ཤེས་རིག་བཀའ་བློན་མཆོག་ནས་ཉི་ཧོང་གྲོས་ཚོགས་ནང་བོད་དོན་གསུང་བཤད་གནང་།

བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་ཊོག་ཡོ་མ་བྷ་གཙུག་ལག་སློབ་གཉེར་ཁང་དུ་རྒྱ་ནག་གི་མི་སེར་སྤེལ་ཡུལ་གྱི་གཏན་སློབ་ནི་གྲངས་ཉུང་མི་རིགས་ཀྱི་ངོ་བོ་རྩ་མེད་བཟོ་བའི་འཆར་གཞི་ངན་པ་ཞིག་ཡིན། ཞེས་པའི་བརྗོད་གཞིའི་ཐོག་གསུང་བཤད་གནང་ཡོད་འདུག

ཟླ་འདིའི་ཕྱི་ཚེས་ ༨ ཉིན་དབུས་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་ཉི་ཧོང་གྲོས་ཚོགས་ནང་ཕེབས་ཏེ་བོད་དོན་གསུང་བཤད་གནང་ཡོད་པ་དང་། སྐབས་དེར་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཤི་མོ་མུ་ར་ཧ་ཀུ་བུན་ (Shimomura Hakubun) མཆོག་དང་། ལྕམ་སྐུ་ཨི་ཤི་ཤི་ཐོ་ཀོ་ (Ishii Mitsuko) ལགས། སྐུ་ཞབས་རུའུ་ཧི་རོ་ཧྥུ་མི་ (Ryu Hirofumi) ལགས་སོགས་དང་མཇལ་འཕྲད་གནང་ཡོད་འདུག

ཉི་ཧོང་གྲོས་ཚོགས་སུ་གསུང་བཤད་གནང་སྐབས་བཀའ་བློན་མཆོག་གིས། རྒྱ་ནག་གཞུང་གིས་བོད་ནང་དུ་བཅའ་སྡོད་སློབ་གྲྭ་མང་པོ་ཆེད་འཛུགས་ཀྱིས་བོད་ཀྱི་སློབ་ཕྲུག་རྣམས་རང་རང་གི་ཕ་མ་དང་ཁ་བྲལ་དུ་བཅུག་སྟེ་མི་སེར་སྤེལ་ཡུལ་རིང་ལུགས་ཀྱི་སྲིད་ཇུས་སྤེལ་བཞིན་ཡོད་པ་དང་། བོད་ཀྱི་སྐད་ཡིག་དང་ཆོས་རིག་སོགས་རྩ་མེད་དུ་བཏང་སྟེ་བོད་མིའི་ངོ་བོ་ཤུལ་མེད་དུ་བཟོ་ཐབས་བྱེད་མུས་ཡིན་པའི་སྐོར་དང་། རྒྱ་ནག་གཞུང་གིས་བོད་ནང་ཚད་ལས་འདས་པའི་དྲག་གནོན་བྱས་ཏེ། བོད་མིའི་འགྲོ་འདུག་སྤྱོད་གསུམ་ལ་ལྟ་རྟོག་ནན་མོས། བོད་ནང་གི་བོད་མི་རྣམས་ལ་གཞི་རྩའི་འགྲོ་བ་མིའི་ཐོབ་ཐང་མེད་པའི་སྐོར་སོགས་ངོ་སྤྲོད་གནང་བ་བརྒྱུད། ཉི་ཧོང་གྲོས་ཚོགས་དང་གཞུང་དམངས་གཉིས་ནས་བོད་དོན་ཐད་ལ་མུ་མཐུད་རྒྱབ་སྐྱོར་གནང་བའི་འབོད་སྐུལ་ཞུས་ཡོད་འདུག

ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས། འདི་ལོའི་ཕྱི་ཟླ་ ༡ ནང་མཉམ་འབྲེལ་ཀྱི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་བསྐྱར་ཞིབ་སྐབས། ཉི་ཧོང་གཞུང་གིས་རྒྱ་ནག་གིས་བོད་ནང་དུ་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པ་ཐེར་འདོན་དང་སྐྱོན་བརྗོད་གནང་བར་ཐུགས་རྗེ་ཆེ་ཞུས་ཡོད་པའི་ཁར། རྒྱ་ནག་གཞུང་གིས་ཐབས་མཁས་པོས་ཕྱོགས་མང་པོ་ཞིག་ནས་བོད་ཀྱི་སྐད་ཡིག་དང་རིག་གཞུང་ཚུད་པའི་བོད་ཀྱི་ངོ་བོ་རྩ་མེད་བཟོ་ཐབས་བྱེད་མུས་ཡིན་སྐོར་སོགས་འགྲེལ་བརྗོད་གནང་འདུག

ཟླ་འདིའི་ཕྱི་ཚེས་ ༨ ཉིན་ཤེས་རིག་བཀའ་བློན་མཆོག་ནས་ཉི་ཧོང་གི་རྒྱལ་ས་ཊོག་ཡོ་རུ་རྟེན་གཞི་བྱས་པའི་ཊོག་ཡོ་ཀོ་མ་བྷ་(Tokyo Komaba)  གཙུག་ལག་སློབ་གཉེར་ཁང་དུ། རྒྱ་ནག་གི་མི་སེར་སྤེལ་ཡུལ་གྱི་གཏན་སློབ་ནི་གྲངས་ཉུང་མི་རིགས་ཀྱི་ངོ་བོ་རྩ་མེད་བཟོ་བའི་འཆར་གཞི་ངན་པ་ཞིག་ཡིན། ཞེས་པའི་བརྗོད་གཞིའི་ཐོག་གསུང་བཤད་གནང་ཡོད་ཅིང་། བཀའ་བློན་མཆོག་གིས། ང་ཚོ་ཚང་མ་མཉམ་རུབ་ཀྱིས་ལངས་ཏེ་རྒྱ་ནག་གཞུང་ལ་གཏན་སློབ་དེ་དག་སྒོ་རྒྱག་ཏུ་འཇུག་དགོས་པ་དང་། རྒྱ་གཞུང་གི་ཉེན་ཚབས་ཅན་གྱི་སྲིད་ཇུས་དེ་འཕྲལ་དུ་མཚམས་འཇོག་དགོས་པའི་འབོད་སྐུལ་ཞུ་དགོས། ང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་རྒྱལ་སྤྱིའི་འགན་འཁྲི་སྲུང་སྐྱོབ་དང་། ལྷོ་སོག་ཡུ་གུར་མཚོན་པའི་་མི་རིགས་ཚང་མའི་ཐོབ་ཐང་ལ་བརྩི་བཀུར་བྱེད་དགོས་པའི་འབོད་སྐུལ་བྱ་དགོས། དེ་བཞིན་ང་ཚོས་འགྲོ་བ་མིའི་ཐོབ་ཐང་གི་ཚོགས་པ་དང་། ལོ་རྒྱུས་ཀྱི་ཐོག་ནས་མི་སེར་སྤེལ་ཡུལ་གཏན་སློབ་ཀྱི་ཉམས་མྱོང་གཅིག་མཚུངས་ཡོད་པའི་མི་རིགས། ཁྲིམས་བཟོ་བ། ཕྲུ་གུའི་ཐོབ་ཐང་ཆེད་མཁས་པ། གྲོས་ཚོགས། གསར་འགྱུར་བརྒྱུད་ལམ། སྤྱི་ཚོགས་དྲ་རྒྱ་བཅས་ཀྱི་མཐུན་གྲོགས་འཚོལ་སྒྲུབ་བྱ་དགོས། རྒྱ་ནག་གཞུང་གིས་སྒོ་བརྒྱབ་པའི་སློབ་གྲྭ་དང་མཐོ་སློབ་ཁག་སླར་ཡང་སྒོ་ཕྱེ་བར་རེ་འདུན་དང་གནོན་ཤུགས་སྤྲད་དགོས། ཞེས་གསུངས་འདུག་ལ། གསུང་བཤད་སྐབས་ལྷོ་སོག་ལྷན་ཚོགས་ཀྱི་སྐུ་ཞབས་དའི་ཆིན་ཨོལ་ཧུན་རྡུ་ (Daichin Olhunud) ལགས་དང་། ཉི་ཧོང་ཡུ་གུར་མཉམ་འབྲེལ་ཚོགས་པའི་སྐུ་ཞབས་རས་ཐེབ་ཨ་ཕུ་མེཊ་ (Retep Afumet) ལགས། ཊོག་ཡོ་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ཨ་ཁོ་ཊོ་མོ་ཀོ་ (Ako Tomoko) ལགས་སོགས་ཀྱིས་མཉམ་ཞུགས་གནང་འདུག

འདི་གའི་གསར་འགོད་པར་ཤེས་རིག་ལས་ཁུངས་ཀྱིས་བསྐུར་བའི་བཀའ་བློན་མཆོག་གི་མཛད་འཆར་ལྟར་ན། དེ་རིང་ཕྱི་ཚེས ༡༠ ཉིན་བཀའ་བློན་མཆོག་གིས་རི་ཏཱ་ཀུ་དང་ཆི་བྷ་འཕྲུལ་ལས་གཙུག་ལག་སློབ་གཉེར་ཁང་སོགས་སུ་ཕེབས་རྒྱུ་དང་། ཕྱི་ཚེས་ ༡༢ ཉིན་ཁུལ་དེའི་བོད་རིགས་ཁག་ཅིག་ལ་མཇལ་འཕྲད་གནང་རྒྱུ་ཡིན་འདུག ཕྱི་ཚེས་ ༡༣ ཉིན་ཧེ་ནི་བྷ་གནམ་ཐང་ནས་ཕྱིར་རྒྱ་གར་དུ་ཕེབབས་འཆར་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།