ཡུ་རོབ་ཧིལ་སིན་ཁི་འགྲོ་བ་མིའི་ཐོབ་ཐང་ཐེབས་རྩས་རྒྱལ་ཚོགས་ནང་བོད་ཀྱི་འགྲོ་བ་མིའི་ཐོབ་ཐང་སྐོར་སྙན་སེང་ཞུས་འདུག
ཟླ་འདིའི་ཕྱི་ཚེས་ ༤ ཉིན་ཡུ་རོབ་ཧིལ་སིན་ཁི་འགྲོ་བ་མིའི་ཐོབ་ཐང་ཐེབས་རྩའི་(Helsinki Foundation for Human Rights)ཚོགས་གཙོ་ལྕམ་མེ་ལེན་ཡ་ (Mélanie Blondelle) ལགས་ཀྱི་མིང་ཐོག་ནས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༥༦ པའི་ཐོག་བོད་ནང་གི་འགྲོ་བ་མིའི་ཐོབ་ཐང་སྐོར་གྱི་སྙན་ཞུ་ཞིག་ཕུལ་ཡོད་འདུག
སྙན་ཞུ་དེའི་ནང་། འདས་པའི་ལོ་གཉིས་ལྷག་གི་ནང་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་ཁག་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནས་སྟངས་ཐད་ཉེན་བརྡ་བཏང་ཡོད་ཅིང་། དེའི་ཁྲོད་དུ་བོད་ཕྲུག་ས་ཡ་གཅིག་ཙམ་རང་ཉིད་ཀྱི་ནང་མི་དང་ཁ་བྲལ་དུ་བཏང་སྟེ་རྒྱ་ནག་གཞུང་གི་བཅའ་སྡོད་སློབ་གྲྭ་ཁག་ཏུ་བཙན་གྱིས་མངག་གཏོང་བྱེད་ཀྱི་ཡོད་པ་དང་། ངལ་རྩོལ་བསྒྱུར་བཀོད་ཀྱི་སྲིད་ཇུས་ལག་བསྟར་བྱས་པ། བོད་མི་འབོར་ཆེན་བཙན་གྱིས་གནས་སྤོ་བྱས་བཅུག་པ། བོད་ཀྱི་ཁོར་ཡུག་དང་འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་རྣམས་བཙོན་འཇུག་བྱས་ཏེ་མནར་གཅོད་ཚད་མེད་བཏང་ཡོད་པ་མ་ཟད། བཙོན་ཁང་ནས་ཤི་བ་དང་གར་སོང་ཆ་མེད་དུ་གྱུར་བ་སོགས་ཀྱི་གནས་ཚུལ་ཐོན་ཡོད། སྔོན་མ་བྱུང་མྱོང་མེད་པའི་རྒྱལ་ཁབ་མང་པོ་ཞིག་གིས་བོད་དོན་ཐོག་གྲོས་གཞི་བཏོན་སྟེ་རྒྱལ་སྤྱིའི་སྤྱི་ཚོགས་ལ་བློ་ཕམ་བྱུང་བའི་རྣམ་པ་བསྟན་གྱི་ཡོད་ཅིང་། ང་ཚོས་ཀྱང་འདི་ལ་དགའ་བསུ་ཞུ་བཞིན་ཡོད་པ་མ་ཟད། འདི་ནི་བོད་ནང་གི་དངོས་ཡོད་གནས་སྟངས་ངོས་འཛིན་བྱས་པ་ཙམ་མ་ཡིན་པར། འགྲོ་བ་མིའི་ཐོབ་ཐང་ལྷན་ཚོགས་ཀྱི་རྩ་དོན་སྲུང་སྐྱོབ་བྱེད་པར་ཕན་ཐོགས་ཡོད། རྒྱ་ནག་གཞུང་གིས་བོད་དོན་གྱི་དམིགས་བསལ་གྲོས་འཆར་དོན་ཚན་ ༢༣ ལས་བརྒྱ་ཆ་ ༧༠ ཁས་ལེན་བྱས་མེད་པ་དང་། དོན་ཚན་གཞན་རྣམས་ཁས་ལེན་བྱས་ཏེ་ལག་བསྟར་བྱས་ཟིན་ཟེར་བའང་དོན་དངོས་དང་མི་མཐུན་པ་ཞིག་རེད། ཅེས་འཁོད་འདུག
དེ་བཞིན་སྙན་ཞུ་དེའི་ནང་། ཡུ་རོབ་མནའ་འབྲེལ་མཐུན་ཚོགས་དང་རྒྱལ་ཁབ་ཁག་ཅིག་གིས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་དང་། དམིགས་བསལ་སྙན་ཞུ་བ་རྣམས་བོད་ནང་དུ་བཀག་སྡོམ་མེད་པར་རང་དབང་ཐོག་འགྲོ་ཆོག་པའི་འབོད་སྐུལ་ཞུས་ཡོད་ཀྱང་། རྒྱ་ནག་ཕྱོགས་ནས་བོད་ནང་དུ་འགྲོ་བསྐྱོད་བྱ་རྒྱུ་བཀག་སྡོམ་བྱས་ཡོད་པ་མ་ཟད། དེ་ལས་ལྡོག་སྟེ་སྤྱི་ཚོགས་ཡར་རྒྱས་ཀྱི་གནས་ཚུལ་རྫུན་མ་རྣམས་དྲིལ་བསྒྲགས་བྱས་ཡོད་པས། རྒྱལ་སྤྱིའི་སྤྱི་ཚོགས་ཀྱིས་ངེས་པར་དུ་གཡོ་ཐབས་འདི་དག་ཤེས་དགོས་པ་ཞིག་ཡིན། འགྲོ་བ་མིའི་ཐོབ་ཐང་ནི་ཕྱི་གསལ་ནང་གསལ་དང་ཁ་བྲལ་ཐབས་མེད་པ་ཞིག་ཡིན་པ་ནན་བརྗོད་བྱེད་དགོས། ལོ་མང་པོའི་དུས་ཡུན་རིང་བོད་ནང་བཙན་གནོན་གྱི་འཇིགས་སྐྲག་ཆེ་བའི་ཁོར་ཡུག་གི་རྐྱེན་གྱིས། བོད་མི་ཚོས་མཉམ་འབྲེལ་རྒྱལ་ཚོགས་ཀྱི་སྒྲིག་འཛུགས་ཁག་དང་། ལྷག་པར་དུ་ཨ་རིའི་གྲོས་ཚོགས་ནང་རང་དབང་གིས་འབྲེལ་བ་བྱེད་ཐུབ་ཀྱི་མེད།
ཛ་དྲག་གི་གནས་སྟངས་ལ་ཐུག་ཀྱང་ཞི་བདེའི་ཐོག་འགྱུར་བ་གཏོང་བའི་གདམ་ག་ཡོད་པ་བཞིན། ༧གོང་ས་རྒྱལ་བ་རིན་པོ་ཆེ་མཆོག་ནས་ཕྱོགས་གཉིས་ཀྱི་བསམ་འདུན་དང་མཐུན་པའི་གྲོས་མོལ་གྱི་ལམ་བུ་ཞིག་འཚོལ་བཞིན་ཡོད། རྒྱ་གཞུང་གིས་གོ་སྐབས་འདི་དམ་འཛིན་བྱེད་དགོས་པ་མ་ཟད། རྒྱལ་སྤྱིའི་སྤྱི་ཚོགས་ཀྱིས་གནོན་ཤུགས་སྤྲོད་དགོས། རྒྱ་ནག་ནི་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་ཚོགས་ཁོངས་ཡིན་པའི་ཆ་ནས། རྒྱ་གཞུང་གིས་བོད་མིའི་ཐོབ་ཐང་ལ་བརྩི་བཀུར་ཆ་ཚང་བྱས་པའི་ཐོག་ནས་མཐོ་སྒང་བོད་ཀྱི་དཀའ་རྙོག་དག་གི་གཞི་རྩ་ཐག་གཅོད་བྱེད་དགོས། བོད་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་དེའི་བརྒྱུད་ནས་འཛམ་གླིང་འགྲོ་བ་མིའི་ཐོབ་ཐང་སྲུང་སྐྱོབ་བྱེད་པའི་ནུས་པར་ཚོད་ལྟ་བྱེད་སྤྱད་ཅིག་ཆགས་ཡོད་ལ། འདི་ནི་ཕམ་མི་རུང་བའི་ཚོད་ལྟ་ཞིག་རེད། ཅེས་འཁོད་འདུག
མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༥༦ པ་དེ་ཕྱི་ཟླ་ ༦ ཚེས་ ༡༨ ནས་ཕྱི་ཟླ་ ༧ ཚེས་ ༡༢ བར་དུ་སུད་སི་ཇི་ནེ་ཝ་གྲོང་ཁྱེར་དུ་འཚོག་བཞིན་ཡོད་པ་དང་། ཐེངས་འདིའི་དབུ་འབྱེད་མཛད་སྒོའི་ཐོག་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ཨོ་མཱར་ཛི་ནི་གྷར་ (Omar Zniber) མཆོག་གི་གཙོས་ཚོགས་མི་ཝོལ་ཁེར་ཊུར་ཁི་(Volker Türk) ལགས་བཅས་རྒྱལ་ཁབ་འདྲ་མིན་གྱི་འགྲོ་མིའི་ཐོབ་ཐང་ལྷན་ཚོགས་ཀྱི་ཚོགས་མི་ ༤༧ མཉམ་ཞུགས་གནང་ཡོད་འདུག
འདས་ལོའི་ཕྱི་ཟླ་ ༢ ཚེས་ ༢༦ ནས་ལོ་དེའི་ཕྱི་ཟླ་ ༤ ཚེས་ ༥ བར་སུད་སི་ཇི་ནེ་ཝ་གྲོང་ཁྱེར་དུ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༥ འཚོགས་ཡོད་ཅིང་། སྐབས་དེར་སུད་སི་སྐུ་ཚབ་དོན་ཁང་གི་རྒྱལ་ཚོགས་ཞུ་གཏུག་འབྲེལ་ལས་ཕུན་ཚོགས་སྟོབས་རྒྱལ་ལགས་ཀྱིས་བོད་དོན་སྐོར་གྱི་བསྒྲགས་གཏམ་སྒྲོགས་སྦྱང་གནང་བའི་ནང་། བོད་ཐེ་བའི་རྒྱ་ནག་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པའི་སྐོར་དང་། རྒྱ་གཞུང་གིས་བོད་ཀྱི་སྐད་ཡིག་དང་རིག་གཞུང་རྩ་གཏོར་གཏོང་བཞིན་ཡོད་པའི་སྐོར། བོད་ཕྲུག་ས་ཡ་གཅིག་ཙམ་མི་སེར་སྤེལ་ཡུལ་གཏན་སློབ་ཁག་ཏུ་བཙན་འཇུག་བྱེད་བཞིན་པའི་སྐོར། བོད་མིའི་རིགས་རྫས་བརྟག་དཔྱད་བྱེད་བཞིན་པའི་སྐོར། གར་སོང་ཆ་མེད་དུ་གྱུར་བའི་༧པཎ་ཆེན་ཆུང་སྲིད་རིན་པོ་ཆེའི་ཛ་དྲག་གི་གནས་སྟངས་སྐོར་སོགས་ལ་གསལ་བཤད་གནང་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
