༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས། 

༧མགོན་པོ་གང་ཉིད་བོད་ལུགས་ལྟར་དགུང་གྲངས་དགུ་བཅུའི་འཁྲུངས་སྐར་དང་བསྟུན་ཚོགས་པ་ཁག་གསུམ་གྱིས་བརྟན་བཞུགས་བསྟར་འབུལ་ཞུས་སོང་།

དེ་རིང་ཕྱི་ཟླ་ ༦ ཚེས་ ༡༡ ཉིན་༧གོང་ས་རྒྱལ་བ་རིན་པོ་ཆེ་མཆོག་བོད་ལུགས་ལྟར་དགུང་གྲངས་དགུ་བཅུའི་འཁྲུངས་སྐར་དང་བསྟུན།  བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ཀྱི་ལས་བྱེད་ཟུར་བ་དང་། སྐུ་སྲུང་ཟུར་བ། དེ་བཞིན་འགྲོ་ཕན་བོད་ཀྱི་སྨན་རྩིས་ཁང་བཅས་ཀྱིས་སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་ཅིང་། སྐབས་དེར་༧མགོན་པོ་གང་ཉིད་ཀྱིས་བྱང་ཆུབ་སེམས་དང་སྟོང་ཉིད་ཀྱི་ལྟ་བ་ཉམས་ལེན་གནང་རྒྱུ་དེ་ཧ་ཅང་གལ་ཆེན་པོ་ཡིན་སྐོར་སོགས་ཀྱི་བཀའ་སློབ་བཟང་པོ་བསྩལ་སོང་། 

བརྟན་བཞུགས་སྐབས་༧མགོན་པོ་གང་ཉིད་ཀྱིས། དེ་རིང་ཆོས་གྲོགས་ཚོས་བརྟན་བཞུགས་ཕུལ་བ་རེད། ངོས་རང་ལོ་བརྒྱ་དང་བཅུ་གྲངས་ཤིག་བསྡད་རྒྱུའི་རྨི་ལམ་གསལ་པོ་ཞིག་འདུག ངོས་ཀྱི་མཇིང་པ་སྒང་ནས་དཔལ་ལྡན་ལྷ་མོས། ཁྱེད་རང་ལོ་བརྒྱ་དང་བཅུ་གྲངས་ཤིག་བསྡད་རྒྱུ་རེད་གསུང་གི་འདུག ད་ལྟ་ང་རང་ཚོ་བོད་པ་ལ་དཀའ་ངལ་ཆེན་པོ་ཡོད་པས། བོད་པ་སྤྱི་མཐུན་གྱི་ལས་དང་སྨོན་ལམ་གྱི་སྟོབས་ལས་ངོས་རང་མདོ་སྨད་ནས་སྐྱེས་བ་ཞིག་ལ་བོད་པ་མང་པོ་ཞིག་གིས་དགའ་པོ་བྱ་རྒྱུ་ཞིག་དང་། ལུང་རྟོགས་ཀྱི་བསྟན་པར་ཞབས་འདེགས་གང་འཚམ་ཞིག་སྒྲུབ་མཁན་ཞིག་ཆགས་དུས། ལྷ་མོའི་ལུང་བསྟན་དེའང་རྒྱུ་མཚན་ལྡན་པ་ཞིག་འདུག ངོས་རང་ལས་དང་སྨོན་ལམ་གྱི་དབང་གིས་སྐྱེས་བ་ཞིག་ཡིན་དུས། ལྷ་མོའི་ལུང་བསྟན་བཞིན་ལོ་བརྒྱ་དང་བཅུ་གྲངས་ཤིག་སྡོད་ཀྱི་རེད། ཁྱེད་རང་ཚོ་ཚང་མ་བློ་བདེ་པོ་བྱས་ནས་བཞུགས། ཞེས་གསུངས་སོང་།

 ཡང་༧མགོན་པོ་གང་ཉིད་ཀྱིས། གལ་ཆེ་ཤོས་དེ་ང་རང་ཚོ་གསོན་པའི་རིང་ལ། ང་ཚོ་བཅོམ་ལྡན་འདས་ཀྱི་ཆོས་པ་ཞིག་ཡིན་དུས། སངས་རྒྱས་བཅོམ་ལྡན་འདས་ཀྱི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བའི་སྐོར་གསུངས་པ་དེ་ང་ཚོས་ག་ཚོད་ཐུབ་ཐུབ་ཀྱིས་ལག་ལེན་བསྟར་དགོས་རེད། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ཡག་པོ་ཞིག་བསམ་བློ་བཏང་བ་ཡིན་ན་མི་གོ་ཆོད་པ་ཞིག་རེད། ངོས་རང་ལ་མཚོན་ནའང་ཉིན་རེ་བཞིན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་བསམ་བློ་ཞེ་དྲགས་གཏོང་གི་ཡོད་སྟབས། ཆོས་གྲོགས་ཚོས་ཀྱང་ཉིན་རེ་བཞིན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་དགོངས་པ་ཡག་པོ་ཞིག་བཞེས། ང་ཚོས་ཚོགས་བསགས་སྒྲིབ་སྦྱོང་བྱ་རྒྱུའི་ཐབས་ཤེས་ཡག་ཤོས་དེ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསྒོམ་རྒྱུ་དེ་ཆགས་ཡོད། དཔལ་ལྡན་ལྷ་མོ་དགྱེས་པ་བྱེད་པའི་མཆོད་པ་དེའང་བྱང་ཆུབ་ཀྱི་སེམས་དང་སྟོང་ཉིད་ལྟ་བ་བསྒོམ་རྒྱུ་དེ་གཙོ་བོ་ཆགས་ཀྱི་འདུག སངས་རྒྱས་བཅོམ་ལྡན་འདས་དགྱེས་པ་སྐྱེ་རྒྱུའི་སྒྲུབ་པའི་མཆོད་པ་ཡག་ཤོས་དེའང་བྱང་ཆུབ་ཀྱི་སེམས་དང་སྟོང་ཉིད་ལྟ་བ་བསྒོམ་རྒྱུ་དེ་གཙོ་བོ་ཆགས་ཀྱི་ཡོད་རེད། ང་ཚོ་བོད་པའི་སྤྱི་དོན་ལ་ཆ་བཞག་ནའང་ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་དང་སྟོང་ཀྱི་ལྟ་བ་བསྒོམས་ནས་ཕྱིན་པ་ཡིན་ན། བོད་དབང་བསྒྱུར་བྱེད་མཁན་གྱི་རྒྱ་ནག་ལ་མཚོན་ནའང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་དོ་སྣང་བྱེད་མཁན་ཇེ་མང་ནས་ཇེ་མང་དུ་འགྲོ་ཡི་འདུག་ལ། འཛམ་བུ་གླིང་ཤར་ནུབ་དང་ལྷོ་བྱང་སོགས་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་དོ་སྣང་བྱེད་མཁན་དེ་ཤུགས་ཆེ་རུ་ཆེ་རུ་འགྲོ་ཡི་འདུག ཚང་མའི་ཧུར་ཐག་གིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་དགོངས་པ་ཡག་པོ་ཞིག་བཞེས། ཞེས་གསུངས་སོང་། 

 ཡང་༧མགོན་པོ་གང་ཉིད་ཀྱིས། བརྟན་བཞུགས་ཕུལ་བ་ནི་དངུལ་ཕུལ་བའི་སྐད་ཆ་ཞིག་མ་རེད། སོ་སོས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉམས་ལེན་ཡག་པོ་བྱས་ན། དངོས་གནས་དྲང་གནས་སྒྲུབ་པའི་མཆོད་པ་ཡག་ཤོས་དེ་ཆགས་ཡོད་པ་རེད་ལ། བླ་མ་དགྱེས་པའི་མཆོད་པའང་དེའི་ཐོག་ནས་ཡོང་གི་རེད། ངོས་རང་གི་མི་ཚེ་མཚོན་ན་དཔལ་ལྡན་ལྷ་མོའི་ལུང་བསྟན་གསལ་པོ་ཞིག་ཡོད། བྱས་ཙང་ངོས་རང་ལོ་མང་པོ་ཞིག་བསྡད་རྒྱུར་ཕལ་ཆེར་ཐག་ཆོད་པ་ཞིག་རེད། ངོས་རང་གིས་ཧུར་ཐག་འབད་ཐག་བྱེད་ཀྱི་རེད། ཁྱེད་རང་ཚོས་ཀྱང་ཧུར་ཐག་འབད་ཐག་གནང་ཤོག ཅེས་གསུངས་སོང་། 

 ད་ལྟ་དགའ་ལྡན་ཕོ་བྲང་ཡིག་ཚང་གི་དྲ་རྒྱར་གསལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། འདི་ལོའི་ཕྱི་ཟླ་ ༩ ཚེས་ ༡༢ དང་ ༡༣ ཉིན་གྲངས་གཉིས་རིང་ལྷོ་ཤར་ཨེ་ཤ་ཡའི་དད་ལྡན་རྣམས་ལ་ཆོས་འབྲེལ་དང་། ཕྱི་ཟླ་ ༩ ཚེས་ ༡༨ ཉིན་བོད་ཀྱི་བུད་མེད་ལྷན་ཚོགས་དང་།  བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག  ཌལ་ཧོར་སློབ་ཟུར་བཅས་ནས་བརྟན་བཞུགས་བསྟར་འབུལ། དེ་བཞིན་ཕྱི་ཟླ་ ༩ ཚེས་ ༣༠ ནས་ཉིན་གྲངས་གཉིས་རིང་ཐའེ་ཝན་གྱི་དད་ལྡན་ཆོས་ཞུ་བ་རྣམས་ལ་སྤྱོད་འཇུག་ཆེན་མོའི་ལེའུ་བརྒྱད་པའི་ཆོས་འབྲེལ་བསྩལ་རྒྱུ་དང་། ཕྱི་ཟླ་ ༡༠ ཚེས་ ༡ ཉིན་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག

གསར་འགོད་པ། དཔལ་ལྡན། 

རྩོམ་སྒྲིག་བྱེད་མཁན། པདྨ་མཚོ།