བོད་ཀྱི་གསོ་རིག་ལྷན་ཚོགས་ཀྱི་ལོ་རྒྱུས་ཕྱོགས་སྒྲིག་དཔེ་དེབ་དབུ་འབྱེད་གནང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་མ་འོངས་བའི་བོད་ཀྱི་གསོ་རིག་ལྷན་ཚོགས་ཀྱི་གནས་སྟངས་ཐད་བོད་ཀྱི་སྨན་རྩིས་ཁང་ཚང་མས་ཐུན་མོང་གི་ནུས་པ་སྤུངས་རྒྱུ་གལ་ཆེན་པོ་ཡིན་སྐོར་གསུངས་སོང་།

དེ་རིང་སྔ་དྲོ་ཆུ་ཚོད་ ༡༠ ཐོག་བཞུགས་སྒར་དྷ་རམ་ས་ལའི་བོད་ཀྱི་གསོལ་མགྲོན་ཁང་གི་ཚོགས་ཁང་དུ། བོད་ཀྱི་གསོ་བ་རིག་པའི་ལྷན་ཚོགས་ཀྱི་གོ་སྒྲིག་འོག བོད་ཀྱི་གསོ་བ་རིག་པའི་ལྷན་ཚོགས་དབུ་བརྙེས་ནས་ལོ་ ༢༠ འཁོར་བ་དང་བསྟུན།  བོད་ཀྱི་གསོ་བ་རིག་པའི་ལྷན་ཚོགས་ཀྱི་ལོ་རྒྱུས་ཕྱོགས་སྒྲིག་གི་དཔེ་དེབ་དབུ་འབྱེད་ཀྱི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མིའི་སྒྲིག་འཛུགས་འཕྲོད་བསྟེན་དྲུང་ཆེ་ཟླ་བ་ཚུལ་ཁྲིམས་ལགས། བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་གཙོ་སྨན་རམས་པ་དྲུང་འཚོ་ཚེ་རིང་ཐག་གཅོད་ལགས།  ཚོགས་གཞོན་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་སྨན་དགེ་རྡོ་རྗེ་དགྲ་འདུལ་ལགས་བཅས་བོད་ཀྱི་གསོ་རིག་ལྷན་ཚོགས་ཀྱི་སྨན་པ་ ༥༠ ལྷག་ལྷན་འཛོམས་བྱུང་འདུག

སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་ཀྱི་གསོ་བ་རིག་པའི་ལྷན་ཚོགས་ཀྱི་སྤྱི་ཡོངས་ཀྱི་གནས་སྟངས་དང་། མ་འོངས་བར་ཁ་ཕྱོགས་གང་དུ་བསྐྱོད་པའི་གནས་སྟངས་ཐད། བོད་ཀྱི་གསོ་རིག་ལྷན་ཚོགས་དང་། འགྲོ་ཕན་སྨན་རྩིས་ཁང་གི་གྲངས་ཐོ་སྟེང་ཞིབ་འཇུག་ཚད་ལྡན་བྱ་དགོས། ཞིབ་འཇུག་བྱེད་སྟངས་ཀྱང་འཛིན་སྐྱོང་ཐོག་གང་འཚམ་རྒྱུས་མངའ་ཡོད་མཁན་དང་། ཕྱི་མི་ཆེད་མཁས་པ་མཉམ་འབྲེལ་གྱིས་ཞིབ་འཇུག་བྱས་ཏེ་སྙན་ཐོ་བཏོན་དགོས། སྙན་ཐོ་ནང་གི་གྲུབ་འབྲས་གཞི་ལ་བཞག་པའི་ཐོག བོད་ཀྱི་གསོ་བ་རིག་པའི་ལྷན་ཚོགས་དང་། འགྲོ་ཕན་སྨན་རྩིས་ཁང་། ཝཱ་ཎ་གསོ་རིག་སྡེ་ཚན། ལྕགས་པོ་རིའི་བོད་སྨན་སློབ་གཉེར་ཁང་སོགས་ཀྱིས་མ་འོངས་བར་ཁ་ཕྱོགས་གང་དུ་སླེབས་མིན་ཐོག་བསམ་བློ་བཏང་སྟེ། ལས་དོན་བྱེད་ཕྱོགས་བང་སྒྲིག་ཐུབ་ཚེ་ཐུགས་ཕན་གསོ་ཐུབ་པ་ཞིག་ཡོང་བར་བསམ་གྱི་འདུག ལས་དོན་བྱེད་ཕྱོགས་ཀྱང་ས་གནས་སུ་ཕྱིན་ཏེ་ལས་ཀའི་འཆར་གཞི་ཡོད་པ་ལྟར། དངོས་སུ་ལག་བསྟར་བྱེད་ཐབས་ཀྱི་ལམ་ཁར་བསྐྱོད་པར་བགྲོ་གླེང་བྱ་དགོས་པ་ལས། ལས་དོན་འགྲུབ་པར་རེ་བ་ཅིའང་མེད་ཚེ་ཁ་སྟོང་བའི་སྐད་ཆ་རེད། སྨན་པ་རྣམས་ཀྱིས་དེའི་ཐོག་ཏུ་རེ་བ་ཡོད་པར་དགོངས་ཀྱི་ཡོད་ན་ཚང་མས་ཤུགས་བརྒྱབ་ནས་གདོང་ལེན་བྱ་དགོས། ལས་གཞི་དེའང་ཕུགས་རྒྱང་རིང་པོའི་ཐོག་མ་འོངས་བའི་ལོ་ལྔ་དང་བཅུའི་རྗེས་སུ་ག་འདྲ་ཆགས་པར་བསམ་བློ་གཏོང་དགོས། གནས་སྟངས་འདིའི་ཐོག་བོད་ཀྱི་གསོ་རིག་ལྷན་ཚོགས་དང་སྨན་རྩིས་ཁང་ཚང་མས་མཉམ་རུབ་ཀྱི་ཐོག་ནས་ཐུན་མོང་གི་ནུས་པ་སྤུངས་རྒྱུ་གལ་ཆེན་པོ་རེད། ཅེས་གསུངས་སོང་།

འདི་གའི་གསར་འགོད་པས་ཐེངས་འདིའི་ཚོགས་འདུ་སྐོར་ལ་བོད་ཀྱི་གསོ་རིག་ལྷན་ཚོགས་ཀྱི་ཚོགས་གཙོ་ཚེ་རིང་ཐག་གཅོད་ལགས་སུ་དྲིས་པར་ཁོང་གིས། དེ་རིང་གི་ཚོགས་འདུ་འཚོགས་པའི་དགོས་པ་གཙོ་བོ་ནི་བོད་ཀྱི་གསོ་བ་རིག་པའི་ལྷན་ཚོགས་དབུ་བརྙེས་ནས་ལོ་ ༢༠ འཁོར་བ་དང་སྟབས་བསྟུན། ལྷན་ཚོགས་འདིའི་བྱུང་རབས་དང་ལོ་རྒྱུས་ཕྱོགས་སྒྲིག་བྱས་ཡོད་པའི་དཔེ་དེབ་ཅིག་དབུ་འབྱེད་ཞུས་ཡོད།  དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་ལ་བོད་ཀྱི་སྨན་རྩིས་ཁང་དང་། བོད་མིའི་སྒྲིག་འཛུགས་ཀྱི་གཞུང་ཞབས་ཟུར་བ། སྐུ་སྲུང་ཟུར་པ་བཅས་ནས་བརྟན་བཞུགས་ཕུལ་གྱི་ཡོད་པའི་ཐོག་ཕྱི་རྒྱལ་ཁག་ནས་སྨན་པ་མང་པོ་ཞིག་ཕེབས་ཀྱི་ཡོད་པར་བསྟུན། ཁོང་རྣམས་ལ་གསོ་བ་རིག་པའི་ལྷན་ཚོགས་ངོ་སྤྲོད་ཞུ་རྒྱུ་དང་། རྒྱ་གར་ནང་བོད་ཀྱི་གསོ་བ་རིག་པའི་ལྷན་ཚོགས་ལ་ཁྲིམས་མཐུན་གྱི་ངོས་འཛིན་བྱས་པའི་བརྒྱུད་རིམ་ནང་བཀའ་མོལ་དང་གནས་ཚུལ་གོ་སྟངས་འདྲ་མིན་ཡོད་པས། དེའི་ཐོག་ཏུ་གསལ་བཤད་དང་དྲི་བ་དྲིས་ལན་བྱ་རྒྱུ་ཆགས་བསྡད་ཡོད། ཅེས་འགྲེལ་བརྗོད་གནང་སོང་།

བོད་ཀྱི་གསོ་རིག་ལྷན་ཚོགས་ཀྱི་ལོ་རྒྱུས་ཕྱོགས་སྒྲིག་དཔེ་དེབ་སྐོར་ལ་ཁོང་གིས། དཔེ་དེབ་འདིའི་ནང་དོན་གཙོ་བོ་ནི་བོད་ཀྱི་གསོ་བ་རིག་པའི་ལྷན་ཚོགས་སྐབས་བདུན་པའི་ལས་སྡོམ་སྙིང་བསྡུས་རེད། བོད་ཀྱི་གསོ་བ་རིག་པའི་ལྷན་ཚོགས་ཀྱི་ལས་འགན་གཙོ་བོ་སྨན་པ་དང་། མཐོ་སློབ། སྨན་སྦྱོར་ཁང་སོགས་དེབ་བསྐྱལ་བྱས་ཡོད་པ་དེབ་འདིའི་ནང་དུ་གསལ་ཡོད་ཅིང་།  ད་ལྟའི་ཆར་དེབ་བསྐྱལ་བྱས་པའི་སྨན་པ་ ༦༣༠ ལྷག་ཡོད། དེ་བཞིན་བོད་ཀྱི་གསོ་རིག་ལྷན་ཚོགས་ཀྱིས་རྒྱལ་སྤྱིའི་ཚོགས་འདུ་དང་། ཤེས་ཡོན་གོང་འཕེལ་གྱི་ཟབ་ཁྲིད། བོད་ཀྱི་གསོ་བ་རིག་པའི་སྨན་པའི་ནང་གཟེངས་སུ་ཐོན་པའི་གཡུ་ཐོག་གཟེངས་རྟགས་བཅས་གོ་སྒྲིག་ཞུ་བཞིན་ཡོད། རྒྱ་གར་ནང་བོད་ཀྱི་གསོ་བ་རིག་པར་ཁྲིམས་མཐུན་གྱིས་ངོས་འཛིན་བྱས་པའི་བརྒྱུད་རིམ་ཁྲོད། རྒྱ་གར་གཞུང་དང་ཡིག་འབྲེལ་བྱས་པ་སོགས་དེབ་འདིའི་ནང་ཚུད་ཀྱི་ཡོད་པས། མ་འོངས་བར་ལོ་རྒྱུས་ཐོག་དཔེ་དེབ་འདི་གལ་ཆེན་པོ་ཆགས་ཀྱི་རེད། ཅེས་འགྲེལ་བརྗོད་གནང་བྱུང་།

བོད་ཀྱི་གསོ་རིག་ལྷན་ཚོགས་ཀྱི་གནས་བབ་ཐོག་བགྲོ་གླེང་ཡོང་བཞིན་པའི་སྐོར་ལ་ཁོང་གིས། བོད་ཀྱི་གསོ་རིག་ལྷན་ཚོགས་ཀྱི་གནས་བབ་ཐོག་བགྲོ་གླེང་ཡོང་དོན་ནི་རྒྱ་གར་གཞུང་གི་ངོས་ནས་མཐོ་སློབ་དང་སྨན་པ་དེབ་བསྐྱལ་བྱེད་བཞིན་ཡོད་པས། ང་ཚོས་དེབ་བསྐྱལ་གཉིས་བྱེད་དགོས་མིན་གྱི་གནས་སྟངས་ཤིག་རེད། གཞུང་དང་སྒེར་གཉིས་ལས་རྒྱ་གར་གཞུང་ལ་དེབ་བསྐྱལ་བྱས་ཚེ་ཁེ་ཕན་ཆེ་བའི་གནས་སྟངས་ཤིག་ཡོང་གི་ཡོད་ཅིང་། རྒྱ་གར་གཞུང་གིས་བོད་ཀྱི་གསོ་བ་རིག་པ་ཁྲིམས་ཐོག་ནས་ངོས་འཛིན་བྱས་ཏེ་ལོ་ ༢༠ ལྷག་འགྲོ་བཞིན་ཡོད་པ་རེད། ཐོག་མར་བཙན་བྱོལ་བོད་མིའི་ཁྲིམས་བཟོ་ལྷན་ཚོགས་ཀྱིས་བོད་ཀྱི་གསོ་བ་རིག་པར་ཁྲིམས་ཀྱི་བསྐུར་བའི་ལས་འགན་དག་སྒྲུབ་ཐུབ་མིན་གྱི་གནས་བབ་ཀྱི་རྐྱེན་གྱིས། བོད་མི་མང་སྤྱི་འཐུས་ལྷན་ཚོགས་སུ་བསྐྱར་ཞིབ་དགོས་པའི་ཞུ་སྙན་ཕུལ་ཡོད། ཅེས་འགྲེལ་བརྗོད་གནང་བྱུང་།

བོད་ཀྱི་གསོ་བ་རིག་པའི་ལྷན་ཚོགས་ནི་བཙན་བྱོལ་བོད་མིའི་བཅའ་ཁྲིམས་དོན་ཚན་ ༡༨ པའི་དགོངས་དོན་འོག བོད་མི་མང་སྤྱི་འཐུས་ལྷན་ཚོགས་སྐབས་བཅུ་གསུམ་པའི་གྲོས་ཚོགས་ཚོགས་དུས་ལྔ་པའི་སྐབས། བཙན་བྱོལ་བོད་མིའི་བོད་ཀྱི་གསོ་བ་རིག་པའི་སྨན་པའི་ལྷན་ཚོགས་ཀྱི་ཁྲིམས་ཡིག་ཅེས་གསར་དུ་གཏན་ལ་ཕབ་སྟེ། ༧གོང་ས་རྒྱལ་བ་རིན་པོ་ཆེ་མཆོག་ནས་མཚན་རྟགས་སྩལ་ཅིང་། ཕྱི་ལོ་ ༢༠༠༤ ཟླ་ ༡ ཚེས་ ༥ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག བོད་ཀྱི་གསོ་བ་རིག་པའི་སྨན་པའི་ཚོགས་ཆེན་ཐེངས་དང་པོ་འཚོགས་པ་དང་བསྟུན། ལྷན་ཚོགས་འདིའི་ཁྲིམས་ཡིག་གསལ་བསྒྲགས་བྱས་ཏེ་ཐོག་མར་དབུ་བརྙེས་པ་ཞིག་ཡིན་འདུག

གསར་འགོད་པ། བྱམས་པ་ཚེ་རིང་།