དེ་རིང་ཉིན་གུང་ཆུ་ཚོད་ ༡༡ སྟེང་བོད་ཀྱི་དཔེ་མཛོད་ཁང་གི་ཚོགས་ཁང་དུ། བཀའ་ཟུར་བཀྲ་ཤིས་དབང་འདུས་ལགས་་ཀྱིས་བརྩམས་པའི་ངའི་མི་ཚེ། བོད་རང་དབང་ལུང་པར་སྐྱེས། བཙན་བྱོལ་ནང་སྲི་ཞུ་བསྒྲུབས་ཞེས་པའི་དཔེ་དེབ་ཅིག་དབུ་འབྱེད་གནང་སོང་།
དབུ་འབྱེད་ཀྱི་མཛད་སྒོའི་སྟེང་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག བཀའ་ཟུར་བཀྲ་ཤིས་དབང་འདུས་ལགས། བོད་ཀྱི་དཔེ་མཛོད་ཁང་གི་ངེས་སྟོན་པ་དགེ་བཤེས་ལྷག་རྡོར་ལགས། བོད་མིའི་སྒྲིག་འཛུགས་ཀྱི་མཛད་གཙོ་ལས་ཟུར་རྣམ་པ། ལྷན་ཁང་ཁག་གི་དྲུང་ཆེ་ཆུང་སོགས། དེ་བཞིན་མི་མང་ཁག་ཅིག་བཅས་འཛོམས་འདུག
སྲིད་སྐྱོང་སྤེན་པ་ཚེ་རིང་མཆོག་གིས། སྐུ་ངོ་ལགས་ཀྱིས་དེབ་འདི་བརྩམས་པར་སྐུ་ལས་མང་པོ་བསྐྱོན་ཡོད་པ་རེད། དེབ་འདིའི་གཞི་བཅོལ་སའི་ཡིག་ཆ་རྣམས་དཔེ་མཛོད་ཁང་དུ་ཕུལ་ཐུབ་ན་ཕན་ཐོགས་ཆེན་པོ་ཡོད་སྐོར་དང་། སྐུ་ངོ་ལགས་ཀྱིས་ལོ་བཅུ་དགུ་ཉི་ཤུ་ཙམ་རིང་རྒན་དྲུང་ནས་བཀའ་བློན་གྱི་ཕྱག་ལས་གནང་ཡོད་སྐོར་དང་། མི་མང་གི་བདེ་དོན་སླད་སྐུ་ལས་གང་ཐུབ་བསྐྱོན་ཡོད་པར་རྗེས་སུ་ཡི་རངས་ཞུ་ཡི་ཡོད་ལ། རྒན་རབས་པ་ཚོས་སྐུ་ལས་ཇི་ཙམ་བསྐྱོན་པ་དང་བློས་གཏོང་ག་ཚོད་གནང་ཡོད་པ་རྣམས་གཞོན་སྐྱེས་ཚོས་མཁྱེན་དགོས་ཀྱི་འདུག ད་ལྟ་བར་དུ་གནས་སྟངས་འདི་འདྲ་བསླེབས་ཐུབ་པར་སྐུ་ངོ་དང་ཁོང་རྣམ་པའི་མི་རབས་ཚོས་སྐུ་ལས་བསྐྱོན་པ་ལ་བརྟེན་ནས་གནས་སྟངས་དེ་འདྲར་བསླེབས་ཡོད་པ་རེད། དེབ་འདི་སྐུ་ངོའི་ཉམས་མྱོང་གི་མཛོད་ལྟ་བུ་ཞིག་ཡིན་པ་དང་། མི་རབས་གསར་པ་རྣམས་ལ་སེམས་ཤུགས་བསྐྱེད་རྒྱུའི་གཞི་རྩ་ཞིག་ཆགས་ཀྱི་ཡོད་སྐོར་དང་། རེ་བ་དུས་ནམ་ཡང་འདོར་རྒྱུ་མེད་པ་དང་། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་མིའི་རེ་བ་མ་བརླག་པའི་དོན་དུ་བཀའ་སློབ་མང་པོ་གནང་གི་ཡོད་པ་རེད་ཅེས་ད་ལྟ་བར་དུ་བཀའ་ཟུར་བཀྲ་ཤིས་དབང་འདུས་ལགས་ནས་སྐུ་ལས་མང་པོ་བསྐྱོན་པར་ཐུགས་རྗེ་ཆེ་ཞུ་རྒྱུ་དང་། བོད་ཀྱི་དཔེ་མཛོད་ཁང་གིས་དེབ་འདི་པར་སྐྲུན་གནང་བར་ཐུགས་རྗེ་ཆེ་ཞུས་སོང་།
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་སྒྲོལ་མ་ཚེ་རིང་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་གཞིར་བཟུང་བཀའ་ཟུར་བཀྲ་ཤིས་དབང་འདུས་ལགས་ཀྱིས་མི་རབས་རྗེས་མའི་ཆེད་ལོ་རྒྱུས་ཉར་ཚགས་དང་། རང་ཉིད་ཀྱི་ཕྲུ་གུའི་ཆེད་དབྱིན་ཡིག་ཐོག་སོ་སོའི་མི་ཚེའི་ལོ་རྒྱུས་ “ངའི་མི་ཚེ། བོད་རང་དབང་ལུང་པར་སྐྱེས། བཙན་བྱོལ་ནང་སྲི་ཞུ་བསྒྲུབས།” ཞེས་པའིདཔེ་དེབ་ཅིག་བྲིས་པར་བསྔགས་བརྗོད་ཞུ་ཡི་ཡོད་སྐོར་དང་། ཁོང་གིས་བོད་མིའི་སྒྲིག་འཛུགས་ནང་ཐོག་མར་རྒན་དྲུང་གནས་རིམ་ཐོག་སྐད་བསྒྱུར་གྱི་སྲི་ཞུ་བ་དང་། དེ་ནས་ཐེག་པ་རིམ་འཛེགས་ཀྱིས་བོད་མིའི་སྒྲིག་འཛུགས་ཀྱི་ལས་ཁུངས་ཆེ་ཁག་གི་བཀའ་བློན་གནང་སྟེ་བོད་དོན་ཆེད་ཕྱག་ལས་རྒྱ་ཆེ་གནང་ཡོད་པའི་སྐོར་དང་། དེ་བཞིན་མི་རབས་གཞོན་པ་ཚོས་ཁོང་གི་བྲིས་གནང་བའི་དཔེ་དེབ་དེར་རྒྱུས་ལོན་བྱས་ནས་བོད་མིའི་འཐབ་རྩོད་ཐོག་སོ་སོའི་ནུས་པར་དཔག་པའི་བློས་གཏོང་ཐུབ་པའི་བློ་སྤོབས་རྙེད་ཐུབ་ཅིང་། ལྷག་པར་བོད་ཀྱི་ཉག་ཕྲ་བའི་དུས་ཚོད་འདིར་ཚང་མས་ནུས་པ་མཉམ་སྤུངས་ཀྱིས་བོད་ཀྱི་འཐབ་རྩོད་དང་། བོད་མིའི་སྒྲིག་འཛུགས། དམངས་གཙོ་བཅས་སྲ་བརྟན་ཡོང་བར་མཉམ་རུབ་ཀྱི་ནུས་པ་འདོན་དགོས་སྐོར་སོགས་གསུངས་སོང་།
བཀའ་ཟུར་བཀྲ་ཤིས་དབང་འདུས་ལགས་ཀྱིས། ངའི་མི་ཚེ། བོད་རང་དབང་ལུང་པར་སྐྱེས། བཙན་བྱོལ་ནང་སྲི་ཞུ་བསྒྲུབས་ཞེས་པའི་དཔེ་དེབ་འདི་ནི། ཕྱི་ལོ་ ༢༠༡༡ ལོར་བཀའ་བློན་ཁྲི་པའི་འོས་བསྡུ་གནང་རྗེ
གསར་འགོད་པ། བསྟན་འཛིན་ཕུར་བུ། དཔལ་ལྡན། ཚེ་རིང་རྣམ་རྒྱལ།
