བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཡུ་རོབ་གྲོས་ཚོགས་དང་ལྷན་ཚོགས་ཀྱི་ཚོགས་གཙོ་གཉིས་ལ་འཚམས་འདྲི་དང་སྦྲགས་བོད་དོན་ཐོག་མུ་མཐུད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་འདུག
ཟླ་འདིའི་ ༧ ཚེས་ ༢༢ ཉིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྤྱི་ཚོགས་དྲྭ་ལམ་ X བརྒྱུད་ལྕམ་ཨུར་སུ་ལ་ཝོན་ཊེར་ལེ་ཡེ་ (Ursula von der Leye) མཆོག་སླར་ཡང་ཡུ་རོབ་ལྷན་ཚོགས་ (European Commission) ཀྱི་ཚོགས་གཙོར་འོས་འདེམས་བྱུང་བར་འཚམས་འདྲི་གནང་ཡོད་ཅིང་། ཚོགས་གཙོ་མཆོག་གི་འཚམས་འཕྲིན་ནང་། སྐུ་ཉིད་ཀྱི་དབུ་ཁྲིད་གནང་ཕྱོགས་དང་། བོད་ཀྱི་བདེན་པའི་རྩ་དོན་ཐོག་རྒྱབ་སྐྱོར་གནང་ཕྱོགས་ལ་འཛམ་གླིང་གང་སར་ཡོད་པའི་བོད་མི་ཚང་མས་བསྔགས་བརྗོད་ཞུ་ཡི་ཡོད་པ་དང་། འབྱུང་འགྱུར་མུ་མཐུད་བོད་དོན་ཐོག་རྒྱབ་སྐྱོར་གནང་སྐྱོང་ཡོང་བའི་རེ་བ་ཞུ་བཞིན་ཡོད། ཅེས་འཁོད་འདུག
དེ་བཞིན་ཚོགས་གཙོ་མཆོག་གིས་ལྕམ་རོ་བྷེ་ཊོ་མེཊ་སོ་ལ་ (Roberta Metsola) མཆོག་བསྐྱར་དུ་ཡུ་རོབ་གྲོས་ཚོགས་ཀྱི་ཚོགས་གཙོར་འོས་འདེམས་བྱུང་བར་འཚམས་འདྲི་གནང་ཡོད་པའི་ནང་། ཡུ་རོབ་མཐུན་ཚོགས་ནང་བོད་དོན་ཐོག་རྒྱབ་སྐྱོར་གྱི་ལས་གཞི་གང་མང་སྤེལ་ཡོད་པའི་ཁྲོད། ཡུ་རོབ་གྲོས་ཚོགས་ནི་དེ་དག་གི་སྣེ་ཁྲིད་མཁན་ཞིག་ཆགས་ཀྱི་ཡོད་སྟབས། བོད་མི་ཡོངས་ཀྱིས་ཡུ་རོབ་གྲོས་ཚོགས་ཀྱིས་བོད་དོན་ཐོག་རྟག་ཏུ་རྒྱབ་སྐྱོར་བརྟན་པོ་གནང་བར་གུས་བརྩི་ཞུ་ཡི་ཡོད། ཅེས་འཁོད་འདུག
ལྕམ་རོ་བྷེ་ཊོ་མེཊ་སོ་ལ་མཆོག་ནི་ཕྱི་ལོ་ ༡༩༧༩ ལོར་མཱལ་ཊ་སྤྱི་མཐུན་རྒྱལ་ཁབ་ཀྱི་ནུབ་ཁུལ་གྱི་སི་ཝི་ཁི་གྲོང་གསེབ་དུ་སྐྱེས་ཅིང་། ཕྱི་ལོ་ ༢༠༠༣ ལོར་མཱལ་ཊ་གཙུག་ལག་སློབ་གཉེར་ཁང་ནས་ཁྲིམས་ལུགས་ཐོག་ལག་འཁྱེར་བླངས། ཕྱི་ལོ་ ༢༠༠༤ སྦེལ་ཇམ་ཡུ་རོབ་མཐོ་སློབ་ནས་དུས་ཐུང་སློབ་སྦྱོང་བྱས། ཕྱི་ལོ་ ༢༠༠༥ ལོ་ནས་བཟུང་ཁོང་མོའི་ཁྱོ་ག་དང་མཉམ་དུ་ཡུ་རོབ་མི་མང་སྲིད་དོན་ཚོགས་པ་ཞུགས་ཏེ། ཕྱི་ལོ་ ༢༠༠༩ ལོར་ཡུ་རོབ་གྲོས་ཚོགས་འོས་མི་རུ་མཉམ་ཞུགས་གནང་། ཕྱི་ལོ་ ༢༠༡༣ ལོར་ཁོང་མོ་ནི་ཡུ་རོབ་གྲོས་ཚོགས་ཀྱི་ཁྲོད་བུད་མེད་གྲོས་ཚོགས་འཐུས་མི་ཐེངས་དང་པོར་ཆགས། ཕྱི་ལོ་ ༢༠༡༤ ལོར་བསྐྱར་དུ་ཡུ་རོབ་གྲོས་ཚོགས་འཐུས་མིར་བདམས་ཐོན་བྱུང་། ཕྱི་ལོ་ ༢༠༢༢ ལོར་ཡུ་རོབ་གྲོས་ཚོགས་ཀྱི་ཚོགས་གཙོའི་འོས་བདམས་ཁྲོད་རྒྱལ་ཁ་ཐོབ་ཡོད་འདུག
ལྕམ་ཨུར་སུ་ལ་ཝོན་ཊེར་ལེ་ཡེ་མཆོག་ནི་ཕྱི་ལོ་ ༡༩༥༨ ལོར་འཇར་མན་རྒྱལ་ཁབ་ཀྱི་རྒྱལ་ས་བྷི་རུ་སིལ་སི་རུ་སྐྱེས་ཡོད་ཅིང་། ཕྱི་ལོ་ ༡༩༧༨ ལོར་དབྱིན་ཇིའི་གཙུག་ལག་སློོབ་གཉེར་ཁང་དུ་དཔལ་འབྱོར་རིག་པའི་སློབ་ཐོན་བྱུང་། ཕྱི་ལོ་ ༡༩༨༧ ལོར་འཇར་མན་ཧན་ནོ་ཝར་གཙུག་ལག་སློབ་གཉེར་ཁང་ནས་སྨན་པའི་ལག་འཁྱར་བླངས། ཕྱི་ལོ་ ༡༩༩༩ ནས་བཟུང་ཧན་ནོ་ཝིར་ས་གནས་སུ་སྲིད་དོན་ཐོག་ཞུགས། ཕྱི་ལོ་ ༢༠༠༣ ནས་ ༢༠༠༥ བར་ལོ་བིར་མངའ་སྡེའི་བློན་ཆེན་གྱི་ཕྱག་ལས་གནང་། ཕྱི་ལོ་ ༢༠༠༥ ནས་ ༢༠༠༩ བར་ནང་སྲིད་བློན་ཆེན་དང་། ཕྱི་ལོ་ ༢༠༠༩ ནས་ ༢༠༢༣ བར་ངལ་རྩོལ་དང་སྤྱི་ཚོགས་བདེ་དོན་བློན་ཆེན། ཕྱི་ལོ་ ༢༠༡༣ ནས་ ༢༠༡༩བར་བདེ་སྲུང་བློན་ཆེན་བཅས་ཀྱི་ལས་འགན་འཁུར་འདུག ཕྱི་ལོ་ ༢༠༡༩ ལོར་ཡུ་རོབ་མཐུན་ཚོགས་ཀྱི་ཚོགས་གཙོ་བདམས་ཐོན་བྱུང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
