒྱ་ནག་གཞུང་གིས་རྒྱ་དཀར་ནག་གི་འབྲེལ་ལམ་ཡར་རྒྱས་གཏོང་བར་དམིགས་ཡོད་སྐོར་བརྗོད་ཀྱི་འདུག

དེ་རིང་རྒྱ་གར་དུས་བབ་གསར་ཁང་གིས་རྒྱ་ནག་བློན་ཆེན་ལས་ཁུངས་ཀྱིས་རྒྱ་གར་གྱི་པི་ཌི་ཨ་ཡེ་(PTI) གསར་ཁང་ལ་དེ་སྔོན་ཨབ་གྷ་ནི་སི་ཐན་(Afghanistan)དང་རོ་མན་ནི་ཡ་ (Romania )གཉིས་སུ་རྒྱ་ནག་གི་གཞུང་ཚབ་པ་བྱེད་མྱོང་མཁན་ཞུ་ཧྥེ་ཧོང་ཟེར་བའི་རྒྱ་མི་དེ་རྒྱ་གར་གྱི་རྒྱལ་ས་ལྡི་ལིའི་རྒྱ་ནག་གཞུང་ཚབ་པར་བསྐོ་གཞག་བྱས་ཡོད་སྐོར་བརྗོད་འདུག་ཀྱང་། ད་ལྟའི་ཆར་གཞུང་ཚབ་ཁང་གི་དྲ་ལམ་སོགས་ན་དེ་འབྲེལ་གནས་ཚུལ་གང་ཡང་མི་འདུག་པས་ལས་མགོ་ག་དུས་འཛུགས་ཀྱི་ཡོད་མེད་སོགས་གསལ་ཁ་མི་འདུག

ད་ལྟ་རང་ལོ་ ༦༠ ཡིན་པའི་ཞུ་ཧྥེ་ཧོང་གིས་ཕྱི་ལོ་ ༡༩༨༧ ནས་ ༡༩༩༡ བར་མི་ལོ་ལྔ་རིང་རྒྱ་ནག་ཕྱི་སྲིད་བློན་ཆེན་ལས་ཁུངས་སུ་ལས་ཀ་བྱས་ཡོད་པ་མ་ཟད། སྔ་གཞུག་ཏུ་ཧྥིན་ལེན་ཌི་དང་། ལྷོ་ཀོ་རི་ཡ། ནེའུ་ཛི་ལེན་ཌི། དབྱིན་ཡུལ་སོགས་ཀྱི་རྒྱ་ནག་གི་གཞུང་ཚབ་ཁང་དུ་ལས་ཀ་བྱས་ཡོད་འདུག ཕྱི་ལོ་ ༢༠༡༡ ལོར་ཨབ་གྷ་ནི་སི་ཐན་དང་། ཕྱི་ལོ་ ༢༠༡༥ ལོར་རི་མི་ནི་ཡ་རྒྱལ་ཁབ་ནང་རྒྱ་ནག་གཞུང་ཚབ་པ་བྱས་ཡོད་འདུག

ཕྱི་ལོ་ ༢༠༢༢ ལོའི་ཟླ་ ༡༠ ནང་རྒྱ་གར་དུ་གནས་སྡོད་རྒྱ་ནག་གཞུང་ཚབ་པ་སན་(Sun Weidong) ཟེར་བ་དེ་རྒྱ་ནག་ཕྱི་སྲིད་ལས་ཁུངས་ཀྱི་བློན་ཆེན་གཞོན་པར་བསྐོ་གཞག་བྱས་རྗེས་ཁོའི་ཚབ་གསར་པ་བསྐོ་བཞག་བྱས་མེད་པ་རེད། འདས་པའི་ལོ་ཤས་རིང་རྒྱ་དཀར་ནག་གིས་མཐའ་མཚམས་ས་ཐིག(LAC) ཁུལ་གྱི་བོད་ཧིན་མཐའ་མཚམས་སོགས་སུ་རྒྱ་དཀར་ནག་གི་དམག་མི་གདོང་ཐུག་ལན་མང་དང་། ལྷག་པར་དུ་ཕྱི་ལོ་ ༢༠༢༠ ལོར་གྷུ་ཝན་ལུང་གཞོངས་སུ་དྲག་པོའི་གདོང་ཐུག་བྱུང་མཚམས། ཕྱོགས་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཡོད། དེ་བཞིན་རྒྱ་གར་གཞུང་གིས་གོ་སྒྲིག་གནང་བའི་འཛམ་གླིང་སྟོབས་ཆེན་རྒྱལ་ཁབ་ཉི་ཤུ་ཡི་ཚོགས་ཆེན་སོགས་ལ་རྒྱ་ནག་གི་འཐུས་ཚབ་མཉམ་ཞུགས་བྱས་མེད་ལ། ད་བར་རྒྱ་དཀར་ནག་གཉིས་ཀྱི་དམག་དོན་གྱི་གྲོས་མོལ་མང་དག་ཅིག་བྱས་ཡོད་ཀྱང་ཕྱོགས་གཉིས་ལ་ཕན་འབྲས་གང་ཡང་བྱུང་མེད་སྟབས། རྒྱ་ནག་གིས་གཞུང་ཚབ་པ་གསར་པ་བསྐོས་པ་དེས་ཡུལ་གཉིས་ཀྱི་འབྲེལ་ལམ་ཡར་སྐྱེད་གཏོང་བར་ཤུགས་སྣོན་བརྒྱག་རྒྱུ་ཡིན་པར་ངོས་འཛིན་བྱེད་ཀྱི་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།