བོད་མིའི་སྒྲིག་འཛུགས་ཀྱིས་ཨ་རིའི་གཞུང་གིས་བོད་རྒྱའི་དཀའ་རྙོག་སེལ་ཐབས་ཀྱི་སྲིད་ཇུས་གཏན་འབེབ་གནང་ཟིན་པར་གཞུང་འབྲེལ་རྟེན་འབྲེལ་མཛད་སྒོ་འཚོགས་ཏེ་ཁྲིམས་ཡིག་འདིའི་ཐོག་ནས་བོད་ཀྱི་ཛ་དྲག་གི་གནས་སྟངས་སེལ་ཐབས་བྱེད་དགོས་པ་རྒྱལ་སྤྱི་དང་རྒྱ་ནག་ལ་གསལ་བོ་བསྟན་གནང་ཡོད་སྐོར་གསུངས།
ཨ་རིའི་སྲིད་འཛིན་རྗོ་བྷའེ་ཌིན་མཆོག་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མཚན་རྟགས་བསྐྱོན་ཏེ་སྲིད་ཇུས་སུ་གཏན་འབེབ་བྱུང་བར་བོད་གཞུང་མང་གཉིས་ནས་དགའ་བསུ་ཞུ་བཞིན་ཡོད་པ་ལྟར། ཁ་སང་ཕྱི་ཚེས་ ༡༧ ཉིན་གྱི་ཉིན་རྒྱབ་ཆུ་ཚོད་ ༣།༣༠ ཐོག་གངས་ཅན་སྐྱིད་གཤོངས་ཀྱི་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། བོད་མིའི་སྒྲིག་འཛུགས་ཀྱི་གཞུང་འབྲེལ་རྟེན་འབྲེལ་དགའ་སྟོན་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མི་མང་སྤྱི་འཐུས་རྒྱུན་ལས་ཁག་ཅིག ལྷན་ཁང་ཁག་གི་དྲུང་ཆེ་ཆུང་རྣམ་པ། སྲི་ཞུ་བ་བཅས་ལྷན་འཛོམས་གནང་།
སྐབས་དེར་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་འཛམ་གླིང་ཞི་བདེ་དང་བོད་དོན་ཆེད་དུ་ཆིབས་སྒྱུར་གནང་བཞིན་ཡོད་པ་ལྟར། ༧གོང་ས་མཆོག་ཨ་རིར་ག་དུས་ཕེབས་ཀྱང་ཨ་རིའི་སྲིད་འཛིན་གྱི་ཕོ་བྲང་དཀར་པོར་གདན་འདྲེན་ཞུས་ཏེ་མཇལ་འཕྲད་གནང་ཡོད་ཅིང་། ཨ་རིའི་གྲོས་ཚོགས་ནང་དུ་བོད་དོན་དང་འབྲེལ་བའི་ཛ་དྲག་གི་གནས་ཚུལ་བྱུང་སྐབས་དགོས་མཁོ་དང་མཐུན་པའི་གྲོས་ཆོད་ཧ་ཅང་མང་པོ་བཞག་ཡོད་པ་མ་ཟད། ཕྱི་ལོ་ ༢༠༠༢ ལོར་ཐོག་མར་མགོ་བཙུགས་ཏེ་ཨ་རིའི་གཞུང་གིས་བོད་དོན་ཐོག་འཛིན་པའི་སྲིད་ཇུས་གཏན་འབེབ་གནང་བ་རླབས་ཆེ་བའི་རྒྱབ་སྐྱོར་ཞིག་ཡིན་པ་གསལ་བོ་ཆགས་ཡོད་ལ། དེ་ནས་རིམ་བཞིན་ཕྱི་ལོ་ ༢༠༢༠ ནང་ཁྲིམས་ཡིག་དེར་དགོས་ངེས་ཀྱི་བསྐྱར་བཅོས་བྱས་ཡོད། དེ་བཞིན་ད་ལན་ད་ལྟའི་ཨ་རིའི་གྲོས་ཚོགས་འཐུས་མི་རྣམས་ཀྱི་ཐུགས་འགན་གཙོ་བོ་བཞེས་པའི་ཐོག་བོད་ཀྱི་ཛ་དྲག་གི་གནས་སྟངས་སེལ་ཐབས་བྱེད་དགོས་པ་རྒྱལ་སྤྱི་དང་རྒྱ་ནག་ལ་གསལ་བོ་བསྟན་ཡོད། ཅེས་གསུངས་སོང་།
ཁྲིམས་སུ་ཆགས་པའི་ཉིན་མོ་དེར་སྲིད་སྐྱོང་མཆོག་གིས། བོད་ཕྱི་ནང་གཉིས་ཀྱི་བོད་མི་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། ཨ་རིའི་སྲིད་འཛིན་རྗོ་བྷའི་ཌེན་མཆོག་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་མཚན་རྟགས་བཀོད་དེ་ཁྲིམས་སུ་གྱུར་ཡོད་པའི་གཏམ་བཟང་གི་གནས་ཚུལ་རེད། སྐབས་བཅུ་དྲུག་པའི་བཀའ་ཤག་གིས་ལོ་གཉིས་དང་ཟླ་བ་གཉིས་རིང་སྲིད་བྱུས་དེ་དབུ་མའི་ལམ་ཡིན་པ་གང་ཞིག་ལ་ཐབས་བྱུས་ལ་འགྱུར་བ་བཏང་སྟེ་དབུ་མའི་མཐའ་གཅིག་ནི་བོད་དེ་ལོ་རྒྱུས་ཐོག་རང་བཙན་ཡིན་པའི་གནས་བབ་ཐོག་ཤུགས་རྒྱག་རྒྱུ་བྱེད་པ་ནང་བཞིན་ཁ་ནས་བཤད་པ་ཙམ་མ་ཡིན་པར་ཁ་ཡོད་ལག་ཡོད་ཀྱིས་ཨ་རིའི་གྲོས་ཚོགས་མཉམ་དཀའ་ལས་བརྒྱབ་པའི་རྒྱུ་མཚན་ལ་བརྟེན་ནས་ཡོང་གི་ཡོད་པ་རེད། དེའི་ནང་དཀའ་ལས་རྒྱག་མཁན་མང་པོ་ཡོད། དངོས་སུ་ཕྱག་ལས་གནང་མཁན་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་གཙོས་ལས་བྱེད་རྣམ་པ་དང་། དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་རི་ཅཊ་གྷེ་རི་ (Richard Gere) ལགས། རྒྱལ་སྤྱིའི་བོད་དོན་ལས་འགུལ་ཁང་གི་བསྟན་ཆོས་རྒྱ་མཚོ་ལགས། བུ་ཆུང་ཚེ་རིང་ལགས། ཕེ་རན་ཇི་ (Franz) ལགས་བཅས་ཀྱི་ཧུར་ཐག་གནང་ཡོད། དེ་བཞིན་འདི་ལོའི་ཕྱི་ཟླ ༣ ཚེས ༡༡ དང་ ༡༢ ལ་ཨ་རི་ནང་ཡོད་པའི་བོད་པའི་ཞུ་གཏུག་པ་མི་གྲངས་ཉིས་བརྒྱ་ལྷག་ཙམ་ཞིག་ཝ་ཤིང་ཊོན་ཌི་སིར་ཕེབས་ནས་ཁྲིམས་འཆར་འདི་དང་འབྲེལ་བའི་ཐོག་ནས་ཞུ་བསྐུལ་བྱས་ཡོད། བོད་རིགས་སྤྱི་མཐུན་ཚོགས་པ་དང་བོད་དོན་རྒྱབ་སྐྱོར་ཚོགས་པས་དེའི་ཐོག་སྐུ་ལས་ཧ་ཅང་བསྐྱོན་ཡོད། ཚང་མས་སྐུ་ལས་བསྐྱོན་པའི་ཉེར་ལེན་ལ་བརྟེན་ནས་ང་ཚོ་ད་ལྟ་གནས་སྟངས་འདི་འདྲ་ཞིག་ལ་བསླེབས་ཐུབ་ཡོད། དེར་བརྟེན། ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། མ་འོངས་པ་ཡིན་ནའང་འདི་ལྟ་བུའི་ལས་ཀ་མང་པོ་ཞིག་བྱེད་དགོས་ཐུག་གི་རེད། ཚང་མས་མཉམ་རུབ་ཀྱི་ཐོག་ནས་ནུས་པ་མཉམ་སྤུངས་བྱས་པ་ཡིན་ན་དོན་དག་སྒྲུབ་རྒྱུ་ཡོད་པ་འདི་ནས་ཁུངས་སྐྱེལ་ཐུབ་པའི་གནས་སྟངས་ཆགས་ཡོད། ཅེས་གསུངས་འདུག
བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ (The Promoting a Resolution to the Tibet-China Dispute Act)དེ་ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ (Michael McCaul) མཆོག་དང་། གྲོས་ཚོགས་འཐུས་མི་རྗེམ་མེག་གྷོ་ཝིན་(Jim McGovern) མཆོག གྲོས་ཚོགས་འཐུས་མི་རྗེ་ཧྥུ་མེར་ལི་ (Jeff Merkley) མཆོག གྲོས་ཚོགས་འཐུས་མི་ཊོ་ཌི་ཡོང་(Todd Young) མཆོག་སོགས་ཀྱིས་ཐུགས་འགན་བཞེས་ཏེ། ཐོག་མར་ཕྱི་ལོ་ ༢༠༢༢ ཟླ་ ༧ ཚེས་ ༡༣ ཉིན་གྲོས་ཚོགས་འོག་མའི་ནང་དུ་ཁྲིམས་འཆར་དེ་ངོ་སྤྲོད་གནང་ཡོད་པ་དང་། དེ་ནས་ཕྱི་ལོ་ ༢༠༢༣ ཟླ་ ༡ ཚེས་ ༣༠ ཉིན་གྲོས་ཚོགས་གོང་མའི་ནང་ངོ་སྤྲོད་གནང་། ཕྱི་ལོ་ ༢༠༢༤ ཟླ་བ་ ༢ ཚེས་ ༡༥ ཉིན་ཨ་རིའི་གྲོས་ཚོགས་འོག་མའི་ནང་ཚད་མཐོའི་མང་མོས་རྒྱབ་སྐྱོར་ཐོབ་ཡོད་པ་དང་། ཕྱི་ཟླ་ ༥ པའི་ཚེས་ ༢༣ བོད་ལུགས་ཀྱི་ས་ག་ཟླ་བའི་ཚེས་པ་ ༡༥ ཉིན། ཨ་རིའི་གྲོས་ཚོགས་གོང་མའི་ནང་སྤྱི་མོས་རྒྱབ་སྐྱོར་ཐོབ། ཕྱི་ཟླ་ ༦ ཚེས་ ༡༢ ཉིན་ཨ་རིའི་གྲོས་ཚོགས་འོག་མའི་ནང་ཁྲིམས་འཆར་གྱི་བསྐྱར་བཅོས་ཚིག་བརྗོད་ལ་དམངས་གཙོ་ཚོགས་པ་དང་སྤྱི་མཐུན་ཚོགས་པའི་འཐུས་མི་ ༣༩༡གིས་རྒྱབ་སྐྱོར་གནང་སྟེ་གྲོས་ཚོགས་གོང་འོག་གཉིས་ནས་གཏན་འབེབ་གནང་བ་ལྟར། ཨ་རིའི་སྲིད་འཛིན་གཞོན་པ་ཀ་མ་ལ་ཧེ་རི་སི(Kamala Harris) མཆོག་དང་། གྲོས་ཚོགས་འོག་མའི་ཚོགས་གཙོ་མེག་ཇོན་སོན་ (Mike Johnson) མཆོག་རྣམ་གཉིས་ནས་མཚན་རྟགས་བསྐྱོན་གྲུབ་སྟེ། ཟླ་འདིའི་ཕྱི་ཚེས་ ༡༡ ཉིན་ཨ་རིའི་སྲིད་འཛིན་ཕོ་བྲང་དུ་ཕུལ་བ་ལྟར་ཟླ་འདིའི་ཕྱི་ཚེས་ ༡༣ ཉིན་སྲིད་འཛིན་རྗོ་བྷའེ་ཌིན་མཆོག་ནས་དངོས་སུ་མཚན་རྟགས་བསྐྱོན་ཡོད་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
