བོད་ཀྱི་དཔེ་མཛོད་ཁང་གི་རིག་གཞུང་ཉམས་ཞིབ་དང་པར་སྐྲུན་སྡེ་ཚན་གྱི་འགན་འཛིན་ན་ག་སངས་རྒྱས་བསྟན་དར་ལགས་ཀྱིས་བོད་མིའི་སྒྲིག་འཛུགས་ཀྱིས་ཡིག་སྒྱུར་བ་འདེམས་སྒྲུག་ཡག་པོ་བྱས་ཏེ་སྟངས་འཛིན་ཡོད་པའི་ཐོག་ནས་རྒྱུན་སྐྱོང་གནང་ཐུབ་ཚེ་སྒྱུར་གྱི་ལས་ཀ་ཡག་པོ་འགྲོ་ཐུབ་ཀྱི་ཡོད་སྐོར་བརྗོད་གནང་བྱུང་།
ཟླ་འདིའི་ཕྱི་ཚེས་ ༡༠ ནས་ཕྱི་ཟླ་ ༡༠ ཚེས་ ༩ བར་ཟླ་གསུམ་རིང་བོད་ཀྱི་དཔེ་མཛོད་ཁང་གི་གོ་སྒྲིག་འོག རྩོམ་སྒྱུར་ཟབ་སྦྱོང་ཐེངས་བཅུ་བདུན་པ་འཚོག་བཞིན་འདུག་ལ། ཐེངས་འདིའི་ཟབ་སྦྱོང་ནང་མཐོ་སློབ་ཁག་ནས་སློབ་གཉེར་བ་གྲངས་ ༡༠ མཉམ་ཞུགས་བྱས་འདུག་ལ། ཕྱི་ལོ་ ༢༠༠༦ ནས་ད་ལྟ་བར་དུ་བོད་ཀྱི་དཔེ་མཛོད་ཁང་གི་ཟབ་སྦྱོང་འདིའི་ནང་ཁྱོན་གཞོན་སྐྱེས་གྲངས་ ༥༠༠ ཙམ་གྱིས་ཆ་ཤས་བླངས་ཡོད་འདུག
འདི་གའི་གསར་འགོད་པས་རིག་གཞུང་ཉམས་ཞིབ་དང་པར་སྐྲུན་སྡེ་ཚན་གྱི་འགན་འཛིན་ན་ག་སངས་རྒྱས་བསྟན་དར་ལགས་སུ། བོད་ཀྱི་དཔེ་མཛོད་ཁང་གིས་སྒྱུར་རྩོམ་གྱི་ཟབ་སྦྱོང་ཐེངས་བཅུ་དྲུག་འཚོགས་ཟིན་ཡོད་པ་དང་། སྒྱུར་རྩོམ་ཐོག་དམིགས་བསལ་ཟབ་སྦྱོང་སྤྲད་པ་དེས་སྤྱི་ཚོགས་ནང་ཕན་ཐོགས་ག་འདྲ་བྱུང་ཡོད་མེད་དྲིས་པར་ཁོང་གིས། ཕྱི་ལོ་ ༢༠༠༦ ལོ་ནས་བཟུང་བོད་ཀྱི་དཔེ་མཛོད་ཁང་གི་སྒྱུར་རྩོམ་ཟབ་སྦྱོང་མགོ་ཚུགས་ཡོད་ཅིང་། དགེ་བཤེས་ལྷག་རྡོར་ལགས་བོད་ཀྱི་དཔེ་མཛོད་ཁང་གི་འགན་འཛིན་ཆགས་ཏེ་ལས་གཞི་མང་པོ་སྤེལ་ཡོད་པའི་ནང་། རྩོམ་སྒྱུར་ཟབ་སྦྱོང་འདི་ལས་གཞི་དེའི་ཁྲོད་ཀྱི་གཅིག་ཆགས་བསྡད་ཡོད། ༧གོང་ས་རྒྱལ་བ་རིན་པོ་ཆེ་མཆོག་གི་ཞབས་འོག་ཏུ་ལོ་ ༡༦ རིང་དགེ་བཤེས་ལྷག་རྡོར་ལགས་ཀྱིས་སྒྱུར་རྩོམ་དང་འབྲེལ་བའི་ལས་ཀ་བྱས་པའི་ཤུགས་རྐྱེན་ལ་བརྟེན། གཞོན་སྐྱེས་རྣམས་ལ་སྒྱུར་རྩོམ་གྱི་གོ་སྐབས་ཤིག་སྤྲད་ཚེ་ཕན་ཐོགས་ཆེ་བའི་ཐོག་མའི་ཀུན་སློང་ནས་བྱུང་བ་ཞིག་རེད་བསམ་གྱི་འདུག སྤྱིར་སྒྱུར་གྱི་ཐོག་སློབ་ཚན་གཞན་པ་བཞིན་སློབ་ཁྲིད་བྱེད་པར་སྟབས་བདེ་བོ་གང་ཡང་མེད། དེ་ནི་ལོ་ཙཱ་བ་རང་ཉིད་ཀྱིས་ལོ་མང་པོའི་རིང་བསགས་པའི་ཉམས་མྱོང་གི་ཐོག་ནས་བཤད་ཀྱི་ཡོད་པ་མ་གཏོགས། ཨང་རྩིས་དང་། ཚན་རིག དེ་བཞིན་གཞུང་བྱེ་བྲག་པ་ལྟར་དུ་སློབ་ཁྲིད་བྱེད་ཀྱི་ཡོད་པ་མ་རེད། ང་ཚོས་སྒྱུར་རྩོམ་ཟབ་སྦྱོང་ཞེས་མིང་དུ་བཏགས་ཡོད་ཀྱང་། དངོས་སུ་སློབ་ཁྲིད་བྱེད་པའི་སྐབས་སུ་བོད་ཡིག་དང་དབྱིན་ཡིག་གཉིས་ཀྱི་སྐད་ཡིག་སློབ་ཁྲིད་དང་། རྩོམ་སྒྱུར་བྱ་རྒྱུ་གཙོ་བོ་ཆོས་དང་། རིག་གཞུང་། བོད་པའི་སྐོར་ཡིན། སྒྱུར་གྱི་ཐོག་ལ་དགའ་ལྡན་ཕོ་བྲང་ཡིག་ཚང་གི་གསུང་སྒྱུར་བ་དང་། བོད་ཀྱི་དཔེ་མཛོད་ཁང་གི་སྒྱུར་ཐོག་ལས་ཀ་བྱེད་མཁན་སོགས་ཀྱིས་ཟབ་ཁྲིད་བྱས་ཡོད། ཟབ་སྦྱོང་གི་དུས་ཡུན་ཟླ་བ་གསུམ་ལས་མེད་པ་དང་། སློབ་གཉེར་བ་རྣམས་ཀྱང་སྒྱུར་གྱི་ཐོག་རྒྱུས་མངའ་ཡོད་པ་དེ་འདྲ་མིན་ཡང་། ཟབ་སྦྱོང་ནང་དུ་གཙོ་བོ་སྐད་ཡིག་གཉིས་བར་དུ་ཕན་ཚུན་གྲོགས་དན་བྱེད་ཀྱི་ཡོད་པར་བརྟེན། སྐད་ཡིག་གཉིས་ཀྱི་ཐོག་ཡར་རྒྱས་འགྲོ་ཡི་ཡོད་པ་དང་། སྒྱུར་གྱི་ཐོག་ཉམས་མྱོང་རག་གི་ཡོད་པས། རྗེས་སུ་སྤྱི་ཚོགས་ནང་དུ་སླེབས་དུས་གཏན་གཏན་ཕན་ཐོགས་ཀྱི་ཡོད་པ་རེད། ཐོག་མར་ཟབ་སྦྱོང་མགོ་ཚུགས་དུས་དགའ་ལྡན་ཕོ་བྲང་ཡིག་ཚང་གི་ལས་བྱེད་དང་། སྨན་རྩིས་ཁང་གི་སྨན་པ་མང་པོ་ཕེབས་མྱོང་ཡོད་ལ། ཁོང་ཚོའི་ཕྱག་ལས་ཐད་ཕན་ཐོགས་མང་པོ་བྱུང་ཡོད་འདུག ཅེས་འགྲེལ་བརྗོད་གནང་བྱུང་།
ཡང་གསར་འགོད་པས་ད་ལྟའི་ཆར་མི་སྒེར་དང་ཚོགས་སྡེ་ཁག་ཏུ་ཡིག་སྒྱུར་གྱི་ལས་ཀ་བྱེད་མཁན་མང་དུ་འགྲོ་བཞིན་ཡོད་པ་ལྟར། བོད་ཀྱི་དཔེ་མཛོད་ཁང་གིས་ཡིག་སྒྱུར་ཟབ་སྦྱོང་ལ་ནང་ཆོས་དང་ཚན་རིག་སོགས་ཆེད་དམིགས་ཁ་ཕྱོགས་ཡོད་མེད་དྲིས་པར་ཁོང་གིས། བོད་ཀྱི་དཔེ་མཛོད་ཁང་དུ་ནང་ཆོས་སློབ་ཁྲིད་བྱེད་བཞིན་ཡོད་པར་བརྟེན། ནང་ཆོས་དང་འབྲེལ་བའི་སྒྱུར་གྱི་སྐོར་ལ་བསམ་བློ་གཏོང་བཞིན་ཡོད་པ་རེད། སྒྱུར་གྱི་ཐོག་བརྗོད་བྱ་གང་ལེན་ཡང་ཁྱད་པར་ཡོད་པ་མ་རེད། གཙོ་བོ་སྒྱུར་གྱི་ཐབས་ལམ་ལམ་རིག་པ་རྙེད་པའི་ཐབས་ཤེས་རེད། བོད་ཀྱི་དཔེ་མཛོད་ཁང་གིས་ཀྱང་ནང་ཆོས་ཀྱི་གཞུང་ཆེན་མང་པོ་བསྒྱུར་ཡོད་པ་མ་རེད། སྐབས་རེར་ལོ་རྒྱུས་ཀྱི་དཔེ་དེབ་བོད་བསྒྱུར་བྱས་པ་དེ་འདྲ་ཡོད། ཕྱི་ལོ་ ༢༠༠༠ ནས་བོད་ཀྱི་དཔེ་མཛོད་ཁང་དུ་ཚན་རིག་གི་སྡེ་ཚན་མགོ་བཙུགས་ཡོད། ཚན་རིག་མཁས་པའི་སློབ་ཚན་མང་པོ་བོད་ཡིག་ནང་བསྒྱུར་སྟེ་བོད་ཡིག་ཐོག་སློབ་ཁྲིད་ཤུགས་ཆེན་བྱེད་བཞིན་ཡོད། རྒྱ་གར་ནང་གི་དགོན་པ་གྲྭ་ཚང་ཁག་ཏུ་བོད་ཡིག་ཐོག་ཚན་རིག་གི་ཟབ་སྦྱོང་མང་པོ་སྤྲད་ཡོད། མཚམས་རེར་ནང་ཆོས་དང་ཚན་རིག་གཉིས་མཚུངས་བསྡུར་བྱས་ཏེ་སློབ་ཁྲིད་རྒྱུན་སྐྱོང་གནང་བཞིན་པ་རེད། ཅེས་འགྲེལ་བརྗོད་གནང་བྱུང་།
བཙན་བྱོལ་བོད་མིའི་ཡིག་སྒྱུར་གྱི་གནས་ཚད་ག་འདྲ་ཡོད་དྲིས་པར་ཁོང་གིས། ད་ལྟའི་ཆར་སྒྱུར་གྱི་ལས་ཀ་བྱེད་མཁན་རྣམས་སྒེར་བ་དང་ཚོགས་སྡེ་ཁག་གི་ཆེད་དུ་རེད། བོད་མིའི་སྒྲིག་འཛུགས་ལའང་སྒྱུར་གྱི་སྡེ་ཚན་ཆེན་པོ་དེ་འདྲ་ཡོད་པ་མ་རེད། སྤྱི་ཡོངས་ཀྱི་སྒྱུར་གྱི་སྐོར་ལ་ཞིབ་འཇུག་བྱེད་མཁན་དེ་འདྲ་མེད་དུས་བཤད་རྒྱུ་ཁག་པོ་རེད། སྒེར་བའི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་གི་རྣམ་ཐར་སོགས་མང་པོ་བསྒྱུར་འདུག སྒྱུར་གྱི་བརྗོད་གཞི་གསར་པ་ཡིན་པ་མ་ཟད། བོད་པའི་སྤྱི་ཚོགས་ནང་དུ་ཕན་ཐོགས་བྱུང་ཡོད། སྒྱུར་གྱི་ཐོག་ཏུ་ཉམས་ཞིབ་ཀྱི་སྡེ་ཚན་ཞིག་ནས་ཞིབ་འཇུག་བྱས་མྱོང་མེད་པ་རེད། ཚོགས་སྡེ་ཁག་གིས་སྦྱིན་བདག་ཐོན་ཏེ་མི་སྒེར་གྱིས་དེབ་སྒྱུར་བ་ལས། སྦྱིན་བདག་མ་རག་ཚེ་མུ་མཐུད་དུ་རྒྱུན་སྐྱོང་ཐུབ་ཀྱི་མེད་པ་རེད། གཞུང་གི་ངོས་ནས་དང་པོ་སྒྱུར་མཁན་འདེམས་སྒྲུག་ཡག་པོ་བྱས་ཏེ། སྟངས་འཛིན་གྱི་ཐོག་ནས་རྒྱུན་སྐྱོང་བྱེད་ཐུབ་ཚེ་སྒྱུར་གྱི་ལས་ཀ་ཡག་པོ་འགྲོ་ཐུབ་པ་ཞིག་ཡིན་ཡང་། ད་ལྟའི་ཆར་བོད་ཡིག་ནང་དཔལ་འབྱོར་དང་། ཚན་རིག ཨང་རྩིས། ལོ་རྒྱུས་སོགས་ཀྱི་བརྗོད་གཞིའི་སྐོར་ནས་སྒྱུར་བ་ཧ་ཅང་ཉུང་ཉུང་ཡིན་པས། ད་ལྟའི་བཙན་བྱོལ་ཁྲོད་སྒྱུར་གྱི་གནས་ཚད་སྐོར་ནས་བཤད་ཐུབ་པ་མི་འདུག ཅེས་བརྗོད་གནང་བྱུང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན། པདྨ་མཚོ།
