ཨ་རིའི་སེམས་ཁམས་ཚན་རིག་ལྷན་ཚོགས་ནས་སྤེལ།
སྨན་པ་ཐུབ་བསྟན་དཔལ་ལྡན་གྱིས་བསྒྱུར།
—–དྲན་པ་ཉེར་བཞག་གི་སྒོམ་ཀྱིས་ལུས་སེམས་གཉིས་ཀའི་འཕྲོད་བསྟེན་ལ་ཕན་པ།
ལོ་ངོ་སྟོང་ཕྲག་མང་པོར་མི་རྣམས་ཀྱིས་སྒོམ་བརྒྱབ་ཡོད་ལ་དེ་དག་མང་པོ་ཞིག་ནི་ཆོས་ལུགས་ཀྱི་ཆ་ཤས་སུ་ཉམས་ལེན་བྱས་ཡོད། ཡིན་ནའང་ཉེ་བའི་ལོ་ཤས་ནང་དྲན་པ་ཉེར་བཞག་ནི་མི་རྣམས་ཀྱི་སེམས་ངལ་ལ་གདོང་ལེན་དང་སྤྱི་ཡོངས་ཀྱི་བདེ་ཐང་ཡར་རྒྱས་གཏོང་བའི་ཐབས་ལམ་སྙན་གྲགས་ཅན་ཞིག་ཏུ་གྱུར་ཡོད་ཅིང་། ཐབས་ལམ་དེ་ནུས་པ་ལྡན་པ་ཞིག་ཡིན་པ་ཞིབ་འཇུག་མང་པོ་ཞིག་གིས་གསལ་སྟོན་བྱས་ཡོད། སེམས་ཁམས་ཁྱད་ལས་པ་རྣམས་ལ་དྲན་པ་ཉེར་བཞག་གི་སྒོམ་ཀྱིས་ང་ཚོའི་ཀླད་པ་དང་ལུས་ཟུངས་ལ་བཟང་ཕྱོགས་ཀྱི་འགྱུར་བ་བཏང་སྟེ་ལུས་སེམས་གཉིས་ཀྱི་འཕྲོད་བསྟེན་ཡར་རྒྱས་གཏོང་གི་ཡོད་པ་གསར་རྙེད་བྱུང་ཡོད།
དྲན་པ་ཉེར་བཞག་གི་སྒོམ་ཞེས་པ་ཅི་ཞིག་རེད་དམ།
སྒོམ་ཞེས་པ་དེ་ལ་འགྲེལ་བཤད་མང་པོ་ཡོད་ཀྱང་སྟབས་བདེ་པོར་བསམ་ན་དེ་ནི་རང་གི་བློ་ལ་སྦྱོང་བརྡར་བྱས་ཏེ་སེམས་ལྷོད་ལ་འཇོག་ཐུབ་པ་དང་བཟང་ཕྱོགས་ཀྱི་སེམས་ཚོར་སྐྱེ་རུ་འཇུག་རྒྱུ་དེ་ཡིན།
དྲན་པ་ཉེར་བཞག་ནི་ཆེས་སྙན་གྲགས་ཆེ་བའི་སྒོམ་གྱི་ཐབས་ལམ་ཞིག་རེད། དེ་ལ་ཆ་གཉིས་ཡོད་པ་སྟེ་དམིགས་སུ་གཏད་པ་དང་དྭང་དུ་ལེན་པ་གཉིས་ཡིན། དམིགས་སུ་གཏད་པ་ཞེས་པ་ནི་རང་གི་མྱོང་ཚོར་རྣམས་དུས་ད་ལྟ་བའི་གནས་སྐབས་སུ་གང་འབྱུང་བཞིན་པའི་གནས་ཚུལ་ལ་ཁ་ཕྱོགས་པ་ལ་ཟེར། དེ་ནི་རང་གི་དབུགས་དང་ནང་གི་བསམ་བློ་དང་ཕྱི་ལུས་ཀྱིས་མྱོང་བཞིན་པའི་ཚོར་བ་སོགས་ཀྱི་སྟེང་དུ་རང་གི་བློ་བཀུག་པ་ཞིག་རེད། དྭང་དུ་ལེན་པ་ནི་གོང་གི་སེམས་ཚོར་དེ་དག་ལ་ལེགས་ཉེས་ཀྱི་དབྱེ་འབྱེད་མ་བྱས་པར་ལྟ་ནས་སྡོད་པ་ཙམ་ལ་ཟེར། བསམ་བློ་དང་ཚོར་བ་དེ་དག་གི་རྗེས་སུ་རྒྱུག་པའམ་ཡ་ལན་སྤྲོད་པ་སོགས་ཀྱི་ཚབ་ཏུ་རང་གིས་དེ་དག་ཡོད་པ་ཧ་གོ་བ་ཙམ་དང་དེ་རྣམས་རང་འགུལ་གྱིས་འགྲོ་འོང་བྱེད་འཇུག་རྒྱུ་དེ་རང་ཉིད་ཀྱི་དམིགས་ཡུལ་ཡིན་དགོས།
དྲན་པ་ཉེར་བཞག་གི་འཛིན་གྲྭ་དང་དེ་ཉིད་གཞི་ལ་བཞག་པའི་དཔྱད་བཅོས་སོགས་ཀྱིས་གཞི་རྩའི་ལྟ་གྲུབ་དེ་ལག་ལེན་དུ་འགེལ་ཐབས་སུ་མཐུན་རྐྱེན་སྦྱོར་བ་རེད། དེ་འདྲའི་ལས་གཞི་ཁག་ཏུ་དབུགས་སྦྱོང་། ཡོ་ག རང་གི་ལུས་ཚོར་དང་སེམས་ཚོོར། བསམ་བློ་སོགས་ཀྱི་སྟེང་དུ་དྲན་ཤེས་བསྟེན་ཐབས་ཀྱི་ལག་ལེན་དམར་ཁྲིད་སོགས་ཚུད་ཡོད།
དྲན་པ་ཉེར་བཞག་སྐོར་གྱི་ཞིབ་འཇུག་མང་ཆེ་ཤོས་ནི་བཅོས་ཐབས་རིགས་གཉིས་ཀྱི་ཐོག་ལ་ཤུགས་གནོན་བརྒྱབ་ཡོད།
- དྲན་པ་ཉེར་བཞག་གིས་སེམས་ངལ་ཞི་ཐབས་(MBSR) ནི་བདུན་ཕྲག་བརྒྱད་ཀྱི་རིང་དུ་རང་ཁྱིམ་དུ་ཉིན་ལྟར་དྲན་པ་ཉེར་བཞག་གི་སྒོམ་སྦྱོང་བརྡར་དང་བདུན་རེར་དྲན་པ་ཉེར་བཞག་སྐོར་མཉམ་ཞུགས་པ་གཞན་རྣམས་དང་ལྷན་དུ་འཛིན་གྲྭ་སོགས་ཡོད་པའི་བཅོས་ཐབས་ཤིག་རེད།
- དྲན་པ་ཉེར་བཞག་སྟེང་ནས་སེམས་ཁམས་སློབ་གསོའི་ཐབས་ལམ་ (MBCT) ཞེས་པ་ནི་གོང་གི་ MBSR དང་སེམས་ཁམས་སློབ་གསོའི་ཐབས་ལམ་(CBT) གཉིས་ཟུང་འབྲེལ་གྱིས་སེམས་གཅོང་གི་ནད་པ་གསོ་བའི་ཐབས་ལམ་ཞིག་རེད།
ནད་མེད་ཀྱི་མི་ལ་དྲན་པ་ཉེར་བཞག་གི་ཞིབ་འཇུག་དཔྱད་རྩོམ་རྣམས་གྲངས་ཉིས་བརྒྱ་བརྒལ་བར་ཉམས་ཞིབ་པ་རྣམ་པས་བསྐྱར་ཞིབ་བྱས་པ་བརྒྱུད། དྲན་པ་ཉེར་བཞག་གི་བཅོས་ཐབས་ནི་སེམས་གཅོང་། སེམས་དངངས། སེམས་ངལ་བཅས་ཉུང་དུ་གཏོང་བར་དམིགས་བསལ་གྱིས་ཕན་ཐོགས་ཡོད་པ་མ་ཟད་ན་ཚ་བྱེ་བྲག་པ་སེམས་གཅོང་། ཟུག་གཟེར ཐ་མག་དང་ངན་ལང་ཤོར་བ་སོགས་ཀྱང་བཅོས་ཐབས་སུ་ཕན་ཐོགས་ཡོད་པ་བརྙེད་འདུག སེམས་གཅོང་ཕོག་པའི་ནད་པ་རྣམས་ལ་ཆེས་རེ་བ་ཆེ་བའི་ཉམས་ཞིབ་འགའ་ཤས་བྱས་ཡོད་པ་ལས་འགའ་ཤས་དཔེར་ན་ MCBT ལྟ་བུས་དེ་སྔ་སེམས་གཅོང་ཚབས་ཆེན་ཡང་ནས་ཡང་དུ་ན་མྱོང་བའི་མི་རྣམས་ཀྱི་ནད་བསྐྱར་ལོག་མ་ཐེབས་པར་ཕན་ཐོགས་རླབས་ཆེན་ཡོད་པ་གྲུབ་དོན་དུ་བརྙེད་འདུག ད་དུང་དེས་ཀྱང་མ་ཚད་པར། དྲན་པ་ཉེར་བཞག་གི་སྒོམ་གྱིས་ཕྱི་ལུས་ཀྱི་འཕྲོད་བསྟེན་ཡར་རྒྱས་གཏོང་ཐུབ་པ་དཔེར་ན་གཅོང་ཅན་ན་ཟུག་ཕོག་པའི་ནད་པ་རྣམས་ཀྱི་ཟུག་གཟེར། ངལ་དུབ། སེམས་ངལ་སོགས་ཆུང་དུ་གཏོང་ཐུབ་ཀྱི་ཡོད། ཞིབ་འཇུག་གཞན་རྣམས་ལས་དྲན་པ་ཉེར་བཞག་གིས་ནད་འགོག་མ་ལགས་ཡར་རྒྱས་གོང་འཕེལ་དུ་གཏོང་བ་དང་ཆམ་ཚད་ཕོག་པའི་མི་རྣམས་མྱུར་དུ་དྲག་སྐྱེད་ཡོང་བ་སོགས་ལ་ཕན་ཐོགས་ཡོད་སྲིད་པའི་སྔོན་འགྲོའི་དཔང་རྟགས་བརྙེད་ཡོད་འདུག
དྲན་པ་ཉེར་བཞག་གི་བྱ་བ་བྱེད་ཚུལ།
རང་ཉིད་ཀྱི་དོ་སྣང་དང་དམིགས་པ་རང་གི་བསམ་བློ་དང་མྱོང་ཚོར་བཅས་ལ་བཞག་ཙམ་གྱིས་ལུས་ཀྱི་ཕྱི་ནང་བར་གསུམ་དུ་བཟང་ཕྱོགས་ཀྱི་གྲུབ་འབྲས་མང་པོ་དེ་འདྲ་ཇི་ལྟར་ཡོང་ངམ། ཉམས་ཞིབ་པ་རྣམས་ཀྱིས་དྲན་པ་ཉེར་བཞག་གི་ཁེ་ཕན་དེ་ཚོ་ནི། ང་ཚོའི་ཕྱི་གཟུགས་པོས་ནང་སེམས་ཀྱི་དཀའ་ངལ་དང་གནོན་ཤུགས་ལ་ཁ་གཏད་དུ་སློང་བའི་རང་གི་ལུས་སྟེང་གི་འགྱུར་འགྲོས་རྣམས་ཞི་འཇམ་དུ་གཏོང་བའི་ནུས་པ་དང་འགྲེལ་བ་ཡོད་པ་ཡིད་ཆེས་གནང་གི་ཡོད།
ཡུན་རིང་སེམས་ངལ་ན་བའི་རྐྱེན་གྱིས་ལུས་ཀྱི་ནད་འགོག་མ་ལག་ཉམས་ཆགས་འགྲོ་བ་མ་ཟད་འཕྲོད་བསྟེན་གྱི་དཀའ་ངལ་གཞན་དག་ཀྱང་སྡུག་ཏུ་འགྲོ་བ་རེད། སེམས་ངལ་ཆུང་དུ་བཏང་བ་བརྒྱུད་དྲན་པ་ཉེར་བཞག་གིས་ལུས་སྤྱི་ལ་ཤུགས་རྐྱེན་སྤྲོད་ཐུབ་པ་རེད།
སེམས་ཁམས་ཚན་རིག་པ་རྣམས་ཀྱིས་དྲན་པ་ཉེར་བཞག་གིས་ཀླད་པའི་ནང་གི་སེམས་ངལ་གྱི་རྒྱུ་ལམ་གཉིས་ཀྱི་ཐོག་ཤུགས་རྐྱེན་སྤྲོད་པ་སྟེ་དྲན་ཤེས་དང་སེམས་ཚོར་སྟངས་འཛིན་བྱེད་པའི་ཀླད་པའི་ཆ་ཤས་ཀྱི་དབྱིབས་བཀོད་དང་བྱེད་ལས་གཉིས་ལ་འགྱུར་བ་གཏོང་གི་ཡོད་པ་ཤེས་ཡོད། དགེ་མཚན་དེ་དག་དྲན་པ་ཉེར་བཞག་གི་ཆ་གང་དང་གང་ལ་རག་ལུས་པའང་ཚན་རིག་པ་རྣམས་པས་གསར་དུ་རྟོགས་བཞིན་ཡོད། སྒོམ་གྱི་སྐོར་ཞིབ་འཇུག་བྱས་པའི་གྲུབ་དོན་དཔྱད་རྩོམ་ཁག་ལ་བསྐྱར་ཞིབ་བྱས་པ་ལས་སེམས་ཁམས་ཞིབ་འཇུག་པ་རྣམས་པས་MBCT གྱི་བཅོས་ཐབས་ཐོབ་ཟིན་པའི་མི་རྣམས་སེམས་ངལ་གྱི་དུས་སྐབས་སུ་བསམ་བློ་ངན་ཕྱོགས་སུ་ཤོར་བའམ་ཕན་མེད་ཀྱི་སེམས་ཚོར་ཤུགས་ཆེན་གྱི་རིགས་སྐྱེ་རྒྱུ་ཉུང་བ་ཡོད་པའི་དཔང་རྟགས་ཚད་ལྡན་མཐོང་ཡོད། མ་ཟད་ཁོང་རྣས་པས་ MBCT དང་ཡང་ན་MBSR གྱི་ཐབས་ལམ་ནང་མཉམ་ཞུགས་བྱས་ཟིན་པའི་མི་རྣམས་ངན་ཕྱོགས་ཀྱི་བསམ་བློ་དང་ཉམས་མྱོང་གི་སྐོར་ལ་ཡང་ནས་ཡང་དུ་བསམ་བློ་གཏོང་བ་དང་སེམས་ཁྲལ་བྱ་རྒྱུ་ཉུང་བ་ཡོད་པ་དང་། མིག་སྔར་གྱི་གནས་ཚུལ་ལ་རིག་པ་སྒྲིམ་རྒྱུའི་ནུས་པ་ཆེ་བ་ཡོད་པའི་དཔང་རྟགས་འབྲིང་ཙམ་བརྙེད་ཡོད།
མགོ་ཇི་ལྟར་རྩོམ་དགོས་སམ།
དྲན་པ་ཉེར་བཞག་ལ་སློབ་སྦྱོང་བྱེད་རྒྱུ་ནི་སྔར་ལས་ཀྱང་ད་ལྟ་ཆེས་ལས་སླ་པོ་ཆགས་ཡོད། སྐུ་ཉིད་ཚོད་ལྟ་བྱེད་རྒྱུར་གྲ་སྒྲིག་ཡོད་དམ། ཐབས་ལམ་དང་རྣམ་པ་ཅུང་མི་འདྲ་བ་ཡོད་ཀྱང་ཡོ་ག་ལྟེ་གནས། རྩེད་མོའི་ཚོགས་ཁག སྨན་ཁང་ཆེ་ཆུང་སོགས་ཀྱི་ནང་དུ་དྲན་པ་ཉེར་བཞག་གི་འཛིན་གྲྭ་དང་བཅོས་ཐབས་སོགས་ཁྱབ་རྒྱ་ཆེན་པོ་ཡོད། ཁེ་ཕན་ནམ་དགེ་མཚན་གྱི་དཔང་རྟགས་ཡག་ཤོས་ཡོད་པའི་བཅོས་ཐབས་སྟེ་MBSR ཡང་ན་ MBCT ལ་ལག་ལེན་དངོས་ཀྱི་སྦྱོང་བརྡར་ཡོད་པའི་གསོ་དཔྱད་པ་ཚད་ལྡན་ཞིག་ཚོལ་དང་། དྲན་པ་ཉེར་བཞག་གི་བཅོས་ཐབས་སྣ་ཚོགས་ཤིག་དེང་སང་དྲྭ་ལམ་དང་ཡང་ན་ལག་ཐོག་ཁ་པར་གྱི་མཉེན་ཆས་སོགས་མང་པོ་ཡོད་ཀྱང་ཉམས་ཞིབ་ཡུན་རིང་བརྒྱུད་ནས་དེ་ཚོས་ཀླད་པ་དང་གཟུགས་པོ་ལ་ཤུགས་རྐྱེན་ཇི་ལྟར་ཐེབས་མིན་རྩད་གཅོད་བྱེད་དགོས། དེ་ལྟར་ནའང་སྔོན་འགྲོའི་ཞིབ་འཇུག་བརྒྱུད་ནས་དྲྭ་ཐོག་གི་དྲན་པ་ཉེར་བཞག་གི་ཐབས་ལམ་དེ་ཚོས་སེམས་ཁམས་འཕྲོད་བསྟེན་ཐད་བཟང་ཕྱོགས་ཀྱི་ཤུགས་རྐྱེན་ཡོད་པ་ར་འཕྲོད་བྱུང་ཡོད།
དྲན་པ་ཉེར་བཞག་གི་སྒོམ་དེ་ཐོག་མར་མ་གོམས་པས་བཅོས་མ་ལྟ་བུའི་ཚོར་སྣང་འབྱུང་སྲིད་ལ་ཁྱེད་ཀྱི་ཉིན་རེའི་རྒྱུན་ལྡན་གྱི་བྱེད་སྒོའི་ཆ་ཤས་སུ་འགྱུར་བར་དུས་ཡུན་གང་འཚམ་འགོར་སྲིད། ཡིན་ནའང་རིམ་པས་སྦྱོང་བརྡར་བྱས་ན། ད་གཟོད་ཁྱེད་ཀྱིས་ལུས་སེམས་ཀྱི་བདེ་ཐང་གོང་འཕེལ་དང་སེམས་ངལ་ཆུང་དུ་གཏོང་བའི་ཐབས་ལམ་ཡང་དག་པ་ཞིག་བརྙེད་སྲིད་དོ།།
མ་རྩོམ་དྲྭ་ཐགhttps://www.apa.org/topics/mindfulness/meditation
