རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ནང་ལོ་ངོ་ ༡༨ ལྷག་རིང་ལས་ཀ་བྱེད་མྱོང་བའི་བོད་ལྗོངས་དམར་ཤོག་དྲུང་ཆེ་ཟུར་པ་ཝུའུ་ཡིན་ཅེ་ཡིས་ཁྲིམས་འགལ་ཚབས་ཆེན་བྱས་ཡོད་པའི་དོགས་གཞིའི་འོག་ཞིབ་བཤེར་བྱེད་བཞིན་ཡོད་འདུག
བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཝུའུ་ཡེན་ཅི་ལ་ཞིབ་བཤེར་བྱེད་ཀྱི་ཡོད་པ་རེད། དྲ་ལམ་གྱི་པར།
ཟླ་འདིའི་ཕྱི་ཚེས་ ༡༦ ཉིན་རྒྱ་ནག་དམར་ཤོག་སྒྲིག་ཁྲིམས་ཞིབ་བཤེར་ཁང་གིས། བོད་རང་སྐྱོང་ལྗོངས་ཟེར་བའི་དྲུང་ཆེ་ཟུར་པ་ཝུའུ་ཡིན་ཅེ་ཟེར་བས་དམར་ཤོག་གི་ཁྲིམས་སྒྲིག་དང་འགལ་བའི་ནག་ཉེས་ཚབས་ཆེན་བསགས་ཡོད་པའི་དོགས་གཞིའི་འོག་ཞིབ་བཤེར་བྱེད་བཞིན་ཡོད་སྐོར་བསྒྲགས་འདུག་ལ། ཝུའུ་ཡིན་ཅི་ནི་དམར་ཤོག་ཚོགས་ཆེན་ ༢༠ རྗེས་སུ་ཞིབ་བཤེར་བྱས་པའི་བོད་རང་སྐྱོང་ལྗོངས་ཟེར་བའི་མཐོ་རིམ་མགོ་འཁྲིད་ ༥ པ་དེ་ཆགས་འདུག་ལ། འདི་ལོའི་ཕྱི་ཟླ་ ༡ ནས་ ༦ པ་བར་དུ་བོད་རང་སྐྱོང་ལྗོངས་ཟེར་བ་ནས་འབྲིང་རིམ་ཡན་གྱི་ལས་བྱེད་ ༣༣ ལ་ཞིབ་བཤེར་བྱས་ཡོད་འདུག
ཝུའུ་ཡིན་ཅེ་ནི་ཕྱི་ལོ ༡༩༥༦ ལོར་རྒྱ་ནག་ཧྲན་ཏུང་ཞིང་ཆེན་དུ་སྐྱེས་ཤིང་། ཕྱི་ལོ་ ༡༩༨༧ ལོར་རྒྱ་ནག་དམར་ཤོགས་ཚོགས་པའི་ཁོངས་སུ་འཛུལ། ཕྱི་ལོ་ ༢༠༠༣ ནས་བཟུང་ཁོས་བོད་རང་སྐྱོང་ལྗོངས་ཟེར་བའི་སློབ་གསོ་ཁང་གི་དམར་ཤོག་ཚོགས་པའི་སྤྱི་ཁྱབ་དྲུང་ཆེ་གཞོན་པ་དང་། སློབ་གསོ་ཁང་གི་འགན་འཛིན། བོད་རང་སྐྱོང་ལྗོངས་ཟེར་བའི་སྲིད་གཞུང་གི་མགོ་ཁྲིད་གཞོན་པ། བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་རྒྱུན་ལས་དང་དྲིལ་བསྒྲགས་ཁང་གི་འགན་འཛིན། བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་རྒྱུན་ལས་དང་། ལས་ཡུན་མཐའ་མ་དེ་ཕྱི་ལོ་ ༢༠༡༦ ནས་ ༢༠༢༡ ཟླ་ ༡༠ བར་དམར་ཤོག་ཚོགས་པའི་དྲུང་ཆེ་བྱས་ཡོད་པ་རེད། མི་དེས་བོད་ནང་སྲིད་དབང་འཛིན་སྐབས་བོད་ཀྱི་རྒྱལ་ས་ལྷ་ས་གཙོ་བོར་གྱུར་བའི་བོད་རང་སྐྱོང་ལྗོངས་ཟེར་བའི་ནང་སྔར་ལས་ལྷག་པའི་དམ་དྲག་གི་སྲིད་ཇུས་ལག་བསྟར་བྱས་ཡོད་པ་མ་ཟད། བོད་ཀྱི་མདོ་སྟོད་སྨད་ནས་ཡོང་མཁན་ཚོར་དམ་དྲག་དང་། བོད་རང་སྐྱོང་ལྗོངས་ཟེར་བའི་སྲིད་གཞུང་གི་ལས་བྱེད་དང་བོད་ལྗོངས་སློབ་གྲྭ་ཆེན་མོ་སོགས་ཀྱི་དགེ་སློབ་རྣམས་ཕོ་བྲང་པོ་ཏ་ལ་སོགས་སུ་མཆོད་མཇལ་དུ་འགྲོ་བར་བཀག་སྡོམ་བྱས་པ་སོགས་བསམ་ཡུལ་ལས་འདས་པའི་དམ་དྲག་ཤུགས་ཆེན་བྱས་ཡོད་པ་རེད།
འདི་ལོར་ཁྲིམས་བཤེར་ཁྲིམས་ཆད་ཕོག་པའི་བོད་རང་སྐྱོང་ལྗོངས་ཟེར་བའི་མཐོ་རིམ་དཔོན་རིགས་བཞི།
རྒྱ་ནག་དམར་ཤོག་ཚོགས་པས་བོད་རང་སྐྱོང་ལྗོངས་ཟེར་བ་དང་ཡུ་གུར་མི་རིགས་རང་སྐྱོང་ཁུལ་ཟེར་བ་གཉིས་ཆབ་སྲིད་ཀྱི་གནད་འགག་ཆེན་པོ་ཞིག་ཏུ་ངོས་འཛིན་གྱིས་དམར་ཤོག་དྲུང་ཆེ་རིམ་པ་རྣམས་ཧུར་བརྩོན་ཅན་དང་དབུས་གཞུང་གི་མཛུམ་མོ་གར་སྟོན་ཤར་བྱེད་མཁན་གྱི་དཔོན་རིགས་ཆེད་བསྐོས་བྱེད་ཀྱི་ཡོད་པ་མ་ཟད། གནད་འགག་ཅན་གྱི་ཁུལ་དེ་གཉིས་ཀྱི་དམར་ཤོག་དྲུང་ཆེ་ཕན་ཚུན་བརྗེ་བསྒྱུར་བྱས་པའི་གནས་ཚུལ་ཡང་ཡོང་གི་ཡོད་པ་རེད།
ཞི་ཅིང་ཕིན་གྱིས་རྒྱ་ནག་དམར་ཤོག་ཚོགས་པའི་ཏང་སྲིད་དམག་གསུམ་གྱི་དབང་ཆ་བཟུང་བ་ནས། སྟག་དང་སྦྲང་མ་ལེབ་རྡུང་གི་སྲིད་ཇུས་འོག བོད་དང་ཡུ་གུར། སོག་པོ་སོགས་བཙན་བཟུང་བྱས་པའི་གྲངས་ཉུང་མི་རིགས་ས་ཁུལ་གྱི་མགོ་ཁྲིད་མང་པོ་ཞིག་གཏན་འབེབས་དོན་མཚན་བརྒྱད་ཟེར་བ་དང་། རྒྱ་ནག་དམར་ཤོག་ཚོགས་པའི་སྒྲིག་ལམ་དང་འགལ་བ་སོགས་ཀྱི་ནག་ཉེས་ཕོག་གི་ཡོད་པ་རེད། འདི་ལོ་གཅིག་པུར་བོད་རང་སྐྱོང་ལྗོངས་ཟེར་བའི་ནང་མཐོ་རིམ་མགོ་འཁྲིད་དྲུག་གནས་དབྱུང་བཏང་སྟེ་ཞིབ་བཤེར་བྱས་ཡོད་འདུག དེ་ཡང་འདི་ལོའི་ཕྱི་ཟླ་ ༡ ཚེས་ ༢༩ ཉིན་བོད་རང་སྐྱོང་ལྗོངས་སྲིད་གཞུང་གི་མགོ་འཁྲིད་གཞོན་པ་ཝང་ཡོང་དང་། ཕྱི་ཟླ་ ༣ པའི་ནང་བོད་རང་སྐྱོང་ལྗོངས་དམངས་ཆེན་གྱི་རྒྱུན་ལས་མགོ་འཁྲིད་གཞོན་པ་ཇི་གོ་ཀང་། འདི་ལོའི་ཕྱི་ཟླ་ ༡ ནང་བོད་རང་སྐྱོང་སྲིད་གཞུང་དམར་ཚོགས་ཀྱི་མགོ་འཁྲིད་གཞོན་པ་ཀྲང་ཧོང་ཙི། ཕྱི་ཟླ་ ༦ ཚེས་ ༡༤ ཉིན་བོད་རང་སྐྱོང་ལྗོངས་རྒྱུན་ལས་ལྷན་ཁང་གི་མགོ་འཁྲིད་གཞོན་པ་ཅང་ཅེ་བཅས་སྔ་རྗེས་སུ་གནས་དབྱུང་བཏང་སྟེ་ཞིབ་བཤེར་བྱས་དང་བྱེད་བཞིན་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
