བལ་ཡུལ་གྱི་སྲིད་བློན་གསར་པ་འདེམས་ཐོན་བྱུང་བ་དང་འབྲེལ་བལ་ཡུལ་ནི་ཆབ་སྲིད་ཀྱི་ཐོག་ནས་རྒྱ་དཀར་ནག་གཉིས་ལ་གལ་གནད་ཆེ་བས། རྒྱ་དཀར་ནག་གཉིས་ནས་བལ་ཡུལ་གྱི་སྲིད་བློན་གསར་བར་འཚམས་འདྲི་བྱེད་པ་སོགས་སོ་སོའི་ཆབ་སྲིད་ཀྱི་ལངས་ཕྱོགས་བསྒྲགས་ཐབས་བྱེད་བཞིན་འདུག
ཁ་སང་ཕྱི་ཚེས་ ༡༥ ཉིན་ནས་བལ་ཡུལ་གྱི་དམར་ཤོག་ཚོགས་པ་ཆེ་ཤོས་ཀྱི་མགོ་ཁྲིད་ཤར་མ་ཨོ་ལིས་ (K. P. Sharma Oli) བལ་ཡུལ་གྱི་སྲིད་བློན་གསར་པའི་ལས་ཁུར་དམ་འབུལ་ཞུས་ཏེ། ཁོ་རང་བལ་ཡུལ་གྱི་སྲིད་བློན་ཆགས་པ་ཐེངས་བཞི་པ་དེ་ཡིན་འདུག་ལ། འབྱུང་འགྱུར་ཉིན་གྲངས་ ༣༠ ནང་བལ་ཡུལ་གྱི་བཅའ་ཁྲིམས་ནང་གསལ་ལྟར། བལ་ཡུལ་གྱི་གྲོས་ཚོགས་འོག་མའི་ནང་ཨོ་ལིས་སྣེ་ཁྲིད་པའི་གཞུང་ལ་ཡིད་ཆེས་རྒྱབ་སྐྱོར་ཡོད་མེད་ཀྱི་འོས་བསྡུ་བྱས་ཏེ། ཁོ་ལ་འོས་གྲངས་ ༢༧༥ ནས་ཉུང་མཐར་འོས་གྲངས་ ༡༣༨ མ་ཐོབ་ཚེ་སྲིད་བློན་གྱི་གོ་གནས་ནས་དགོངས་པ་ཞུ་དགོས་ཀྱི་ཡོད་པ་རེད།
ད་རེས་ཤར་མཱ་ཨོ་ལི་བསྐྱར་དུ་བལ་ཡུལ་གྱི་སྲིད་བློན་ཆགས་དོན་ནི། ཟླ་འདིའི་ཕྱི་ཚེས་ ༡༢ ཉིན་བལ་ཡུལ་གྲོས་ཚོགས་འོག་མའི་ནང་བལ་ཡུལ་གྱི་སྲིད་བློན་པུ་ཤི་པ་ཀ་མལ་ (Pushpa Kamal Dahal) ལ་ཡིད་ཆེས་རྒྱབ་སྐྱོར་ཡོད་མེད་ཐོག་ནས་འོས་བླུགས་ཏེ། གྲོས་ཚོགས་འཐུས་མི་ ༢༥༨ ལས་འོས་གྲངས་ ༦༣ མ་གཏོགས་ཐོབ་མེད་སྟབས་ཡིན་པ་དང་། བལ་ཡུལ་དམར་ཤོག་ཚོགས་པའི་མགོ་ཁྲིད་ཨོ་ལིས་བལ་ཡུལ་གྱི་དམངས་གཙོའི་སྲིད་དོན་ཚོགས་པ་ཆེ་ཤོས་ (Nepali Congress) དང་མཉམ་འབྲེལ་གྱིས་རང་ཉིད་སླར་ཡང་སྲིད་བློན་དུ་བསྡད་ཡོད་པ་རེད།
སྲིད་བློན་གསར་པ་ཤར་མཱ་ཨོ་ལི་ནི་རྒྱ་ནག་ལ་མཐུན་ཕྱོགས་སྒྲིག་མཁན་དང་རྒྱ་གར་ལ་སྡང་ཟུག་འཛིན་མཁན་ཞིག་ཡིན་ཡང་། ད་རེས་ཁོ་སླར་ཡང་སྲིད་བློན་དུ་འདེམས་ཐོན་བྱུང་བར་རྒྱ་གར་གྱི་སྲིད་བློན་མོ་དྷི་མཆོག་གིས་འཚམས་འདྲི་གནང་ཡོད་འདུག་པ་དང་། རྒྱ་གར་གྱི་སྲིད་བློན་མོ་དྷི་མཆོག་གིས་འཚམས་འདྲི་གནང་བའི་ནང་། ཤར་མཱ་ཨོ་ལི་བལ་ཡུལ་གྱི་སྲིད་བློན་གསར་པར་བསྐོ་བཞག་བྱུང་བར་འཚམས་འདྲི་ཞུ་ཡི་ཡོད། ང་ཚོས་མུ་མཐུད་དུ་རྒྱལ་ཁབ་གཉིས་ཀྱི་འབྲེལ་ལམ་སྲ་བརྟན་དང་། མི་མང་གི་མངོན་འདོད་ཇི་བཞིན་ཕྱོགས་གཉིས་ཀྱི་མཉམ་ལས་སྔར་ལྷག་ཡར་རྒྱས་ཀྱིས་མདུན་སྐྱོད་བྱེད་ཀྱི་ཡིན། ཞེས་བརྗོད་འདུག་ལ། བལ་ཡུལ་གྱི་སྲིད་བློན་ཨོ་ལི་ཡིས་ཀྱང་། རྒྱ་གར་གྱི་སྲིད་བློན་མོ་དྷི་མཆོག་གིས་འཚམས་འདྲི་གནང་བར་ཐུགས་རྗེ་ཆེ་ཞུ་རྒྱུ་ཡིན། ཕྱོགས་གཉིས་ཀར་ཁེ་ཕན་ཡོང་སླད་ཁྱེད་དང་མཉམ་དུ་རྒྱ་གར་དང་བལ་ཡུལ་བར་གྱི་འབྲེལ་ལམ་ཡར་རྒྱས་དང་སྲ་བརྟན་དུ་གཏོང་བར་འབད་བརྩོན་བྱ་རྒྱུའི་ཁས་ལེན་བྱེད་ཀྱི་ཡོད། ང་ཚོ་མཉམ་འབྲེལ་གྱིས་ལོ་རྒྱུས་དང་ལྡན་པའི་འབྲེལ་ལམ་ཡར་རྒྱས་གཏོང་གི་ཡིན། ཞེས་བརྗོད་འདུག
གཞན་ཡང་། ཁ་སང་ཨོ་ལིའི་དམ་འབུལ་མཛད་སྒོར་རྒྱ་དཀར་ནག་གཉིས་ཀྱི་གཞུང་ཚབ་པ་ཞུགས་ཏེ། ཨོ་ལི་དང་དངོས་སུ་ཐུག་འཕྲད་བྱས་ཡོད་པ་མ་ཟད། རྒྱ་ནག་གི་གཞུང་ཚབ་པ་ཁྲན་སོན་ (Chen Song) ཟེར་བས། ཨོ་ལི་དང་ཐུག་འཕྲད་བྱས་ཏེ་བལ་ཡུལ་དང་རྒྱ་ནག་གཉིས་ཀྱི་མཉམ་འབྲེལ་གོང་འཕེལ་དུ་བཏང་ནས་རྒྱལ་ཁབ་གཉིས་ཀྱི་མཛའ་འབྲེལ་གཏིང་ཇེ་ཟབ་ཏུ་གཏོང་བར་མོས་མཐུན་བྱུང་ཡོད་སྐོར་བསྒྲགས་ཡོད་འདུག
སྤྱིར་ཤར་མཱ་ཨོ་ལི་ནི་ཕྱི་ལོ་ ༢༠༡༥ ལོར་ཨོ་ལི་བལ་ཡུལ་གྱི་སྲིད་བློན་ཡིན་སྐབས། ཁོས་རྒྱ་ནག་དང་ལྷན་དུ་མཉམ་འབྲེལ་གྱི་འབྲེལ་བ་ཤུགས་ཆེན་བཟུང་བ་མ་ཟད། ཕྱི་ལོ་ ༢༠༡༧ ལོར་བལ་ཡུལ་རྒྱ་ནག་གི་རྒྱུད་གཅིག་ལམ་གཅིག་ཚོང་འབྲེལ་ལས་གཞི་ནང་དངོས་སུ་ཞུགས་པ་དང་། ཕྱི་ལོ་ ༢༠༡༨ ལོའི་ཟླ་ ༦ པར་ཁོས་རྒྱ་ནག་དང་ལྷན་དུ་གཞིས་ཀ་རྩེ་ནས་བལ་ཡུལ་གྱི་རྒྱལ་སའི་བར་མེ་འཁོར་ལྕགས་ལམ་མཐུད་རྒྱུར་མོས་མཐུན་ས་ཡིག་བརྒྱབ་ཡོད་ལ། ཕྱི་ལོ་ ༢༠༢༠ ལོར་ཁོའི་གཞུང་གིས་བལ་ཡུལ་གྱི་ས་ཁྲ་གསར་པ་ཞིག་བཟོས་ཏེ་ཁྲིམས་ཚོགས་ནང་གཏན་འབེབ་བྱས་པ་དང་། ས་ཁྲའི་ནང་ད་ལྟ་རྒྱ་གར་གྱི་མངའ་འོག་ཏུ་ཡོད་པའི་ས་ཁུལ་ལི་པུ་ལིག་ (lipulek) དང་། ལིམ་པི་ཡ་དུ་ར་ (Limpiyadhura)། ཀ་ལ་པ་ནི་ (kalapani) བཅས་ཀྱི་བདག་དབང་བལ་ཡུལ་གཞུང་ལ་ཡོད་པ་བློ་སྟོབས་ཆེན་པོས་བསྒྲགས་ཡོད། དེར་བརྟེན། བལ་ཡུལ་ནང་ཤར་མཱ་ཨོ་ལི་ནི་རྒྱལ་ཞེན་ཆེ་ཞིང་རྒྱ་གར་ཐོག་ཆབ་སྲིད་ཀྱི་ལངས་ཕྱོགས་མཁྲེགས་པོ་འཛིན་མཁན་ཞིག་ཏུ་ངོས་འཛིན་བྱས་མྱོང་འདུག
ཕྱི་ལོ་ ༡༩༥༥ ལོ་ནས་བལ་ཡུལ་གྱིས་རྒྱ་ནག་གཅིག་གི་སྲིད་ཇུས་འོག་ནས་བོད་ནི་རྒྱ་ནག་གི་ཆ་ཤས་ཡིན་པར་བསྒྲུབས་ཡོད་པ་མ་ཟད། རྒྱ་ནག་གཞུང་གི་བཀོད་འདོམས་འོག་བལ་ཡུལ་དུ་ཡོད་པའི་བོད་མི་སྐྱབས་བཅོལ་བ་ཚོར་དམ་དྲག་དང་སོ་ལྟ་སོགས་བྱས་མྱོང་ལ། དམིགས་བསལ་ཤར་མཱ་ཨོ་ལི་བལ་ཡུལ་གྱི་སྲིད་བློན་ཡིན་སྐབས། བལ་ཡུལ་ནང་གི་བོད་མི་ཚོར་གསུམ་བཅུའི་དུས་དྲན་དང་༧རྒྱལ་བའི་འཁྲུངས་སྐར་སོགས་དུས་ཆེན་རིགས་སྲུང་གཙི་བྱེད་པར་དམ་དྲག་ཤུགས་ཆེན་བྱས་ཡོད་ལ། འདས་ལོར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་སྙན་ཐོ་ཞིག་བཏོན་ཏེ། བལ་ཡུལ་གཞུང་གིས་ཁུལ་དེར་གནས་སྡོད་བོད་མི་རྣམས་ལ་སྐྱབས་བཅོལ་བའི་ཡིག་ཆ་སྤྲད་རྒྱུ་མཚམས་འཇོག་བྱས་ཤིང་། རིམ་པས་ཕྱོགས་ཡོངས་ནས་བོད་མིའི་གཞི་རྩའི་རང་དབང་ལ་དམ་དྲག་བྱེད་མགོ་བཙུགས་ཏེ། དེང་སྐབས་བོད་ནས་བྲོས་བྱོལ་དུ་ཡོང་མཁན་ཚོར་ཉེན་སྲུང་ཐུབ་པའི་ས་ཁུལ་ཞིག་ཆགས་ཀྱི་མེད་པ་མ་ཟད། བལ་ཡུལ་དེ་བཞིན་བོད་ཀྱི་རྗེས་སུ་རྒྱ་གཞུང་གིས་བོད་མིའི་ཐོག་དྲག་གནོན་བྱ་སའི་ས་ཁུལ་གཉིས་པ་ཞིག་ཏུ་གྱུར་ཡོད་སྟབས། བོད་མི་མང་པོ་ཞིག་གིས་བལ་ཡུལ་ལ་བོད་གཉིས་པ་ཞེས་འབོད་སྲོལ་ཡོད་པ་ཐེར་འདོན་གནང་འདུག
ཤར་མཱ་ཨོ་ལི་ནི་ཕྱི་ལོ་ ༡༩༥༢ ཟླ་ ༢ ཚེས་ ༢༢ ཉིན་སྐྱེས་ཤིང་། ཕྱི་ལོ་ ༡༩༦༦ ལོ་ནས་ཐོག་མར་སྲིད་དོན་ནང་ཞུགས། ཕྱི་ལོ་ ༡༩༧༠ ཟླ་ ༢ པའི་ནང་བལ་ཡུལ་གྱི་དམར་ཤོག་ཚོགས་པའི་ནང་འཛུལ་ཞུགས་བྱས་ཏེ། ཕྱི་ལོ་ ༡༩༧༠ ལོར་ཁོས་ཆབ་སྲིད་བཅོས་བསྒྱུར་གྱི་ལས་དོན་བྱས་པའི་རྐྱེན་གྱིས་ཐོག་མར་འཛིན་བཟུང་བྱས། དེ་རྗེས་ཁོས་མི་གཅིག་དབང་སྒྱུར་གྱི་ལམ་ལུགས་ལ་ཁ་གཏད་དུ་ལངས་པའི་རྐྱེན་གྱིས་ཕྱི་ལོ་ ༡༩༧༣ ནས་ལོ་ངོ་ ༡༤ རིང་འཛིན་བཟུང་བྱས། ཕྱི་ལོ་ ༡༩༩༡ ནས་གྲོས་ཚོགས་འོག་མའི་འཐུས་མི་རུ་འདེམས་ཐོན་བྱུང་བ་མ་ཟད། ༡༩༩༢ ལོར་བལ་ཡུལ་དམར་ཤོག་ཚོགས་པའི་ཕྱི་སྲིད་ལས་ཁུངས་ཀྱི་ཚོགས་གཙོ་རུ་བསྐོ་བཞག་བྱས། ༡༩༩༤ ལོར་བསྐྱར་དུ་གྲོས་ཚོགས་འཐུས་མིར་འདེམས་ཐོན་བྱུང་སྟེ་ནང་སྲིད་ལས་ཁུངས་ཀྱི་བློན་ཆེན་གྱི་ལས་གནས་འཁུར། ཕྱི་ལོ་ ༢༠༠༦ ལོར་སྲིད་བློན་གཞོན་པ་དང་ཕྱི་སྲིད་ལྷན་ཁང་གི་བློན་ཆེན་དུ་བསྐོ་བཞག་བྱས། ཕྱི་ལོ་ ༢༠༡༤ ཟླ་ ༧ པའི་ནང་བལ་ཡུལ་གྱི་དམར་ཤོག་ཚོགས་པའི་ཚོགས་གཙོར་འདེམས་ཐོན་བྱུང་། ཕྱི་ལོ་ ༢༠༡༥ ནས་ ༢༠༡༦ བར་དང་། ཕྱི་ལོ་ ༢༠༡༨ ཟླ་ ༢ པ་ནས་ ༢༠༢༡ ཟླ་ ༧ བར་སྲིད་བློན་གྱི་ལས་གནས་འཁུར། ཕྱི་ལོ་ ༢༠༢༡ ཟླ་ ༥ པའི་ནང་སྲིད་འཛིན་བྷི་དྷི་ཡ་དྷེ་ཝི་ (Bidya Devi Bhandari) ཡིས་ཨོ་ལི་སྲིད་བློན་དུ་བསྐོ་བཞག་བྱས་ཡོད་ཀྱང་། གྲོས་ཚོགས་འོག་མ་ནས་འོས་གྲངས་མ་ཚང་བའི་རྐྱེན་གྱིས་ལོ་དེའི་ཕྱི་ཟླ་ ༡༡ ནང་བསྐྱར་དུ་འོས་བསྡུ་བྱ་རྒྱུའི་ཐག་གཅོད་བྱས་ཡོད་འདུག
གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པས་རྩོམ་སྒྲིག་བྱས།
