བོད་མིའི་མཉམ་འབྲེལ་བསྐྱར་ཞིབ་ཚོགས་ཆེན་ཐོག་སྦན་ད་ར་བོད་མིའི་མཉམ་འབྲེལ་གྱི་དོན་རྐྱེན་ལས་སློབ་གསོ་ལེན་པ་དང་མཉམ་འབྲེལ་དེ་སླར་གསོ་ཡོང་ཐབས་སུ་དོན་ཚན་དྲུག་ཐག་གཅོད་གནང་འདུག
ཟླ་འདིའི་ཕྱི་ཚེས་ ༢༢ ནས་ཉིན་གསུམ་རིང་དྷ་ས་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ལྟེ་གནས་ཁང་དུ། བོད་མིའི་སྒྲིག་འཛུགས་ནང་སྲིད་དབུས་ངལ་སེལ་ཚོགས་པའི་གོ་སྒྲིག་འོག བོད་མིའི་མཉམ་འབྲེལ་བསྐྱར་ཞིབ་ཚོགས་ཆེན་འཚོགས་ཡོད་ཅིང་། དེ་རིང་མཇུག་བསྡོམས་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། བོད་མིའི་སྤྱི་མཐུན་མཉམ་འབྲེལ་ཚོགས་གཙོ་པདྨ་བདེ་ལེགས་ལགས། དེ་བཞིན་ལྷོ་སྤྱི་དང་ལ་སྤྱི། ས་གནས་མགོ་འཛིན་རྣམ་པ། ས་གནས་ཁག་གི་མཉམ་འབྲེལ་བཅོ་ལྔའི་ཚོགས་གཙོ་དང་དྲུང་ཆེ། སྤྱི་མཐུན་མཉམ་འབྲེལ་གྱི་སྐུ་ཚབ་བཅས་ཁྱོན་ཚོགས་བཅར་བ་ ༤༥ ཙམ་མཉམ་ཞུགས་གནང་འདུག
མཇུག་བསྡོམས་ཐོག་སྲིད་སྐྱོོང་སྤེན་པ་ཚེ་རིང་མཆོག་གིས། ཐེངས་འདིར་མཉམ་འབྲེལ་གྱི་ཚོགས་འདུ་འཚོགས་པ་ང་ཚོའི་སྤྱི་ཚོགས་ཀྱི་འཚོ་བ་རོལ་སྟངས་ཐད་བསམ་བློའི་ཀུན་ནས་བླངས་ཏེ་ལས་ཀ་བྱེད་བཞིན་པ་རེད། ང་ཚོ་བཙན་བྱོལ་དུ་འབྱོར་བ་ནས་གཞིས་ཆགས་འཛུགས་སྐྲུན་བྱེད་པའང་༧གོང་ས་རྒྱལ་བ་རིན་པོ་ཆེ་མཆོག་གི་ཕུགས་རྒྱང་རིང་པོར་དགོངས་པ་བཞེས་ཏེ་བོད་དོན་འཐབ་རྩོད་རྒྱུན་རིང་གནས་ཆེད་དུ་བཙུགས་པ་ཞིག་རེད། གཞིས་ཆགས་བཙུགས་པའི་རྒྱུ་མཚན་ལ་བརྟེན་ནས་སློབ་གྲྭ་དང་། ཆོས་རིག རིག་གཞུང་གི་ལྟེ་གནས་ཁག་བཙུགས་ཐུབ་སྟེ་མི་རིགས་ཀྱི་ངོ་བོ་སྲུང་སྐྱོབ་བྱེད་ཐུབ་ཀྱི་ཡོད། མི་རབས་རྒན་པ་ཚོར་སློབ་སྦྱོང་ཡོད་མེད་གང་ཡིན་རུང་སེམས་ཤུགས་ལ་བརྟེན་ནས་ད་ལྟའི་བར་དུ་སྐུ་ལས་མང་པོ་བསྐྱོན་ཡོད། ད་ལྟ་མི་རབས་ཀྱང་བརྗེ་བོ་ཐེབས་བཞིན་ཡོད། བོད་མིའི་སྒྲིག་འཛུགས་ཀྱི་ལས་བྱེད་ཁོངས་སུ་ཕྱི་ལོ་ ༡༩༥༠ ནས་ ༡༩༦༠ ནང་བོད་ནས་འབྱོར་བའི་མི་མེད་པའི་གནས་སྟངས་ཤིག་ཆགས་ཡོད། རྒྱ་གར་ནང་མི་རབས་གཉིས་པས་འགན་འཁུར་བཞིན་ཡོད་ལ། མ་འོངས་པར་མི་རབས་གསར་པར་རྩིས་སྤྲོད་དགོས་པས་གྲ་སྒྲིག་བྱེད་དགོས། ང་ཚོར་གཞིས་ཆགས་ཡོད་པ་གཅིག་པུའི་ཕན་ཐོགས་ཀྱི་མེད། གཞིས་ཆགས་ནང་དུ་སྡོད་མཁན་གྱི་མི་དགོས་ཀྱི་ཡོད་པར་བརྟེན། ད་ལྟའི་ཆར་གཞིས་སྤོས་ལས་གཞི་འགྲོ་དང་འགྲོ་བཞིན་པ་རེད། ཅེས་གསུངས་སོང་།
ཡང་སྲིད་སྐྱོང་མཆོག་གིས། ང་ཚོའི་མཉམ་འབྲེལ་དང་། འགན་འཛིན་ལྷན་ཚོགས། མཉམ་འབྲེལ་དྲུང་ཆེ་རྣམས་ཀྱི་འཛིན་སྐྱོང་གི་འགན་འཁུར་སྟངས་ཐད་འབྲེལ་བ་བྱེད་ཡུལ་སྤྱི་མཐུན་མཉམ་འབྲེལ་དང་ནང་སྲིད་ལས་ཁུངས་གཉིས་ཀྱི་ཡིན་མིན་གསལ་བོ་བཟོས་ཚེ། ལས་དོན་བྱེད་ཕྱོགས་ཀྱི་སྒྲོམ་གཞི་ཡག་པོ་ཆགས་འགྲོ་ཡི་རེད། སྒྲོམ་གཞི་ཡག་པོ་མ་ཆགས་ཚེ་གཅིག་གིས་གཅིག་ལ་མགོར་གཡུག་སྟེ་བར་ནས་ལྷག་པའི་ཉེན་ཁ་ཡོད་པ་རེད། ཉེ་ཆར་གྱི་སྦན་ད་ར་གཞིས་ཆགས་ཀྱི་སྙན་ཐོའི་ནང་དུ་ཡོད་པའི་རིགས་མ་འོངས་པར་མི་ཡོང་བའི་ཆེད་དུ་ཡིན། མཉམ་འབྲེལ་དགོས་ཀྱི་ཡོད་མེད་ཐད་བགྲོ་གླེང་བྱེད་དགོས་པ་ལས་ཨུ་ཚུགས་རྒྱག་དགོས་པ་མ་རེད། ས་གནས་ཁག་ཏུ་སྤྱི་ཚོགས་ཡར་རྒྱས་ཕྱིན་ཏེ་མཉམ་འབྲེལ་དགོས་མཁོ་མེད་པ་ཡིན་ཚེ། དེའི་ཚབ་ཏུ་འཛུགས་སྐྲུན་བྱེད་པའི་ལས་གཞི་གང་དགོས་པ་ལའང་བསམ་བློ་གཏོང་དགོས་པ་རེད། དམིགས་ཡུལ་གཙོ་བོ་དེ་སོ་སོའི་གཞིས་ཆགས་ནང་དུ་མཉམ་འབྲེལ་གྱི་ངོས་ནས་མི་སླེབས་པར་ཅི་ཞིག་བྱེད་དགོས་པ་དང་། གཞོན་སྐྱེས་ཚོ་གཞིས་ཆགས་ནང་དུ་གནས་ཐུབ་པར་བསམ་བློ་གཏོང་དགོས། ཞེས་གསུངས་སོང་།
འདི་གའི་གསར་འགོད་པས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་སུ་ཚོགས་ཆེན་ག་འདྲ་བྱུང་སྐོར་དྲིས་པར་ཁོང་གིས། ཕྱི་ལོ་ ༢༠༢༢ ལོ་ནས་བཀའ་ཤག་སྐབས་བཅུ་དྲུག་པའི་སྲིད་སྐྱོང་མཆོག་གིས་ནང་སྲིད་ལས་ཁུངས་ལ་མཉམ་འབྲེལ་གྱི་གནས་སྟངས་ཞིབ་འཇུག་བྱེད་དགོས་པའི་བཀའ་གནང་བ་རེད། ཕྱི་ལོ་ ༢༠༢༣ ལོར་གསར་དུ་ཞིབ་འཇུག་བྱེད་པའི་ལས་གཞི་མགོ་བཙུགས་ཏེ་ཉེ་ཆར་ཚར་བ་རེད། ཉམས་ཞིབ་སྐབས་སུ་ཉམས་ཞིབ་གྲུབ་པ་དང་སྙན་ཐོ་སླེབས་དུས། མཉམ་འབྲེལ་ཡོངས་ཀྱི་ཚོགས་གཙོ་དང་དྲུང་ཆེ་རྣམས་མཉམ་དུ་འཛོམས་ཏེ་གྲོས་བསྡུར་བྱེད་དགོས་པ་དང་། ཐེངས་འདིའི་ཚོགས་ཆེན་ནང་གཞིས་ཆགས་སུ་ཡུལ་སྐོར་སྤྲོ་འཆམ་པའི་ལས་གཞི་བྱེད་ཕྱོགས། ནང་སྲིད་དང་མཉམ་འབྲེལ་མཉམ་རུབ་ཀྱི་ཐོག་དཔལ་འབྱོར་ཡར་རྒྱས་གཏོང་ཕྱོགས་ཐད་བགྲོ་གླེང་བྱས་ཡོད། ཅེས་འགྲེལ་བརྗོད་གནང་བྱུང་།
ཐེངས་འདིའི་ཚོགས་ཆེན་གྱི་གལ་གནད་སྐོར་ལ་ཁོང་གིས། བོད་མིའི་སྒྲིག་འཛུགས་དང་བོད་མིའི་མཉམ་འབྲེལ་གཉིས་ཁ་བྲལ་ནས་ལོ་བཅུ་དགུ་ཕྱིན་པ་རེད། ལོ་འདི་དག་ནང་དུ་སྤྱི་ཚོགས་ཀྱི་གནས་སྟངས་ལ་འགྱུར་བ་མང་པོ་ཕྱིན་ཡོད་པར་བརྟེན། མཉམ་འབྲེལ་ཁ་ཤས་གང་ལ་གང་འཚམ་ཡག་པོ་ཆགས་ཡོད་པ་དང་། ཁ་ཤས་རང་འཇགས་བསྡད་འདུག ཡང་ཁ་ཤས་དེ་ལས་སྐྱོ་བ་ཆགས་འདུག ཐོག་མར་བོད་མིའི་བཙན་བྱོལ་གཞིས་ཆགས་སུ་༧གོང་ས་རྒྱལ་བ་རིན་པོ་ཆེ་མཆོག་དང་། རྒྱ་གར་ནང་སྲིད་ལས་ཁུངས། ཕྱི་རྒྱལ་རོགས་ཚོགས་ཁག་གིས་རྒྱ་གར་མཉམ་འབྲེལ་གྱི་ལོ་རྒྱུས་ནང་སྒོ་ཕྱུགས་འཚོ་སྐྱོང་བྱེད་པར་ཡར་རྒྱས་བྱུང་ཡོད་པ་མིག་དཔེ་བལྟས་པ་ཞིག་ཡིན་པ་རེད། ནང་སྲིད་ལས་ཁུངས་ཀྱིས་ང་ཚོའི་དུས་སྐབས་སུ་མི་རབས་རྒན་པས་བཙུགས་པ་རྣམས་ཉམས་ཚེ་འགྲིག་གི་མེད་པའི་བསམ་བློ་འཁོར་བ་རེད། མཉམ་འབྲེལ་ཉམས་བཞིན་པ་བསྐྱར་དུ་མཉམ་རུབ་བྱས་ཏེ་ལངས་ཐབས་བྱ་དགོས་ལ། ལོ་གཉིས་རེའི་མཚམས་སུ་ཚོགས་ཆེན་རེ་འཚོག་པའི་འཆར་གཞི་ཡོད། ཅེས་འགྲེལ་བརྗོད་གནང་བྱུང་།
ཐེངས་འདིའི་བོད་མིའི་མཉམ་འབྲེལ་བསྐྱར་ཞིབ་ཚོགས་ཆེན་ཐོག སྦན་ད་ར་བོད་མིའི་མཉམ་འབྲེལ་གྱི་དོན་རྐྱེན་དེ་ཡིས་མ་འོངས་མཉམ་འབྲེལ་ཁག་གི་འཛིན་སྐྱོང་གནང་ཕྱོགས་ལ་སློབ་གསོ་དང་། མཉམ་འབྲེལ་གནས་སྟངས་ཞན་པ་རྣམས་སླར་གསོ་ཡོང་ཐབས་སུ་རྒྱ་གར་དབུས་ས་གཞུང་ནས་མཐུན་རྐྱེན་ཞུ་སྤྲོད་ཐོག་གོ་བསྡུར་གནང་རྒྱུ་ཡིན་པའི་གྲོས་ཆོད་ནང་། ༡། མཉམ་འབྲེལ་ཀྱི་དཔལ་འབྱོར་སྟངས་འཛིན་ཆ་ཚང་ཚོགས་གཙོ་དང་། དྲུང་ཆེ། དེ་བཞིན་རྩིས་པ་བཅས་ ཀྱི་ལག་ཏུ་ཡོད་པར་སོང་དེ་དག་གི་འགན་མི་གཅིག་གི་ནམ་ཡང་འཁུར་རྒྱུ་མེད་པར་བྱ་རྒྱུ། ༢།བོད་མི་ས་གནས་ཁག་ཏུ་དབུས་བོད་མི་སྒྲིག་འཛུགས་ཀྱི་མཛད་གཙོ་རྣམས་པ་ཕེབས་སྐབས་རྒྱ་གར་མངའ་གཞུང་གི་མཉམ་འབྲེལ་ལས་ཁུངས་དང་དཔོན་རིགས་ཁག་ཐུགས་འཕྲད་བྱས་ཚེ་མ་འོངས་མཉམ་འབྲེལ་གྱི་ལས་དོན་བྱེད་ཕྱོགས་ཐད་ཕན་ཐོགས་ཆེ་བར་མངོན། ༣།ས་གནས་མཉམ་དྲུང་ངམ་ལས་བྱེད་བསྐོ་བཞག་གནང་སྐབས་རྒྱབ་ལྗོངས་དང་ལོ་རྒྱུའི་གནས་སྟངས་ ངེས་པར་དུ་ཞིབ་འཇུགས་མཐིལ་ཕྱིན་གནང་དགོས་རྒྱུ། ༤།ས་གནས་མཉམ་འབྲེལ་ཁག་གི་ཟོག་བཤེར་ཁག་དུས་ཐོག་གནང་དགོས་པ་དེ་ཡང་རྩིས་ཁྲ་ལ་གཞི་བཅོལ་གྱིས་ཞིབ་འཇུག་ངེས་པར་དུ་བྱེད་དགོས་རྒྱུ། ༥། མཉམ་འབྲེལ་རྩིས་པ་ནས་ཟླ་རེར་ cash book རྩིས་མཇུག་ཟིན་མཚམས་དངུལ་ཁང་གི་གནས་སྟངས་ bank statement ངེས་པར་དུ་མཉམ་སྦྱར་དགོས་པ་མ་ཟད་འགན་ལྷན་ཚོགས་འདུའི་སྐབས་མིག་སྟོན་གནང་དགོས། ༦།བོད་མིའི་སྤྱི་མཐུན་མཉམ་འབྲེལ་གྱི་འགན་ལྷན་ནང་གྲོས་བསྡུར་བྱུང་བ་ལྟར་སྤྱི་མཐུན་མཉམ་འབྲེལ་ནས་སྦན་ད་ར་ས་གནས་མཉམ་འབྲེལ་སླར་གསོ་སླད་ལོ་གཉིས་རིང་མཉམ་དྲུང་གླ་ཕོགས་ཟླ་རེར་སྒོར་ཁྲི་གསུམ་དང་རྩིས་པའི་གླ་ཕོགས་ཁྲི་གཉིས་རེ་གནང་རྒྱུ་དང་། དེ་བཞིནྋགོང་ས་མཆོག་དང་ནང་སྲིད་ནས་གནང་བའི་འབྲས་འཐག་བཟོ་གྲྭ་གཏའ་འཇོག་བཞག་པ་ཚུར་ལེན་ཐབས་སུ་སྤྱི་མཐུན་མཉམ་འབྲེལ་ནས་སྒོར་འབུམ་ ༢༣ གནང་རྒྱུ་བཅས་བྱས་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
