སྲིད་སྐྱོང་སྤེན་པ་ཚེ་རིང་མཆོག་གིས་དབྱིན་ཡུལ་གྱི་སྲིད་བློན་གསར་པར་འཚམས་འདྲི་གནང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབྱིན་ཡུལ་གྱི་སྲིད་བློན་གསར་པ་ཀི་ཡ་སི་ཊ་མིར་མཆོག་ལ་བོད་མི་ཡོངས་ཀྱི་ཚབ་བྱས་ནས་འཚམས་འདྲི་དང་སྦྲགས་མུ་མཐུད་བོད་དོན་རྒྱབ་སྐྱོར་གནང་བའི་འབོད་སྐུལ་ཞུས་འདུག

ཁ་སང་ཕྱི་ཚེས་ ༡༠  ཉིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབྱིན་ཡུལ་གྱི་སྲིད་བློན་གསར་པ་སྐུ་ཞབས་ཀི་ཡ་སི་ཊ་མིར་ (Keir Starmer)མཆོག་ལ་འཚམས་འདྲི་གནང་བའི་ནང་། སྲིད་བློན་མཆོག་གིས་སྣེ་འཁྲིད་པའི་ཆབ་སྲིད་ཚོགས་པའི་འབྱུང་འགྱུར་གྱི་ལས་དོན་མཐའ་དག་ལམ་ལྷོངས་ཡོང་བའི་སྨོན་འདུན་ཞུས་འདུག

དེ་ཡང་སྲིད་སྐྱོང་མཆོག་གི་འཚམས་འདྲིའི་ནང་། དབྱིན་ཡུལ་གཞུང་དམངས་གཉིས་ནི་དུས་ཡུན་རིང་པོར་བོད་དང་བོད་མིར་རྒྱབ་སྐྱོར་དང་སེམས་ཁུར་གནང་མཁན་ཞིག་ཡིན། ང་ཚོས་དུས་རབས་བཅོ་བརྒྱད་པ་ཙམ་ནས་བོད་དང་དབྱིན་ཡུལ་བར་རིག་གཞུང་དང་ཚོང་དོན་གྱི་ལོ་རྒྱུས་རང་བཞིན་ལྡན་པའི་འབྲེལ་ལམ་བཟང་པོ་ལ་ཡིད་སྨོན་བྱེད་ཀྱི་ཡོད་ལ། རྒྱ་ནག་གཞུང་གིས་བོད་སར་བཙན་འཛུལ་བྱས་རྗེས། དབྱིན་ཡུལ་གཞུང་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་བབ་ཐད་ལ་ཐུགས་འཚབ་ཆེན་པོ་གནང་ཡོད། ཅེས་གསུངས་འདུག

ཡང་སྲིད་སྐྱོང་མཆོག་གིས། སྐུ་ཉིད་ཀྱིས་དབུ་ཁྲིད་བཟང་པོའི་ལམ་སྟོན་གྱི་འོག་ནས་དེང་སྐབས་བོད་ནང་དུ་འབྱུང་མུས་ཡིན་པའི་གནད་དོན་ཐད་ལ་གཟིགས་ཞིབ་དང་རྒྱབ་སྐྱོར་གནང་རྒྱུར་ཡིད་ཆེས་བརྟན་པོ་ཡོད། དབྱིན་ཡུལ་གཞུང་གིས་བོད་མིའི་རྩ་དོན་དང་ལངས་ཕྱོགས་ལ་རྒྱབ་སྐྱོར་གནང་བ་དེས། ཕྱོགས་གཉིས་ཀྱི་དྲང་བདེན་དང་རང་དབང་འཐབ་རྩོད་བྱེད་པར་སྔར་མེད་ཀྱི་ཟིལ་མདངས་ཤིག་གནང་བར་གོར་མ་ཆག ཅེས་དང་། སྐུ་ཉིད་ཀྱིས་དབྱིན་ཡུལ་གྱི་སྲིད་བློན་གནང་བར་ལས་དོན་མཐའ་དག་ལམ་ལྷོངས་དང་། ང་ཚོས་ཁྱེད་ཀྱི་ལམ་སྟོན་བཟང་པོའི་འོག་ནས་དབྱིན་ཡུལ་རྒྱལ་ཁབ་དེ་སྔར་ལས་ཀྱང་དར་རྒྱས་གོང་འཕེལ་དུ་འགྲོ་བའི་ཡིད་ཆེས་བརྟན་པོ་བྱེད་ཀྱི་ཡོད། ཅེས་གསུངས་འདུག

སྐུ་ཞབས་ཀི་ཡ་སི་ཊ་མིར་མཆོག་ནི་ཕྱི་ལོ་ ༡༩༦༢ ལོར་དབྱིན་ཡུལ་གྱི་རྒྱལ་ས་ལོན་ཌན་དུ་འཁྲུངས་ཤིང་། གཞི་རིམ་དང་འབྲིང་རིམ་གྱི་སློབ་གཉེར་ཟིན་རྗེས། དབྱིན་ཡུལ་གྱི་ལི་ཌི་གཙུག་ལག་སློབ་གཉེར་ཁང་(University of Leeds) དང་ཨོ་སི་ཧྥོ་ཌི་གཙུག་ལག་སློབ་གཉེར་ཁང་སོགས་ནས་ཁྲིམས་ལུགས་ཐོག་སློབ་གཉེར་གནང་། ཁོང་ཉིད་ཕྱི་ལོ ༢༠༡༥ དང་། ༢༠༡༧ ། ༢༠༡༩ བཅས་ཀྱི་འོས་བསྡུ་རིམ་པའི་ཁྲོད་དབྱིན་ཡུལ་གྲོས་ཚོགས་འཐུས་མིར་འདེམས་ཐོན་བྱུང་འདུག་ལ། ཕྱི་ལོ་ ༢༠༢༤ ལོའི་དབྱིན་ཡུལ་གྱི་སྲིད་བློན་གྱི་འོས་བསྡུ་ཆེན་མོ་དེ་ཟླ་འདིའི་ཕྱི་ཚེས་ ༤ ཉིན་བྱས་ཡོད་ཅིང་།  དབྱིན་ཡུལ་གྲོས་ཚོགས་སུ་རྐུབ་སྟེགས་ ༦༥༠ ཡོད་པའི་ཁྲོད། ངལ་རྩོལ་སྲིད་དོན་ཚོགས་པའི་སྐུ་ཞབས་ཀི་ཡ་སི་ཊ་མིར་ལགས་རྐུབ་སྟེགས་ ༤༡༡ ཐོབ་སྟེ། རྙིང་ཞེན་སྲིད་དོན་ཚོགས་པའི་མགོ་ཁྲིད་དང་རྒྱ་གར་པན་ཇབ་ནས་ཡིན་པའི་སྐུ་ཞབས་སྲིད་བློན་ཟུར་པ་རཱི་ཤེ་སའོ་ནག་ལགས་དང་། དམངས་གཙོ་གུ་ཡངས་( Liberal Democrats) སྲིད་དོན་ཚོགས་པའི་སྐུ་ཞབས་ཌ་ཝེ་གཉིས་ལས་རྣམ་པར་རྒྱལ་ཡོད་འདུག་ལ། སྲིད་བློན་རྒྱལ་ཁ་ཐོབ་པར་ཉུང་མཐར་རྐུབ་སྟེགས་ ༣༢༦ འཐོབ་དགོས་ཀྱི་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།