སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་ཨ་རིའི་ཁྲིམས་ཡིག་གཏན་འབེབས་གནང་བ་བཞིན་ཉི་ཧོང་གཞུང་མང་གཉིས་ནས་ཀྱང་བོད་དོན་ལ་རྒྱབ་སྐྱོར་མཚོན་ཆེད་དེ་ལྟར་ཁྲིམས་ཡིག་འཇོག་དགོས་པའི་འབོད་སྐུལ་ཞུས་ཡོད།
ཁ་སང་ཕྱི་ཟླ་ ༧ ཚེས་ ༢༢ ཉིན་དབུས་བོད་མིའི་སྒྲིག་འཛུགས་ཀྱི་དྲ་རྒྱར་གསལ་བའི་གནས་ཚུལ་ལྟར་ན། ཉེ་ལམ་ཉི་ཧོང་བོད་ཁང་དང་ཨེ་ཤ་ཡའི་མང་གཙོ་ལས་འགུལ་ཁང་གཉིས་ཀྱི་གོ་སྒྲིག་འོག སྤྱི་ཚོགས་རིག་པའི་འབུམ་རམས་པ་རྒན་རྒྱལ་ལོ་མཆོག་གིས་བུན་ཀྱོ་ཀུ་སྤྱི་བའི་བསྟི་གནས་ཁང་དུ་རྒྱ་ནག་གཞུང་གིས་བོད་ནང་མི་སེར་སྤེལ་བའི་རིང་ལུགས་ཀྱི་བཅའ་སྡོད་སློབ་གྲྭ་བཙུགས་ནས། བོད་ཕྲུག་རྣམས་ལ་རྒྱ་བསྒྱུར་སྲིད་ཇུས་ལག་བསྟར་བྱེད་མུས་ཡིན་པའི་སྐོར་གསུང་བཤད་དང་གསར་འགོད་གསལ་བསྒྲགས་ཤིག་གནང་འདུག་ལ། སྐབས་དེར་བོད་དོན་ལས་འགུལ་བསྟི་གནས་ཁང་ (Tibet Action Institute) གི་ཨེ་ཤ་ཡའི་ལས་འཆར་འགན་འཛིན་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་དང་། བོད་རང་བཙན་སློབ་ཕྲུག་ཚོགས་པའི་བསྟན་འཛིན་སྨིན་ལེགས་ལགས། ཚེ་རིང་རྡོ་རྗེ་ལགས་བཅས་ཀྱིས་གསུང་བཤད་གནང་ཡོད་འདུག
ལྷན་ཚོགས་དེའི་ཐོག་འབུམ་རམས་པ་ལྡོང་རྒྱལ་ལོ་མཆོག་གིས། རྒྱ་ནག་གཞུང་གིས་བོད་ཡུལ་དུ་བོད་ཀྱི་མ་འོངས་པའི་ཆོས་རིག་དང་། སྐད་ཡིག བོད་མིའི་སྲོལ་རྒྱུན་སོགས་རྨེག་མེད་དུ་བཟོ་སླད། མི་སེར་སྤེལ་ཡུལ་རིང་ལུགས་ཀྱི་བཅའ་སྡོད་སློབ་གྲྭ་འཛུགས་སྟངས་ཀྱི་གོ་རིམ་དང་། ཕྱི་ལོ་ ༡༩༨༤ ཙམ་ནས་རྒྱ་ནག་གཞུང་གིས་བོད་ནང་གི་སློབ་མ་མང་དག་ཅིག་བོད་སྐད་ཡིག་གི་ཁོར་ཡུག་དང་། བོད་ཀྱི་སྤྱི་ཚོགས་ལས་རྒྱང་དུ་བཀྱེད་པའི་རྒྱ་ནག་གི་སློབ་གྲྭ་ཁག་ཏུ་བཙན་ཁྲིད་བྱས་པའི་སྐོར། ལྷག་པར་ཕྱི་ལོ་ ༢༠༡༦ ཙམ་ནས་རྒྱ་ནག་གཞུང་གིས་བོད་ནང་གི་སྲོལ་རྒྱུན་གྱི་སློབ་གྲྭ་མང་པོ་ཞིག་གཏན་དུ་སྒོ་བརྒྱབ་སྟེ། ལོ་ ༤ ནས་ ༡༨ བར་གྱི་བོད་ཕྲུག་མང་པོ་ཞིག་རྒྱ་ནག་གཞུང་གིས་ཆེད་འཛུགས་བྱས་པའི་བཅའ་སྡོད་སློབ་གྲྭ་ཁག་ཏུ་བཙན་གྱིས་བཅུག་པ་བརྒྱུད་བོད་ཕྲུག་རྣམས་ལ་རྒྱའི་སློབ་གསོའི་ཤུགས་རྐྱེན་ཆེན་པོ་ཐེབས་ཡོད་སྐོར་སོགས་གསུངས་འདུག
དེ་རྗེས་བོད་རང་བཙན་སློབ་ཕྲུག་ཚོགས་པའི་བསྟན་འཛིན་སྨིན་ལེགས་ལགས་ཀྱིས་བོད་རང་བཙན་སློབ་ཕྲུག་ཚོགས་པའི་ལས་འགུལ་དང་འབྲེལ་རྒྱ་ནག་གཞུང་གིས་བོད་ཀྱི་ངོ་བོ་དང་སྐད་ཡིག རིག་གཞུང་བཅས་རྩ་མེད་བཟོ་ཐབས་བྱེད་བཞིན་པའི་སྐོར་གསལ་སྟོན་གནང་མཚམས། སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་གོ་སྒྲིག་ཚོགས་ཆུང་དང་། ཚོགས་བཅར་བ་རྣམས་ལ་ཐུགས་རྗེ་ཞུས་པ་མ་ཟད། ཨ་རིའི་གཞུང་གིས་རྒྱ་ནག་གི་མི་སེར་སྤེལ་ཡུལ་གཏན་སློབ་ཁག་མཚམས་འཇོག་དགོས་པའི་ཁྲིམས་ཡིག་གཏན་འབེབས་གནང་བ་བཞིན་ཉི་ཧོང་གཞུང་མང་གཉིས་ནས་ཀྱང་བོད་དོན་ལ་རྒྱབ་སྐྱོར་མཚོན་ཆེད་དེ་ལྟར་ཁྲིམས་ཡིག་འཇོག་དགོས་པའི་འབོད་སྐུལ་ཞུས་ཡོད།
གཏམ་བཤད་ཀྱི་ལས་རིམ་ཁག་གྲུབ་རྗེས། རྒྱལ་སྤྱིའི་བོད་དོན་ལས་འགུལ་ཁང་དང་ཉི་ཧོང་སྐུ་ཚབ་དོན་གཅོད་ཁང་གཉིས་ཀྱིས་མི་སེར་སྤེལ་ཡུལ་གཏན་འཇགས་སློབ་གྲྭའི་སྐོར་ཉི་ཧོང་གི་སྐད་དུ་བསྒྱུར་བའི་སྙན་ཐོ་ཞིག་འགྲེམས་སྤེལ་བྱས་ཡོད་པ་མ་ཟད། གསར་འགོད་པ་རྣམས་དང་ལྷན་དུ། རྒྱ་ནག་གཞུང་གིས་བོད་ནང་བཅའ་སྡོད་སློབ་གྲྭ་བཙུགས་ནས་བོད་ཕྲུག་རྣམས་ལ་རྒྱའི་སློབ་གསོའི་ཤུགས་རྐྱེན་ཐེབས་ཡོད་སྐོར་དང་། རྒྱ་ནག་གཞུང་གིས་རྒྱལ་སྤྱིའི་ཁྲིམས་སྒྲིག་དང་འགལ་ནས་བོད་ཀྱི་ལོ་ཆུང་བྱིས་པ་རྣམས་བཙན་གྱིས་ཕ་མ་དང་ཁ་བྲལ་དུ་གཏོང་གི་ཡོད་པའི་ཐད་ལ་དྲི་བ་དྲི་ལན་སོགས་གནང་ཡོད་འདུག
འདི་ལོའི་ཕྱི་ཟླ་ ༡ ནང་མཉམ་འབྲེལ་རྒྱལ་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་བསྐྱར་ཞིབ་བྱེད་སྐབས། རྒྱ་ནག་གཞུང་གིས་བོད་ནང་དུ་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པ་ཉི་ཧོང་གཞུང་གིས་ཐེར་འདོན་དང་སྦྲགས་སྐྱོན་བརྗོད་གནང་ཡོད་པ་མ་ཟད། རྒྱ་ནག་གཞུང་གིས་ཐབས་མཁས་པོས་ཕྱོགས་མང་པོ་ཞིག་ནས་བོད་ཀྱི་སྐད་ཡིག་དང་རིག་གཞུང་ཚུད་པའི་བོད་ཀྱི་ངོ་བོ་རྩ་མེད་བཟོ་ཐབས་བྱེད་མུས་ཡིན་སྐོར་དང་། རྒྱ་ནག་གཞུང་གིས་བོད་ཕྲུག་རྣམས་བཙན་གྱིས་བཅའ་སྡོད་སློབ་གྲྭ་ཁག་ཏུ་འཇུག་གིན་ཡོད་པའི་གནས་ཚུལ་སོགས་ཐེར་འདོན་གནང་ཡོད།
འདས་པའི་ལོ་ཤས་རིང་རྒྱ་ནག་གཞུང་གིས་བོད་ནང་གི་ས་ཁུལ་མང་དག་ཅིག་ཏུ་བཅའ་སྡོད་སློབ་གྲྭ་བཙུགས་ནས་བོད་ཕྲུག་རྣམས་བཙན་གྱིས་མངག་གཏོང་བྱས་པར། རྒྱལ་སྤྱི་ཁྱོན་ཡོངས་ནས་གནོན་ཤུགས་དང་གླེང་སློང་ཤུགས་ཆེན་བྱས་སྟབས། འདས་ལོར་རྒྱ་ནག་གོ་ལའི་དུས་བབ་ཀྱིས་བོད་ནང་གི་བཅའ་སྡོད་སློབ་གྲྭ་ཁག་གི་སྐོར་ལ་ཡིག་བརྙན་གཉིས་ཀྱི་ཐོག་ནས་གནས་ཚུལ་སྤེལ་ནས་དཀར་འདོན་བྱེད་ཐབས་དང་། འབུམ་རམས་པ་རྒན་རྒྱལ་ལོ་མཆོག་ཚུད་པའི་ཚོགས་པ་མང་དག་ཅིག་གིས་བོད་ནང་གི་བཅའ་སྡོད་སློབ་གྲྭའི་སྐོར་ལ་འཁྱོག་བརྗོད་བྱེད་ཀྱི་ཡོད་ལུགས་ཀྱི་དྲིལ་བསྒྲགས་ཤུགས་ཆེན་བྱས་ཡོད།
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
