ཡུ་རོབ་རྒྱལ་ཁབ་སུད་སིའི་གྲོང་ཁྱེར་ཛུ་རིག་ཏུ་བོད་མིའི་སྒྲིག་འཛུགས་ཀྱི་གཏན་འཇགས་ཐབས་ཇུས་ཚོགས་ཆུང་གི་ཚོགས་འདུ་ཐེངས་དྲུག་པ་ཉིན་གྲངས་གསུམ་རིང་འཚོག་གིན་འདུག
ཟླ་འདིའི་ཕྱི་ཚེས་ ༡༣ ནས་ཉིན་གྲངས་གསུམ་རིང་ཡུ་རོབ་རྒྱལ་ཁབ་སུད་སིའི་གྲོང་ཁྱེར་ཛུ་རིག་ཏུ་སྲིད་སྐྱོང་སྤེན་པ་ཚེ་རིང་མཆོག་གིས་སྣེ་འཁྲིད་པའི་བོད་མིའི་སྒྲིག་འཛུགས་ཀྱི་གཏན་འཇགས་ཐབས་བྱུས་ཚོགས་ཆུང་གི་ཚོགས་འདུ་ཐེངས་ ༦ པ་འཚོག་གིན་འདུག་ཅིང་། ཚོགས་འདུའི་ཐོག་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་སློབ་སྟོན་པ་བཀའ་ཟུར་འབྲོང་ཆུང་དངོས་གྲུབ་མཆོག་ཕུད་པའི་སློབ་སྟོན་པ་གཞན་རྣམས་དང་ཚོགས་ཆུང་གི་ཚོགས་མི་རྣམ་པ་བཅས་འཛོམས་ཡོད་པ་མ་ཟད། ད་རེས་ཀྱི་ཚོགས་འདུ་ཐེངས་དྲུག་པའི་སྟེང་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་ཕྱི་དྲིལ་བཀའ་བློན་ནོར་སྒྲོལ་མ་མཆོག་རྣམ་གཉིས་ཀྱང་མཉམ་ཞུགས་གནང་འདུག
ཚོགས་ཆུང་གི་སློབ་སྟོན་པའི་ཁོངས་སུ་བཀའ་ཟུར་བསྟན་པ་ཚེ་རིང་མཆོག་དང་བཀའ་ཟུར་འབྲོང་ཆུང་དངོས་གྲུབ་མཆོག དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་མཆོག ༧གོང་ས་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་མཆོག་བཅས་དང་། ཚོགས་མིའི་ཁོངས་སུ་སྲིད་སྐྱོང་སྤེན་པ་ཚེ་རིང་མཆོག་དང་བདེ་སྲུང་དྲུང་ཆེ་ཀརྨ་རིན་ཆེན་མཆོག ཆབ་སྲིད་དྲུང་ཆེ་བཀྲ་ཤིས་རྒྱ་མཚོ་མཆོག ཕྱི་དྲིལ་དྲུང་ཆེ་ཀརྨ་ཆོས་དབྱིངས་མཆོག བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་མཆོག་བཅས་ཡོད་པ་རེད།
ཕྱི་ལོ་ ༢༠༢༡ ཟླ་ ༨ ཚེས་ ༡༣ ཉིན་བཀའ་ཤག་སྐབས་ ༡༦ པས་དེ་སྔ་ནས་ཡོད་པའི་བོད་རྒྱ་འབྲེལ་མོལ་ལས་དོན་ཚོགས་ཆུང་ཕྱིར་བསྡུ་དང་སྦྲགས་གཏན་འཇགས་ཐབས་བྱུས་འཆར་འགོད་ཚོགས་ཆུང་ཞིག་ཆེད་འཛུགས་གནང་སྟེ། བཀའ་ཤག་སྐབས་བཅུ་དྲུག་པའི་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་དང་པོ་དེ་ཕྱི་ལོ་ ༢༠༢༡ ཟླ་ ༡༡ ཚེས་ ༡༦ ནས་ ༡༨ བར་ཉིན་གྲངས་གསུམ་རིང་ ནོར་གླིང་ཉེ་འཁྲིས་རྒྱ་གར་གྱི་ (Imperial Heights) གསོལ་མགྲོན་ཁང་དུ་འཚོགས། ཐེངས་གཉིས་པ་དེ་ཕྱི་ལོ་ ༢༠༢༢ ཟླ་ ༧ ཚེས་ ༢༧ ནས་ ༢༩ བར་ཉིན་གསུམ་རིང་བཞུགས་སྒར་དྷ་སར་ཡོད་པའི་ཨེ་ཤ་ཡའི་གསོལ་མགྲོན་ཁང་ (Asia Health Resort)དུ་འཚོགས། ཚོགས་ཐེངས་གསུམ་པ་དེ་ ཕྱི་ལོ་ ༢༠༢༢ ཟླ་ ༡༡ ཚེས་ ༢༥ ནས་ ༢༧ བར་ཉིན་གྲངས་གསུམ་རིང་དང་ཚོགས་ཐེངས་བཞི་པ་ཕྱི་ལོ་ ༢༠༢༣ ཟླ་ ༤ ཚེས་ ༦ ནས་ ༨ བར་ཉིན་གསུམ་རིང་བཅས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཚོགས་ཁང་དུ་འཚོགས། ཚོགས་ཐེངས་ལྔ་བ་ཕྱི་ལོ་ ༢༠༢༣ ཟླ་ ༡༡ ཚེས་ ༨ ཉིན་ནས་ཉིན་གྲངས་གསུམ་རིང་སཱ་ར་མཐོ་སློབ་ཏུ་འཚོགས་ཡོད།
གསར་འགོད་པ། སྐལ་བཟང་སྦྱིན་པ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
ང་རང་གི་ཞུ་དོན་དེ་གཞུང་དམངས་གཉིས་ལ་གལ་ཆེར་རྩིས་ནས་ས་ཟླར་དམིགས་པའི་ཆོས་ཀྱི་བྱ་ལས་ཕར་བཞག་ནས་འདིར་ཕྲན་ཙམ་འབོད་བསྐུལ་ཞུ་འདོད་བྱུང་། ངའི་ཞུ་དོན་ནི་གནས་དོན་གང་ལ་གཟིགས་ནས་ད་ལན་གྱི་བོད་རྒྱ་འབྲེལ་མོལ་ལས་དོན་ཚོགས་ཆུང་ངམ་གཏན་འཇགས་ཐབས་བྱུས་འཆར་འགོད་ཚོགས་ཆུང་དེ་སུད་སིའི་གྲོང་ཁྱེར་ཛུ་རིག་ཏུ་འཚོགས་དགོས་བྱུང་ཡོད་དམ། རྩ་བའི་ས་གནས་གང་དུ་འདུ་འཛོམས་ཞུ་བར་ཁྱད་མེད་། ཁྱད་དེ་ལས་དོན་ཞུ་རྒྱུ་དེ་རེད་ལ་དེ་གནང་རེད། ཡིན་ཀྱང་དགོས་གནད་དེ་ཙམ་མེད་པའི་འགྲོ་གྲོན་ཆེ་བའི་ཁྱད་དེ་གནད་དོན་གཅིག་རེད། གནད་དོན་གལ་ཆེ་ཞིག་རེད། ཐུགས་བསམ་བཞེས་དགོས་གལ་ཞིག་རེད། ད་རེས་ཀྱི་ཚོགས་འདུ་འདིར་ཚོགས་མི་དགུ་བཅུ་ཤིག་རྒྱ་གར་ནས་ཕེབས་སྟབས་ལམ་གྲོན་དང་མགྲོན་ཁང་གནས་གླ་སོགས་ཆེན་པོ་ཡོང་རྒྱུ་གཏན་འཁེལ། འགྲོ་གྲོན་དེ་དག་གཞན་རྟེན་ལས་ཡིན་པའི་གཞན་རྒྱུར་ཕང་སེམས་དང་རང་རྒྱུ་ལྟར་བསྲིད་ཚགས་ཡང་དགོས་རྒྱུ་དགོངས་འཇགས་ཆེ་གནད་འདུག ད་རེས་ཙམ་མིན་པར་དེ་ནས་ལོ་བཅུ་ཕྲག་ཙམ་ནང་དགོས་གནད་ཆེར་མེད་པའམ་ཕན་ཁྱད་དེ་ཙམ་མེད་པའི་འགྲོ་གྲོན་ནམ་རྒྱས་སྤྲོད་ཀྱི་རྣམ་པའི་ལས་འཆར་འགའ་ཤས་བྱུང་སོང་།
གཞུང་འཛིན་པ་ཚོས་གནད་དོན་འདི་རིག་ལ་དགོངས་པ་ཆེ་བཞེས་གནང་གལ་འདུག སོ་སོའི་དངུལ་གཏོང་གི་ཡོད་ནའང་ཕན་ཁྱད་ཀྱི་ཚོང་མ་རྒྱག་རྩིས་རྒྱག་ཅེས་པའི་རྩིས་དེ་རྒྱག་གལ་མིན་འདུག་གམ། གཞན་རྟེན་གནད་ལ་དེ་བས་ཀྱང་དམ་དོན་གནང་མ་གནང་ན་ཉིན་གཅིག་སྐད་ཤོར་ཡོང་། རྒྱས་སྤྲོད་ཀྱི་དྲི་ངན་ལས་བྲལ། ཐབ་ཆུང་ཆུང་ནས་མེ་ཚ་བོ་དང་མཐོན་འཕེལ་འགྲོན་ཆུང་གནང་ཐབས་དེ་མ་བརྗེད་པ་གནང་རོགས་ཞུ།།