དེ་རིང་བཞུགས་སྒར་ཁུལ་དུ་འཚོག་མགོ་བརྩམས་པའི་བོད་རིགས་ན་གཞོན་འདུ་འཛོམས་ཀྱི་ཐོག་གཞོན་སྐྱེས་ཕན་ཚུན་བར་བསམ་ཚུལ་བརྗེ་ལེན་དང་། བོད་མིའི་སྒྲིག་འཛུགས་ཀྱི་དྲུང་ཆེ་རྣམས་དང་། ལྷན་ཁང་། སྒྲིག་འཛུགས་ཁག་གི་འབྲེལ་ཡོད་ལས་བྱེད་དང་ལྷན་དུ་གོ་བསྡུར་དང་བསམ་ཚུལ་བརྗེ་ལེན་གནང་འཆར་ཡོད་འདུག
དེ་རིང་ཕྱི་ཟླ་ ༧ ཚེས་ ༡ ནས་ཉིན་གྲངས་ལྔ་རིང་རྒྱལ་ཡོང་མང་གཙོ་ལྟེ་གནས་ཁང་གི་གོ་སྒྲིག་འོག བོད་མིའི་ངོ་བོ་སྲུང་སྐྱོབ་བྱེད་ཐབས་དང་། དབུས་བོད་མིའི་སྒྲིག་འཛུགས་དང་བོད་རིགས་གཞོན་སྐྱེས་ཚོའི་བར་འབྲེལ་ལམ་གོང་མཐོར་གཏོང་ཐབས་ཀྱི་བོད་རིགས་ན་གཞོན་འདུ་འཛོམས་ཐེངས་དང་པོ་དེ་དངོས་སུ་འཚོག་མགོ་བཙུགས་སོང་ལ། བོད་རིགས་གཞོན་སྐྱེས་བསམ་བློ་བརྗེ་རེས་བྱས་པའི་འདུ་འཛོམས་དེའི་ཐོག རྒྱ་གར་དང་བལ་ཡུལ་ཁུལ་གྱི་ཚོགས་པ་ ༢༤ ཡི་གཞོན་སྐྱེས་མགོ་ཁྲིད་གྲངས་ ༣༨ ཀྱིས་མཉམ་ཞུགས་གནང་འདུག་ལ། སྐབས་དེར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབུ་མ་དང་རང་བཙན་གྱི་ཐབས་ལམ་གཉིས་ཟུང་འབྲེལ་ཐབས་ཇུས་གསལ་སྟོན་གྱིས་བོད་དོན་འཐབ་རྩོད་གནང་རྒྱུ་དེ་ཧ་ཅང་གལ་ཆེན་ཡིན་སྐོར་སོགས་གསུངས་སོང་།
མཛད་སྒོའི་ཐོག་མར་རྒྱལ་ཡོངས་མང་གཙོ་ལྟེ་གནས་ཁང་གི་འགན་འཛིན་བསྟན་འཛིན་བཟང་མོ་ལགས་ཀྱིས། དེ་རིང་བོད་རིགས་ན་གཞོན་འདུ་འཛོམས་འདིའི་ཐོག་ཆེད་དུ་བཅར་བའི་ན་གཞོན་དེ་དག་ནི་རྒྱ་བལ་གཉིས་ཀྱི་མཐོ་སློབ་ཁག་སོགས་ཀྱི་ཚོགས་པ་ཁག་གི་སྣེ་འཁྲིད་མཁན་ཤ་སྟག་ཡིན་པའི་ཁྲོད། རྒྱ་བལ་གཉིས་ནས་ན་གཞོན་མགོ་ཁྲིད་སུམ་ཅུ་ལྷག་འདུ་འཛོམས་བྱས་ཡོད། ཅེས་དང་། རྒྱལ་ཡོངས་མང་གཙོ་ལྟེ་གནས་ཁང་གིས་འདས་པའི་མི་ལོ་བཞི་བཅུའི་ནང་རྒྱལ་ཁབ་ང་དྲུག་ལྷག་གི་ནང་དམངས་གཙོའི་སྒྲིག་འཛུགས་སྲ་བརྟན་ཆེད། མི་མང་གི་མཉམ་ཞུགས་བྱ་རྒྱུ་གོང་འཕེལ་གཏོང་ཐབས་དང་། ཕྱི་གསལ་ནང་གསལ། སྒྲིག་འཛུགས་སྲ་བརྟན་ཡོང་ཐབས་སོགས་ཀྱི་ཐད་ལ་ལས་དོན་མང་དག་ཅིག་གཉེར་ཡོད་ཅིང་། དེ་བཞིན་དབུས་བོད་མིའི་སྒྲིག་འཛུགས་སྲ་བརྟན་དང་། ནུས་པ་གོང་འཕེལ་གྱི་ལས་གཞི་ཞིག་སྤེལ་ཡོད་པའི་ཁྲོད། གཞོན་སྐྱེས་རྣམས་ཧ་ཅང་གལ་ཆེན་ཞིག་ཏུ་གྱུར་ཡོད་པས། ད་ལན་ཆེད་དམིགས་ཀྱིས་ཉིན་གྲངས་ལྔ་རིང་གི་འདུ་འཛོམས་དེ་གོ་སྒྲིག་གནང་ཡོད་སྐོར་དང་། ད་ལན་གྱི་འདུ་འཛོམས་དེ་ནི་གཞོན་སྐྱེས་ནང་ཁུལ་བར་བསམ་ཚུལ་བརྗེ་རེས་ཀྱི་ལྷན་ཚོགས་ཤིག་ཡིན་པའི་ཁར། བོད་རིགས་གཞོན་སྐྱེས་རྣམས་ཀྱི་དཀའ་ངལ། བོད་མིའི་སྒྲིག་འཛུགས་དང་བོད་རིགས་གཞོན་སྐྱེས་འབྲེལ་ལམ་གོང་མཐོར། དེ་བཞིན་གཞོན་སྐྱེས་ཚོའི་བོད་མིའི་སྒྲིག་འཛུགས་སོགས་ཀྱི་ཐད་ལ་རྒྱུས་ལོན་བྱ་རྒྱུའི་ལྷན་ཚོགས་ཤིག་ཡིན་སྐོར་སོགས་བརྗོད་བྱུང་།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ལོ་ཆུང་ཆུང་ཡིན་པའི་སྐབས་སུ་གནས་ཚུལ་དང་བསམ་ཚུལ་གང་མང་མང་ཞིག་ཐོས་པ་དེས། གནས་ཚུལ་ལ་དཔྱད་ཞིབ་བྱ་རྒྱུར་ཕན་ཐོགས་ཡོད་པས། གནས་ཚུལ་གང་ཐུབ་ཐུབ་ཀྱིས་ཉན་འཇོག་བྱ་རྒྱུ་ཧ་ཅང་གལ་ཆེན་པོ་རེད། སྤྱིར་བཏང་སྤྱི་ཚོགས་ནང་ལས་ཀ་ག་རེ་བྱས་ནའང་གནས་ཚུལ་རྟོགས་པར་བྱ་རྒྱུ་དེ་དཔེ་མི་སྲིད་པའི་གལ་ཆེན་པོ་རེད་དེ། གནས་ཚུལ་མ་རྟོགས་པ་ཡིན་ན་ལས་དོན་བྱ་མི་ཐུབ་ལ་བརྟག་དཔྱད་ཀྱང་བྱ་མི་ཤེས་པས། གྲུབ་འབྲས་དམིགས་བསལ་ཞིག་འཐོན་རྒྱུ་མེད་པས། ཕྱོགས་ཡོངས་ནས་གནས་ཚུལ་གསལ་རྟོགས་ཐུབ་པ་བྱས་ནས། གཞན་གྱི་རྗེས་སུ་མི་འབྲངས་པར་དཔེ་དེབ་རིགས་མང་ཙམ་བཀླགས་ཏེ། དཔྱད་ཞིབ་དང་གནས་ཚུལ་གསལ་རྟོགས་བྱས་ནས་རང་རང་གི་བསམ་བློ་བཏང་ནས་རང་ཐག་རང་གིས་གཅོད་དགོས་པ་རེད། ཅེས་དང་། ང་ཚོའི་ལས་འགན་གཙོ་བོ་གཉིས་ལས་གཅིག་ནི་བོད་རྒྱའི་དཀའ་རྙོག་སེལ་ཐབས་དེ་རེད། བོད་རྒྱའི་དཀའ་རྙོག་སེལ་ཐབས་ད་ལྟ་གཏན་ལ་ཕབ་པ་དེ་དབུ་མའི་ལམ་གྱི་སྲིད་ཇུས་རེད། དབུ་མའི་ལམ་གྱི་སྲིད་ཇུས་འགྱུར་བ་གཏོང་དགོས་ནའང་ང་སྲིད་སྐྱོང་དང་སྤྱི་འཐུས་སོགས་མི་སྒེར་གཅིག་གིས་འགྱུར་བ་གཏོང་ཐབས་མེད་པ་རེད་ལ། མ་འོངས་པར་འགྱུར་བ་གཏང་དགོས་ན་བཅའ་ཁྲིམས་དོན་ཚན་ལྔ་བཅུ་ང་བརྒྱད་ཀྱི་དགོངས་དོན་བཞིན་མང་མོས་ཀྱི་བརྒྱུད་རིམ་ཞིག་འགྲོ་དགོས་པས་ད་བར་དབུ་མའི་ལམ་གྱི་སྲིད་ཇུས་དེ་འཛིན་གྱི་ཡོད་ལ། བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་པས་དབུ་མའི་ལམ་གྱི་སྲིད་ཇུས་འཛིན་གྱི་ཡོད། ཅེས་གསུངས་སོང་།
ཡང་སྲིད་སྐྱོང་མཆོག་གིས། བོད་པའི་སྤྱི་ཚོགས་ནང་རང་བཙན་དང་དབུ་མ་བཤད་ནས་རྩོད་རྒྱག་རེས་བྱས་པ་དེས་ཅི་ཡང་མི་ཕན་པས། ཚང་མས་མཉམ་རུབ་ཀྱི་ཐོག་ནས་བོད་དོན་འཐབ་རྩོད་ཀྱི་ཐད་ལ་ནུས་པ་མཉམ་སྤུངས་བྱ་དགོས་ཤིང་། དེང་གི་ཆར་ཨ་རིའི་ནང་གཙོས་རྒྱལ་ཁབ་མང་པོ་ཞིག་གི་ནང་བོད་རིགས་གཞོན་སྐྱེས་མང་དག་ཅིག་གིས་བོད་དོན་ཞུ་གཏུག་གི་ལས་འགུལ་ནང་མཉམ་ཞུགས་བྱས་ཏེ། ཕྱོགས་མང་པོ་ཞིག་ནས་བོད་དོན་ཞུ་གཏུག་སོགས་ཀྱི་ཐད་ལ་གྲུབ་འབྲས་མི་དམན་པ་ཞིག་ཐོན་ཡོད་པས། གཞོན་སྐྱེས་ཚང་མས་མཉམ་རུབ་ཀྱི་ལས་དོན་གཉེར་ནས་ཐབས་ཇུས་བསྟན་དགོས་སྐོར་དང་། གཞོན་སྐྱེས་དག་ནི་མ་འོངས་པའི་བོད་ཀྱི་མགོ་ཁྲིད་ཡིན་པས། ཕྱོགས་ཡོངས་ནས་ཐབས་ཤེས་གསར་པ་དང་། མཉམ་རུབ་ཀྱི་ནུས་པ་སྤུངས་འཇོག དེ་བཞིན་འདུ་འཛོམས་རིགས་ནང་མཉམ་ཞུགས་བྱས་ནས་ནུས་པ་ཐོན་ཐུབ་པར་བྱ་རྒྱུ་དེ་གལ་ཆེན་ཡིན་སྐོར་སོགས་གསུངས་སོང་།
གསར་འགོད་པ། དཔལ་ལྡན།
