གནས་མཆོག་རྡོ་རྗེ་གདན་རྒྱ་བསྐྱེད་ནས་གནས་སྐོར་དང་ཡུལ་སྐོར་ས་ཚིགས་ཆེན་པོ་ཞིག་ཏུ་བསྒྱུར་འཆར་ཡོད་འདུག
གནས་མཆོག་རྡོ་རྗེ་གདན། དྲ་ལམ་གྱི་པར།
ཁ་སང་རེས་གཟའ་མིག་དམར་ཉིན་རྒྱ་གར་གྱི་དཔལ་འབྱོར་བློན་ཆེན་ནིར་མཱ་ལ་སི་ཐི་རཱ་མན་(Nirmala Sitharaman) ལགས་ཀྱིས། རྒྱ་གར་གཞུང་གི་ཕྱི་ལོ ༢༠༢༤ ལོའི་སྔོན་རྩིས་ཀྱི་གཏམ་བཤད་གནང་སྐབས་རྒྱ་གར་གྱི་མངའ་སྡེ་བྷེ་ཧར་གྱི་གྲོང་ཁྱེར་གྷ་ཡའི་ཉེ་འདབས་སུ་ཆགས་པའི་གནས་མཆོག་རྡོ་རྗེ་གདན་གྱི་ནང་གི་བྱང་ཆུབ་མཆོད་རྟེན་ཆེན་མོ་དང་། ཁྱབ་འཇུག་གི་ཝིཥྞུ་པཱ་དཱི་ལཱི་ (Vishnupad Temple) ལྷ་ཁང་གཉིས་ལ་བར་འཁྱམས་སོགས་རྒྱ་བསྐྱེད་ནས། འཛམ་གླིང་གི་གནས་སྐོར་དང་ཡུལ་སྐོར་སྤྲོ་འཆམ་གྱི་ས་ཚིགས་སུ་བསྒྱུར་རྒྱུ་ཡིན་པའི་གསལ་བསྒྲགས་ཤིག་སྤེལ་བར། རྒྱ་གར་དབུས་གཞུང་དཔལ་འབྱོར་ལས་ཁུངས་ཀྱིས་རོགས་འདེགས་བྱ་རྒྱུ་ཡིན་སྐོར་སོགས་གསུངས་འདུག
ཁོང་མོས། བྷེ་ཧར་གྱི་ག་ཡའི་ཁྱབ་འཇུག་ལྷ་ཁང་དང་རྡོ་རྗེ་གདན་གྱི་བྱང་ཆུབ་ཆེན་པོའི་ལྷ་ཁང་གཉིས་ཆོས་ཕྱོགས་ནས་གལ་གནད་ཆེན་པོ་ཡིན་པས། ཁྱབ་འཇུག་ལྷ་ཁང་དང་བྱང་ཆུབ་ཆེན་པོའི་ལྷ་ཁང་གི་བར་འཁྱམས་གཉིས་རྒྱ་བསྐྱེད་ནས། འཛམ་གླིང་གི་གནས་སྐོར་དང་ཡུལ་སྐོར་སྤྲོ་འཆམ་བྱེད་ཡུལ་དུ་བསྒྱུར་བར་རྒྱབ་སྐྱོར་བྱ་རྒྱུ་དང་། དེ་བཞིན་རྒྱལ་བོའི་ཁབ་དང་ན་ལེནྡྲ་གཉིས་ཀྱང་ཡར་རྒྱས་གཏང་རྒྱུ་ཡིན་སྐོར་དང་། ཁོང་གིས་ཨོ་ཌི་ཤའི་མཛེས་སྡུག་ལྡན་པའི་ཡུལ་ལྗོངས་དང་། ལྷ་ཁང་། དྲན་རྟེན་རྡོ་རིང་། ལག་ཤེས་ལག་རྩལ་གྱི་རིག་གཞུང་། རི་དྭགས་སྲུང་སྐྱོབ་ས་ཁུལ། རང་བྱུང་གི་ཡུལ་ལྗོངས། ཀུན་གཙང་མཚོ་འགྲམ་བཅས་ནི་ཡུལ་སྐོར་སྤྲོ་འཆམ་བྱེད་ཡུལ་མཐར་ཐུག་ཅིག་ཡིན་སྟབས། ཨོ་ཌི་ཤ་ལའང་དེ་ཚོ་ཡར་རྒྱས་གཏོང་བར་རོགས་རམ་བྱ་རྒྱུ་ཡིན་སྐོར་སོགས་གསུངས་འདུག
ད་ལྟ་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ། རྒྱ་གར་དཔལ་འབྱོར་བློན་ཆེན་མཆོག་གིས་ཆོས་ལུགས་ཀྱི་ལྟེ་གནས་ཁང་དེ་དག་རྒྱ་བསྐྱེད་པར་དཔལ་འབྱོར་གྱི་རོགས་འདེགས་གནང་རྒྱུ་ཡིན་སྐོར་གསུངས་ཡོད་པ་ལས། འདི་ལོའི་སྔོན་རྩིས་ལས་མ་དངུལ་ག་ཙམ་གནང་རྒྱུ་དང་། ག་དུས་ཙམ་ལ་རྒྱ་བསྐྱེད་ནས་ཡུལ་སྐོར་སྤྲོ་འཆམ་དང་གནས་མཇལ་བའི་ས་ཚིགས་གལ་ཆེན་ཞིག་ཏུ་བསྒྱུར་རྒྱུ་ཡིན་པའི་ཐད་གསལ་ཁ་གང་ཡང་མེད་པ་རེད།
གནས་མཆོག་རྡོ་རྗེ་གདན་ནི་ནང་པ་རྣམས་ཀྱིས་སྟོན་པ་བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་གནས་མཆོག་ཏུ་ངོས་འཛིན་བྱེད་ཀྱི་ཡོད་ཅིང་། དེ་ནི་ཐོག་མར་བྲམ་ཟེ་ཛ་སའི་བུ་ཐ་ཆུང་བྲམ་ཟེ་དགེ་བས་བཞེངས་པར་གྲགས། རྗེས་སུ་མ་ག་དྷའི་ཁྱིམ་བདག་འཆི་མེད་དང་རྒྱ་གར་གཞུང་སོགས་ཀྱིས་ཉམས་གསོ་གནང་། དབུས་ཀྱི་གན་དྷོ་ལའི་རྩེའི་མཆོད་རྟེན་ཆུང་ངུ་དེ་སློབ་དཔོན་ཀླུ་སྒྲུབ་ཀྱིས་བཞེངས་ཤིང་། ནང་དུ་བཅོམ་ལྡན་འདས་ཀྱི་རིང་བསྲེལ་བྲེ་གང་དང་། ལྷ་ཁང་སྟེང་འོག་གཉིས་ཡོད་པའི་སྟེང་མ་དེའི་ནང་དུ་ལྷ་སའི་ཇོ་བོ་སྔོན་བཞུགས་པར་གྲགས། སྐོར་ལམ་གྱི་རྡོའི་དྲྭ་མིག་དེ་དག་མགོན་པོ་ཀླུ་སྒྲུབ་ཀྱིས་བཞེངས། སྔ་རྗེས་བར་གསུམ་དུ་སྦྱིན་པའི་བདག་པོ་རྣམས་ཀྱིས་ཉམས་གསོ་ལན་མང་གནང་། དེང་སྐབས་དེ་ནི་ནང་པའི་གནས་ཆེན་ཁྱད་འཕགས་ཤིག་དང་། འཛམ་གླིང་གི་ཡུལ་སྐོར་བའི་ས་ཚིགས་གལ་ཆེན་ཞིག་ཏུ་གྱུར་ཡོད།
ཝིཥྞུ་པཱ་དཱི་ལཱི་(Vishnupad Temple) ནི་ཁྱབ་འཇུག་གི་ཞབས་ཀྱི་ལྷ་ཁང་ཞིག་སྟེ། རྒྱ་གར་གྱི་བྷེ་ཧར་མངའ་སྡེའི་ག་ཡའི་གྲོང་ཁྱེར་ནང་གི་ཧིན་དྷུའི་གནའ་བོའི་ལྷ་ཁང་ཞིག་ཡིན། ཁྱབ་འཇུག་གིས་བདུད་ག་ཡཱ་སུ་ར་བསད་པའམ་ས་འོག་ཏུ་བཅུག་པའི་གནས་སུ་བཞེངས་པར་གྲགས། ལྷ་ཁང་དེའི་ནང་དུ་ཁྱབ་འཇུག་གི་ཞབས་རྗེས་སེན་ཊི་མི་ཊར ༤༠ ཅན་ཞིག་ཡོད་པའི་རྡོ་ལེབ་ཅིག་བརྐོས་ཡོད། རྡོ་ལེབ་དེ་ནི་ག་ཡཱ་སུ་རའི་བྲང་ཁར་ཞབས་ཀྱིས་བཅགས་ནས་ས་འོག་ཏུ་བཅུག་པའི་རྗེས་ཤུལ་ཡིན་སྐོར་གྲགས། ཁྱབ་འཇུག་གི་ལྷ་ཁང་ནི་ག་ཡའི་གྲོང་ཁྱེར་ནང་གི་དད་ལྡན་པའི་ལྷ་ཁང་གཙོ་བོ་དེ་ཡིན།
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
