༧གོང་ས་རྒྱལ་བ་རིན་པོ་ཆེ་མཆོག་གི་ཞབས་པུས་དྲག་སྐྱེད་ཆེན་པོ་བཞེས་ཏེ་ཁོར་ཡུག་སྐྱིད་ས་ཞིག་ལ་ཕེབས་རྒྱུ་རེད་འདུག
ཁ་སང་ཕྱི་ཚེས་ ༣ ཉིན་༧སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་དང་། བོད་ལུགས་སྐུ་བཅར་སྨན་པ་རྟ་མགྲིན་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཕྲོད་བཞེས་དང་འབྲེལ་བའི་བརྙན་ལམ་ནས་ཡོངས་ཁྱབ་གསལ་བསྒྲགས་གནང་བའི་ནང་། ༧གོང་ས་མཆོག་གི་ཞབས་པུས་སྨན་བཅོས་གཞན་དང་མ་འདྲ་བའི་དྲག་སྐྱེད་མྱུར་པོ་བཞེས་ཀྱི་ཡོད་སྟབས། སྐུ་ངལ་ཡག་པོ་གསོ་ཆེད་མཁའ་དབུགས་གཙང་ཞིང་ཁོར་ཡུག་སྐྱིད་པོ་ཞིག་ལ་གནས་སྤོ་རྒྱུ་ཡིན་སྐོར་གསུངས་འདུག
༧སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས། དེ་རིང་ངས་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གནས་སྟངས་ཀྱི་སྐོར་ལ་ཚིག་ཁ་ཤས་ཞུ་ཡི་ཡིན། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ལ་གཤག་བཅོས་གནང་སྟེ་ཉིན་ལྔ་པ་དེ་རེད། ཉིན་ལྔ་པའི་སྟེང་སྨན་པ་དང་ལུས་རྩལ་གྱི་སྨན་པ་རྣམ་པ་གཉིས་ཀྱིས་ཞིབ་འཇུག་གནང་དུས། ༧གོང་ས་མཆོག་གི་༧སྐུའི་འཕྲོད་བཞེས་ཧ་ལས་པའི་ཡར་རྒྱས་ཕྱིན་ཡོད་པ་མ་ཟད། སྤྱིར་བཏང་གི་ནད་པར་སྨན་བཅོས་དེ་འདྲ་བྱས་ནས་དྲག་སྐྱེད་འགྲོ་རྒྱུ་ལས་༧གོང་ས་མཆོག་གི་དྲག་སྐྱེད་ཞེ་དྲགས་ཀྱིས་མགྱོགས་པ་འདུག ཅེས་གསུང་གི་འདུག གཙོ་བོ་མི་ཚང་མས་སེམས་འཚབ་བྱ་ས་གཅིག་ནི་སྙུང་གཟེར་ཆེ་ཆུང་གང་འདྲ་ཡིན་མིན་ཐད་ལ་སེམས་འཚབ་བྱེད་ཀྱི་ཡོད་པ་རེད། སྙུང་གཟེར་ཧ་ལས་པ་ཉུང་ཉུང་ཆགས་བསྡད་འདུག ཞབས་གོམ་ཡང་བསྐྱོན་ཐུབ་ཀྱི་འདུག གང་ཅིའི་ཐོག་ནས་ཡར་རྒྱས་འགྲོ་བཞིན་པ་རེད་འདུག ཉིན་རེར་ཡར་རྒྱས་ཕེབས་ཀྱི་འདུག ང་ཚོའི་འཆར་གཞིའི་ཐོག་ནས་ཉིན་ཤས་རྗེས་༧རྒྱལ་བ་རིན་པོ་ཆེ་མཆོག་ནེའུ་ཡོག་གྲོང་ཁྱེར་ནས་ས་ཁུལ་གཞན་གུ་ཡངས་པ་དང་། རླུང་གཙང་བ། ཡུལ་ལྗོངས་ཡག་པོ་ཡོད་ས་ཞིག་ལ་སྐུ་ངལ་གསོ་རྒྱུའི་འཆར་གཞི་གདིང་རྒྱུ་ཡིན། ད་ལྟའི་ཆར་བོད་ཕྱི་ནང་གཉིས་ཀའི་ནང་ཡོད་པའི་བོད་མི་ཡོངས་རྫོགས་ཀྱིས་སེམས་འཚབ་ཞེ་དྲགས་གནང་ནས་བཞུགས་ཡོད་པ་རེད། རྩ་བ་ཉིད་ནས་ཐུགས་ཁྲལ་གནང་དགོས་རྒྱུ་མི་འདུག་ཞུ་རྒྱུ་ཡིན། ཐུགས་ལྷོད་ལྷོད་བྱས་ནས་བཞུགས་རོགས་གནང་ཞུ་རྒྱུ་ཡིན། ཞེས་གསུངས་སོང་།
བོད་ལུགས་སྐུ་བཅར་སྨན་པ་རྟ་མགྲིན་ལགས་ཀྱིས། བོད་ལུགས་ཀྱི་ཐོག་ནས་༧སྐུའི་འཕྲོད་བཞེས་ཞུས་པ་ཡིན་ན། གོང་དུ་གསུངས་པ་ནང་བཞིན་༧སྐུའི་ཞབས་པུས་ཀྱི་སྨན་བཅོས་ཧ་ལས་པའི་ལམ་ལྷོངས་དང་། ཡག་པོ་ཞེ་དྲགས་བྱུང་སོང་། བོད་ལུགས་ཀྱི་ཐོག་ནས་རྩ་དང་ཆུའི་ཐོག་ནས་སྐུ་བཅར་ཞུས་ཏེ་བརྟག་དཔྱད་ཞུ་དུས། སྐུ་ཁམས་ཚང་མ་དཔེ་ཡག་པོ་ཡོད་པ་དང་། ཞབས་པུས་ཀྱི་དྲག་སྐྱེད་ཡར་སྔོན་ཟླ་བཞིན་བཟང་དུ་ཕེབས་ཏེ་གོམ་པ་བསྐྱོན་གནང་རྒྱུ་སོགས་དཔེ་ཡག་པོ་བྱུང་སོང་། མི་ཚང་མས་ཐུགས་ཁྲལ་རྩ་བ་ནས་གནང་དགོས་ཀྱི་མི་འདུག སྐུ་ཁམས་བཟང་པོ་འདུག ཚང་མ་བློ་བདེ་པོ་གནང་རོགས་གནང་། ཞེས་གསུངས་སོང་།
དགའ་ལྡན་ཕོ་བྲང་ཡིག་ཚང་གི་དྲ་རྒྱར་གསལ་བའི་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། འདི་ལོའི་ཕྱི་ཟླ་ ༩ ཚེས་ ༡༢ དང་ ༡༣ ཉིན་གྲངས་གཉིས་རིང་ལྷོ་ཤར་ཨེ་ཤ་ཡའི་དད་ལྡན་རྣམས་ལ་ཆོས་འབྲེལ་དང་། ཕྱི་ཟླ་ ༩ ཚེས་ ༡༨ ཉིན་བོད་ཀྱི་བུད་མེད་ལྷན་ཚོགས་དང་། བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག ཌལ་ཧོར་སློབ་ཟུར་བཅས་ནས་བརྟན་བཞུགས་བསྟར་འབུལ་ཞུ་རྒྱུ། དེ་བཞིན་ཕྱི་ཟླ་ ༩ ཚེས་ ༣༠ ནས་ཉིན་གྲངས་གཉིས་རིང་ཐའེ་ཝན་གྱི་དད་ལྡན་ཆོས་ཞུ་བ་རྣམས་ལ་སྤྱོད་འཇུག་ཆེན་མོའི་ལེའུ་བརྒྱད་པའི་ཆོས་འབྲེལ་བསྩལ་རྒྱུ་དང་། ཕྱི་ཟླ་ ༡༠ ཚེས་ ༡ ཉིན་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
