ཧྥ་རན་སིའི་གྲོས་ཚོགས་ཀྱི་འོས་བསྡུའི་ཁྲོད་མི་མང་མདུན་སྐྱོད་གསར་པའི་ཚོགས་པར་རྒྱལ་ཁ་ཐོབ་ཡོད་ཀྱང་གཞུང་འཛིན་ཚོགས་པ་ཆགས་པར་ད་དུང་འཐུས་མི་ ༡༠༠ དགོས་ཀྱི་ཡོད་སྟབས་གཅིག་སྒྲིལ་མཉམ་འབྲེལ་སྲིད་གཞུང་ཞིག་འཛུགས་ཐུབ་པར་ནང་མོལ་བྱེད་བཞིན་ཡོད་འདུག
![](https://tibettimes.net/wp-content/uploads/2024/07/༡.png)
ཡུ་རོབ་ནང་གི་དཔལ་འབྱོར་གནས་བབ་ལེགས་ཤོས་ཨང་གཉིས་པ་དང་། དམག་དོན་གྱི་སྟོབས་ཤུགས་ཆེ་ཤོས་ཧྥ་རན་སིའི་ནང་འདི་ལོའི་ཕྱི་ཟླ་ ༦ ཚེས་ ༣༠ ཉིན་ཧྥ་རན་སི་རྒྱལ་ཡོངས་འོས་བསྡུ་གནང་ཡོད་པ་ལྟར། ཧྥ་རན་སིའི་རྒྱལ་ཡོངས་མཐུན་གྲོགས་ (National Rally and allies) ཚོགས་པར་འོས་གྲངས་ ༡༤༣ དང་། མཐུན་འབྲེལ་ཚོགས་པར་ (Ensemble alliance) འོས་གྲངས་ ༡༦༣། མི་མང་མདུན་སྐྱོད་གསར་པའི་ཚོགས་པ་ (New Popular Front) ལ་འོས་གྲངས་ ༡༨༢ ཐོབ་ཡོད་འདུག ཡིན་ནའང་། གཞུང་འཛིན་ཚོགས་པ་ཆགས་པར་ཉུང་མཐར་གྲོས་ཚོགས་ཀྱི་ཞབས་བཀྱག་ ༢༨༩ འཐོབ་དགོས་ཀྱི་ཡོད་སྟབས། ད་ལྟའི་ཆར་སྲིད་དོན་ཚོགས་པ་ཁག་གི་བར་གསང་བའི་ཚོགས་འདུ་བསྡུས་ཏེ་མཉམ་འབྲེལ་འཛིན་སྐྱོང་བྱེད་པར་གྲོས་མོལ་བྱེད་བཞིན་པའི་སྒང་ཡིན་འདུག
ཟླ་འདིའི་ཕྱི་ཚེས་ ༨ ཉིན་ཧྥ་རན་སིའི་སྲིད་བློན་གྷེ་བྷི་རིལ་ཨ་ཊ་(Gabriel Attal)ལགས་ཀྱིས་ལས་གནས་ནས་རྩ་དགོངས་ཞུ་རྒྱུ་ཡིན་པའི་སྙན་ཞུ་ཕུལ་ཡོད་ཀྱང་། ཉིན་དེར་སྲིད་འཛིན་མེ་ཁོ་རོན་མཆོག་ནས་སྤྱི་ཚོགས་བརྟན་ལྷིང་ཡོང་ཆེད་སྲིད་བློན་གྱི་ཐུགས་འགན་མུ་མཐུད་འཁུར་དགོས་པའི་འབོད་སྐུལ་ཞུས་ཏེ་བཀའ་འཁྲོལ་གནང་མེད་པ་རེད། སྤྱིར་བཏང་ཕྱི་ལོ་ ༡༩༨༦ ཙམ་ནས་བཟུང་ཧྥ་རན་སིའི་སྲིད་འཛིན་ལས་ཐོག་གིས་སྲིད་བློན་འདེམས་སྲོལ་ཡོད་ཀྱང་། ཐེངས་འདིའི་འོས་བསྡུའི་ཁྲོད་སྲིད་འཛིན་གྱི་སྲིད་དོན་ཚོགས་པར་ཕམ་ཉེས་བྱུང་ཡོད་པར་བརྟེན། མ་འོངས་པའི་སྲིད་བློན་དེ་ཆབ་སྲིད་ཚོགས་པ་གཞན་ཞིག་ནས་ཡོང་སྲིད་པའི་ཚོད་དཔག་ཀྱང་བྱེད་བཞིན་འདུག་ལ། ཧྥ་རན་སིའི་མ་འོངས་སྲིད་གཞུང་གསར་པའི་གོ་དབང་དེ་གཡས་ཕྱོགས་མཐུན་འབྲེལ་ཚོགས་པ་(Ensemble alliance)དང་། གཡོན་ཕྱོགས་མི་མང་མདུན་སྐྱོད་གསར་པའི་ཚོགས་པ་(New Popular Front) གང་རུང་ཞིག་ལ་འཐོབ་སྲིད་པའི་ཚོད་དཔག་བྱེད་བཞིན་འདུག
དེའི་ཐད་ཡུ་རོབ་བོད་མི་མང་སྤྱི་འཐུས་ཐུབ་བསྟན་རྒྱ་མཚོ་ལགས་ཀྱིས་འདི་གའི་གསར་འགོད་པར། ཧྥ་རན་སིའི་ནང་ཨོ་རྩལ་འགྲན་ཚོགས་འཚོག་ལ་ཉེ་བར་བརྟེན། སྲིད་དོན་ཚོགས་པ་ཁག་གསུམ་པོས་གཞུང་གསར་པ་འཛིན་རྒྱུའི་ཆ་རྐྱེན་མ་ཚང་བར་དུ་གནས་སྐབས་རིང་ནུས་པ་མཉམ་སྤུངས་ཀྱི་ནང་མོལ་བྱེད་བཞིན་པ་ཡིན་ལ། ད་ལྟའི་ཆར་མི་མང་མདུན་སྐྱོད་གསར་པའི་ཚོགས་པ་ཡིས་གཞུང་འཛིན་པའི་ཐད་སྐད་ཆ་ཤུགས་ཆེན་ཡོང་གི་ཡོད་ཀྱང་། ཚོགས་པ་དེས་གཞུང་འཛིན་པར་སྲིད་དོན་ཚོགས་པ་གཞན་ནས་ལངས་ཕྱོགས་ཅུང་གུ་ཡངས་ཅན་གྱི་གྲོས་ཚོགས་འཐུས་མི་ ༡༠༠ ཞིག་གི་བློ་འགུག་སྟེ་སྲིད་གཞུང་གསར་པའི་ནང་བློན་ཆེན་སོགས་ཀྱི་གོ་གནས་སྤྲད་པ་ཡིན་ན་གཅིག་སྒྲིལ་མཉམ་འབྲེལ་སྲིད་གཞུང་ཞིག་འཛུགས་ཐུབ་རེ་ཡོད་ལ། འབྱུང་འགྱུར་གྱི་ཉིན་ ༡༠ ནང་ཚུད་གསལ་པོ་ཆགས་འགྲོ་རྒྱུ་ཡིན་སྐོར་དང་། ཟླ་འདིའི་ཕྱི་ཚེས་ ༨ ཉིན་ཧྥ་རན་སིའི་སྲིད་བློན་གྷེ་བྷི་རིལ་ལགས་ཀྱིས་སྲིད་བློན་གྱི་ལས་གནས་ནས་དགོངས་པ་ཞུས་ཡོད་ཀྱང་། སྲིད་འཛིན་མེ་ཁོ་རོན་གྱིས་དགོངས་ཤོག་ངོས་ལེན་གནང་མེད་པས་ཕྱི་ཟླ་ ༩ ཚེས་ ༡༥ བར་མུ་མཐུད་དུ་གཞུང་གི་ལས་དོན་རྒྱུན་སྐྱོང་གནང་དགོས་ཀྱང་། བར་བརྒལ་གྱི་གཞུང་ལྟ་བུ་ཆགས་ཡོད་དུས་ཁྲིམས་དང་སྲིད་ཇུས་གསར་པ་བཟོ་རྒྱུ་སོགས་ཀྱི་སྐུ་དབང་མེད་སྐོར་སོགས་འགྲེལ་བརྗོད་གནང་བྱུང་།
![](https://tibettimes.net/wp-content/uploads/2024/07/Untitled-3-scaled.jpg)
འདི་ལོའི་ཕྱི་ཟླ་ ༦ ཚེས་ ༣༠ ཉིན་ཧྥ་རན་སིའི་གྲོས་ཚོགས་ཀྱི་འོས་བསྡུ་རིམ་པ་དང་པོའི་སྐབས། ཧྥ་རན་སིའི་གཡས་ཕྱོགས་ཆབ་སྲིད་ཚོགས་པ་ལ་དེ་སྔ་བྱུང་མ་མྱོང་བའི་རྒྱལ་ཁ་ཐོབ་པར་བརྟེན། ཐེངས་འདིའི་འོས་བསྡུའི་རྒྱལ་ཁ་གཡས་ཕྱོགས་ཆབ་སྲིད་ཚོགས་པར་འཐོབ་རྒྱུའི་ཚོད་དཔག་བྱས་ཡོད་ཀྱང་། འོས་བསྡུའི་རིམ་པ་གཉིས་པའི་སྐབས། གཡས་ཕྱོགས་ཆབ་སྲིད་ཚོགས་པར་ཕམ་ཁ་བྱུང་བར་བརྟེན། མི་མང་དང་དཔྱད་ཞིབ་པ་མང་པོ་ཞིག་ཧང་སངས་དགོས་བྱུང་ཡོད་འདུག
ད་ལྟའི་ཆར་ཧྥ་རན་སིའི་གྲོས་ཚོགས་ལ་ཞབས་སྟེགས་ཁྱོན་ ༥༧༧ ཡོད་པའི་ཁྲོད་ནས་རྒྱལ་ཡོངས་མཐུན་གྲོགས་ཚོགས་པར་ (National Rally and allies) འོས་གྲངས་ ༡༤༣ དང་། མཐུན་འབྲེལ་ཚོགས་པར་ (Ensemble alliance) འོས་གྲངས་ ༡༦༣། མི་མང་དཔུང་ཁག་གསར་པའི་ཚོགས་པ་(New Popular Front) ལ་འོས་གྲངས་ ༡༨༢ ཐོབ། གཞན་གཡས་ཕྱོགས་ཀྱི་ཚོགས་པ་ལ་འོས་གྲངས་ ༦༨། གཡོན་ཕྱོགས་ཀྱི་ཚོགས་པ་ལ་འོས་གྲངས་ ༡༡། ཚོགས་པ་གཞན་ལ་འོས་གྲངས་ ༡༠ ཐོབ་ཡོད་པར་བརྟེན། ཆབ་སྲིད་ཚོགས་པ་གསུམ་མཉམ་འབྲེལ་གྱིས་གཞུང་ཞིག་འཛིན་སྐྱོང་བྱ་རྒྱུའི་གྲོས་མོལ་བྱེད་བཞིན་ཡོད་འདུག་ལ། ཕྱི་ལོ་ ༡༩༥༨ ནས་བཟུང་ཕྱི་ལོ་ ༡༩༨༦ དང་ཕྱི་ལོ་ ༡༩༩༣། ཕྱི་ལོ་ ༡༩༩༧ ལོར་ཆབ་སྲིད་ཚོགས་པ་མི་འདྲ་བ་གཉིས་ཀྱིས་སྲིད་འཛིན་དང་སྲིད་བློན་གྱི་ཕྱག་ལས་མཉམ་དུ་འཁུར་མྱོང་ཡོད་འདུག
ཡུ་རོབ་གྲོས་ཚོགས་ཀྱི་འོས་བསྡུའི་སྐབས་སུ་ཕྱིའི་མི་རིགས་ལ་ལྟ་ཚུལ་དང་ལངས་ཕྱོགས་ཐད་དམ་དྲག་བྱེད་ཀྱི་ཡོད་པར་བརྟེན། ཧྥ་རན་སི་རྒྱལ་ཡོངས་གཅིག་སྒྲིལ་ཚོགས་པ་ལ་འོས་ཤོག་ཚད་མཐོ་པོ་ཐོབ་ཡོད་པར་བརྟེན། སྲིད་འཛིན་མེ་ཁོ་རོན་མཆོག་གི་དམིགས་བསལ་སྐུ་དབང་བེད་སྤྱད་དེ་ཧྥ་རན་སིའི་གྲོས་ཚོགས་འོག་མ་མཁོ་བསྡུ་གནང་སྟེ། ཕྱི་ཟླ་ ༦ ཚེས་ ༣༠ ཉིན་སྔོན་འགྲོའི་འོས་བསྡུ་གནང་ཡོད་པ་དང་། ཕྱི་ཟླ་ ༧ ཚེས་ ༧ ཉིན་དངོས་གཞིའི་འོས་བླུགས་ཏེ། ཧྥ་རན་སིའི་རྒྱལ་ཡོངས་མཐུན་གྲོགས་ (National Rally and allies) ཚོགས་པར་འོས་གྲངས་ ༡༤༣ དང་། མཐུན་འབྲེལ་ཚོགས་པར་ (Ensemble alliance) འོས་གྲངས་ ༡༦༣། མི་མང་དཔུང་ཁག་གསར་པའི་ (New Popular Front) ཚོགས་པ་ལ་འོས་གྲངས་ ༡༨༢ ཐོབ་ཡོད་འདུག ཐེངས་འདིའི་འོས་བསྡུའི་ཁྲོད་གཡས་ཕྱོགས་གཞུང་འཛིན་ཚོགས་པ་ཕམ་པ་དང་གཡོན་ཕྱོགས་ཆབ་སྲིད་ཚོགས་པར་གཞུང་འཛིན་གྱི་འོས་གྲངས་མ་ཟིན་པའི་ཁར། ཟླ་འདིའི་ཕྱི་ཚེས་ ༢༦ ནས་ཕྱི་ཟླ་ ༨ ཚེས་ ༡༡ བར་ཧྥ་རན་སིར་ཨོ་རྩལ་འགྲན་ཚོགས་བསྡུ་ལ་ཉེ་བའི་གནད་འགག་གི་དུས་སྐབས་ཤིག་ལའང་ཁེལ་ཡོད་པ་རེད།
གསར་འགོད་པ།་བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།