འདི་ལོའི་རྒྱ་གར་རྒྱལ་ཡོངས་ཀྱི་འོས་བསྡུ་དེ་སྲིད་འཛིན་ལས་ཐོག་མུ་དྷི་མཆོག་གིས་སྣེ་ཁྲིད་པའི་བྷི་ཇི་པི་སྲིད་དོན་ཚོགས་པར་འཐོབ་ཀྱི་ཡོད་འདུག
Adnan Abidi/Reuters
འདི་ལོའི་ཕྱི་ཟླ་ ༤ ཚེས་ ༡༩ ནས་ཟླ་ ༦ ཚེས་ ༡ བར་ཉིན་གྲངས་ ༤༤ རིང་རྒྱ་གར་གྱི་འོས་བསྡུ་ཆེན་མོ་གནང་ཡོད་པ་ལྟར། དེ་རིང་རྒྱལ་ཡོངས་ཀྱི་འོས་བསྡུའི་གྲུབ་འབྲས་རིམ་གྱིས་འཐོན་བཞིན་འདུག་ལ། ད་ལྟའི་ཆར་རྒྱ་གར་གྲོས་ཚོགས་འོག་མའི་ནང་ཁྱོན་ཞབས་བཀྱག་ ༥༤༣ ཡོད་པའི་ཁྲོད། ཀོང་རེ་སི་སྲིད་དོན་ཚོགས་པར་ཞབས་བཀྱག་ ༢༢༨ དང་། བྷི་ཇི་པི་སྲིད་དོན་ཚོགས་པར་ཞབས་བཀྱག་ ༢༩༨། དེ་བཞིན་ཆབ་སྲིད་ཚོགས་པ་གཞན་རྣམས་ལ་ཞབས་བཀྱག་ ༡༧ ཐོབ་ནས། འདི་ལོའི་རྒྱ་གར་རྒྱལ་ཡོངས་ཀྱི་འོས་བསྡུ་ཆེན་མོའི་རྒྱལ་ཁ་དེ་བྷི་ཇི་པི་སྲིད་དོན་ཚོགས་པར་རྒྱལ་ཁ་ཐོབ་ཀྱི་འདུག་ལ། ད་ལན་མུ་དྷི་མཆོག་གི་སྲིད་བློན་གྱི་ལས་འཁུར་ཐེངས་གསུམ་པ་དེ་ཆགས་ཀྱི་ཡོད ཀྱང་། ད་ལྟ་རྒྱ་གར་དབུས་འོས་བསྡུ་ལྷན་ཁང་གིས་གསལ་བསྒྲགས་གནང་མེད་པ་རེད།
འདི་ལོའི་རྒྱལ་ཡོངས་འོས་བསྡུ་དྲིལ་བསྒྲགས་སྐབས་སྲིད་འཛིན་ལས་ཐོག་མུ་དྷི་མཆོག་གིས་སྣེ་ཁྲིད་པའི་བྷི་ཇི་པི་སྲིད་དོན་ཚོགས་པས། རྒྱ་གར་རྒྱལ་ཡོངས་སུ་ཧིན་དྷུ་ཆོས་ལུགས་དར་སྤེལ་དང་། ཕྱོགས་ཡོངས་སུ་ཧིན་དྷུ་ཆོས་ལུགས་ཀྱི་མཆོད་རྟེན་དང་། ལྷ་ཁང་སོགས་འཛུགས་སྐྲུན་བྱ་རྒྱུ། རྒྱ་གར་དེ་འཛམ་གླིང་གི་ཚོང་གི་ལྟེ་གནས་ཆེ་ཤོས་གསུམ་པར་བསྒྱུར་ཐབས་དང་། རྒྱ་གར་གྱི་ལས་བཟོ་བའི་སྒྲིག་འཛུགས་བསྐྱར་བཅོས་ཀྱིས་ཚོང་དོན་བཟོ་གྲྭ་དང་ལས་མི་གང་མང་བསྡུ་ཐབས། དེ་བཞིན་རྒྱ་གར་ཤར་ནུབ་ཁུལ་གྱི་མངའ་སྡེ་དེ་དག་གི་ཁྲོད་དུ་དྲག་སྤྱོད་དང་དམར་གསོད་ཀྱི་དོན་རྐྱེན་ཞི་བར་བྱས་ནས་བརྟན་བརླིང་གི་འཚོ་བ་བསྐྲུན་ཐབས་གནང་རྒྱུ་སོགས་ཁས་ལེན་གནང་ཡོད་འདུག
ཕྱི་ལོ་ ༢༠༡༩ ལོའི་འོས་བསྡུའི་སྐབས་མུ་དྷི་གཞུང་གིས་མི་ལོ་ལྔ་ཡི་ནང་ཚུད་ལ་རྒྱ་གར་གྱི་རྒྱལ་སྲུང་དང་། ཞིང་པའི་ཚོང་དོན་ཡོང་འབབ་གོང་མཐོར་གཏང་རྒྱུ་ཡིན་པ་སོགས་ཁས་ལེན་ཆེན་པོ་བཅུ་ཙམ་གནང་ཡོད་ཀྱང་ལག་ལེན་མ་བསྟར་བར་རྒྱ་གར་གྱི་ཞིང་ལས་ཁྲིམས་སྒྲིག་གསུམ་གྱི་ཐད་ལ་བསྐྱར་བཅོས་བྱས་པར་བརྟེན། རྒྱ་གར་གྱི་པན་ཇབ་དང་། ཧར་ཡ་ན་སོགས་ཞིང་ལས་ཤུགས་ཆེ་བའི་མངའ་སྡེ་མང་པོའི་ནང་ཞིང་པའི་ངོ་རྒོལ་ལས་འགུལ་ཤུགས་ཆེན་བྱས་ཏེ། ད་བར་ཞིང་པ་ལས་འགུལ་བ་མང་པོར་ཤི་རྨས་བྱུང་བ་དང་། རང་ཤི་བརྒྱབ་པའི་གནས་ཚུལ་བྱུང་ཡོད་འདུག་ལ། སྲིད་གཞུང་གསར་པའི་ངོས་ནས་རྒྱ་གར་ཞིང་པའི་དཀའ་ངལ་སེལ་དགོས་པ་སོགས་ཀྱི་དགོས་འདུན་བཏོན་ཡོད་འདུག
སྲིད་བློན་མུ་དྷི་མཆོག་གི་འདས་པའི་ལས་ཡུན་ལོ་ ༡༠ རིང་། རྒྱ་གར་གྱི་དཔལ་འབྱོར་ཕྱོགས་ཡོངས་ནས་འཕེལ་རྒྱས་ཤུགས་ཆེན་ཕྱིན་ཏེ་འདས་པའི་ལོ་ཤས་རིང་རྒྱ་གར་འཛམ་གླིང་གི་ཚོང་གི་ལྟེ་གནས་ཆེ་ཤོས་ལྔ་པར་གྱུར་ཡོད་ཅིང་། རྒྱ་གར་གྱི་ཤེས་རིག་དང་། འཕྲོད་བསྟེན། འཛུགས་སྐྲུན། དེང་རབས་འཕྲུལ་རིག་སོགས་ཀྱི་ཐད་ནས་འཕེལ་རྒྱས་ཆེན་པོ་ཕྱིན་ཡོད་པ་དང་། ལྷག་པར་དུ་རྒྱ་གར་གྱི་གྲོང་གསེབ་ཁག་ཏུ་སློབ་གྲྭ་ ༢༣༡ ལྷག་གསར་འཛུགས་ཀྱིས་སློབ་མ་གྲངས ༡༤༠༠༠༠ ལྷག་ལ་སློབ་སྦྱོང་གི་གོ་སྐབས་བསྐྲུན་པ། པཱ་ཀི་སི་ཐན་ནང་ཐེངས་འགར་དྲག་པོའི་རྒོལ་རྡུང་བཏང་བ། ལྐོག་ཟ་རུལ་སུངས་འགོག་ཆེད་དངུལ་ལོར་བརྗེ་བསྒྱུར་དང་འཕྲུལ་ལས་ཅན་དུ་བསྒྱུར་བ་སོགས་ཀྱི་གྲུབ་འབྲས་ཐོན་ཡོད་འདུག
སྲིད་བློན་ནཱ་རན་ཌ་མུ་དྷི་མཆོག་ནི། ཕྱི་ལོ་ ༡༩༥༠ ལོའི་ཟླ་ ༩ ཚེས་ ༡༧ ཉིན་གྷོ་ཇི་རཱ་ཊིའི་ཟས་རིགས་འཚོང་མཁན་གྱི་ཁྱིམ་ཚང་དཀྱུས་མ་ཞིག་ཏུ་སྐྱེས་ཤིང་། ཁོང་ཆུང་དུས་མེ་འཁོར་དང་སྤྱི་སྤྱོད་རླངས་འཁོར་ས་ཚིགས་སོགས་སུ་ཇ་འཚོང་ཞོར་དུ་སློབ་ཆུང་མཐར་ཕྱིན་ཡོད་པ་དང་། དགུང་ལོ་ ༡༨ སྟེང་ཆང་ས་བརྒྱབ་ཡོད་འདུག ཕྱི་ལོ་༡༩༧༠ ལོར་གྷོ་ཇི་རཱ་ཊིའི་མེ་འཁོར་གྱི་ཐབ་ཚང་ཞིག་ཏུ་ལས་ཀ་བྱས། ཕྱིས་སུ་ཡིག་འབྲེལ་ལམ་ནས་ལྡི་ལི་མཐོ་སློབ་ནས་སྲིད་དོན་ཚན་རིག་གི་རིག་གནས་རབ་འབྱམས་པའི་ལག་འཁྱེར་དང་གྷོ་ཇི་རཱ་ཊིའི་གཙུག་ལག་སློབ་ཆེན་ནས་སྲིད་དོན་ཚན་རིག་གི་གཙུག་ལག་རབ་འབྱམས་པའི་ལག་འཁྱེར་བླངས་ཡོད་འདུག ཕྱི་ལོ་ ༡༩༩༥ ལོར་བྷི་ཇི་པི་སྲིད་དོན་ཚོགས་པའི་དྲུང་ཆེར་བདམས་ཐོན་བྱུང་སྟེ། ཧི་མ་ཅལ་དང་ཧར་ཡ་ན་མངའ་སྡེའི་ནང་སྲིད་དོན་གྱི་ཕྱག་ལས་གནང་ཡོད་པ་དང་། ཕྱི་ལོ་ ༡༩༩༨ ལོར་གྷོ་ཇི་རཱ་ཊིའི་གྲོས་ཚོགས་ནང་བདམས། ཕྱི་ལོ་ ༢༠༠༡ ལོ་ནས་བཟུང་གྷོ་ཇི་རཱ་ཊི་མངའ་སྡེའི་སྤྱི་ཁྱབ་བློན་ཆེན་གྱི་ཕྱག་ལས་གནང་ཡོད་པ་དང་། ཕྱི་ལོ་ ༢༠༡༤ ལོ་ནས་རྒྱ་གར་གྱི་སྐབས་ ༡༦ པའི་སྲིད་བློན་གྱི་ཕྱག་ལས་གནང་།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
