ཁེ་ན་ཌའི་བོད་དོན་ལྷན་ཁང་གིས་གནས་ཚུལ་སྤེལ་བ་ལྟར་ན། ཁེ་ན་ཌའི་གྲོས་ཚོགས་འོག་མའི་ནང་གྲོས་ཚོགས་འཐུས་མི་སྐུ་ཞབས་ཨེ་ལེག་སི་(Alexis Brunelle-Duceppe) ལགས་ཀྱི་གྲོས་འདོན་འོག བོད་མི་རྣམས་ལ་རང་ཐག་རང་གཅོད་ཀྱི་གྲོས་འཆར་ཞིག་ལ་གྲོས་ཚོགས་ཀྱི་འཐུས་ཡོངས་ནས་རྒྱབ་སྐྱོར་གནང་སྟེ་སྤྱི་མོས་གཏན་འབེབ་གནང་ཡོད་འདུག
གཏན་འབེབ་ཟིན་པའི་གྲོས་འཆར་དེའི་ནང་དུ། བོད་མི་རྣམས་མི་དམངས་དང་བོད་དེ་རྒྱལ་ཁབ་ལ་ངོས་འཛིན་བྱས་ཏེ། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཀྱི་གཙོས་ཆོས་ལུགས་དང་སྤྱི་ཚོགས། དཔལ་འབྱོར། རིག་གཞུང་སོགས་དང་འབྲེལ་བའི་རང་ཐག་རང་གཅོད་བྱེད་པའི་ཐོབ་ཐང་རང་བཞིན་གྱི་ཡོད། རྒྱ་ནག་གཞུང་གིས་༧གོང་ས་མཆོག་གི་སྐུའི་ཡང་སྲིད་ངོས་འཛིན་བྱེད་པར་ཐེ་གཏོགས་བྱེད་མི་ཆོག་པ་དང་། རྒྱ་ནག་གཞུང་གིས་འཆར་གཞི་ལྡན་པའི་ཐོག་ནས་བོད་ཀྱི་ཆོས་དང་རིག་གཞུང་སོགས་བཙན་སྒྱུར་བྱེད་བཞིན་པར་སྐྱོན་བརྗོད་སོགས་གནང་འདུག
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨེག་སི་ (X) སྤྱི་ཚོགས་དྲ་ལམ་བརྒྱུད། ཁེ་ན་ཌའི་གྲོས་ཚོགས་འོག་མའི་ནང་བོད་མིར་རང་ཐག་རང་གཅོད་ཀྱི་གྲོས་འཆར་གཏན་འབེབ་གནང་བ་དེས་བོད་ནང་གི་བོད་མི་ཚོའི་བློས་གཏོང་གནང་བའི་འཐབ་རྩོད་དེ་བརྗེད་མེད་པའི་བརྡ་ལན་ཤུགས་ཆེན་པོ་སྤྲད་ཡོད། གྲོས་ཚོགས་འཐུས་མི་ (Alexis Brunnelle-Duceppe) ལགས་དང་། གྲོས་འཆར་ལ་རྒྱབ་སྐྱོར་གནང་མཁན་ཆབ་སྲིད་ཚོགས་པ་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། གྲོས་འཆར་འདི་ཡིས་རྒྱལ་སྤྱིའི་སྤྱི་ཚོགས་ཁྲོད་བོད་དོན་ལ་རྒྱབ་སྐྱོར་ཇེ་ཆེར་འགྲོ་བཞིན་པ་གསལ་པོར་བསྟན་པ་ཙམ་མ་ཡིན་པར། རྒྱ་ནག་གིས་བོད་ནང་གོ་རིམ་ལྡན་པའི་སྒོ་ནས་བོད་ཀྱི་རིག་གཞུང་བཙན་སྒྱུར་བྱེད་བཞིན་པ་དང་། ༧གོང་ས་མཆོག་གི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་བཞིན་པ་བཅས་ལ་གདོང་ལེན་བྱེད་ངེས་རེད། ཅེས་གསུངས་འདུག
ཁེ་ན་ཌའི་བོད་དོན་ལྷན་ཁང་གི་གནས་ཚུལ་ནང་། ཐེངས་འདིར་ཁེ་ན་ཌའི་གྲོས་ཚོགས་ནང་བོད་དོན་གྲོས་འཆར་གཏན་འབེབ་བྱུང་ནི། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས། ཁེ་ན་ཌའི་བོད་དོན་ལྷན་ཚོགས་བཅས་ཀྱིས་ཁེ་ན་ཊའི་གྲོང་ཁྱེར་མོན་ཀྲེལ་དང་། ཨོ་ཊ་བ། ཨ་རིའི་ཝ་ཤིང་ཀྲོན་ཁུལ་དུ་ཁུ་བེག་(Bloc Québécois) སྲིད་དོན་ཚོགས་པའི་མགོ་ཁྲིད་ཚོ་དང་ལྷན་དུ་མཇལ་འཕྲད་ཞུས་ཏེ། ཞུ་སྐུལ་རིམ་པ་གནང་བ་ལ་བརྟེན་ནས་བྱུང་བ་ཞིག་ཡིན་པ་གསལ་འདོན་བྱས་འདུག་ལ། ཕྱི་ལོ་ ༢༠༢༤ ཟླ་ ༤ ནང་སྲིད་སྐྱོང་སྤེན་པ་ཚེ་རིང་མཆོག་བྱང་ཨ་རིའི་ཁུལ་དུ་ཉིན་གྲངས་ ༢༠ ཙམ་རིང་གཞུང་འབྲེལ་ཕྱོགས་ཕེབས་གནང་སྐབས་ཁུ་བེག་སྲིད་དོན་ཚོགས་པའི་ (Bloc Québécois) མགོ་ཁྲིད་དང་། གྲོས་ཚོགས་འཐུས་མི་ཨེ་ལེག་སི་ (Alexis Brunnelle-Duceppe) ལགས་དང་ལྷན་མཇལ་མོལ་གནང་སྟེ། བོད་རྒྱའི་དཀའ་རྙོག་དང་བོད་མི་རྣམས་ནས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་བྱེད་ཀྱི་ཡོད་སྐོར་ཞུ་སྐུལ་གནང་ཡོད་འདུག
