༧གོང་ས་མཆོག་ཕྱི་ལུགས་དགུང་གྲངས་ ༩༠ ཕེབས་སྐབས་རྒྱལ་སྤྱིའི་ཁྱོན་ཡོངས་ལ་ལོ་ཧྲིལ་པོར་བྱམས་བརྩེའི་ལོ་ཞེས་སྲུང་གཙི་ཞུ་རྒྱུ་ཡིན་འདུག

སྐུ་མགྲོན་གཙོ་བོ་འབྲས་ལྗོངས་སྤྱི་ཁྱབ་བློན་ཆེན་པྲེམ་སིངྒ་ཏ་མང་ (Prem Singh Tamang)མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་ཉིན་མོར་འཛམ་གླིང་ཁྱོན་ཡོངས་སུ་བྱམས་སྙིང་རྗེའི་ཉིན་མོར་སྲུང་གཙི་ཞུ་བཞིན་ཡོད་སྐོར་སོགས་གསུངས་སོང་།

དེ་རིང་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་གི་ཆོས་རའི་ནང་དུ། ༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ཀྱི་དགུང་གྲངས་ ༨༩ ལ་ཕེབས་པའི་གཞུང་འབྲེལ་འཁྲུངས་སྐར་སྲུང་གཙི་གནང་སོང་ལ། དེ་རིང་གི་མཛད་སྒོའི་ཐོག་སྐུ་མགྲོན་གཙོ་བོ་འབྲས་ལྗོངས་སྤྱི་ཁྱབ་བློན་ཆེན་པྲེམ་སིངྒ་ཏ་མང་ (Prem Singh Tamang)མཆོག་དང་། དམིགས་བསལ་སྐུ་མགྲོན་རྒྱ་གར་བྱང་ཤར་མངའ་སྡེ་ཨ་རུ་ན་ཅལ་ཁུལ་གྱི་གྲོས་ཚོགས་འོག་མའི་འཐུས་མི་སྐུ་ཞབས་ཏ་པིར་གྷའོ་ (Tapir Gao) ལགས་གཉིས་ཀྱི་དབུས་མགྲོན་པོ་ ། འབྲས་ལྗོངས་མངའ་སྡེའི་གྲོས་ཚོགས་ཚོགས་གཙོ་ནོར་བུ་གཤེར་པ་ལགས། ཁེ་ན་ཌ་ཨེན་ཊེ་རིའོ་མངའ་སྡེའི་ས་གནས་གྲོས་ཚོགས་ཚོགས་གཞོན་བུ་འཁྲིད་དཀར་པོ་ཆེ་ལགས། འབྲས་ལྗོངས་མངའ་སྡེའི་བློན་ཆེན་རྣམ་རྒྱལ་ལེབ་ཆ་ལགས། འབྲས་ལྗོངས་མངའ་སྡེའི་གྲོས་ཚོགས་འཐུས་མི་སྐུ་ཞབས་ཨི་རུང་ལེབ་ཆ་ལགས། འབྲས་ལྗོངས་མངའ་སྡེའི་གྲོས་ཚོགས་འཐུས་མི་སན་ཇི་ཏི་ (Sanjeet Kharel) ལགས། སུད་སི་ (Oetwill am See) གྲོང་སྡེའི་སྤྱི་ཁྱབ་པ་གངས་གཞོན་ཚང་རྣམ་རྒྱལ་ལགས། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་དབུས་མཛད་གཙོ་རྣམ་པ་དང་སྲི་ཞུ་ལས་བྱེད། དྷ་ས་ཁུལ་གྱི་སེར་སྐྱ་མི་མང་དང་སློབ་ཕྲུག་སོགས་འཛོམས་འདུག

མཛད་སྒོའི་ཐོག་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་མཆོག་ནས་སྲིད་སྐྱོང་སྤེན་པ་ཚེ་མཆོག་དང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ལ་ཕྱག་རྟགས་ཕུལ་སོང་ལ། བོད་མིའི་སྒྲིག་འཛུགས་ཀྱི་ངོས་ནས་ཁོང་རྣམ་པར་ཞལ་ཐང་དང་སྐུ་འདྲ་སོགས་ཕྱག་རྟགས་སུ་གནང་སོང་། དེ་བཞིན་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་ལས་བྱེད་ལས་དོན་གཟེངས་ཐོན་འགན་འཛིན་སྡེ་ཚན་ཁོངས་ནས་ལྡེ་ར་ལྡུན་གྱི་ས་གནས་མགོ་འཛིན་ཟུང་དྲུང་དོན་གྲུབ་རྒྱལ་པོ་ལགས་དང་། ལས་བྱའི་སྡེ་ཚན་ཁོངས་ནས་ཀ་སྦུག་ས་གནས་མགོ་འཛིན་ལས་ཁུངས་ཀྱི་ལས་དོ་བསྟན་འཛིན་ཆོས་དབྱིངས་ལགས་རྣམ་གཉིས་ལ་གཟེངས་རྟགས་ཕྱག་འཁྱེར་གནང་བ་དང་། དེ་བཞིན་ཞབས་ལོ་ ༢༥ འཁོར་བའི་བོད་མིའི་སྒྲིག་འཛུགས་ཀྱི་ལས་བྱེད་ ༦ ལ་བྱ་དགའ་གསོལ་རེས་གནང་སོང་ལ། འཕགས་བོད་གཉིས་གནའ་བོའི་བླ་སློབ་དང་དེང་གི་མཛའ་བརྩེའི་འབྲེལ་ལམ་ཞེས་པའི་བོད་འགྱུར་དེབ་ཅིག་དང་། ནུབ་ཧི་མ་ལ་ཡའི་བུ་ཆེན་མ་ཎི་བ་དང་ཕོ་བ་རྡོ་གཤག་གི་རབ་བྱེད་ཅེས་པའི་དཔེ་དེབ་དབུ་འབྱེད་གནང་སོང་།

སྲིད་སྐྱོང་སྤེན་པ་ཚེ་རིང་མཆོག་ནས་༧སྐུའི་འཁྲུངས་སྐར་ཀྱི་བཀའ་ཤག་གི་གསུང་འཕྲིན་སྒྲོགས་སྦྱངས་གནང་སྐབས། འཛམ་གླིང་ས་ཕྱོགས་གང་སར་༸མགོན་པོ་གང་ཉིད་ཀྱི་༸སྐུའི་འཁྲུངས་སྐར་སྲུང་བརྩི་བྱེད་པའི་དུས་ཚེས་ཁྱད་པར་ཅན་འདིར། ང་ཚོ་ཚང་མས་རྣམ་པ་འདྲ་མིན་གྱི་དགའ་སྟོན་ལ་རོལ་པ་དང་ཆབས་ཅིག། ༸གོང་ས་༸སྐྱབས་མགོན་ཆེན་པོ་མཆོག་ནས་བྱམས་བརྩེ་ལྡན་པའི་གོ་ལ་ཞིག་འཛུགས་སྐྲུན་བྱེད་པའི་རླབས་ཆེན་གྱི་མཛད་འགན་བསྐྱངས་དང་སྐྱོང་བཞིན་པར་དྲིན་གཟོ་སླད་མི་རེ་ངོ་རེས་བྱམས་བརྩེའི་ཉམས་ལེན་བསྟེན་པའི་དུས་ཚེས་ཤིག་ཡིན་པར་དྲན་བསྐུལ་ཞུ་རྒྱུ་ཡིན་ཞེས་གསུངས་པ་དང་འབྲེལ། བོད་ལུགས་ལྟར་ན། ད་ལོ་༸མགོན་པོ་མཆོག་གོ་སྟོན་རྟེན་འབྲེལ་གྱི་ཉིན་མོར་འཁེལ་ཡོད་པ་དང་། ཕྱི་ལོ་ ༢༠༢༥ ཟླ་ ༧ པ་ནས་བཀའ་ཤག་གིས་ཕྱི་ལུགས་ལྟར་རྒྱལ་སྤྱིའི་ཁྱོན་ལ་ལོ་འཁོར་ཧྲིལ་པོར་བྱམས་བརྩེའི་ལོ་ཞེས་གཞུང་འབྲེལ་གོ་སྟོན་གོ་སྒྲིག་ཞུ་གཏན་འཁེལ་ཏེ་མཛད་རིམ་རྣམ་མང་འཆར་སྒྲིག་ཞུ་བཞིན་ཡོད་པ་དང་། དེར་སྟ་གོན་གྱི་ཚུལ་དུ་དེ་རིང་ནས་ཡོང་འགྱུར་གྱི་གཞུང་འབྲེལ་མཛད་སྒོ་ཁག་བཞིར་༸མགོན་པོ་མཆོག་གི་མཛད་འགན་བཞིའི་སྐོར་ངོ་སྤྲོད་སྙིང་བསྡུས་བརྒྱུད། རྗེས་འཇུག་ཀུན་ལ་བཀའ་བཞིན་སྒྲུབ་པའི་མཆོད་པས་མཉེས་པར་ཞུ་གལ་སྐོར་དྲན་སྐུལ་ཞུ་འཆར་ཡིན་ཞེས་དང་།

ད་ལྟ་འཕྲད་བཞིན་པ་དང་། འབྱུང་འགྱུར་གྱི་མི་རབས་རྣམས་ལའང་འཕྲད་པར་འགྱུར་བའི་ཇེ་སྡུག་ནས་ཇེ་ཐུར་འགྲོ་བཞིན་པའི་དབུལ་ཕྱུག་གི་བར་ཁྱད་དང་། “ང་ཚོ་དང་ཁོང་ཚོའི་” བར་ཐག་གི་འཐབ་རྩོད་ཀྱི་དཀའ་ཁག་རྣམས་ལ་གདོང་ལེན་ཆེད། ཁེར་རྐྱང་བ་དང་རང་ཚུགས་ཐུབ་པས་སྟོང་པའི་རྟེན་འབྲེལ་ལྟོས་གྲུབ་ཀྱི་ལྟ་གྲུབ་ལ་རྒྱབ་རྟེན་བཅོལ་བའི་ཕན་ཚུན་བསམ་ཤེས་གུ་ཡངས་དང་འགན་འཁུར། ཀུན་ལ་བྱམས་བརྩེ་ལྡན་པའི་མི་ཚེ་སྐྱེལ་སྟངས་ཀྱི་ཤེས་ཡོན་དང་། དཀའ་ངལ་གྱི་འབྱུང་རྩ་ “ ང་དང་ངའི་ ” ཞེས་པའི་མཁྲེགས་འཛིན་གྱི་བསམ་བློ་སྤོང་ཐབས་ཀྱི་དགོངས་གཞི་རྒྱ་ཆེར་བཀྲལ་ཅིང། བྱམས་བརྩེ་དང་ཤེས་རབ་ཟུང་དུ་འབྲེལ་བའི་ཤེས་ཡོན་སྤྲོད་སྟངས་ཤིག་དེང་རབས་སློབ་གསོའི་ལམ་ལུགས་ཁོངས་འཇུག་གལ་ནན་སྐུལ་མཛད་པ་བཞིན། ད་ལྟའི་ཆར་རྒྱལ་ཁབ་ ༡༣༠ ལྷག་ནང་དངོས་སུ་ལག་བསྟར་བྱེད་བཞིན་པ་དང་། རྒྱལ་སྤྱིའི་རང་བཞིན་གྱི་བགྲོ་གླེང་ཡང་ལོ་ལྟར་འཚོགས་བཞིན་ཡོད་ཅིང་། ནུབ་ཕྱོགས་ཀྱི་ཡུལ་གྲུ་མང་པོས་༸མགོན་པོ་མཆོག་གི་རླབས་ཆེན་གྱི་དགོངས་བཞེད་འདིར་བཀུར་གཟོས་མཚོན་སླད་ད་བར་གཟེངས་རྟགས་དང་ཕྱག་འཁྱེར་གྲགས་ཆེ་བ་ ༣༠༠ སྐོར་འབུལ་བཞེས་བྱུང་ཡོད། ༸མགོན་པོ་མཆོག་རྒྱལ་ཁབ་ ༦༠ ལྷག་ཙམ་ཞིག་གི་ནང་ཐེངས་ ༣༠༠ མ་ཟིན་ཙམ་ཞིག་ཕྱོགས་ཕེབས་གནང་སྟེ། རྒྱལ་ཁབ་སོ་སོའི་ཆབ་སྲིད་དང་ཆོས་ལུགས་ཁག་གི་དབུ་ཁྲིད་ ༥༠༠ མ་ཟིན་ཙམ་ཞིག་ལ་མཇལ་མོལ་དང་། མང་ཚོགས་ལ་བཀའ་སློབ། སྙན་གྲགས་ཅན་གྱི་གཙུག་ལག་སློབ་གཉེར་ཁང་བཅུ་ཕྲག་དྲུག་ཙམ་ཞིག་ཏུ་ཞབས་སོར་བཀོད་དེ། ༸མགོན་པོ་མཆོག་གི་མཛད་འགན་བཞི་ཡིས་མཚོན་པའི་གུ་ཡངས་དཀྱེལ་ཆེའི་བཞེད་དགོངས་རྣམས་རྒྱས་པར་གསུང་གླེང་མཛད་པས། སྐལ་ལྡན་སྐྱེ་བོ་ས་ཡ་དུ་མར་བླང་དོར་གྱི་བློ་མིག་ཕྱེས་ཡོད་ཅེས་སོགས་གསུངས་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་སྤྱི་འཐུས་ཀྱི་གསུང་བཤད་སྒྲོགས་སྦྱང་གནང་བའི་ནང་། ༸རྒྱལ་བ་སྐུ་ཕྲེང་བཅུ་བཞི་པ་ཆེན་པོ་མཆོག་ནི་ཕྱི་ནང་གི་རིག་པའི་གནས་མཐའ་དག་ལ་མཁྱེན་པ་རྒྱས་ཤིང་། དེང་གི་ཚན་རིག་བཅས་ལ་ཐུགས་སྣང་ཆེན་པོ་གནང་སྟེ་འཛམ་གླིང་ནང་ཆེ་དགུ་ཀུན་གྱིས་བཀུར་བ་དང་། ཁོང་གི་མཛད་འཕྲིན་ལ་ཡིད་སྨོན་ཆེན་པོ་ཞུ་བཞིན་ཡོད། ཆོས་ཕྱོགས་ནས་དད་ལྡན་འབུམ་ཕྲག་མང་པོར་དབང་ལུང་ཁྲིད་གསུམ་རྒྱ་ཆེར་གནང་ཞིང་། ལྷག་པར་དུ་ཕྱི་ལོ་ ༡༩༥༤ ནས་བཟུང་ད་བར་དུས་འཁོར་དབང་ཆེན་ཐེངས་ ༣༤ བསྩལ་གནང་མཛད་ཅིང་། ཉིན་མཚན་དུས་དྲུག་ཏུ་སྟོང་ཉིད་སྙིང་རྗེ་སྙིང་པོ་ཅན་གྱི་བྱང་ཆུབ་ཀྱི་སེམས་ཐུགས་ཉམས་སུ་བཞེས་པའི་སྒོ་ནས་རྒྱལ་བསྟན་སྤྱི་དང་བྱེ་བྲག་ཏུ་བོད་བརྒྱུད་ནང་བསྟན་གྱི་རྗེས་འཇུག་པ་རྣམས་ནང་ཕན་ཚུན་དམ་ཚིག་འོ་ཆུ་གཅིག་འདྲེས་མཛད་པ་ཙམ་དུ་མ་ཟད། འཛམ་གླིང་ནང་གི་ཆོས་ལུགས་ཕན་ཚུན་མཐུན་སྒྲིལ་ཡོང་ཐབས་སུ་སྐུ་ངལ་འཛེམས་མེད་ཀྱི་ཐོག་ནས་ས་ཕྱོགས་གང་སར་ཆིབས་བསྒྱུར་མཛད་ནས་བཀའ་སློབ་ལམ་སྟོན་གནང་འབྲས་སུ་ནང་པ་མ་ཡིན་པའི་ཆོས་ལུགས་གཞན་ཁག་གི་བླ་ཆེན་རྣམ་པའི་རྗེས་འབྲང་དང་བཅས་པས་ཀྱང་མོས་གུས་ཆེན་པོའི་སྒོ་ནས་བཀའ་གསུང་དང་ལེན་ཞུས་དང་ཞུ་བཞིན་ཡོད་ཅེས་དང་།  ཉེ་ཆར་༸མགོན་པོ་གང་ཉིད་མཆོག་ཨ་རིར་ཞབས་པུས་སྨན་བཅོས་གནང་བར་ཕེབས་ཤིང་ཞབས་པུས་སྨན་བཅོས་ཆེས་ལེགས་གྲུབ་བྱུང་བར་རང་ཅག་རྣམས་ཧ་ཅང་དགའ་ཚོར་ཆེན་པོ་བྱུང་བ་མ་ཟད་དུས་དེར་རིས་མེད་དགོན་སྡེ་ཁག་དང་། བོད་གཞིས་བྱེས་གཉིས། ཧི་མ་ལ་ཡའི་རི་བརྒྱུད། ཆོས་ལུགས་གཞན་བཅས་ཀྱིས་ཞབས་རིམ་བསྒྲུབས་ཤིང་། གནད་ཡོད་མི་སྣ་མང་པོས་༸སྐུའི་འཕྲོད་བཞེས་བཟང་ཞིང་གང་མྱུར་བདེ་ཐང་ཡོང་བའི་སྨོན་འདུན་ཞུས་གནང་བ་དང་། ཨ་རི་ནེའུ་ཡོག་ཏུ་རྟེན་གཞི་བྱས་པའི་སྨན་ཁང་ (Hospital for Special Surgery) གི་སྨན་པ་དང་སྨན་ཞབས། སྐུ་བཅར་ཞབས་ཞུ་བ་རྣམ་པ་བཅས་འབྲེལ་ཡོད་ཚང་མར་དེ་རིང་གི་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་།

དེ་བཞིན་དེ་རིང་འཛམ་གླིང་ཡུལ་གྲུ་གང་སར་གནས་པའི་བོད་མི་ཡོངས་ཀྱི་དགའ་དད་སྤྲོ་གསུམ་ངང་༸སྐུ་ཡི་འཁྲུངས་སྐར་སྲུང་བརྩི་ཞུ་བའི་ལམ་ནས་མགོན་པོ་མཆོག་གི་ཀུན་ཁྱབ་མཛད་འཕྲིན་རྣམས་ཀྱི་བཀའ་དྲིན་རྗེས་སུ་དྲན་ཞིང་། བླང་དོར་ལམ་སྟོན་མཛད་པ་གང་ཐུབ་ཅི་ཐུབ་ཀྱིས་ཉམས་ལེན་ཞུ་རྒྱུའི་དམ་བཅའ་བསྐྱར་ནན་ཞུ་རྒྱུ་དང་། བདག་ཅག་བོད་འབངས་ཡོངས་ཀྱིས་རྒྱལ་བའི་དགོངས་བཞེད་དང་བཀའ་སློབ་ལམ་སྟོན་བཞིན་སྙིང་སྟོབས་བསྐྱེད་དེ་ནུས་པ་མཉམ་སྤུངས་ཀྱིས་ཆིག་སྒྲིལ་ངང་བོད་ཀྱི་ཆོས་དང་། རིག་གཞུང་། སྐད་ཡིག བོད་དོན་བདེན་པའི་འཐབ་རྩོད་བཅས་ལ་ནུས་པ་གང་ཡོད་འདོན་ཐབས་ཞུ་དགོས་ཞེས་དང་། འདི་ལོར་བོད་ལུགས་ལྟར་ན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་དགུ་བཅུར་ཕེབས་ཀྱི་ཡོད་པ་དང་། ཕྱི་ལུགས་དགུང་ལོ་དགུ་བཅུ་རྗེས་ལོར་འཁེལ་གྱི་ཡོད་སྟབས། སྐབས་དེར་བོད་མིའི་སྒྲིག་འཛུགས་ངོས་ནས་༸གོང་ས་མཆོག་གི་བཀའ་དྲིན་རྗེས་དྲན་དང་ཐུགས་རྗེ་ཆེ་ཞུའི་ཆེད་གོ་སྟོན་གྱི་མཛད་སྒོ་རྒྱས་པ་ཞིག་དང་། བརྟན་བཞུགས་བསྟར་འབུལ་ཞུ་རྒྱུ། ལོ་གཅིག་ཧྲིལ་པོར་གོ་སྟོན་སྲུང་བརྩི་ཞུ་རྒྱུའི་འཆར་གཞི་ཡོད་པ་ལྟར། ཚོགས་སྒེར་ཁག་ཡོངས་ནས་ཀྱང་བཀའ་དྲིན་རྗེས་དྲན་ཞུ་ཕྱིར་གོ་སྟོན་སྐབས་ལས་འཆར་ཆེ་ཕྲ་སྣ་ཚོགས་ཤིག་སྤེལ་ཐུབ་ན་༸རྒྱལ་བ་དགྱེས་པའི་མཆོད་སྤྲིན་དུ་འགྱུར་རྒྱུར་སོང་དེ་དོན་ཞུ་ཕྱོགས་དགོས་པའི་འབོད་སྐུལ་ཞུ་རྒྱུ་ཡིན་ཞེས་སོགས་གསུངས་སོང་།

དེ་ནས་སུད་སི་ (Oetwill am See) གྲོང་སྡེའི་སྤྱི་ཁྱབ་གངས་གཞོན་ཚང་རྣམ་རྒྱལ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནས་ལོ་ངོ་ ༦༥ རིང་སྐུ་ངལ་འཛེམས་མེད་ངང་བོད་དོན་ཆེད་ཕྱག་ལས་གནང་ཡོད་ལ། དེ་ནི་འགྲོ་བ་མིའི་རིགས་ཀྱི་ཆེད་དུའང་རེད། དཔལ་ལྡན་སྲིད་སྐྱོང་མཆོག་དང་བོད་མིའི་སྒྲིག་འཛུགས་ནས་ཕུལ་དུ་བྱུང་བའི་ཕྱག་ལས་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན་ཞེས་དང་། ༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཡུན་ནས་ཡུན་དུ་བརྟན་པའི་སྨོན་འདུན་ཞུ་ཞེས་གསུངས་སོང་། དེ་བཞིན་ཁེ་ན་ཌ་ཨེན་ཊེ་རིའོ་མངའ་སྡེ་གྲོས་ཚོགས་ཀྱི་ཚོགས་གཞོན་བུ་འཁྲིད་དཀར་པོ་ཆེ་ལགས་ཀྱིས། ༧གོང་ས་མཆོག་གི་འཁྲུངས་སྐར་ལ་བཀྲིས་བདེ་ལེགས། ད་ལོ་༧སྐུའི་འཁྲུངས་སྐར་དུས་ཆེན་དྷ་རམ་ས་ལར་སྲུང་གཙི་ཞུ་རྒྱུའི་གོ་སྐབས་རག་པར་སྐལ་བ་བཟང་པོ་བྱུང་། བོད་མིའི་སྒྲིག་འཛུགས་དང་མི་མང་དང་ལྷན་དུ་སྲུང་གཙི་ཞུས་པ་ཐེངས་དང་པོ་ཡིན། དགའ་པོ་ཞེ་དྲགས་བྱུང་ཞེས་དང་། ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ནང་བཙན་བྱོལ་དུ་འབྱོར་བའི་སྐབས་ཏེ་བོད་ཀྱི་ལོ་རྒྱུས་ནང་ཆེས་གཉན་འཕྲེང་ཆེ་བའི་དུས་སྐབས་དེར། ༧གོང་ས་མཆོག་དགུང་གྲངས་ ༢༤ ལས་ཕེབས་མེད་ཀྱང་ཁོང་གི་མཁྱེན་དཔྱོད་ལ་བརྟེན་ནས་བཙན་བྱོལ་བོད་མིའི་བྱིས་པ་ཚོར་སློབ་གྲྭ་དང་། མི་མང་གཞིས་ཆགས། གྲྭ་བཙུན་ཆེད་དགོན་པ་གྲྭ་ཚང་ཁག་བཅས་གསར་འཛུགས་མཛད་ཡོད་ལ། དགོན་པ་གྲྭ་ཚང་ཁག་ནི་བོད་ཀྱི་ཤེས་རབ་དང་ནང་ཆོས་སོགས་འབྱུང་གནས་ཡིན་སྐོར་དང་། རྒྱ་གར་གཞུང་མང་གཉིས་ཀྱི་གཏོང་ཕོད་དང་རྒྱབ་སྐྱོར་མེད་ཚེ་འདི་རྣམས་འགྲུབ་ཐབས་མེད་སྐོར་དང་། སྐུ་དགུང་ལོ་ ༢༤ ལས་བཞེས་མེད་པ་ཞིག་ལ་བཙན་བྱོལ་ནང་སོ་སོའི་མི་མང་གི་ཆེད་དུ་འདི་འདྲ་ལྟ་བུའི་ཤེས་རབ་ལྡན་པ་དང་། མི་ལོ་ ༦༥ ལྷག་རིང་མཛད་པ་རླབས་ཆེན་བསྐྱངས་བ་ནི་བློ་ཡུལ་དུ་ཤོང་དཀའ་བ་ཞིག་ཡིན་ལ། ང་ཚོ་ནི་ཁོང་གིས་སྐུ་ངལ་འཛེམས་མེད་ཀྱི་དབུ་འཁྲིད་འོག་བྱུང་བ་ཞིག་ཡིན་སྐོར་སོགས་གསུངས་སོང་།

དམིགས་བསལ་སྐུ་མགྲོན་ཨ་རུ་ན་ཅལ་མངའ་སྡེའི་གྲོས་ཚོགས་འོག་མའི་འཐུས་མི་སྐུ་ཞབས་ཏ་པིར་གྷའོ་ (Tapir Gao) ལགས་ཀྱིས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༨༩ ལ་ཕེབས་པའི་འཁྲུངས་སྐར་དུས་ཆེན་སྲུང་གཙི་ཞུ་རྒྱུ་བྱུང་བར་དགའ་པོ་བྱུང་། དེ་རིང་གི་ཉིན་མོར་འཁྲུངས་སྐར་དུས་ཆེན་སྲུང་གཙི་ཞུས་པ་ཙམ་མིན་པར། ཁོང་གིས་སྐུ་ཚེ་ཧྲིལ་པོར་ཞི་བདེ་དང་བྱམས་སྙིང་རྗེའི་དོན་དུ་སྐུ་ལས་མང་པོ་བསྐྱོན་ཡོད་ལ། འགྲོ་བ་མིའི་རིགས་ཀྱི་དོན་དུ་སྐུ་ལས་མང་པོ་བསྐྱོན་ཡོད་པ་དང་། བོད་དང་རྒྱ་གར་གྱི་འབྲེལ་ལམ་ཡར་རྒྱས་འགྲོ་བཞིན་ཡོད་པ་དང་། ༧གོང་ས་མཆོག་ནས་འཛམ་གླིང་ས་ཕྱོགས་གང་སར་འཚེ་མེད་ཞི་བ་དང་བྱམས་སྙིང་རྗེའི་སྐོར་ལ་བཀའ་སློབ་མང་པོ་བསྩལ་ཡོད་སྐོར་དང་། ཁོང་གི་འཁྲུངས་སྐར་ཉིན་འཛམ་གླིང་ཡོངས་ལ་བྱམས་སྙིང་རྗེའི་ཉིན་མོ་སྲུང་གཙི་བྱེད་ཀྱི་ཡོད་ལ། རྒྱ་གར་མི་མང་གིས་དུས་རྟག་ཏུ་བོད་མི་རྣམས་ལ་རྒྱབ་སྐྱོར་ཡོད་སྐོར་སོགས་གསུངས་སོང་།

སྐུ་མགྲོན་གཙོ་བོ་འབྲས་ལྗོངས་སྤྱི་ཁྱབ་བློན་ཆེན་པྲེམ་སིངྒ་ཏ་མང་ (Prem Singh Tamang)མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་ཉིན་མོར་འཚམས་འདྲི་བཀྲ་ཤིས་བདེ་ལེགས་ཞུ་ཡི་ཡོད། དེ་རིང་དྷ་རམ་ས་ལར་༧སྐུའི་འཁྲུངས་སྐར་སྲུང་གཙི་ཞུ་རྒྱུའི་གོ་སྐབས་བྱུང་བར་དགའ་པོ་ཞེ་དྲགས་བྱུང་། ༧གོང་ས་མཆོག་དགུང་ལོ་ཆུང་དུས་ནས་དཀའ་ངལ་མང་པོ་བྱུང་ཡོད་ཀྱང་། ཞི་བདེ་དང་བྱམས་སྙིང་རྗེ་ཁྱབ་སྤེལ་གནང་མུས་ཡིན་ལ།  ཁོང་གིས་དུས་རྒྱུན་དུ་ནས་འཛམ་གླིང་ས་ཕྱོགས་གང་སར་བྱམས་སྙིང་རྗེའི་སྐོར་བཀའ་སློབ་གནང་གི་ཡོད་ལ། ཕྱི་ལོ་ ༡༩༨༩ ལོར་ནོ་སྦེལ་ཞི་བདེའི་གཟེངས་རྟགས་བཞེས་ཡོད་པ་མ་ཟད། དེ་རིང་འཁྲུངས་སྐར་གྱི་ཉིན་མོར་འཛམ་གླིང་ཡོངས་ལ་བྱམས་སྙིང་རྗེའི་ཉིན་མོར་སྲུང་གཙི་ཞུ་བཞིན་ཡོད་སྐོར་དང་། ༧མགོན་པོ་གང་ཉིད་མཆོག་གི་སྐུ་གཟུགས་བདེ་ཐང་དང་སྐུ་ཚེ་ཡུན་རིང་བརྟན་པའི་གསེལ་འདེབས་ཞུ་བཞིན་ཡོད་སྐོར་གསུངས་སོང་།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་བྱེད་མཁན། པདྨ་མཚོ།