དེ་རིང་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་རྩེད་འགྲན་གྱི་ཉིན་མཐའ་མར་དྷ་སའི་རྩེད་འགྲན་པ་གཅིག་ལ་བོད་མིའི་དཔྱ་ཁྲལ་ལག་དེབ་ཡོད་མེད་ཀྱི་རྩོད་གླེང་བྱུང་སྟེ་རྟིང་རྩོད་འགྲན་སྡུར་འཕར་འགྱངས་གནང་དགོས་བྱུང་སོང་།
ཧོན་སུར་གཞིས་ཆགས་སུ་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་ཐེངས་ ༢༩ པའི་ཉིན་མཐའ་མ། ༢༠༢༤།༠༥།༢༨ ཐད་གཏོང་གི་བརྙན་པར།
ཟླ་འདིའི་ཕྱི་ཚེས་ ༡༥ ནས་ ༢༨ བར་ཉིན་གྲངས་བཅུ་བཞི་རིང་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་རྩེད་འགྲན་དེ་རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་དུ་བསྡུས་ཡོད་པ་ལྟར། དེ་རིང་ཆུ་ཚོད་གསུམ་དང་ཕྱེད་ཀ་ཙམ་ལ་རྫོང་དཀར་ཆོས་ལྡན་གྱི་མཁན་རིན་པོ་ཆེ་དབུ་བཞུགས་ཐོག དྷ་ས་རུ་ཁག་དང་མོན་གྷོ་འདོད་གླིང་རུ་ཁག་གཉིས་བར་མཐའ་མའི་རྟིང་རྩོད་འགྲན་སྡུར་བྱེད་གྲབས་ཡོད་སྐབས། ཁ་སང་དྷ་ས་རུ་ཁག་ལས་འགྲན་ཕམ་བྱུང་བའི་གྷོ་ལ་ཐ་ལའི་རུ་ཁག་གི་རྒྱབ་སྐྱོར་བ་སོགས་ཀྱིས་དྷ་ས་རུ་ཁག་གི་སྟོད་གོས་ཨང་བདུན་པར་དཔྱ་ཁྲལ་ལག་དེབ་མེད་པ་དང་། དྷ་སའི་སྒོ་སྲུང་བས་དཔྱ་ཁྲལ་ལག་དེབ་རྫུན་མ་སྤྲད་ཡོད་པར་བརྗོད་ནས་ངོ་རྒོལ་བྱས་རྐྱེན་རྟིང་རྩོད་ཀྱི་འགྲན་བསྡུར་ཉིན་གཉིས་རིང་འཕར་འགྱང་བྱེད་དགོས་ཁེལ་ཡོད་སྟབས། ཕྱོགས་མཐའ་ཁག་ནས་ཡོང་བ་དང་དྲ་ལམ་གྱི་ལྟད་མོ་བ་མང་པོར་བློ་ཕམ་བྱུང་འདུག
འདི་གའི་གསར་པས་དེ་རིང་ཕྱི་ཟླ་ ༥ ཚེས་ ༢༨ ཉིན་བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་བྱང་ཆུབ་རྒྱལ་མཚན་ལགས་སུ་ཁ་པར་ཐེངས་གསུམ་བཏང་ཡང་མཐུད་ཐུབ་མ་སོང་། གང་ལྟར་རྒྱལ་ཡུམ་ཆེན་མོའི་རྩེད་འགྲན་ནང་ཞུགས་པར་བོད་མི་ཡིན་པའི་དཔང་རྟགས་སུ་དཔྱ་ཁྲལ་ལག་དེབ་ཡོད་དགོས་པ་རེད།
ཟླ་འདིའི་ཕྱི་ཚེས་ ༡༥ ནས་ ༢༨ བར་འདི་ལོའི་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་རྩེད་འགྲན་དེ་ཧོན་སུར་རབ་རྒྱས་གླིང་དུ་འཚོགས་ཡོད་ཅིང་། རྩེད་འགྲན་ནང་ཨོ་གླིང་དང་། བལ་ཡུལ། ལ་དྭགས་སོགས་ནས་རྩེད་འགྲན་རུ་ཁག་ ༡༦ གིས་མཉམ་ཞུགས་བྱས་ཏེ། ཉིན་གྲངས་བཅུ་བཞིའི་རིང་ཐོག་པའི་རྩེད་འགྲན་དང་། བརྒྱད་མཐའ་དང་བཞི་མཐའི་རྩེད་འགྲན་མང་དག་ཅིག་བྱས་ཡོད་འདུག
ཕྱི་ལོ་ ༢༠༢༢ ལོར་ཧི་མ་ཅལ་མངའ་སྡེའི་སྤོན་ཊ་ཆོལ་གསུམ་གཞིས་ཆགས་སུ་བསྡུས་པའི་རྒྱལ་ཡུམ་ཆེན་མོའི་རྩེད་འགྲན་སྐབས། སིམ་ལའི་རྩེད་འགྲན་པས་རྩེད་དཔང་གི་ཐག་གཅོད་ལ་མོས་མཐུན་མ་བྱས་པར་རྩེད་ཐང་གི་ཕྱི་ལ་ཐོན་པའི་གནས་ཚུལ་བྱུང་ཡོད་སྟབས། བོད་རྒྱལ་ཡོངས་རྩེད་རིགས་ཚོགས་ཆུང་གིས་སིམ་ལའི་རུ་ཁག་ལ་ལོ་ལྔའི་བཀག་སྡོམ་བྱས་ཡོད་ཀྱང་། རུ་ཁག་དེས་དགོངས་སེལ་ཞུས་པར་བརྟེན་འདས་ལོའི་ཕྱི་ཟླ་ ༡༠ ཚེས་ ༩ ཉིན་བོད་རྒྱལ་ཡོངས་རྩེད་རིགས་ཚོགས་པས་སིམ་ལའི་རུ་ཁག་དེ་ལོ་གཅིག་ཙམ་བཀག་སྡོམ་བྱས་མཐར། འདི་ལོ་ནས་སླར་ཡང་རྒྱལ་ཡུམ་ཆེན་མོའི་རྩེད་འགྲན་ནང་ཞུགས་ཆོག་པའི་བཀའ་ཁྲོལ་གནང་ཡོད་འདུག
ཧོན་སུར་གཞིས་ཆགས་སུ་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་ཐེངས་ ༢༩ པའི་ཉིན་མཐའ་མ། ༢༠༢༤།༠༥།༢༨ ཐད་གཏོང་གི་བརྙན་པར།
བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་གནང་བཞིན་པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་ནི། ཕྱི་ལོ་ ༡༩༨༡ ལོར་བོད་ཕྲུག་ཁྱིམ་སྡེའི་རྩིས་དཔོན་ཟུར་པ་ཇོ་བོ་ཚེ་རིང་ལགས་ཀྱིས་གསར་འཛུགས་གནང་ཡོད་པ་དང་། རྩེད་འགྲན་འདི་ལོ་ལྟར་ཚོགས་ཀྱི་ཡོད་པ་རེད། འོན་ཀྱང་། ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་ཀྱི་རྐྱེན་གྱིས་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་འཚོགས་ཐུབ་མི་འདུག
རྒྱལ་ཡུམ་ཆེན་མོའི་རྩེད་འགྲན་དེ་ཕྱི་ལོ་ ༢༠༡༢ ལོར་དྷ་རམ་ས་ལ་དང་ ༢༠༡༣ ལོར་ཧོན་སུར་རབ་རྒྱས་གླིང་། ༢༠༡༤ ལོར་དོན་གྲུབ་གླིང་(Clementown)། ༢༠༡༥ ལོར་དྷ་རམ་ས་ལ། ༢༠༡༦ ལོར་མོན་གྷོ། ༢༠༡༧ ལོར་ཀོ་ལི་གྷལ་དོན་ལྡན་གླིང་། ༢༠༡༨ ལོར་སྦེལ་ཀོབ་བདེ་སླར་གཞིས་ཆགས། ༢༠༡༩ ལོར་དྷ་རམ་ས་ལ། ༢༠༢༡ ལོར་དོན་གྲུབ་གླིང་དང་། ཕྱི་ལོ་ ༢༠༢༢ ལོར་སྤོན་ཊ་ཆོལ་གསུམ་གཞིས་ཆགས་སུ་འཚོགས་ཡོད་ཅིང་། འདས་ལོའི་རྒྱལ་ཡུམ་ཆེན་མོའི་རྗེས་དྲན་གསེར་གྱི་རྟགས་མའི་རྩེད་འགྲན་དེ་དྷ་སར་འཚོགས་ཡོད་པ་རེད།
བོད་རྒྱལ་ཡོངས་རྩེད་རིགས་ཚོགས་པའི་དྲ་རྒྱར་གཞིགས་ན། ད་བར་རྒྱལ་ཡུམ་ཆེན་མོའི་རྩེད་འགྲན་ཐེངས ༢༩ ལ་རྩེད་འགྲན་བྱས་པའི་ཁྲོད། ཕྱི་ལོ་ ༢༠༡༥ ལོར་མོན་གྷོ་འདོད་རྒུ་གླིང་རུ་ཁག་དང་། ༢༠༢༦ ལོར་ཊི་ཌི་ཨེལ་བྷེལ་ཀོབ་རུ་ཁག ༢༠༡༧ བཀྲིས་གླིང་ཧི་མ་ལ་ཡ་རུ་ཁག ༢༠༡༨ དང་ ༢༠༡༩ ལོར་མོན་གྷོ་འདོད་རྒུ་གླིང་རུ་ཁག ༢༠༢༡ ལོར་སིམ་ལ་རུ་ཁག ༢༠༢༢ ལོར་དོན་གྲུབ་གླིང་རུ་ཁག ༢༠༢༣ ལོར་དྷ་ས་གཅིག་སྒྲིལ་རུ་ཁག་བཅས་ལ་རྒྱལ་ཁ་ཐོབ་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
