བསམ་ཚུལ་བསྡུ་ལེན་ནང་ཆ་ཤས་ལེན་མཁན་བརྒྱ་ཆ་ ༨༩ ཡིས་བོད་མི་ཚང་མར་འོས་འཕེན་གྱི་ཐོབ་ཐང་འདྲ་མཉམ་དགོས་པའི་བསམ་ཚུལ་བཏོན་འདུག

མང་གཙོ་དང་བགྲོ་གླེང་ཞིབ་འཇུག་རུ་ཁག་གིས་བོད་མི་གནས་སྡོད་བྱས་ཡོད་པའི་འཛམ་གླིང་རྒྱལ་ཁབ་ ༣༠ ཙམ་གྱི་ནང་བོད་མིའི་སྒྲིག་འཛུགས་ལ་ལྟ་སྟངས་དང་སྤྱི་འཐུས་ཀྱི་གྲངས་འབོར། འོས་འཕེན་གྱི་ཐོབ་ཐང་སོགས་ཀྱི་ཐོག་བསམ་ཚུལ་བསྡུ་ལེན་བྱས་ཏེ་སྙན་ཐོ་ཞིག་བཏོན་འདུག

དེ་རིང་སྔ་དྲོའི་ཆུ་ཚོད་ ༡༡ ཐོག་དྷ་ས་ས་གནས་མགོ་འཛིན་ལས་ཁུངས་ཀྱི་ཚོགས་ཁང་དུ། མང་གཙོ་དང་བགྲོ་གླེང་ཞིབ་འཇུག་རུ་ཁག་གིས་ཕྱི་ལོ་ ༢༠༢༣ ཟླ་ ༡༡ ནས་ ༢༠༢༤ ཟླ་ ༢ བར་བོད་མི་གནས་སྡོད་བྱས་ཡོད་པའི་འཛམ་གླིང་རྒྱལ་ཁབ་ ༣༠ ཙམ་གྱི་མི་གྲངས་ ༡༠༨༨ ནས་བསམ་ཚུལ་བསྡུ་ལེན་བྱས་པ་བརྒྱུད་དབྱིན་བོད་གཉིས་ཀྱི་ནང་ཡོད་པའི་སྙན་ཐོ་ཞིག་འགྲེམས་སྤེལ་གནང་བའི་ནང་། བསམ་ཚུལ་བསྡུ་ལེན་ནང་ཆ་ཤས་ལེན་མཁན་བརྒྱ་ཆ་ ༨༩ ཡིས་བོད་མི་ཚང་མར་འོས་འཕེན་གྱི་ཐོབ་ཐང་འདྲ་མཉམ་དགོས་པ་དང་། བརྒྱ་ཆ་ ༦༤ ཡིས་ཕྱི་རྒྱལ་ཡུལ་གྲུ་ཁག་གི་སྤྱི་འཐུས་ཀྱི་གྲངས་འབོར་སྤར་དགོས་པ། བརྒྱ་ཆ་ ༧༥ ཡིས་དབུ་མའི་ལམ་གྱི་སྲིད་ཇུས་ལ་རྒྱབ་སྐྱོར་གནང་གི་ཡོད་པ་སོགས་གསལ་འདུག

མང་གཙོ་དང་བགྲོ་གླེང་རུ་ཁག་གི་ཁྲིམས་ལུགས་རིག་པ་བ་ལྷ་རོང་ལགས་ཀྱིས། བོད་མིའི་བསམ་ཚུལ་བསྡུ་ལེན་གྱི་སྙན་ཐོ་བཏོན་པའི་དམིགས་ཡུལ་གཙོ་བོ་ནི་མི་མང་གི་བསམ་ཚུལ་ལ་ཆེ་མཐོང་དང་གྲོས་བསྡུར་བྱ་རྒྱུ་ནི་མང་གཙོའི་ཁྱད་ཆོས་མེད་དུ་མི་རུང་བ་ཞིག་ཡིན་པར་བརྟེན། བོད་མིའི་མང་གཙོའི་ལམ་ལུགས་དང་སྒྲོམ་གཞིའི་ཐད་ལ་མི་མང་ཁྲོད་ནས་བསམ་ཚུལ་གང་ཡོད་པ་ཤེས་རྟོགས་བྱ་རྒྱུ་དང་། མང་གཙོའི་ལམ་ལུགས་དང་འབྲེལ་བའི་ལེགས་བཅོས་ལག་བསྟར་ཡོང་བའི་ཆེད་དུ་བོད་མིའི་སྒྲིག་འཛུགས་དང་མི་མང་བར་ལ་འབྲེལ་ལམ་བསྐྲུན་པའི་ཐོག མང་གཙོ་ལག་བསྟར་ལ་སྔར་ལས་ལྷག་པའི་བཟང་ཕྱོགས་ཀྱི་འགྱུར་བ་དང་མདུན་བསྐྱོད་ཡོང་བར་དམིགས་པ་ཡིན་སྐོར་བརྗོད་སོང་།

ཡང་ཁོང་གིས་ལས་གཞིའི་སྐོར་ལ་ངོ་སྤྲོད་གནང་སྐབས། ལས་འཆར་འདི་ནི་ཆབ་སྲིད་ཀྱི་ཤོག་ཁག་བྱེ་བྲག་བ་གང་གི་ཁོངས་སུའང་མ་གཏོགས་པའི་རང་དབང་ཅན་གྱི་མང་གཙོ་དོན་གཉེར་བ་བོད་རིགས་སློབ་ཕྲུག་དང་ཆེད་ལས་པ་ཁག་ཅིག་ལྔ་དང་ལྔ་བཅུའི་གཞོན་སྐྱེས་ཚོགས་ཆེན་ཐུག་སྟེ། ཕྱི་ལོ་ ༢༠༢༠ ལོར་ལས་གཞི་འདི་དངོས་སུ་མགོ་བཙུགས་པ་ཡིན་ལ། ཤེས་ཡོན་དང་གོ་རྟོགས་ཀྱི་ལམ་ནས་བོད་མིའི་མང་གཙོའི་ལམ་ལུགས་ཚད་ལྡན་ཞིག་བསྐྲུན་པར་མང་ཚོགས་སྤྱི་དང་། ལྷག་པར་དུ་ལོ་གཞོན་པ་རྣམས་ལ་སྲིད་ཇུས་དང་ཁྲིམས་བཟོའི་བརྒྱུད་རིམ་ནང་མཉམ་ཞུགས་ཡོང་བའི་ཆེད་དུ། རི་མོའི་སྒྱུ་རྩལ་དང་། བགྲོ་གླེང་གྲོས་བསྡུར་བྱེད་སའི་སྡིངས་ཆ་བསྐྲུན་པ་དང་། བརྙན་ཐུང་ཕྱོགས་སྒྲིག མང་ཚོགས་ཀྱི་བསམ་ཚུལ་བསྡུ་ལེན་སོགས་གྲངས་ཐོ་དང་ལྡན་པའི་ཐོག་ནས་དཔྱང་ཞིབ་དང་སྙན་ཐོ་བཏོན་ཏེ། བསམ་ཚུལ་བརྗེ་ལེན་དང་སྦྱངས་བཤད་ཀྱི་ལམ་ནས་བོད་མིའི་མང་གཙོའི་ནུས་པ་གོང་འཕེལ་དང་སྲ་བརྟན་ཡོང་བར་དམིགས་པ་ཞིག་ཡིན་ཞེས་བརྗོད་སོང་།

སྙན་ཐོའི་ནང་ནང་དོན་གནས་བསྡུས་དོན་ཚན་ ༡༢ བཀོད་པའི་དོན་གནད་དང་པོ། སྒྲོམ་གཞིའི་སྒྲིག་གཞི་དང་འབྲེལ་བའི་གནད་དོན་ཁག

དང་པོ་། མི་མང་བརྒྱ་ཆ་ ༨༩ ཡིས་བོད་མི་ཚང་མ་ལ་གཅིག་གྱུར་གྱི་འོས་གྲངས་འདྲ་མཉམ་འཕེན་ཆོག་པའི་ལེགས་བཅོས་ དགོས་པར་རྒྱབ་སྐྱོར་ཚད་མཐོན་པོ་འདུག སྤྱི་ཡོངས་ནས་ལོ་ན། ཆོལ་ཁ། ལས་རིགས། ཕོ་མོ་གང་ཅི་ཐད་ནས་རྒྱབ་སྐྱོར་ཧ་ ཅང་ཚད་མཐོ་པོ་འདུག

གཉིས་པ། མི་མང་བརྒྱ་ཆ་ ༨༠ ཡིས་བོད་མིའི་སྒྲིག་འཛུགས་ནས་བོད་མིའི་མང་གཙོའི་གནད་དོན་ཐོག་དམིགས་བསལ་ ཚོགས་ཆེན་ཞིག་སྐོང་འཚོག་བྱ་དགོས་པར་རྒྱབ་སྐྱོར་དང་མོས་མཐུན་ཞུ་ཡི་འདུག

གསུམ་པ། ལན་འདེབས་པ་བརྒྱ་ཆ་ ༧༠ཡིས་ཆོས་དང་སྲིད་གཉིས་ལོགས་སུ་འབྱེད་དགོས་པར་རྒྱབ་སྐྱོར་བྱ་བཞིན་འདུག

བཞི་པ། ལན་འདེབས་པ་བརྒྱ་ཆ་ ༦༤ ཡིས་རྒྱ་བལ་འབྲུག་གསུམ་ཕུད་པའི་ཕྱི་རྒྱལ་ཡུལ་གྲུ་ཁག་གི་སྤྱི་འཐུས་གྲངས་སྤར་ ཆ་གནང་དགོས་པར་མོས་མཐུན་གནང་གི་འདུག

ལྔ་པ། ལན་འདེབས་པ་བརྒྱ་ཆ་ ༥༨ ཀྱིས་ད་ལྟའི་བོད་མིའི་མང་གཙོའི་སྤུས་ཚད་ལ་འདོད་བློ་ཁེངས་པ་ཡོད་འདུག་ཀྱང་ལན་འདེབས་པ་བརྒྱ་ཆ་ ༤༩ ཡིས་མ་གཏོགས་མང་གཙོའི་འཕེལ་རིམ་གྱི་མགྱོགས་ཚད་ལ་འདོད་བློ་ཁེངས་པ་བྱུང་མི་འདུག

དོན་གནད་གཉིས་པ། སྲིད་བྱུས་དང་འབྲེལ་བའི་གནད་དོན།

དྲུག་པ། བོད་མི་སྒྲིག་འཛུགས་ཀྱི་ཆབ་སྲིད་ཀྱི་ལངས་ཕྱོགས་ཡང་ན་ལྟ་གྲུབ་ཐོག་ལ་ ལན་འདེབས་པ་བརྒྱ་ཆ་ ༧༥ ཡིས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་གི་འདུག རང་བཙན་གཙང་མ་ལ་བརྒྱ་ཆ་ ༡༥། རང་ཐག་རང་གཅོད་ལ་བརྒྱ་ཆ་ ༡༠ འདུག

བདུན་པ། ལན་འདེབས་པ་བརྒྱ་ཆ་ ༦༤ ཡིས་ད་ཡོད་སྤྲོད་བཞིན་པའི་དྭང་བླངས་དཔྱ་དངུལ་ལག་དེབ་ཀྱི་དངུལ་གྲངས་ བརྒྱ་ ༥༠% སྤར་དགོས་པ་རྒྱབ་སྐྱོར་གནང་གི་འདུག

དོན་གནད་གསུམ་པ། སྒྲིག་འཛུགས་ཁག་ལ་ལྟ་ཚུལ།

བརྒྱད་པ། རྒྱལ་ཁབ་དང་སྒྲིག་འཛུགས་ཁག་དང་བསྡུར་ན་ལན་འདེབས་པས་བོད་མིའི་སྒྲིག་འཛུགས་ལ་རྒྱབ་སྐྱོར་ཚད་མཐོ་ཤོས་ཏེ་བརྒྱ་ཆ་ ༨༥ ཡིས་ཡིད་ཆེས་དང་། དེ་བཞིན་རྒྱ་གར་ལ་བརྒྱ་ཆ་ ༨༠། ཨ་རི་ལ་བརྒྱ་ཆ་ ༧༨ དང་རྒྱ་ནག་ ༡༤ ལས་མི་འདུག

དགུ་པ། ལན་འདེབས་པ་བརྒྱ་ཆ་ ༧༧ གྱིས་ད་ལྟའི་སྲིད་སྐྱོང་གི་ཕྱག་ལས་གནང་ཕྱོགས་ལ་རྒྱབ་སྐྱོར་དང་ངོས་ལེན་ཚད་མཐོན་པོ་གནང་གི་འདུག

བཅུ་པ། ལན་འདེབས་པ་བརྒྱ་ཆ་ ༦༧ ཙམ་གྱིས་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་ལ་རྒྱབ་སྐྱོར་མོས་མཐུན་དང་དུས་ཡུན་ཕལ་ཆེ་བར་དགོས་ངེས་ལས་དོན་རྣམས་ཁ་ཚ་དགོས་གཏུགས་སྒྲུབ་ཀྱི་ཡོད་པ་ངོས་ལེན་གནང་གི་འདུག

བཅུ་གཅིག སྒྲིག་འཛུགས་ཁྱོན་ཡོངས་ནས་བཀའ་ཤག་ལ་ལན་འདེབས་པ་ཁོངས་ནས་བརྒྱ་ཆ་ ༦༦ བཅས་ཡིད་ཆེས་དང་གདེང་ཚོད་ཆེ་ཤོས་དང་། ལན་འདེབས་པ་ལས་བརྒྱ་ཆ་ ༣༧ བཅས་སྤྱི་འཐུས་ལྷན་ཚོགས་ལ་གདེང་ཚོད་ཀྱི་ཚད་དམའ་ཤོས་དང་། དེ་བཞིན་གཞུང་ཁོངས་མ་ཡིན་པའི་ཚོགས་པ་སྒྲིག་འཛུགས་ལ་བརྒྱ་ཆ་ ༥༣ དང་གསར་ཁང་ཁག་ལ་བརྒྱ་ཆ ༥༡ བཅས་ཡིན་འདུག

དོན་གནད་བཞི་པ། རྒྱལ་ཁབ་ཨ་རི། རྒྱ་གར་། རྒྱ་ནག ཡུ་རོབ་མཐུན་ཚོགས་ ཐའི་ཝན་དང་བོད་མི་སྒྲིག་འཛུགས་བཅས་ལ་རྒྱབ་སྐྱོར་དང་གཟིགས་ཚུལ།

བོད་མི་མང་གཙོའི་སྒྲིག་འཛུགས་ནང་ནས་འཛིན་སྐྱོང་བཀའ་ཤག་དང༌། སྤྱི་འཐུས་ལྷན་ཚོགས། ཁྲིམས་ཞིབ་ དེ་བཞིན་ གཞུང་ཁོངས་མ་ཡིན་པའི་ཚོགས་པ་གསར་ཁང་ཁག་ལ་རྒྱབ་སྐྱོར་དང་ཡིད་ཆེས་སྐོར་ཡིན།

དོན་གནད་ལྔ་པ། སྤྱི་ཚོགས་དུམ་བུར་མི་འགྲོ་བའི་ཐབས་ལམ་བསམ་ཚུལ།

བཅུ་གཉིས། སྤྱི་ཚོགས་དུམ་བུ་ཕྱིན་པ་འདི་མང་གཙོ་གོང་འཕེལ་འགྲོ་བར་འགོག་རྐྱེན་སྤྲོད་མཁན་གཙོ་བོ་ཞིག་ཡིན་པ་ངོས་ འཛིན་ཞུ་ཡིས་འདུག དེ་འགོག་པའི་ཐབས་ལམ་ཁག་ནི་ཆིག་སྒྲིལ། ཆོས་ཀྱི་སྒྲིག་འཛུགས་དང་སྲིད་གཉིས་ལོགས་སུ་དགོས་ པ། ཆོལ་ཁ་དང་ལུང་ཚན་འཐེན་ཁྱེར་སྤོང་བ། ྋརྒྱལ་བའི་བཀའ་དགོངས་ལ་ཤར་བསྐྱོད། མཐུན་སྒྲིལ། དྲང་བདེན། འོས་གྲངས་འདྲ་མཉམ འགོ་ཁྲིད་མིག་དཔེར་འོས་པ། བསམ་ཤེས། ས་ཁུལ་ལ་དཔག་པའི་འཐུས་ཚབ། མང་གཙོའི་གོ་རྟོགས་སྤེལ་རྒྱུ། ཆབ་སྲིད་སློབ་སྦྱོང་སྤྲོད་རྒྱུ་བཅས་བཀོད་འདུག

མང་གཙོ་དང་བགྲོ་གླེང་ཞིབ་འཇུག་རུ་ཁག་གིས་༢༠༢༡ ལོར་བཙན་བྱོལ་བོད་མིའི་སྤྱི་འཐུས་ལྷན་ཚོགས་སུ་རྒྱ་བལ་འབྲུག་གསུམ་ཕུད་པའི་ཕྱི་རྒྱལ་ཡུལ་གྲུ་ཁག་གི་ནང་སྤྱི་འཐུས་སྤར་དགོས་མིན་ཐད་ལ་མི་གྲངས་ ༤༠༠༠ ལྷག་མཉམ་ཞུགས་བྱས་ཡོད་པའི་བོད་མིའི་བསམ་ཚུལ་བསྡུ་ལེན་གྱི་ཞིབ་འཇུག་སྙན་ཐོ་ཞིག་བཏོན་ཡོད་པ་དང་། བོད་མི་ཕལ་མོ་ཆེས་ཕྱི་རྒྱལ་ཡུལ་གྲུ་ཁག་གི་ནང་མི་འབོར་ཇེ་མང་དུ་འགྲོ་བཞིན་ཡོད་པ་དང་། སྤྱི་འཐུས་ཉུང་དྲགས་པའི་རྐྱེན་གྱིས་ལས་དོན་མང་པོ་བསྒྲུབ་ཐུབ་མིན་ལ་བལྟས་ནས་ཕྱི་རྒྱལ་ཡུལ་གྲུ་ཁག་གི་སྤྱི་འཐུས་ཀྱི་གྲངས་འབོར་སྤར་དགོས་པའི་བསམ་ཚུལ་བཏོན་ཡོད་འདུག

བོད་མིའི་སྒྲིག་འཛུགས་ལ་སྙན་ཐོ་འདི་འབུལ་འཆར་ཡོད་མེད་ཐད་ཁོང་གིས། ང་ཚོ་མི་སྒེར་སོ་སོ་ལ་དམངས་གཙོ་གོང་ཕེལ་གཏོང་བར་ལས་འགན་རེ་ཡོད་རེད་བསམ་གྱི་འདུག  དེར་བརྟེན། བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་དང་སྤྱི་འཐུས་རྒྱུན་ལས། ཁྲིམས་ཞིབ་ཁང་། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་ལ་སྙན་ཐོ་འདི་འབུལ་འཆར་ཡོད་སྐོར་དང་། དམངས་གཙོ་གོང་འཕེལ་དུ་གཏོང་སླད་དུས་རྒྱུན་དུ་ནས་མཁས་དབང་དང་། མི་མང་། གསར་འགོད་པ་རྣམས་དང་ལྷན་དུ་བརྗོད་གཞི་འདྲ་མིན་གྱི་ཐོག་ལ་བགྲོ་གླེང་བྱེད་བཞིན་ཡོད་པ་ལྟར། མུ་མཐུད་དུ་བགྲོ་གླེང་བྱ་རྒྱུའི་ཆོད་སེམས་བརྟན་པོ་ཡོད་ལ། སྤྱི་སྒེར་ཡོངས་ཀྱིས་ལས་གཞི་འདིའི་ནང་མཉམ་ཞུགས་བྱ་རྒྱུ་གལ་ཆེན་པོ་ཡིན་སྐོར་སོགས་བརྗོད་སོང་ལ། མང་གཙོ་དང་བགྲོ་གླེང་ཞིབ་འཇུག་རུ་ཁག་གི་དྲ་ཚིགས་སུ་ www.democracyanddebate.org གནང་དགོས་པ་སོགས་བརྗོད་སོང་།

གསར་འགོད་པ། བསྟན་འཛིན་ཕུར་བུ། ཚེ་རིང་རྣམ་རྒྱལ།

རྩོམ་སྒྲིག་པ། པདྨ་མཚོ།