རྒྱ་ནག་གི་མགོ་ཁྲིད་ཞི་ཅིན་ཕིང་ལ་ནག་ཉེས་ཀྱི་ཁྲིམས་ར་འཚོག་བཞིན་འདུག

ནི་ཐར་ལེན་ཌིའི་གྲོང་ཁྱེར་ཧེག་ (Hague) ནང་དུ་རྟེན་གཞི་བྱས་པའི་འཛམ་གླིང་མི་སེར་ཁྲིམས་ཁང་ (The Court of the Citizen of the World) གིས་རྒྱ་ནག་གི་མགོ་ཁྲིད་ཞི་ཅིན་ཕིང་གིས་བོད་ནང་བཅའ་སྡོད་སློབ་གྲྭ་མང་པོ་ཆེད་འཛུགས་བྱས་ཡོད་པ་དང་བཙོན་ཁང་དུ་མནར་གཅོད་ཚད་མེད་གཏོང་གི་ཡོད་པ་སོགས་ཀྱི་ནག་ཉེས་རྣམས་ཐེར་འདོན་གྱི་ཁྲིམས་ར་འཚོག་གི་འདུག

ནི་ཐར་ལེན་ཌིའི་གྲོང་ཁྱེར་ཧེག་ཏུ་ཞི་ཅིན་ཕིན་གྱི་ནག་ཉེས་ཐད་འབྲེལ་བའི་ཁྲིམས་ར་འཚོག་བཞིན་པ། དྲ་ལམ་གྱི་པར།

ཟླ་འདིའི་ཕྱི་ཚེས་ ༧ ནས་ ༡༢ བར་དུ་འཛམ་གླིང་མི་སེར་ཁྲིམས་ཁང་གིས་རྒྱ་ནག་གི་མགོ་ཁྲིད་ཞི་ཅིན་ཕིང་གི་ནག་ཉེས་ཐད་ཁྲིམས་ར་འཚོག་མུས་ཡིན་འདུག་ལ། ཁྲིམས་རའི་ནང་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་དང་། ཆབ་སྲིད་བཙོན་ཟུར་དོན་གྲུབ་དབང་ཆེན་ལགས། ཆབ་སྲིད་བཙོན་ཟུར་བསྟན་པ་དར་རྒྱས་ལགས་སོགས་གཙོ་བོར་གྱུར་བའི་བོད་མི་ཁག་ཅིག་མཉམ་ཞུགས་བྱས་ཡོད་འདུག་ལ། ཁྲིམས་ཞིབ་སྐབས་རྒྱ་རིགས་དང་། ཐའེ་ཝན། ཡུ་གུར་བ་སོགས་ཀྱི་དམངས་གཙོ་དོན་གཉེར་བ་ཁག་ཅིག་ཀྱང་མཉམ་ཞུགས་གནང་ཡོད་འདུག

ད་ལན་གྱི་ཁྲིམས་རའི་སྐབས་རྒྱ་ནག་གི་མགོ་ཁྲིད་ཞི་ཅིན་ཕིང་གིས་བོད་ནང་དུ་འགྲོ་བ་མིའི་འགྲོ་འདུག་སྤྱོད་གསུམ་ལ་དམ་དྲག་དང་། ཐའེ་ཝན་ནང་དྲག་གནོན་བྱེད་བཞིན་པ། དེ་བཞིན་ཡུ་གུར་བའི་མི་རིགས་རིག་གཞུང་དང་བཅས་པ་རྩ་མེད་གཏོང་བ། འགྲོ་བ་མིའི་ཐོབ་ཐང་དང་རང་དབང་སོགས་རྩིས་མེད་རྡོག་རོལ་གཏོང་ཐབས་ཀྱི་བྱ་སྤྱོད་སྤེལ་བཞིན་ཡོད་པ་མྱོང་བ་དངོས་ཀྱི་ཐོག་ནས་ཐེར་འདོན་བྱེད་ཀྱི་ཡོད་འདུག

ཕྱི་ལོ་ ༢༠༢༢ ཟླ་ ༣ པའི་ནང་ཨ་རིའི་གཞུང་གིས་རྒྱ་གཞུང་གིས་བོད་ནང་གི་བོད་མི་རྣམས་དང་ཡུ་གུར་བ་རྣམས་ལ་དྲག་གནོན་ཤུགས་ཆེན་བྱེད་བཞིན་ཡོད་པ་དང་། བོད་ནང་གི་བོད་མིར་དམ་དྲག་དང་ལྟ་སྲུང་ནན་པོ་བྱེད་བཞིན་པ། ཧོང་ཀོང་ནང་གཞི་རྩའི་རང་དབང་རྡོག་རོལ་གཏོང་བཞིན་ཡོད་པ་མ་ཟད། གྲངས་ཉུང་མི་རིགས་ཀྱི་འགྲོ་འོང་བཀག་སྡོམ་སོགས་བྱེད་ཀྱི་ཡོད་པར་བརྟེན། ཨ་རིའི་གཞུང་གིས་རྒྱ་ནག་གི་དཔོན་རིགས་ཁག་ཅིག་ལ་སྲིད་དོན་ཉེས་ཆད་བཏང་སྟེ། ཨ་རིར་ཡོང་བར་བཀག་སྡོམ་བྱས་ཡོད་འདུག

Some say Mr Xi has capitalised on the crackdown to gain a political advantage

ཕྱི་ལོ་ ༢༠༢༡ ཟླ་ ༡༡ ནང་ཡུ་རོབ་མཐུན་ཚོགས་ཀྱིས་ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བའི་གནད་དོན་དང་འབྲེལ་ནས་རྒྱ་ནག་གི་དཔོན་རིགས་ཁག་ཅིག་ལ་སྲིད་དོན་ཉེས་ཆད་བཏང་ཡོད་འདུག་ལ། ཨ་རིའི་གཞུང་གིས་རྒྱ་ནག་གི་འཕྲུལ་ལས་དང་འབྲེལ་བའི་ཚོང་ལས་ཁང་ ༡༢ ཙམ་ཚོང་འབྲེལ་བྱེད་མཚམས་བཞག སྐབས་དེར་ཡུ་རོབ་མཐུན་ཚོགས་ཀྱིས་ཨ་རི་དང་ཁེ་ན་ཌ། དབྱིན་ཡུལ་བཅས་ཀྱི་ཤར་ཊུར་ཀི་སི་ཐན་སྤྱི་དམངས་བདེ་འཇགས་ལས་ཁུངས་ཀྱི་འགན་འཛིན་ཁྲིན་མིང་གོ་ (Chen Mingguo) དང་། ཤར་ཊུར་ཀི་སི་ཐན་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ཟུར་པ་ཀྲུའུ་ཧའེ་ལུན་ (Zhu Hailun) གཙོས་ལས་བྱེད་རྒན་པ་ཝང་ཅིན་ཀྲིན་ (Wang Junzheng)། ཝང་མིང་ཧྲན་ (Wang Mingshan) བཅས་རྒྱ་ནག་གི་དཔོན་རིགས་བཞི་དང་། ཤིན་ཅང་བཟོ་སྐྲུན་དང་འཛུགས་སྐྲུན་སྤྱི་བདེ་ལས་ཁུངས་ (Xinjiang Production and Construction Corps Public Security Bureau) ལ་སྲིད་དོན་ཉེས་ཆད་བཏང་སྟེ། འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་བྱ་སྤྱོད་མཚམས་འཇོག་མ་བྱས་བར་དུ་ཡུ་རོབ་ནང་ཡོང་མི་ཆོག་པ་བཟོས་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་བྱེད་མཁན། པདྨ་མཚོ།