རྒྱ་ནག་གཞུང་གིས་མཚོ་སྔོན་ཞིང་ཆེན་གྱི་མགོ་ཁྲིད་གཞོན་པ་སོགས་ཀྱི་ལས་ཀ་ལོ་ངོ་ ༡༢ ཙམ་རིང་བྱས་པའི་རྒྱ་དཔོན་ལའོ་ཡུས་ལིན་གྱིས་ལྐོག་རྔན་འབོར་ཆེན་བླངས་པའི་དོགས་གཞིའི་འོག་ཞིབ་བཤེར་བྱེད་ཀྱི་འདུག
ཞི་ཅིན་ཕིན་གཞུང་གིས་སྟག་དང་སྦྲང་མ་ལེབ་རྡུང་གི་སྲིད་ཇུས་ཟེར་བའི་མིང་འོག་ནས་རྒྱ་ནག་དང་། རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག ཡུ་གུར་སོགས་ཀྱི་དཔོན་རིགས་མང་པོ་ཞིག་ལ་ལྐོག་ཟ་རུལ་སུངས་དང་ལྐོག་རྔན་བླངས་བ། དམར་ཤོག་གཞུང་ལ་བློ་སེམས་མི་དཀར་བ་སོགས་ཀྱི་ནག་ཉེས་འོག་ཁྲིམས་ཆད་ཕོག་གི་ཡོད་པ་ལྟར།ཟླ་འདིའི་ཕྱི་ཚེས་ ༤ ཉིན་རྒྱ་ནག་ཆེས་མཐོའི་མི་དམངས་ཞིབ་དཔྱོད་ཁང་ཟེར་བས། མཚོ་སྔོན་ཞིང་ཆེན་གྱི་མགོ་ཁྲིད་གཞོན་པ་ལའོ་ཡུས་ལིན་(骆玉林) གྱིས་ལྐོག་རྔན་འབོར་ཆེན་བླངས་པའི་དོགས་གཞིའི་འོག ཧྲན་ཏུང་ཞིང་ཆེན་ཆིང་ཏའོ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ལ་ཁྲིམས་གཏུག་བྱས་ཡོད་འདུག
དེའི་ཐད་ཧྲན་ཏུང་ཞིང་ཆེན་ཆིང་ཏའོ་གྲོང་ཁྱེར་མི་དམངས་ཞིབ་དཔྱོད་ལས་ཁུངས་ཟེར་བས། ལའོ་ཡུས་ལིན་གྱིས་མཚོ་སྔོན་ཞིང་ཆེན་གཞུང་ཁོངས་རྒྱུ་ནོར་དོ་དམ་ཚན་པའི་འགན་འཛིན། མཚོ་སྔོན་ཞིང་ཆེན་དཔལ་འབྱོར་ཉོ་ཚོང་ལྷན་ཁང་དང་མཚོ་སྔོན་ཞིང་ཆེན་དཔལ་འབྱོར་ལྷན་ཁང་གི་དམར་ཤོག་ཚོགས་པའི་དྲུང་ཡིག མཚོ་སྔོན་ཞིང་ཆེན་གྱི་མགོ་ཁྲིད་གཞོན་པ། རྒྱལ་སྲིད་སྤྱི་ཁྱབ་ཁང་གཞུང་ཁོངས་གཙོ་གནད་ཁེ་ལས་ཆེ་གྲས་ལྟ་ཞིབ་ལྷན་ཁང་གི་མགོ་ཁྲིད། རྒྱལ་སྲིད་སྤྱི་ཁྱབ་ཁང་གཞུང་ཁོངས་རྒྱུ་ནོར་ལྟ་སྐུལ་དོ་དམ་ལྷན་ཁང་གི་མགོ་ཁྲིད་གཞོན་པ་སོགས་ཀྱི་གོ་གནས་བེད་སྤྱོད་ལོག་པར་བཏང་སྟེ། ལས་གནས་དང་མི་སྒེར་གྱི་ཁེ་ལས། ལྐོག་རྔན་འབོར་ཆེན། གཞུང་གི་ཉོ་ཚོང་བྱེད་སྒོ་ཕྱིར་བསྒྲགས་བྱས་པ་སོགས་ཀྱི་དོགས་གཞིའི་འོག་ནས་ཞིབ་བཤེར་བྱེད་ཀྱི་ཡོད་ལུགས་བསྒྲགས་འདུག
ལའོ་ཡུས་ལིན་ནི་ཕྱི་ལོ་ ༡༩༥༨ ལོར་རྒྱ་ནག་ཧི་ནན་ཞིན་ཡེ་ནས་ཡིན་ཞིང་། ཕྱི་ལོ་ ༡༩༨༤ ལོར་རྒྱ་ནག་དམར་ཤོག་ཚོགས་པའི་ཁོངས་སུ་ཞུགས་ཡོད་པ་དང་། ཕྱི་ལོ་ ༢༠༠༤ ནས་ ༢༠༠༥ བར་མཚོ་སྔོན་ཞིང་ཆེན་མགོ་ཁྲིད་གཞོན་པ་དང་ཟི་ལིང་གྲོང་ཁྱེར་སྤྱི་ཁྱབ་པ་སོགས་ཀྱི་ལས་ཀ་བྱས་འདུག ཕྱི་ལོ་ ༢༠༠༨ ནས་ ༢༠༡༣ བར་མཚོ་སྔོན་ཞིང་ཆེན་གཞུང་ཁོངས་རྒྱུ་ནོར་དོ་དམ་ཚན་པའི་འགན་འཛིན་དང་། མཚོ་སྔོན་ཞིང་ཆེན་གྱི་དམར་ཤོག་ཚོགས་པའི་རྒྱུན་ལས་སོགས་བྱས། ཕྱི་ལོ་ ༢༠༡༥ རྒྱ་ནག་རྒྱལ་སྲིད་སྤྱི་ཁྱབ་ཁང་གཞུང་ཁོངས་གཙོ་གནད་ཁེ་ལས་ཆེ་གྲས་ལྟ་ཞིབ་ལྷན་ཁང་གི་མགོ་ཁྲིད་བྱས། ཕྱི་ལོ་ ༢༠༡༨ ནས་ ༢༠༢༢ བར་རྒྱ་ནག་རྒྱལ་སྲིད་སྤྱི་ཁྱབ་ཁང་གཞུང་ཁོངས་རྒྱུ་ནོར་ལྟ་སྐུལ་དོ་དམ་ལྷན་ཁང་གི་མགོ་ཁྲིད་གཞོན་པ་སོགས་བྱས་ཡོད་འདུག ཕྱི་ལོ་ ༢༠༢༣ ཟླ་ ༥ ཚེས་ ༡༧ ཉིན་བཟུང་ཁོས་ལྐོག་རྔན་བླངས་པ་དང་གཞུང་གི་ནང་མོལ་ཉོ་ཚོང་གི་ཁྲིམས་འགལ་གྱི་དགོས་གཞི་འོག་ཁྲིམས་བཤེར་བྱས་ཡོད་པ་ཞིག་ཡིན་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
