རྒྱ་ནག་གིས་བོད་གོར་དམག་དཔུང་བེད་སྤྱད་ནས་རྒྱ་གར་ལ་ཁ་གཏད་གཅོག་རྩིས་བྱེད་ཀྱི་ཡོད་འདུག

རྒྱ་ནག་གཞུང་གིས་ས་མཐོར་གོམས་འདྲིས་ཆེ་ཞིང་གྲང་ངར་བཟོད་ཆེ་བ་སོགས་ཀྱི་ཐུན་མོང་མ་ཡིན་པའི་ཁྱད་ཆོས་ལྡན་པའི་བོད་དམག་དང་བལ་ཡུལ་གྱི་གོར་དམག་བེད་སྤྱད་ནས་རྒྱ་གར་ལ་ཁ་གཏད་གཅོག་རྩིས་བྱེད་ཀྱི་ཡོད་འདུག

རྒྱ་གར་གྱི་དམག་དཔུང་ནང་བལ་ཡུལ་གོར་ཁའི་དམག་མི་འབོར་ཆེན་ཡོད་ཀྱང་ཕྱི་ལོ་ ༢༠༢༢ ཟླ་ ༨ པའི་ཚེས་  ༢༦ ཉིན་བལ་ཡུལ་གཞུང་གིས་བལ་ཡུལ་གྱི་མི་སེར་དང་དམིགས་བསལ་གོར་དམག་རྣམས་རྒྱ་གར་གྱི་བདེ་སྲུང་དང་འབྲེལ་བའི་ནང་མཉམ་ཞུགས་བྱེད་ཆོག་གི་མེད་པའི་གསལ་བསྒྲགས་ཤིག་བྱས་རྗེས།  རྒྱ་ནག་གཞུང་གིས་གོ་སྐབས་བཟུང་སྟེ་གོར་དམག་ལ་གོ་མཚོན་སོགས་ཀྱི་ཐོག་ནས་མཐུན་འགྱུར་བསྐྲུན་ཐབས་བྱེད་ཀྱི་ཡོད་པ་མ་ཟད། གོར་དམག་བསྡུ་ལེན་གྱི་ཆིངས་ཡིག་འཇོག་འདོད་བྱེད་ཀྱི་ཡོད་ཀྱང་བལ་གཞུང་གིས་རྒྱ་ནག་ཚུད་པའི་རྒྱལ་ཁབ་སུ་ལའང་ཆིངས་ཡིག་དེ་འཇོག་རྒྱུ་མིན་སྐོར་བརྗོད་ཡོད་འདུག

བརྒྱུད་ལམ་གྱི་གནས་ཚུལ་ལྟར་ན། ད་ལྟའི་ཆར་རྒྱ་གར་དང་ཨ་རི། དབྱིན་ཡུལ སོགས་འཛམ་གླིང་རྒྱལ་ཁབ་ཉུང་མཐར་ ༩ ལྷག་གིས་བལ་ཡུལ་གྱི་གོར་དམག་བསྡུ་ལེན་བྱས་ཏེ་དམག་ཞབས་ཕྱི་ཡི་ཡོད་འདུག་ལ། རྒྱ་ནག་གཞུང་གིས་ཀྱང་གོར་དམག་བསྡུ་ལེན་བྱེད་འདོད་ཡོད་སྐོར་བརྗོད་ཡོད་པ་མ་ཟད། ཉེ་ལམ་རྒྱ་གར་གྱི་བརྒྱུད་ལམ་ཁག་ཏུ་རྒྱ་ནག་བཅིངས་གྲོལ་དམག་ཟེར་བའི་ནང་དུ་གོར་དམག་ཡོད་སྐོར་གྱི་གནས་ཚུལ་ཡང་ཐོན་ཡོད་པ་རེད། འདས་ལོར་བལ་ཡུལ་གྱི་(Financial Express)གིས་གནས་ཚུལ་སྤེལ་བ་ལྟར་ན། བལ་ཡུལ་གྱི་སྤྱི་ཚོགས་གསར་སྤེལ་དང་ཕྱི་འབྲེལ་སྲིད་ཇུས་ལྟེ་གནས་ཁང་(The Executive Chairperson of the Center for Social Innovation and Foreign Policy)གི་གཙོ་གཉེར་བ་སྐུ་ཞབས་ཝི་ཇེ་ཁན་ཁར་ནཱ་(Vijay Kant Karna)ཞེས་པ་ཞིག་གིས་བལ་གཞུང་གིས་རྒྱལ་ཁབ་གཞན་ལ་གོར་ཁའི་དམག་མི་བསྡུ་ལེན་གྱི་ཆིངས་ཡིག་གསར་པ་འཇོག་རྒྱུ་མིན་སྐོར་བརྗོད་ཡོད་པ་རེད།

གོར་དམག་དང་བོད་དམག་རྣམས་ནི་ས་མཐོར་གོམས་འདྲིས་ཆེ་ཞིང་གྲང་ངར་བཟོད་ཆེ་བ་སོགས་ཀྱི་ཐུན་མོང་མ་ཡིན་པའི་ཁྱད་ཆོས་ཡོད་པར་བརྟེན། རྒྱ་ནག་དང་རྒྱ་གར་གཉིས་ཀྱིས་བོད་གོར་གྱི་དམག་མི་རྣམས་མཐའ་མཚམས་དམག་ཁུངས་སུ་གཏོང་གི་ཡོད་པ་རེད། དཔེར་ན། ཕྱི་ལོ་ ༢༠༢༡ ལོར་རྒྱ་ནག་གཞུང་གིས་བོད་ཁུལ་གྱི་རང་ལོ་ ༡༨ ནས་ ༢༢ བར་གྱི་མཐོ་རིམ་སློབ་མ་གཙོ་བོར་གྱུར་བའི་གཞོན་སྐྱེས་རྣམས་དམག་ཁོངས་སུ་ཞུགས་དགོས་པའི་བརྡ་ཁྱབ་སྤེལ་ཏེ་སྐུལ་མ་ནན་པོ་བཏང་ཡོད་པ་མ་ཟད། གྷལ་ཝན་ལུང་གཞུང་གི་རྒྱ་དཀར་ནག་བར་གྱི་དོན་རྐྱེན་བྱུང་རྗེས། རྒྱ་ནག་གཞུང་གིས་ཐ་ན་རྒྱ་ནག་ཁྲིན་ཏུའུ་གྲོང་ཁྱེར་དུ་ཡོད་པའི་མགོན་པོ་དྲག་རྩལ་ཁང་སོགས་ཀྱི་གཞོན་ནུ་དྲག་རྩལ་བ་རྣམས་ཀྱང་དམངས་དམག་ཅེས་པའི་མིང་ཐོག་ནས་ཆེད་དུ་མཐའ་མཚམས་ཁུལ་དུ་བཏང་བའི་གནས་ཚུལ་བྱུང་ཡོད་པ་རེད།

ཕྱི་ལོ་༡༨༡༤ ཙམ་ལ་བལ་པོའི་གོར་དམག་དང་རྒྱ་གར་དབྱིན་གཞུང་གི་ཤར་ཕྱོགས་དམག་དཔུང་བར་གྱི་དམག་འཁྲུག(Anglo Nepalese War ) ཞེས་པ་དེ་བྱུང་རྗེས། རྒྱ་གར་དབྱིན་གཞུང་གིས་གོར་དམག་ལ་དཔའ་ངར་ལྡན་པའི་ཆེ་མཐོང་ཐོབ་ཡོད་པ་མ་ཟད། ཕྱི་ལོ་ ༡༨༡༦ ཙམ་ལ་དབྱིན་གཞུང་གིས་བལ་གཞུང་དང་ཆིངས་ཡིག་བཞག་སྟེ་གོར་དམག་བསྡུ་སྒྲིག་གི་ཆིངས་ཡིག་བཞག་སྟེ་ད་ལྟའི་ཆར་ཉུང་མཐར་གོར་དམག་ ༤༠༠༠ ཙམ་གྱིས་དམག་ཞབས་ཕྱི་ཡི་ཡོད་འདུག་ལ། དབྱིན་ཡུལ་ནི་ཆིངས་ཡིག་དེ་འཇོག་མཁན་གྱི་རྒྱལ་ཁབ་ཐོག་མ་དེ་ཡིན་འདུག

ཚེ་རིང་རྣམ་རྒྱལ་གྱིས་གནས་ཚུལ་བསྡུ་སྒྲིག་བྱས།

པདྨ་མཚོས་རྩོམ་སྒྲིག་བྱས།