ཨོ་གླིང་ནང་རྒྱ་ནག་གི་སྲིད་བློན་ལི་ཆང་ལ་ངོ་རྒོལ་ཤུགས་ཆེན་བྱས་འདུག

རྒྱ་ནག་གི་སྲིད་བློན་ལི་ཆང་གིས་ཨོ་གླིང་གི་རྒྱལ་ས་ཁེན་བྷེ་ར་རུ་སྲིད་བློན་སྐུ་ཞབས་ཨེན་ཐོ་ནི་ལགས་སོགས་ཐུག་འཕྲད་སྐབས་ངོ་རྒོལ་བ་ཚོས་རྒྱལ་ཁབ་གཉིས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་བསྐྱར་ཞིབ་བྱ་དགོས་པའི་རེ་འདུན་བཏོན་འདུག

Chinese Premier Li Qiang, left, and Australia’s Prime Minister Anthony Albanese at a signing ceremony at Parliament House in Canberra on June 17, 2024. (Pool AAP Image)

ཟླ་འདིའི་ཕྱི་ཚེས་ ༡༣ ཉིན་ནས་ཉིན་གྲངས་དྲུག་རིང་རྒྱ་ནག་གི་སྲིད་བློན་ལི་ཆང་ (Li Qiang) གིས་ནེའུ་ཛི་ལེན་ཌི་དང་ཨོ་གླིང་གཉིས་སུ་གཞུང་འབྲེལ་སྐོར་སྐྱོད་དང་བསྟུན། དེ་རིང་ཕྱི་ཚེས་ ༡༧ ཉིན་ཨོ་གླིང་གི་རྒྱལ་ས་ཁེན་བྷེ་ར་རུ། ཨོ་གླིང་གི་སྲིད་བློན་སྐུ་ཞབས་ཨེན་ཐོ་ནི་ (Anthony Albanese) ལགས་སོགས་ལ་མཇལ་འཕྲད་ཞུས་ཡོད་པ་དང་། ས་གནས་བོད་མི་གཙོ་བོར་གྱུར་བའི་རྒྱ་ནག་གཞུང་གིས་བཙན་དབང་འོག་ཡོད་པའི་མི་རིགས་དང་། རྒྱ་ནག་གི་དམངས་གཙོ་དོན་གཉེར་བ་སོགས་ཀྱིས་ངོ་རྒོལ་སྐད་འབོད་བྱས་ཡོད་པ་དང་། སྐབས་དེར་ས་གནས་ཀྱི་རྒྱ་རིགས་ཁག་གིས་ལི་ལ་དགའ་བསུ་བྱས་ཏེ་ངོ་རྒོལ་བར་ཚིག་ངན་བཤད་པ་དང་སྐད་འབོད་ལ་འགོག་རྐྱེན་བཟོ་ཐབས་བྱས་པར་བརྟེན་ཕྱོགས་གཉིས་བར་གདོང་ཐུག་ཀྱང་ཅུང་ཙམ་རེ་ཤོར་ཡོད་འདུག

དེ་རིང་ངོ་རྒོལ་སྐད་འབོད་སྐབས་ལས་འགུལ་བ་མང་པོ་ཞིག་གིས་རྒྱལ་ཁབ་གཉིས་ཀྱིས་ཚོང་དོན་ཐད་སྐད་ཆ་མ་བཤད་པའི་གོང་དུ། རྒྱ་ནག་གཞུང་གིས་བཙན་བཟུང་བྱས་པའི་གྲངས་ཉུང་མི་རིགས་ཁག་གི་འགྲོ་བ་མིའི་ཐོབ་ཐང་གི་གནས་བབ་ཐད་ལ་བསྐྱར་ཞིབ་བྱ་དགོས་པའི་དགོས་འདུན་བཏོན་འདུག་ལ། ལི་ཆང་ནེའུ་ཛི་ལེན་ཌི་རུ་བསྐྱོད་སྐབས་ཀྱང་། ས་གནས་བོད་མི་དང་དམངས་གཙོ་དོན་གཉེར་བ་ཚོས་ངོ་རྒོལ་སྐད་འབོད་བྱས་ཡོད་འདུག

ཨོ་རྒྱ་གཉིས་ཀྱི་ཆེས་མཐོའི་མི་སྣ་ཐུག་འཕྲད་ཀྱི་གནད་དོན་དང་འབྲེལ། ཨོ་གླིང་གི་སྲིད་བློན་སྐུ་ཞབས་ཨེན་ཐོ་ནི་ལགས་ཀྱིས། ང་ཚོས་ཕྱོགས་གཉིས་ཀྱི་ཕན་འབྲས་གཙོ་བོར་དམིགས་ནས་ལག་བསྟར་རང་བཞིན་ལྡན་པའི་ཐོག་ནས་རྒྱལ་ཁབ་གཉིས་ཀྱི་དམག་དོན་དང་འབྲེལ་བའི་ལས་དོན་ཐད་ལ་གྲོས་མོལ་དང་། དེ་བཞིན་ཕྱོགས་གཉིས་ཀྱི་དམག་དོན་གྱི་ཐོག་ནས་གདོང་ཐུག་འབྱུང་མུས་ཡིན་པའི་དཀའ་ངལ་སེལ་ཐབས་ཀྱི་ཐད་ལ་གྲོས་མོལ་བྱས་ཡོད། ཅེས་གསུངས་འདུག

རྒྱ་ནག་གི་སྲིད་བློན་ལི་ཆང་གིས། ཕྱོགས་གཉིས་ལ་འཆམ་མཐུན་དང་མཉམ་ལས་འཕེལ་རྒྱས་འགྲོ་བར་དཀའ་ཁག་མང་དག་ཅིག་འཕྲད་མུས་ཡིན་པས། ང་ཚོས་མཉམ་འདུས་ཀྱི་གྲོས་མོལ་བྱ་རྒྱུ་ཧ་ཅང་གལ་ཆེན་ཡིན་ཞིང་། ད་ལན་གྱི་དོན་སྙིང་ལྡན་པའི་ཐུག་འཕྲད་འདི་བརྒྱུད། མཉམ་ལས་ཀྱི་མཐའ་མཚམས་བརྟན་སྲུང་ཟེར་བ་དང་། རྒྱལ་ཁབ་གཉིས་ཀྱི་གཏེར་རིགས་སྔོག་འདོན་གྱི་ལས་དོན་སྔར་ལས་ཇེ་ལེགས་སུ་གཏོང་ཐབས་བྱེད་ཀྱི་ཡོད་པའི་ཐད་ལ་སྐད་ཆ་བྱུང་ཡོད། ཅེས་བཤད་འདུག

རྒྱ་ནག་གཞུང་གིས་ཕྱིའི་རྒྱལ་ཁབ་ཁག་ལ་འབྲེལ་ལམ་ཡག་པོ་ཡོང་ཆེད་མཚོན་དོན་རང་བཞིན་གྱི་བོད་ཀྱི་དོམ་ཁྲ་སྤྲད་སྲོལ་ཡོད་པ་ལྟར། ད་ལན་ལི་ཆང་གི་སྐོར་བསྐྱོད་ཀྱི་དམིགས་ཡུལ་གཙོ་བོ་ནི། པེ་ཅིན་གཞུང་གིས་འཛམ་གླིང་མཚོ་གླིང་རྒྱལ་ཁབ་ཆེ་གྲས་སུ་གཏོགས་པའི་ཨོ་གླིང་ལ་དོམ་ཁྲ་གཉིས་སྤྲད་ཡོད་ཅིང་། དོམ་ཁྲ་དེ་གཉིས་ནི་ཨོ་གླིང་དང་རྒྱ་ནག་གཉིས་ཀྱི་འཆམ་མཐུན་གྱི་ཕོ་ཉ་ཟེར་བ་ཞིག་ཡིན་ལུགས་བསྒྲགས་འདུག

རུའུ་ཊར་གསར་ཁང་གིས་སྤེལ་བའི་གནས་ཚུལ་ནང་། ད་ལན་ཨོ་གླིང་གི་སྲིད་བློན་གྱིས་ལི་ཆང་ལ་ཨོ་རྒྱ་གཉིས་ཀྱི་བར་ཞི་བདེ་རྒྱ་མཚོའི་ཁུལ་དུ་རྩོད་རྙོག་འབྱུང་མུས་ཡིན་པའི་གནད་དོན་ཞི་ཐབས་དང་། ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་གཙོས་རྒྱ་ནག་གིས་འགྲོ་བ་མིའི་ཐོབ་ཐང་ལ་བརྩི་འཇོག་དགོས་པ། ལྷག་པར་དུ་འདི་ལོར་རྒྱ་ནག་གཞུང་གིས་ཚེ་བཙོན་གྱི་ཁྲིམས་ཐག་བཅད་པའི་རྩོམ་པ་པོ་གྲགས་ཅན་ཡང་ཧུན་ཅུན་གྱི་གནད་དོན་སོགས་ཀྱི་ཐད་ལ་གླེང་སློང་གནང་ཡོད་སྐོར་གསལ་འདུག

ཨོ་གླིང་དང་རྒྱ་ནག་བར་དེ་སྔ་ཚོང་དོན་གྱི་ཐད་ནས་འབྲེལ་ལམ་ཧ་ཅང་ཆེ་ནའང་། བར་ལམ་ནས་རྒྱ་ནག་དང་ཨོ་གླིང་བར་ཞི་བདེ་རྒྱ་མཚོའི་ཁུལ་དུ་རྩོད་རྙོག་ཡང་ཡང་འབྱུང་གིན་ཡོད་པས། ཕྱི་ལོ་ ༢༠༢༠ ལོར་ཨོ་གླིང་ཡང་རྒྱ་གར་ཞི་བདེ་རྒྱ་མཚོའི་མངའ་ཁུལ་གྱི་ཨ་རི་དང་ཉི་ཧོང་། རྒྱ་གར་བཅས་ཀྱིས་མཉམ་ཞུགས་བྱས་པའི་ཁོའ་ཌི་(Quad)ནང་འཛུལ་ཞུགས་བྱས་ཏེ། ཨེ་ཤ་ཡའི་ཁུལ་གྱི་རྒྱ་ནག་གཞུང་གི་དབང་ཤུགས་ལ་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་དུ་བརྟན་སྲུང་བྱེད་ཐབས་ཀྱི་མཉམ་འབྲེལ་དམག་སྦྱོང་སྤེལ་ཡོད།

ཕྱོགས་ཁག་རྒྱལ་ཁབ་བཞིའམ་ཁོ་ཝ་ཊི་ (Quad) ནི་ཨ་རིའི་མཐུན་ཕྱོགས་རྒྱལ་ཁབ་རྒྱ་གར་དང་། ཉི་ཧོང་། ཨོ་གླིང་བཅས་ཀྱིས་གྲུབ་པའི་ཕྱོགས་ཁག་རྒྱལ་ཁབ་བཞི་ཡི་ཚོགས་སྡེ་ཞིག་ཡིན་ཞིང་། ཕྱོགས་ཁག་འདི་ནི་རྒྱ་ནག་གཞུང་གི་ལངས་ཕྱོགས་ལ་ཁ་གཏད་གཅོག་མཁན་ཞིག་ཏུ་གྱུར་ཡོད་ལ། རིམ་གྱིས་ཨེ་ཤ་ཡའི་བྱང་ཆིངས་སྒྲིག་འཛུགས་ (ASIAN NATO) ཞིག་ཏུ་འགྱུར་སྲིད་པའི་ཚོད་དཔག་བྱེད་ཀྱི་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།