ཐའེ་ཝན་དང་ཧྥི་ལི་ཕིན་ནང་རྒྱ་མཚོའི་རླུང་འཚུབ་དྲག་པོ་འཕྱུར་རྐྱེན་རྒྱ་ནག་གི་ཞིང་ཆེན་ཁག་ཅིག་ནང་གཏོར་སྐྱོན་ཆེན་པོ་ཐེབས་ཏེ་དཀའ་ངལ་འཕྲད་མུས་ཡིན་འདུག
ཁ་སང་ཕྱི་ཚེས་ ༢༥ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཐའེ་ཝན་དང་ཧྥི་ལི་ཕིན་ནང་རྒྱ་མཚོའི་རླུང་འཚུབ་ཤུགས་དྲག་འཕྱུར་རྐྱེན། ད་ལྟ་རྒྱ་ནག་ནང་མི་རྒྱུ་གཉིས་ལ་རང་བྱུང་གོད་ཆག་གི་དཀའ་ངལ་འཕྲད་མུས་ཡིན་པ་ལྟར། རྒྱ་ནག་གི་ཧྥུའུ་ཅིན་ཞིང་ཆེན་དུ་བསྟུད་མར་དྲག་ཆར་ཤུགས་ཆེན་བབས་རྐྱེན་ཆུ་ལོག་དང་རི་ཉིལ་བྱུང་སྟེ། ཡུལ་མི་ ༢༤༠,༨ ༠༠ ཙམ་ཉེན་གཡོལ་གྱིས་ས་གནས་གཞན་དུ་སྤོ་དགོས་བྱུང་ཡོད་འདུག་ལ། གྲོང་ཁྱེར་གྱི་གཞུང་ལམ་དང་ཁང་པ་སོགས་ཆུས་བསྐོར་ཡོད་སྟབས། གནས་སྐབས་རིང་སློབ་གྲྭ་དང་མཁའ་འགྲུལ་སོགས་སྒོ་བརྒྱབ་ཡོད་འདུག་ལ། རྒྱ་ནག་གི་ཀོང་ཀྲུའུ་དང་། ཀྲེ་ཅིང་། པེ་ཅིང་སོགས་ཉེ་འགྲམ་གྱི་ཞིང་ཆེན་ཁག་ཏུའང་དེ་མཚུངས་དཀའ་ངལ་འཕྲད་བཞིན་ཡོད་འདུག
ཐའེ་ཝན་ནང་རྒྱ་མཚོའི་རླུང་འཚུབ་ཀྱིས་དྲག་ཆར་དང་ཆུ་ལོག་བརྒྱབ་སྟེ། ཉུང་མཐར་མི་གྲངས་ ༣ རྐྱེན་འདས་དང་། མི་གྲངས་ ༣༨༠ རྨས་སྐྱོན་ཕོག མཚོ་གྲུ་གཅིག་གི་ལས་བཟོ་བ་མི་གྲངས་ ༩ གར་སོང་ཆ་མེད་དུ་གྱུར་འདུག ཡུལ་མི་ ༢༡༠༠ ཙམ་ཉེན་གཡོལ་གྱིས་ས་གནས་གཞན་དུ་སྤོ་དགོས་བྱུང་ཡོད་ཅིང་། གཞུང་ལམ་དང་ཁང་པ་སོགས་ཆུས་བསྐོར་ཡོད་སྟབས། གནས་སྐབས་རིང་གཞུང་འབྲེལ་གྱི་ལས་ཁུངས་ཁག་དང་སློབ་གྲྭ ཁྲོམ་རྭ། རྒྱལ་སྤྱི་དང་རྒྱལ་ནང་གི་མཁའ་འགྲུལ་སོགས་སྒོ་བརྒྱབ་ཡོད་འདུག དེ་བཞིན་ཧྥི་ལི་ཕིན་ནང་ཉུང་མཐར་མི་གྲངས་ ༡༢ རྐྱེན་འདས་དང་། ཡུལ་མི་ ༦༠༠,༠༠༠ ཙམ་ཉེན་གཡོལ་གྱིས་ས་གནས་གཞན་དུ་སྤོ་དགོས་བྱུང་ཡོད་ཅིང་། མཚན་གཅིག་གི་རིང་དྲག་ཆར་བབས་རྐྱེན་ས་ཁུལ་མང་པོ་ཆུ་ལོག་གིས་གཏོར་སྐྱོན་ཐེབས་འདུག ཧྥི་ལི་ཕིན་གྱི་རྒྱལ་སའི་ཉེ་འཁོར་གྱི་ས་གནས་ཁག་ཏུ་གཞུང་གི་ལས་ཁུངས་དང་སློབ་གྲྭ་སོགས་མཚམས་འཇོག་བྱས་ཡོད་འདུག
ཐའེ་ཝན་བདེ་སྲུང་བློན་ཆེན་གྱིས་དམག་མི་གྲངས་ ༢༩༠༠ ལྷག་གིས་གནོད་ཐེབས་ས་ཁུལ་ཁག་ཏུ་མྱུར་སྐྱོབ་བྱེད་བཞིན་ཡོད་པ་དང་། ད་ལྟའི་ཆར་ཐའེ་ཝན་གྱི་ནང་ཁུལ་གྱི་གནམ་གྲུ་དང་མེ་འཁོར་གྱི་འགྲུལ་བསྐྱོད་སྒོ་བརྒྱབ་ཡོད་པ་མ་ཟད། རྒྱལ་སྤྱིའི་མཁའ་འགྲུལ་ ༢༠༠ ལྷག་བརྒྱབ་ཡོད་སྐོར་བརྗོད་འདུག ཐའེ་ཝན་མྱུར་སྐྱོབ་རུ་ཁག་གི་རུ་དཔོན་གྱིས་གནམ་གཤིས་ཡག་པོ་ཡོད་ཚེ། མྱུར་སྐྱོབ་རུ་ཁག་གི་མཚོ་གྲུ་དང་ཐད་འཕུར་གནམ་གྲུ་ཉེན་ཁའི་ཡུལ་དངོས་སུ་འབྱོར་ཐུབ་པ་ཞིག་ཡིན་ཡང་། ད་ལྟའི་ཆར་མིག་གིས་རྒྱང་རིང་མཐོང་མི་ཐུབ་པ་མ་ཟད། རླུང་ཤུགས་ཧ་ཅང་ཆེན་པོ་རེད། ཅེས་བརྗོད་འདུག
ཨལ་ཇཱ་ཛེ་རཱ་གསར་ཁང་གི་གནས་ཚུལ་སྤེལ་བ་ལྟར་ན། འདས་བའི་ཆུ་ཚོད་ ༡༢ རིང་ཧྥི་ལི་ཕིན་ནང་དྲག་ཆར་མཚམས་མ་ཆད་པར་བབས་ཏེ་ཆུ་ཤུགས་ཆེ་རུ་འགྱུར་བཞིན་ཡོད་པར་བསྟུན། ཧྥི་ལི་ཕིན་རུ་ཡོད་པའི་མཱ་རི་ཀི་ནཱ་གཙང་པོ་རྒྱས་ཏེ་ཆེན་པོ་ཆགས་ནས་བཞུར་ཚེ། ཉུང་མཐར་མི་གྲངས་འབུམ་ ༥ ལྷག་གི་ཚེ་སྲོག་ལ་ཉེན་ཁ་ཡོད་ཚུལ་ས་གནས་དྲིལ་བསྒྲགས་ལས་ཁུངས་ནས་བཤད་འདུག
ཕྱི་ལོ་ ༢༠༢༡ ལོར་རྒྱ་ནག་ཁྲུང་ཆིན་ (Chongqing) གྲོང་ཁྱེར་དང་སི་ཁྲོན་ (Sichuan) ཞིང་ཆེན་སོགས་ལ་དྲག་ཆར་བབས་པའི་རྐྱེན་གྱིས་ཆུ་ལོག་ཐེངས་ ༡༢ ཙམ་བྱུང་སྟེ། ཁྱོན་མི་གྲངས་ ༤༤༩ རྐྱེན་འདས་སུ་ཕྱིན་ཡོད་འདུག་ལ། རྒྱ་ནག་གི་ལོ་རྒྱུས་ཐོག་ཆུ་ལོག་གནོད་ཚབས་ཆེ་ཤོས་ཤིག་ནི། ཕྱི་ལོ་ ༡༩༣༡ ལོར་རྒྱ་ནག་གི་ཝུའུ་ཧན་ (Wuhan) དང་ནན་ཅིན་ (Nanjing) གྲོང་ཁྱེར་དུ་ཆུ་ལོག་ཚབས་ཆེན་བྱུང་བའི་རྐྱེན་གྱིས་མི་གྲངས་ས་ཡ་ ༢ ལྷག་བཀྲེས་སྐོམ་དང་ནད་གཞིའི་རྐྱེན་གྱིས་འདས་གྲོངས་སུ་ཕྱིན་ཡོད་འདུག
སའི་གོ་ལའི་ཚ་དྲོད་རྒྱས་ཏེ་གངས་རི་དང་འཁྱག་དར་རྣམས་མྱུར་པོར་ཞུ་ཡི་ཡོད་པའི་རྐྱེན་གྱིས་འཛམ་གླིང་ཡུལ་ཕྱོགས་གང་སར་ཆུ་ལོག་རྒྱུག་པའི་གནད་དོན་མང་དུ་བྱུང་སྟེ་མི་རྒྱུ་གཉིས་ལ་གནོད་སྐྱོན་ཚབས་ཆེན་ཡོང་བཞིན་ཡོད་པ་རེད། འཛམ་གླིང་གི་ཆུ་ལོག་གནོད་སྐྱོན་ཆེ་ཤོས་བྱུང་ཡུལ་གཅིག་ནི་བྷང་ལ་དྷེ་ཤི་ཡིན་འདུག་ལ། ཡུལ་དེ་ཆུ་བོ་གང་གཱའི་འགྲམ་རྒྱུད་དུ་ཆགས་ཤིང་ས་ཁམས་དམའ་ལ། གཞོང་ས་རྒྱ་ཆེ་བའི་རྐྱེན་གྱིས་ཆུ་ལོག་གི་གནོད་སྐྱོན་ཡང་ཡང་འབྱུང་བཞིན་ཡོད་འདུག་ལ། ཕྱི་ལོ་ ༡༩༧༢ ནས་ ༢༠༡༣ བར་དུ་ཡུལ་དེའི་མི་གྲངས་ ༡༥,༠༣༣ ལྷག་ཆུ་ལོག་ཁྲོད་རྐྱེན་འདས་སུ་ཕྱིན་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
