ནོར་ཝེ་རྒྱལ་ཁབ་ཀྱིས་ཐོངས་མཆན་མ་སྤྲད་པར་བརྟེན་བོད་རྒྱལ་ཡོངས་བུད་མེད་རྐང་སྤོལ་རུ་ཁག་འདི་ལོའི་ཀོ་ནི་ཧྥའི་རྩེད་འགྲན་ནང་ཞུགས་ཐུབ་མེད་ཀྱང་མི་འགྱངས་བར་ལ་དྭགས་སུ་རྩེད་འགྲན་བྱ་འཆར་ཡོད་འདུག
བོད་རྒྱལ་ཡོངས་བུད་མེད་རྐང་སྤོལ་རུ་ཁག་གིས་ཁེ་ན་ཌར་རྩེད་འགྲན་སྐབས། བོད་ཀྱི་བུད་མེད་གྱི་རྐང་སྤོལ་ཞེས་པའི་ངོ་དེབ་ནས་བླངས།
འདི་ལོའི་བུད་མེད་ཀྱི་ཀོ་ནི་ཧྥ་རྐང་སྤོལ་འགྲན་ཚོགས་དེ་ཟླ་འདིའི་ཚེས་ ༤ ནས་ ༨ བར་ནོར་ཝེ་རྒྱལ་ཁབ་ཀྱི་བྱང་རྒྱུད་དུ་ཆགས་པའི་བྷོ་ཌོ་ (Bodo) ཁུལ་དུ་འཚོག་གི་ཡོད་ཅིང་། བོད་རྒྱལ་ཡོངས་བུད་མེད་རྐང་སྤོལ་རུ་ཁག་ཀྱང་འགྲན་ཚོགས་དེར་མཉམ་ཞུགས་བྱ་འཆར་ཡོད་ཀྱང་ཐོངས་མཆན་སྤྲད་མེད་པ་རེད། བོད་ཀྱི་བུད་མེད་རྐང་སྤོལ་རུ་ཁག་ལ་རྒྱལ་སྤྱིའི་ཀོ་ནི་ཧྥ་འགྲན་ཚོགས་ནང་ཞུགས་པའི་གོ་སྐབས་ཐེངས་གསུམ་པ་དེ་ཤོར་འདུག
དེའི་ཐད་བོད་རྒྱལ་ཡོངས་བུད་མེད་རྐང་སྤོལ་རུ་ཁག་ཐོག་མ་འཛུགས་མཁན་དང་སློབ་སྟོན་པ་ཟུར་བ་ཁེ་སི་ཡ་ (Casya) ལགས་ཀྱིས་སྒེར་གྱི་ཨིན་ས་གྷ་རམ་ (Instagram) དུ་བརྙན་ཐུང་ཞིག་སྤེལ་བའི་ནང་། ནོར་ཝེ་གཞུང་གིས་བོད་ཀྱི་བུད་མེད་རྐང་སྤོལ་རུ་ཁག་གི་རྩེད་འགྲན་པ་རྣམས་ལ་ཐོངས་མཆན་སྤྲད་མེད་པས། བོད་རྒྱལ་ཡོངས་བུད་མེད་རྐང་སྤོལ་རུ་ཁག་ཀོ་ནི་ཧྥ་རྩེད་འགྲན་ནས་ཕྱིར་འཐེན་བྱས་ཡོད། བོད་ཀྱི་བུད་མེད་རྩེད་འགྲན་པ་རྣམས་ནི་རྐང་སྤོལ་བ་ཞིག་ལས་ལྷག་པ་ཡིན་ཏེ། ཁོང་ཚོས་ཕྱི་ལོ་ ༡༩༤༩ ནས་རྒྱ་ནག་གཞུང་གིས་བཙན་འཛུལ་བྱས་པའི་རྒྱལ་ཁབ་ཅིག་གི་སྐུ་ཚབ་བྱེད་ཀྱི་ཡོད་པ་རེད། ཁོང་ཚོས་བོད་ཀྱི་རྒྱལ་དར་ཡོད་པའི་རྐང་སྤོལ་སྒྲིག་ཆས་གྱོན་ནས་རྩེད་འགྲན་བྱས་པ་ནི་ཞི་བའི་ངོ་རྒོལ་ཞིག་ཡིན་ལ། རང་ཉིད་བོད་པ་ཡིན་པའི་མཚོན་དོན་ཞིག་ཀྱང་ཡིན། ཞེས་དང་། རྒྱ་ནག་གཞུང་གིས་བོད་མི་ཚོས་ཞི་བའི་འཐབ་རྩོད་དེ་དག་ལ་དངོས་ཤུགས་བརྒྱུད་གསུམ་ནས་གནོན་ཤུགས་དང་ཐེ་ཇུས་བྱེད་ཀྱི་ཡོད་སྐོར་སོགས་བརྗོད་འདུག
ཉེ་ལམ་བོད་རྒྱལ་ཡོངས་རྩེད་རིགས་ཚོགས་པས་བསྒྲགས་གཏམ་ཞིག་སྤེལ་བའི་ནང་། ཕྱི་ལོ་ ༢༠༢༤ ལོའི་ཀོ་ནི་ཧྥ་རྩེད་འགྲན་ཁྲོད་མཉམ་ཞུགས་ཆེད། ད་བར་རྩེད་འགྲན་པ་རྣམས་ཀྱིས་ནོར་ཝེ་གཞུང་གིས་ཐོངས་མཆན་སྤྲོད་རྒྱུར་རེ་བ་ཆེན་པོ་བྱས་ཡོད་ཀྱང་། ཐོངས་མཆན་མ་སྤྲད་པས་རྩེད་འགྲན་ནང་མཉམ་ཞུགས་བྱ་མ་ཐུབ་པ་ནི་ཆེས་བློ་ཕམ་དགོས་པ་ཞིག་ཡིན་ཡང་། བོད་ཀྱི་བུད་མེད་རྐང་སྤོལ་རུ་ཁག་གིས་མི་འགྱངས་བར་ལ་དྭགས་ཀྱིས་གོ་སྒྲིག་བྱས་པའི་རྩེད་འགྲན་ཁག་ལ་མཉམ་ཞུགས་བྱ་རྒྱུ་ཡིན་སྐོར་སོགས་གསལ་འདུག
ཕྱི་ལོ་ ༢༠༢༡ ཟླ་ ༦ ཚེས་ ༢༣ ནས་ ༣༠ བར་ཡུ་རོབ་ཀྱི་རྒྱལ་ཁབ་རོ་མ་ནི་ཡའི་ (Romania) སི་ཁ་ལེར་ལན་ཌི་ (Szeklerland) ནང་འཚོགས་གཏན་འཁེལ་བའི་རྒྱལ་སྤྱིའི་ཀོ་ནི་ཧྥ་ (CONIFA) བུད་མེད་རྐང་སྤོལ་འགྲན་བསྡུར་ནང་བོད་ཀྱི་བུད་མེད་རུ་ཁག་མཉམ་ཞུགས་བྱ་གཏན་འཁེལ་ཡོད་ཀྱང་། ལོ་དེའི་ཕྱི་ཟླ་ ༣ ཚེས་ ༡༩ ཉིན་རྐང་སྤོལ་རྩེད་འགྲན་གོ་སྒྲིག་ཚོགས་པས་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འོག རྐང་སྤོལ་རྩེད་འགྲན་དེ་ཚོགས་ཐུབ་ཐབས་མེད་པའི་ཡོངས་བསྒྲགས་བྱས་ཡོད་འདུག་ལ། ཕྱི་ལོ་ ༢༠༡༧ ལོར་བོད་རྒྱལ་ཡོངས་བུད་མེད་རྐང་སྤོལ་རུ་ཁག་ཨ་རིའི་ཌ་ལ་སི་གྲོང་ཁྱེར་ནང་གི་རྐང་སྤོལ་རྩེད་འགྲན་ཞིག་ནང་མཉམ་ཞུགས་བྱས་ཀྱང་། གཞུང་གིས་ཐོངས་མཆན་མ་སྤྲད་པའི་དབང་གིས་མཉམ་ཞུགས་བྱ་ཐུབ་མེད་པ་རེད།
ཀོ་ནི་ཧྥ་རྐང་སྤོལ་མཐུན་ཚོགས་ (Confederation of Independent Football Associations) ཐོག་མར་ཕྱི་ལོ་ ༢༠༡༣ ཟླ་ ༦ ཚེས་ ༧ ཉིན། ཧྥི་ཧྥ་རྒྱལ་སྤྱིའི་རྐང་སྤོལ་མཐུན་ཚོགས་ཀྱི་ངོས་འཛིན་མེད་པའི་རྒྱལ་ཁབ་དང་ས་ཁུལ་གྱི་རྐང་སྤོལ་རུ་ཁག་རྣམས་ལ་དམིགས་ཏེ་མགོ་བརྩམས་པ་ཞིག་ཡིན་པ་དང་། ཆེས་ཐོག་མའི་རྒྱལ་སྤྱིའི་རྐང་སྤོལ་འགྲན་བསྡུར་དེ་ཕྱི་ལོ་ ༢༠༡༤ ལོར་སི་ཝེ་ཌན་དུ་འཚོགས་ཤིང་། ཕྱི་ལོ་ ༢༠༢༢ ལོའི་བུད་མེད་ཀྱི་ཀོ་ནི་ཧྥ་རྩེད་འགྲན་དེ་པོན་ཊ་ཆོལ་གསུམ་བོད་མིའི་གཞིས་སྒར་དུ་བསྡུས་ཡོད། ཕྱི་ལོ་ ༢༠༡༧ ལོར་བོད་ཀྱི་བུད་མེད་རྐང་སྤོལ་རུ་ཁག་གིས་གྲོང་ཁྱེར་བན་ཁའོ་བཱར་རྒྱལ་སྤྱིའི་རྐང་སྤོལ་དུས་སྟོན་(Vancouver International Soccer Festival) ཐེངས་ ༡༣ པའི་ཐོག་མཉམ་ཞུགས་བྱས་ཡོད་ལ། དེ་བཞིན་ཕྱི་ལོ ༢༠༢༢ ལོར་པོན་ཊ་ཆོལ་གསུམ་དུ་བསྡུས་པའི་རྒྱལ་སྤྱིའི་ཀོ་ནི་ཧྥ་བུད་མེད་རྐང་སྤོལ་རྩེད་འགྲན་ཁྲོད་སོགས་སུའང་མཉམ་ཞུགས་བྱས་ཡོད།
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
