ཨ་རིས་རྒྱ་རིགས་གནས་སྤོར་བ་༡༡༦ ཕྱིར་ཕུད་བཏང་འདུག

རྒྱ་རིགས་གནས་སྤོ་བ་ནི་ཨ་རིའི་སྲིད་འཛིན་གྱི་འོས་བསྡུའི་སྐབས་དོ་སྣང་བྱེད་སའི་བརྗོད་གཞི་ཞིག་ཆགས་ཏེ་ཨ་རིས་རྒྱ་རིགས་གནས་སྤོར་བ་བརྒྱ་ལྷག་ཕྱིར་ཕུད་བཏང་བ་ཡོངས་བསྒྲགས་བྱས་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཨ་རིའི་སྲིད་འཛིན་གྱི་འོས་བསྡུ་ཆེན་མོ་བསླེབ་ལ་ཉེ་བའི་སྐབས་འདིར། རྒྱ་ནག་ནས་ཨ་རིར་རྒྱུ་མཚན་སྣ་ཚོགས་ཀྱི་འོག་ནས་སྐྱབས་བཅོལ་དུ་འབྱོར་བའི་རྒྱ་རིགས་ ༡༡༦ ཕྱིར་གཟའ་འཁོར་སྔོན་མའི་ནང་རྒྱ་ནག་ཏུ་ཕྱི་ཕུད་བཏང་ཡོད་པ་ཨ་རིའི་རྒྱལ་ནང་བདེ་འཇགས་ལས་ཁུངས་ཀྱིས་བསྒྲགས་འདུག

དེ་འབྲེལ་གནས་ཚུལ་ནང་། འདས་ལོ་ནས་ཨ་རིར་གནས་སྦོར་བྱེད་མཁན་གྱི་རྒྱ་རིགས་ཀྱི་གྲངས་འབོར་ཧ་ཅང་འཕར་ཡོད་པ་དང་། དམིགས་བསལ་ད་ལྟའི་ཆར་ཨ་རིའི་སྲིད་འཛིན་གྱི་འོས་བསྡུའི་བགྲོ་གླེང་འགྲོ་བཞིན་པའི་སྐབས་སུ་རྒྱ་ནག་ནས་རྒྱ་རིགས་གནས་སྦོར་བ་མང་པོ་ཨ་རིར་ཡོང་གི་ཡོད་པ་ནི་རྒྱུན་ལྡན་ཞིག་མིན་པས། ཨ་རིས་ད་ལྟའི་གནས་སྐབས་སུ་རྒྱ་རིགས་དེ་ཚོས་རྗོད་ཀྱིན་པའི་དབུལ་ཕོངས་དང་དྲག་གནོན་གྱི་དཀའ་ངལ་ལ་ཁ་ཡ་བྱེད་ཐབས་བྲལ་བའི་གནས་སྟངས་འོག རྒྱ་རིགས་ ༡༡༦ ཕྱིར་རྒྱ་ནག་ཏུ་ལོག་བཏང་ཡོད་པ་གསལ་འདོན་བྱས་འདུག

ཨ་རིའི་རྒྱལ་ནང་བདེ་འཇགས་ལས་ཁུངས་ཀྱིས། ད་ལྟའི་ཆར་ང་ཚོས་། ཁྲིམས་འགལ་གྱི་གནས་སྤོ་ཉུང་དུ་གཏོང་བ་དང་འགོག་ཐབས་བྱེད་པ། ཁྲིམས་འགལ་གྱི་མི་ནག་ཚོང་བྱེད་མཁན་རྣམས་བཀག་འགོག་བྱེད་པར་རྒྱ་ནག་དང་མཉམ་ལས་བྱེད་ཀྱི་ཡོད་ཅེས་བརྗོད་འདུག་ནའང་། རྒྱ་ནག་གཞུང་གིས་ཨ་རིར་རྒྱ་རིགས་མང་པོ་གནས་སྤོ་བྱེད་བཞིན་པ་དེ་ག་དུས་ཤིག་ནས་མགོ་བརྩམས་ཡོད་མེད་ཐད་ཨ་རིར་ལན་འདེབས་བྱས་མེད་པ་རེད།

ཐེངས་འདིར་ཨ་རིས་རྒྱ་རིགས་ ༡༡༦ ཕྱིར་ཕུད་བཏང་བ་དེ་ནི་འདས་པའི་ལོ་ལྔའི་རིང་ཕྱི་མི་གནས་སྦོར་བ་ཕྱིར་ཕུད་བཏང་བའི་གྲངས་འབོར་ཆེ་ཤོས་ཆགས་ཡོད་པ་དང་། རྒྱ་རིགས་དེ་དག་ཕྱིར་ཕུད་གཏོང་དགོས་དོན་ཡང་གཟའ་འཁོར་སྔོན་མའི་ནང་ཨ་རིའི་སྲིད་འཛིན་གྱི་འོས་མིའི་བར་བགྲོ་གླེང་སྐབས། དེང་སྐབས་རྒྱ་རིགས་མང་པོ་ཨ་རིར་གནས་སྦོར་བྱེད་བཞིན་པ་ནི་གལ་གནད་ཆེ་བའི་བརྗོད་གཞི་ཞིག་ཏུ་གྱུར་བ་ལ་བརྟེན་ནས་བྱུང་ཞིང་། ལོ་རེ་བཞིན་རྒྱ་རིགས་སྟོང་ཕྲག་མང་པོས་རྒྱ་ནག་ནང་དབུལ་ཕོངས་དང་ཆབ་སྲིད་ཀྱི་དྲག་གནོན་ཆེ་བའི་དཀའ་ངལ་བགྲང་སྟེ་ཨ་རིར་སྐྱབས་བཅོལ་ཞུ་ཐབས་བྱེད་བཞིན་ཡོད་པ་རེད།

ཉེ་བའི་ལོ་འགའི་རིང་ཨ་རིར་གནས་སྤོར་བྱེད་མཁན་གྱི་རྒྱ་རིགས་ཀྱི་གྲངས་འབོར་ཧ་ཅང་འབོར་ཆེན་ཆགས་བཞིན་ཡོད་པ་དང་། ཕྱི་ལོ་ ༢༠༢༣ ལོར་ཨ་རིར་གནས་སྤོར་བྱེད་མཁན་རྒྱ་རིགས་ ༣༧༠༠༠ བྱུང་ཞིང་། ཕྱི་ལོ་ ༢༠༢༢ ལོར་བསྡུར་ན་ལྡབ་བཅུ་འཕར་ཡོད་པ་རེད་ལ། རྒྱ་རིགས་དེ་དག་ཨ་རིའི་ཁྱིམ་མཚེས་རྒྱལ་ཁབ་མེག་སི་ཁོ་བརྒྱུད་ཨ་རིར་འགྲོ་བཞིན་ཡོད་ཅིང་། ཨ་རིའི་སྲིད་འཛིན་ཟུར་བ་དང་ད་ལྟའི་སྲིད་འཛིན་གྱི་འོས་མི་ཌོ་ནལ་ཊུམ་ཕུ་ནི་རྒྱ་རིགས་མང་པོ་ཨ་རིར་གནས་སྤོར་བྱེད་བཞིན་པའི་ཐད་དོགས་སློང་གནང་མཁན་ཞིག་ཡིན་པ་རེད།

སྤྱིར་ཨ་རི་དང་རྒྱ་ནག་བར་ཡུལ་མི་གནས་སྤོ་དང་འབྲེལ་བའི་སྲིད་ཇུས་ཡོད་ཀྱང་། རྒྱ་ནག་གཞུང་གིས་ཨ་རིས་ཕྱིར་ཕུད་བཏང་བའི་རྒྱ་རིགས་མང་པོ་ཞིག་ཕྱིར་རྩིས་ལེན་བྱེད་པར་ངོས་ལེན་བྱས་མེད་ཁར། ད་དུང་ཨ་རིས་རྗོད་ཀྱིན་པའི་ཁྲིམས་འགལ་གྱི་གནས་སྤོ་བ་ཟེར་བ་མཐའ་གཅིག་ཏུ་དགག་པ་རྒྱག་གིན་ཡོད་པ་དང་། རྒྱ་ནག་གིས་མཐའ་མཚམས་སྲུང་སྐྱོབ་ནན་མོ་བྱས་ཏེ་ནག་ཚོགས་དང་འབྲེལ་བའི་མི་ཚོང་དང་གནས་སྤོ་བའི་རིགས་ལ་བཀག་སྡོམ་ཤུགས་ཆེན་བྱེད་བཞིན་ཡོད་པའི་ལན་འདེབས་བྱས་འདུག

ཡང་ད་རེས་རྒྱ་རིགས་འབོར་ཆེན་ཕྱིར་ཕུད་བཏང་བ་དེས། ཨ་རིའི་ནང་ཨེ་ཤ་ཡའི་རིགས་ལ་དབྱེ་འབྱེད་དང་ཐུབ་ཚོད་གཏོང་བའི་ཤུགས་རྐྱེན་ཞིག་ཐེབས་སྲིད་སྐོར་ཡང་གླེང་སློང་བྱས་འདུག་པ་དང་། ཨ་རིར་རྟེན་གཞི་བྱས་པའི་ཨེ་ཤ་ཡ་ཐོབ་ཐང་ཞུ་གཏུགས་ཚོགས་པ་ཁག་ཅིག་གིས། ཁོ་ཚོའང་དྲག་གནོན་དང་དབུལ་ཕོངས་ལ་གཡོལ་ཕྱིར་ཨ་རིར་སྐྱབས་བཅོལ་དུ་ཡོང་ཡོད་སྐོར་བརྗོད་འདུག ད་ཐེངས་ནི་ཨ་རིས་རྒྱ་རིགས་ཕྱིར་ཕུད་བཏང་བ་ཐོག་མ་མིན་པར། འདི་ལོའི་ཕྱི་ཟླ་ ༣ ནང་ཨ་རིའི་རྒྱལ་ནང་བདེ་འཇགས་ལས་ཁུངས་ཀྱིས་ཨ་རིར་གནས་སྡོད་ཆོག་པའི་རྒྱུ་མཚན་ནམ་ཐོབ་ཐང་མེད་པའི་རྒྱ་རིགས་སྐོར་ཞིག་རྒྱ་ནག་ཏུ་ཕྱིར་ཕུད་བཏང་ཡོད་པ་དང་། རྒྱ་རིགས་མང་པོ་ཨ་རིར་གནས་སྤོར་བྱེད་བཞིན་པ་ནི་ཨ་རིའི་སྲིད་འཛིན་གྱི་འོས་མིའི་བགྲོ་གླེང་གི་བརྗོད་གཞི་གལ་ཆེན་ཞིག་ཏུ་གྱུར་ཡོད་འདུག

གསར་འགོད་པ། སྐལ་བཟང་སྦྱིན་པ།