ཕྱི་ལོ་ ༢༠༢༤ ལོའི་རྒྱ་ནག་གློག་བརྙན་འཁྲབ་ཁྲིད་པའི་མཐུན་ཚོགས་ཀྱི་དུས་སྟོན་ཐོག་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་དམ་པར་འཁྲབ་ཁྲིད་པ་ཡག་ཤོས་དང་སྦྱིན་པ་ལགས་ལ་འཁྲབ་སྟོན་པ་ཡག་ཤོས་ཀྱི་བྱ་དགའ་ཐོབ་འདུག
ཟླ་འདིའི་ཕྱི་ཚེས་ ༡ ཉིན་རྒྱ་ནག་ཧྲན་ཏུང་ཡན་ཧྲི་གྲོང་ཁྱེར་ཧོང་ཡིས་ཧེ་ཟེར་བའི་ཟུར་བརྒྱད་མཚོ་ཁུག་འགྲེམས་སྟོན་ལྟེ་གནས་སུ། རྒྱ་ནག་གི་གློག་བརྙན་འཁྲབ་ཁྲིད་པའི་མཐུན་ཚོགས་ཀྱི་གོ་སྒྲིག་འོག ཕྱི་ལོ་ ༢༠༢༤ ལོའི་རྒྱ་ནག་གློག་བརྙན་འཁྲབ་ཁྲིད་པའི་གཟེངས་རྟགས་སྤྲོད་པའི་མཛད་སྒོ་འཚོགས་ཡོད་ཅིང་། ཚོགས་ཐོག་ཏུ་གློག་བརྙན་འཁྲབ་ཁྲིད་པ་དང་འཁྲབ་སྟོན་པ་ ༤༠༠ ལྷག་ལྷན་འཛོམས་བྱུང་ཡོད་འདུག སྐབས་དེར་ཕྱི་ལོ་ ༢༠༢༠ ནས་ ༢༠༢༣ བར་གྱི་གློག་བརྙན་འཁྲབ་ཁྲིད་པ་དང་། འཁྲབ་སྟོན་པ། གློག་བརྙན་བརྩམས་ཆོས་ ༣༢ ལ་བྱ་དགའ་སྤྲད་ཡོད་པའི་ཁྲོད། བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་དམ་པ་ཁོང་གི་གློག་བརྙན་དབུགས་ལྒང་ལ་ཕྱི་ལོ་ ༢༠༢༠ ལོའི་གློག་བརྙན་འཁྲབ་ཁྲིད་པ་ཡག་ཤོས་ཀྱི་བྱ་དགའ་དང་། འཁྲབ་སྟོན་པ་སྦྱིན་པ་ལགས་ལ་ཕྱི་ལོ་ ༢༠༢༠ ལོའི་སྐྱེས་པའི་གློག་བརྙན་འཁྲབ་སྟོན་པ་ཡག་ཤོས་ཀྱི་བྱ་དགའ། དེ་བཞིན་འཇིགས་མེད་འཕྲིན་ལས་ལགས་ཀྱི་གློག་བརྙན་གཅིག་དང་བཞི་ལ་ཕྱི་ལོ་ ༢༠༢༣ ལོའི་དམིགས་བསལ་གཟི་བརྗིད་ཅན་གྱི་གློག་བརྙན་བརྩམས་ཆོས་ཀྱི་བྱ་དགའ་བཅས་ཐོབ་ཡོད་འདུག
གློག་བརྙན་དབུགས་ལྒང་ནི་ཕྱི་ལོ་ ༢༠༡༩ ལོར་བོད་ཀྱི་འཁྲབ་ཁྲིད་པ་འདས་པོ་པད་མ་ཚེ་བརྟན་ལགས་ཀྱིས་བཟོས་པའི་གློག་བརྙན་བརྩམས་ཆོས་ཤིག་ཡིན་ཞིང་། གློག་བརྙན་དེའི་ནང་བོད་ཀྱི་གློག་བརྙན་འཁྲབ་སྟོན་པ་སྦྱིན་པ་དང་། བསོད་ནམས་དབང་མོ། གཡང་ཕྱུག་འཚོ་བཅས་ཀྱི་གཙོ་འཁྲབ་བྱས་ཡོད་ཅིང་། དུས་ཡུན་སྐར་མ་ ༡༠༢ ཅན་གྱི་གློག་བརྙན་དེའི་བརྗོད་བྱ་ནི། མི་སྣ་གཙོ་བོ་དར་རྒྱས་ཀྱི་ཁྱིམ་མི་ཚང་མར་སྤྱིར་བཏང་གི་སྦྲུམ་འགོག་ཤུབས་ཤིག་གིས་ཅི་བྱ་གཏོལ་མེད་ངང་གདམ་ག་བྱེད་དཀའ་བའི་དོན་དག་རབ་དང་རིམ་པ་འཕྲད་དུ་བཅུག་ཅིང་། ལྷིང་འཇགས་སུ་གནས་པའི་ཁོ་ཚོའི་འཚོ་བ་རྦད་དེ་འཁྲུག་ཏུ་བཅུག་པ་དང་། སྐྱེ་རྒ་ན་འཆི་ཉི་ཟླ་རེས་མོས་སུ་འཁོར་བ་དང་འདྲ་བས། མི་རྣམས་ཀྱིས་གདམ་ག་ཇི་ལྟར་བྱེད་པའམ། མང་ཚོགས་ཀྱི་གནས་སྟངས་དང་དཀའ་ངལ་འཚོལ་ཞིབ་བྱས་ཡོད་འདུག དེ་བཞིན་ཧའེ་ནན་གླིང་ཕྲན་རྒྱལ་སྤྱིའི་གློག་བརྙན་དུས་ཆེན་སྐབས་གཉིས་པ་དང་། གསེར་གྱི་བེ་ཏའི་བྱ་དགའ་ཡི་གློག་བརྙན་ཡག་ཤོས་ཀྱི་བྱ་དགའ་ཐོབ་ཡོད་པ་དང་། གཙོ་འཁྲབ་པ་བསོད་ནམས་དབང་མོར་བུད་མེད་འཁྲབ་སྟོན་པ་ཡག་ཤོས་ཀྱི་བྱ་དགའ་ཐོབ་འདུག རྒྱ་གར་གྱི་གྷོ་ཝ་མངའ་སྡེའི་ནང་བསྡུས་པའི་རྒྱལ་སྤྱིའི་རྒྱ་གར་གྱི་གློག་བརྙན་དུས་སྟོན་སྐབས་ ༥༠ པའི་ཐོག་དཔྱད་འདེམས་པའི་གཟེངས་རྟགས་ཐོབ་ཡོད་འདུག
གློག་བརྙན་གཅིག་དང་བཞི་ནི་རྩོམ་པ་པོ་འཇམ་དབྱངས་ཚེ་རིང་ལགས་ཀྱིས་བརྩམས་པའི་གཅིག་དང་བཞི་ཞེས་པའི་བརྩམས་སྒྲུང་དེར་གཞི་བཅོལ་ནས་ཕབ་སྐྲུན་བྱས་པ་ཞིག་ཡིན་ཞིང་། ཕྱི་ལོ་ ༢༠༡༩ ལོའི་ཟླ་ ༡༢ ནས་འཁྲབ་ཁྲིད་པ་འཇིགས་མེད་འཕྲིན་ལས་ལགས་ཀྱིས་ཕབ་སྐྲུན་བྱེད་མགོ་བཙུགས་ཡོད་པ་དང་། ནད་ཡམས་ཀྱི་རྐྱེན་གྱིས་བརྙན་ལེན་ཕབ་སྒྲིག་བྱེད་ཐུབ་མེད་ཀྱང་། ཕྱི་ལོ་ ༢༠༢༠ ལོའི་ལོ་མཇུག་ཏུ་ཡང་བསྐྱར་གློག་བརྙན་ཕབ་སྐྲུན་གྱི་ལས་གཞི་མགོ་བཙུགས་ཏེ། ལོ་དེའི་མཇུག་ཏུ་གློག་བརྙན་ཕབ་སྒྲིག་གི་ལས་གཞི་ཚང་མ་གྲུབ་ཡོད་འདུག་ལ། གློག་བརྙན་དེར་བོད་ཀྱི་གློག་བརྙན་འཁྲབ་འཁྲིད་པ་གྲགས་ཅན་པདྨ་ཚེ་བརྟན་གྱིས་ལམ་སྟོན་གནང་ཡོད་འདུག གློག་བརྙན་དེའི་ནང་བོད་ནས་བྱུང་བའི་ཁུངས་མེད་དང་། དོགས་གཞི་རང་བཞིན་ཅན་གྱི་དོན་རྐྱེན་ཞིག་གཏམ་རྒྱུད་ཀྱི་ལམ་ནས་བརྗོད་ཐབས་བྱས་ཡོད་དེ། ནགས་ཚལ་སྤྱི་གླིང་ཞིག་གི་ནང་དུ་གར་ཡོང་མི་ཤེས་པའི་མི་གསུམ་བསླེབས་ཡོད་པ་དང་། ནགས་ཚལ་སྤྱི་གླིང་དེའི་ལྟ་སྲུང་བ་དེའང་ཅི་ཡིན་འདི་ཡིན་མེད་པར་ཇག་པའི་ལས་ལ་ཞུགས་པའི་འཇིགས་རུང་གི་གཏམ་རྒྱུད་ཅིག་ཡིན་འདུག་ལ། ཕྱི་ལོ་ ༢༠༢༢ ལོར་གནའ་མཁར་ཟི་ལིང་དུ་འཚོགས་པའི་ཧྥ་སི་ན་གཞོན་གློག་བརྙན་དུས་སྟོན་སྐབས་ ༡༦ པའི་གློག་བརྙན་དུས་སྟོན་སྐབས། བོད་ཀྱི་གློག་བརྙན་གཅིག་དང་བཞི་ཡི་འཁྲབ་ཁྲིད་པ་འཇིགས་མེད་འཕྲིན་ལས་ལགས་སུ་འཁྲབ་ཁྲིད་པ་ཡག་ཤོས་དང་། སྦྱིན་པ་ལགས་སུ་འཁྲབ་སྟོན་པ་ཡག་ཤོས་ཀྱི་གཟེངས་བསྟོད་བྱ་དགའ་ཐོབ་འདུག དེ་བཞིན་བོད་ཀྱི་གློག་བརྙན་གཅིག་དང་བཞི་ལ་འཁྲབ་གཞུང་གི་འགྲེལ་བརྗོད་ཡག་ཤོས་དང་། གློག་བརྙན་ཡག་ཤོས་བཅས་ཀྱི་བྱ་དགའ་ཡང་ཐོབ་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
