ཕྱིི་ལོ་ ༢༠༢༤ ཟླ་ ༧ ཚེས་ ༢༦ ཉིན་གྱི་དགོང་མོར་ཧྥ་རན་སིའི་རྒྱལ་སར་འཚོགས་ལ་ཉེ་བའི་རྒྱལ་སྤྱིའི་ཨོ་རྩེད་འགྲན་བསྡུར་ཆེན་མོ་དང་འབྲེལ་བའི་གསར་འགྱུར།
ད་ལོ་ཧྥ་རན་སིར་འཚོགས་ལ་ཉེ་བའི་རྒྱལ་སྤྱིའི་ཨོ་རྩེད་ཆེན་མོར་ཡུལ་སྐོར་བ་དང་གཟིགས་མོར་ཕེབས་མཁན་མི་གྲངས་ས་ཡ་ ༡༥ ནས་ ༡༦ བསླེབ་རྒྱུ་ཚོད་དཔག་བྱེད་མུས་རེད་འདུག མགྲོན་ཁང་ཁག་གི་མཚན་གཅིག་གི་རིན་གོང་ཡུ་སྒོར་ ༢༠༠ ཡིན་སར་ད་ཆ་ ༦༠༠ འཕར་ཡོད། ས་གནས་མེ་འཁོར་སྤ་སེའི་རིན་གོང་ལྡབ་ལོག་གསུམ་ཙམ་འཕར་ཡོད། འོན་ཀྱང་ཨོ་རྩེད་འགོ་འཛུགས་ལ་ཉི་མ་གཅིག་གི་སྔོན་ལ་པ་རི་སིའི་ཟ་ཁང་། ཆང་ཁང་། ཚོང་ཁང་ཕལ་ཆེ་བ་སྟོང་བ་རེད་འདུག
ཧྥ་རན་སིའི་ཆབ་སྲིད་གནས་འབབ་ཇི་འདྲ་ཞིག་འོག་ཨོ་རྩེད་འཚོགས་སམ། དེ་ནི་ཧྥ་རན་སིའི་སྤྱི་མཐུན་སྲིད་འཛིན་སྐུ་ཞབས་མ་ཥི་ཝོང་མཆོག་གིས་འདི་ལོ་ཕྱི་ཟླ་ ༦ ནང་ཡུ་རོབ་གྲོས་ཚོགས་ཀྱི་འོས་བསྡུ་ཆེན་མོའི་རྗེས་སུ་ཁོང་གི་གཞུང་འཛིན་སྲིད་དོན་ཚོགས་པར་ཕམ་ཉེས་བྱུང་ནས་བཟུང་སྲིད་འཛིན་གྱིས་རྩ་ཁྲིམས་ཀྱི་དོན་ཚན་ ༡༢ པའི་དགོངས་དོན་ལྟར། ཧྥ་རན་སིའི་རྒྱལ་ནང་གི་གྲོས་ཚོགས་འོག་མ་ཕྱིར་བསྡུ་བྱས་ཏེ་ཟླ་གཅིག་ནང་ཚུད་དུ་རྒྱལ་ཡོངས་འོས་བསྡུ་བྱ་དགོས་ཞེས་བཀའ་ཕབ། འོན་ཀྱང་ཕྱི་ཟླ་ ༧ ཚེས་ ༧ ཉིན་དགོང་མོར་ཧྥ་རན་སིའི་རྒྱལ་ཡོངས་འོས་བསྡུ་ཆེན་མོའི་དངོས་གཞིའི་གྲུབ་འབྲས་གསལ་བསྒྲགས་བསྐྱངས་ཡོད།
མནའ་འབྲེལ་སྲིད་དོན་ཚོགས་པ་ཁག་གསུམ་ཡོད་ཁུངས་ནས་སྲིད་དོན་ཚོགས་པ་སུ་གང་ལ་མང་མོས་གྲངས་ཚད་འཕེར་པའི་གྲོས་ཚོགས་འཐུས་མི་བདམས་ཐུབ་མེད་སྟབས་གཞུང་གསར་བ་འཛིན་ཐུབ་མཁན་གྱི་སྲིད་དོན་ཚོགས་པ་བྱུང་མེད། གཞུང་གསར་བའི་སྲིད་བློན་སུ་བསྐོ་གཞག་བྱ་དགོས་མིན་ཐད་དཀའ་ངལ་ཞིག་ནང་ལྷུང་བསྡད་ཡོད་སྐབས་སུ་འཁེལ། སྲིད་འཛིན་གྱིས་མནའ་འབྲེལ་ཆབ་སྲིད་ཚོགས་པ་གསུམ་གྱི་འགོ་འཁྲིད་ཚོར་ནང་ཁུལ་ཕན་ཚུན་གྲོས་མོལ་བྱས་ཏེ་གང་མགྱོགས་གྲོས་ཚོགས་འཐུས་མིའི་གྲངས་ཚད་ལོན་ཐུབ་པ་བྱས་ཏེ་གཞུང་གསར་བ་འཛིན་རྒྱུར་ཆ་རྐྱེན་ཚང་བ་བྱོས་ཞེས་གསུངས་ཡོད། ད་དུང་ཡང་གཞུང་གསར་བ་གཏན་འབེབས་བྱེད་པར་སྲིད་འཛིན་མཆོག་ནས་སྲིད་བློན་གསར་བ་བསྐོ་གཞག་གནང་ཐུབ་མེད།
གནས་སྟངས་ངེས་མེད་འདི་འདྲ་ཞིག་གི་འོག་ཏུ་ཕྱི་ལོ་ ༢༠༢༤ རྒྱལ་སྤྱིའི་ཨོ་རྩེད་འགྲན་ཚོགས་ཀྱི་དབུ་འབྱེད་མཛད་སྒོའི་རྣམ་པ་གང་ཅིའི་ཐད་ནས་སྔར་དང་མི་འདྲ་བ་ཞིག་གོ་སྒྲིག་བྱ་རྒྱུ་ནི་རྒྱལ་ས་པ་རི་སིའི་གདོང་ལེན་ཞིག་ལ་ངོས་འཛིན་བྱས་ཡོད། སྤྱིར་རྩེད་རིགས་ལ་གསར་བརྗེའི་རྣམ་པ་མངོན་ཐབས་དང་། མཛད་སྒོར་ལྟ་མོ་བ་གང་མང་མཉམ་ཞུགས་བྱ་འཆར་ཡོད་པ་རེད། ཨོ་རྩེད་འགྲན་ཚོགས་ཀྱི་དབུ་འབྱེད་མཛད་སྒོར་གྲ་སྒྲིག་གི་བྱ་བཞག་གི་ཐོག་པ་རི་སི་དང་དེའི་གྲོང་སྡེའི་ལས་ཁུངས། རྒྱལ་སྤྱིའི་ཨོ་རྩེད་འགན་འཛིན་ཚོགས་ཆུང་། ཧྥ་རན་སིའི་རྒྱལ་ཡོངས་ཨོ་རྩེད་ཚོགས་པ་བཅས་འཕྱར་བ་གྲུ་འདེགས་སྒོ་ནས་བྱས་པ་ཞིག་ཡིན་འདུག མཛད་སྒོ་ནི་རྩེད་འགྲན་པ་ཚོའི་རྩེད་མོའི་བསྟི་གནས་ཀྱི་སྙིང་ཁམས་ལྟ་བུ་དང་། སྒྲོན་མེའི་འོག་གསལ་བས་པ་རི་སིའི་གྲོང་ཁྱེར་ནི་མང་ཚོགས་ཀྱི་རྩེད་རིགས་སྣ་ཚོགས་ཀྱིས་གྲུབ་པའི་དུས་སྟོན་ཆེན་མོ་ཞིག་ཏུ་འགྱུར་ཐབས་དང་། རྒྱལ་ས་ན་བཞུར་བཞིན་པའི་ཆུ་བོ་སཱན་ནི་ཨོ་རྩེད་ཀྱི་གར་སྟེགས་ཞིག་ལ་བསྒྱུར་རྒྱུ་བཅས་ཡིན་པ་རེད།
ཕྱི་ལོ་ ༢༠༢༤ ལོར་ཨོ་རྩེད་དབུ་འབྱེད་མཛད་སྒོ་ནི་སྔར་དང་མི་འདྲ་བའི་ཁྱད་དུ་འཕགས་པའི་ལོ་རྒྱུས་ཀྱི་དོན་སྙིང་ལྡན་པའི་རྩེད་མོའི་བྱེད་སྒོ་ཞིག་ལ་རྩལ་འདོན་བྱེད་ཀྱི་ཡོད་པ་རེད། མཛད་སྒོ་སྟ་གོན་བྱ་ཕྱོགས་ཀྱི་ཐད་ནས་ཨོ་རྩེད་དབུ་འབྱེད་མཛད་སྒོ་འདི་ལོ་རྒྱུས་ཁྲོད་ཕྱི་ལོ་ ༢༠༢༤ ཟླ་ ༧ ཚེས་ ༢༦ ཉིན་མོ་ནི་སྙིང་སྟོབས་མཚོན་ཐུབ་པ། ལྷད་མེད་དོན་ངོ་མའི་བྲོ་བ་སྟེར་པ། གཟེངས་སུ་ཐོན་པའི་ཁྱད་ཆོས་གསལ་འདོན་བཅས་བྱ་རྒྱུ་ཡིན་པ་རེད།
དབུ་འབྱེད་མཛད་སྒོ་འཚོགས་ས་དེ་རྩེད་མོའི་ར་བར་མིན་པ་སྟེ། དབྱར་ཁའི་ཨོ་རྩེད་མཛད་སྒོ་ནམ་རྒྱུན་དང་མ་འདྲ་བའི་རྩེད་ར་ཕྱི་ལོགས་སུ་ཆུ་བོའི་སྟེང་གོ་སྒྲིག་བྱ་རྒྱུ་དང་། རྩེད་མོའི་རིགས་གྲོང་ཁྱེར་ནང་གྲ་སྒྲིག་བྱས་ཡོད་སྟབས་མིག་སྔར་གྱི་རྩེད་མོའི་སྒྲིག་ལམ་དང་ལམ་སྲོལ་ཁག་ལ་བསྒྱུར་བ་ཅུང་ཟད་བཏང་། ཉིན་གཅིག་གི་རིང་ལ་པ་རི་སིའི་གྲོང་ཁྱེར་ཨོ་རྩེད་མཛད་སྒོའི་གར་སྟེགས་ཀྱི་མཛེས་བཤམས་ཀྱི་རྒྱབ་ལྗོངས་སུ་ཆགས། གྲོང་ཁྱེར་གྱི་དྲན་རྟེན་ཁང་དང་། ཟམ་པ་དག རིག་གཞུང་བསྟི་གནས་ཁང་། སཱན་གཙང་བོའི་ཆུ་འགྲམ་སོགས་གསོན་ཉམས་དོད་པའི་མཛད་སྒོའི་རྒྱན་ཆར་མངོན།
མཛད་སྒོའི་སྐབས་རྒྱལ་ཁབ་སོ་སོ་ནས་ཕེབས་པའི་རྩེད་འགྲན་པའི་སྐུ་ཚབ་རུ་ཁག་རྣམས་གྲུ་གཟིངས་ནང་བསྡད་དེ་གཙང་བོ་བརྒྱུད་སྤྱི་ལེ་དྲུག་ཙམ་ལ་བསྐོར་བསྐྱོད་བྱ་རྒྱུ་དང་། དམིགས་བསལ་བརྙན་ཆས་བེད་སྤྱོད་བྱས་ཏེ་རྒྱ་ཆེའི་ལྟད་མོ་བ་ཚོར་མཛད་སྒོའི་དཀྱིལ་འཁོར་ནང་དུ་རྩེད་འགྲན་པ་ཚོ་ལྷན་དུ་འོད་སྣང་སྟེར་ཐུབ་པར་བྱ་རྒྱུ་དང་། པ་རི་སིའི་གྲོང་ཁྱེར་ཤར་ནས་Gare d’Austerlitz ནུབ་ Trocadéro དབར་དུ་སྤྱི་ལེ་དྲུག་ཙམ་རྒྱང་ཐག་ལ་རྩེད་འགྲན་པ་མི་གྲངས་ ༡༠༥༠༠ གྲུ་གཟིངས་འདྲ་མིན་དུ་ཞུགས་ཏེ་སཱན་གཙང་བོ་ཐོག་སྐོར་བསྐྱོད་བྱ་རྒྱུ་ཡིན་པ་རེད།
རྒྱ་ཆེའི་མང་ཚོགས་ལྟད་མོ་བ་ཚོ་གང་མང་དབུ་འབྱེད་མཛད་སྒོར་མཉམ་ཞུགས་ཡོང་ཐབས་དང་། སཱན་གཙང་བོའི་འགྲམ་རྒྱུད་སྔོན་ཚུད་ནས་སྤ་སེ་ཉོས་ནས་ཡོང་མཁན་ལྟད་མོ་བ་མི་གྲངས་ ༣༠༠,༠༠༠ ཙམ་ཡོང་རྩིས། ནམ་རྒྱུན་རྩེད་ར་ནང་ལས་མི་གྲངས་ལྡབ་ལོག་ལྔ་ལས་མངས་པ་ཆགས་རྒྱུ་ཡིན་འདུག བརྙན་ཤེལ་ཆེན་མོ་ ༨༠ ཐམ་པ་དང་རྒྱང་སྒྲ་མ་ལག་འཐུས་ཚང་བ་གོ་བསྒྲིག་བགྱིས་ཏེ་རྒྱལ་ས་ཁྱོན་ལ་རོལ་དབྱངས་ཀྱི་སྒྱུ་འཕྲུལ་གྲོང་ཁྱེར་གང་སར་ཁྱབ་ཐུབ་པར་བྱ་རྩིས།
ད་ཐེངས་ཀྱི་ཨོ་རྩེད་དབུ་འབྱེད་མཛད་སྒོ་འདི་ནི་འཛམ་གླིང་སྟེང་ཆེས་ཆེས་ཤོས་སུ་ཆགས་རྒྱུ་ཚོད་དཔག་དང་། ས་གནས་སུ་སྡོད་མཁན་པ་རི་སི་པ་ཚོ་དང་། རྒྱལ་སའི་མཐའ་བ་ཚོ་དང་། འཛམ་གླིང་ཕྱོགས་གང་སར་ནས་བསླེབས་པས་ལྟད་མོ་བ་ཚང་མ་མཛད་སྒོར་ཡོང་བར་དགའ་བསུ་ཞུ་ཟེར་། རྩེ་རིགས་སྣ་མང་གི་རྩེད་འགྲན་པ་ཚོ་ལས་གྲུབ་པ་དང་རྩེད་འགྲན་པ་ཚོའི་ཕྱིར་གྲ་སྒྲིག་བགྱིས་པས་དབུ་འབྱེད་མཛད་སྒོ་གཟབ་རྒྱས་ངང་གནང་འཆར། རྩེད་འགྲན་རུ་ཁག་སོ་སོས་ཁྲོམ་སྐོར་དང་མཉམ་དུ་སྒྱུ་རྩལ་བ་ཚོ་ངོས་ནས་གླུ་གར་གཞས་དང་གློག་སྒྲོན་འདྲ་མིན་གྱི་སྒོ་ནས་ལྟད་མོར་མངོན་མཚར་བ་ཞིག་འབུལ་འཆར།
བདེ་འཇགས་ཐད་ཉེན་རྟོག་༤༥༠༠༠ གཏང་རྒྱུ་དང་ཁ་སྣོན་ཚུལ་དུ་དམག་མི་༡༥༠༠༠ འདྲེན་རྒྱུ་ཡིན་པ་མ་ཟད་སྒེར་གཉེར་བདེ་འཇགས་མི་སྣ་ ༢༢༠༠༠ བཅས་འགྲེམས་འཇོག་བྱ་རྒྱུ་ཡིན་འདུག ཨོ་རྩེད་སྐབས་སུ་ཧྥ་རན་སིའི་གསང་བ་ལས་ཁུངས་ཀྱིས་དམིགས་བཀར་གྱི་བལྟ་རྟོག་བྱ་དགོས་སའི་མི་ས་ཡ་གཅིག་ཙམ་ཡོད་པའི་གནས་ཚུལ་བཅས་འཐོན་འདུག
མཛད་སྒོ་ཆུ་ཚོད་ག་དུས་ནས་མགོ་འཛུགས་རྒྱུ་ཡིན་ནམ་ཞེ་ན། ས་གནས་ ༡༩:༣༠ ནས་ཡིན། ཨ་རིའི་མངའ་སྡེ་ Los Angeles ཆུ་ཚོད་ ༡༠:༣༠ ཙམ་ནས་རེད་འདུག སྦིར་ཛུལ་གྱི་གྲོང་ཁྱེར་ Rio de Janeiro ཆུ་ཚོད་ ༡༤:༣༠ ཙམ་ལ་ཡིན་འདུག ཨིན་ཡུལ་གྱི་ London ཆུ་ཚོད་ ༡༨:༣༠ དང་། སྒུ་རེ་སེའི་ཨ་ཐན་གྱི་ཆུ་ཚོད ༢༠:༣༠ ཙམ་ལ་ཡིན་འདུག
གསར་འགྱུར་འདི་ཕྱོགས་བསྒྲིགས་དང་བོད་ཡིག་ནང་ཕབ་བསྒྱུར་བྱེད་མཁན། ཡུ་རོབ་སྤྱི་འཐུས་ཚ་ཁོ་ཐུབ་བསྟན་རྒྱ་མཚོ།
