བོད་མིའི་སྒྲིག་འཛུགས་ཀྱིས་བོད་ནང་དུ་ལག་ལེན་བསྟར་མུས་ཡིན་པའི་རིག་གཞུང་བཙན་བསྒྱུར་གྱི་སྲིད་ཇུས་ལ་མཐའ་གཅིག་ཏུ་ངོ་རྒོལ་དང་དགག་བྱ་ཡོད་སྐོར་སོགས་གསུངས་སོང་།
རྭ་རྒྱ་ཤེས་རིག་ནོར་གླིང་སྒོ་བརྒྱབ་པའི་རྒྱུ་རྐྱེན་དང་ཤུགས་རྐྱེན་ཞེས་པའི་དཔྱད་གླེང་སྐབས། ༢༠༢༤།༧།༢༩ བོད་ཀྱི་དུས་བབ་ཀྱི་པར།
དེ་རིང་བོད་ཀྱི་སྲིད་ཇུས་ཉམས་ཞིབ་ཁང་གི་གོ་སྒྲིག་འོག རྒྱ་ནག་གཞུང་གིས་རྭ་རྒྱ་ཤེས་རིག་ནོར་གླིང་སྒོ་བརྒྱབ་པའི་རྒྱུ་རྐྱེན་དང་ཤུགས་རྐྱེན་ཞེས་པའི་དཔྱད་གླེང་གི་ལས་རིམ་ཞིག་སྐོང་འཚོག་གནང་ཡོད་ཅིང་། གླེང་མོལ་ལས་རིམ་དེའི་ཁྲོད་བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་དང་། དབུས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས། བོད་ཀྱི་དུས་བབ་གསར་ཁང་གི་སྤྱི་ཁྱབ་རྩོམ་སྒྲིག་པ་པདྨ་མཚོ་ལགས། བོད་གནས་ལྟ་ཞིབ་ཁང་གི་ཉམས་ཞིབ་པ་ཞི་བདེ་ཟླ་བ་ལགས། བོད་མི་མང་སྤྱི་འཐུས་རྒྱུན་ལས་ཁག་ཅིག་དང་། གཞུང་ཁོངས་མིན་པའི་ཚོགས་པ་ཁག་གི་འཐུས་མི་སོགས་ཕེབས་འདུག
སྐབས་དེར་དབུས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། རྒྱ་ནག་གཞུང་གིས་བོད་ཀྱི་སྲོལ་རྒྱུན་གྱི་རིག་གནས་མང་པོ་ཞིག་དར་སྤེལ་གཏོང་གིན་ཡོད་པའི་དྲིལ་བསྒྲགས་ཤུགས་ཆེན་བྱེད་ཀྱི་ཡོད་ལ། ལྷག་པར་འཛུགས་སྐྲུན་གྱི་ལས་གཞི་མང་དག་སྤེལ་མུས་ཡིན་པའི་དྲིལ་བསྒྲགས་ཤུགས་ཆེན་བྱས་ཡོད་ཀྱང་། ད་ལན་རྒྱ་ནག་གཞུང་གིས་བཙན་ཐབས་ཀྱིས་རྭ་རྒྱ་ཤེས་རིག་ནོར་གླིང་སྒོ་བརྒྱབ་པ་དེས། རྒྱ་ནག་གཞུང་གིས་དྲིལ་བསྒྲགས་བྱས་པ་བཞིན་ལག་ལེན་བསྟར་གྱི་མེད་པའི་དཔེ་མཚོན་གསལ་པོ་ཞིག་མཚོན་ཡོད་པའི་སྐོར་དང་། སྤྱིར་རྒྱ་ནག་གཞུང་གིས་བོད་ནང་གི་སློབ་གྲྭ་དང་གྲྭ་ཚང་ཚུད་པའི་སྲོལ་རྒྱུན་རིག་གནས་ཀྱི་བསྟི་གནས་མང་པོ་ཞིག་སྒོ་བརྒྱབ་བཅུག་པའི་གནད་དོན་མང་པོ་ཞིག་བྱུང་དང་འབྱུང་མུས་ཡིན་པའི་ཁར། ཉེ་བའི་ལོ་ཤས་གོང་ནས་རྒྱ་ནག་གཞུང་གིས་བོད་ནང་གི་སྒེར་བཙུགས་སློབ་གྲྭ་བཙན་གྱིས་སྒོ་བརྒྱབ་ཏུ་བཅུག་པ་དང་། བོད་ཕྲུག་རྣམས་ཕ་མ་དང་རྒྱང་དུ་བཀྱེད་བཅུག་ནས་རྒྱ་ནག་གཞུང་གི་གཏན་སྡོད་སློབ་གྲྭར་བཅུག་སྟེ། བོད་ཡུལ་རྒྱ་ཡུལ་དང་བོད་ཕྲུག་རྒྱ་ལ་བསྒྱུར་ཐབས་ཀྱི་སྲིད་ཇུས་སྣ་མང་འཐེན་མུས་ཡིན་པས། དབུས་བོད་མིའི་སྒྲིག་འཛུགས་ཀྱིས་རྒྱ་ནག་གཞུང་གི་རིག་གཞུང་བཙན་བསྒྱུར་གྱི་སྲིད་ཇུས་ལ་མཐའ་གཅིག་ཏུ་ངོ་རྒོལ་དང་དགག་བྱ་ཡོད་སྐོར་སོགས་གསུངས་སོང་།
ཤེས་རིག་ལས་ཁུངས་ཀྱི་དྲུང་འཕར་བསྟན་འཛིན་པདྨ་ལགས་ཀྱིས། རྒན་རྭ་རྒྱ་འཇིགས་མེད་རྒྱལ་མཚན་ལགས་ཀྱིས་གསར་འཛུགས་མཛད་པའི་གངས་ལྗོངས་ཤེས་རིག་སློབ་གླིང་ནི་གནའ་དེང་ཟུང་འབྲེལ་གྱི་ཤེས་རིག་གི་སྐྱེད་ཚལ་ཡངས་པོ་ཞིག་ཡིན་པའི་ཁར། བཙན་བྱོལ་བོད་མིའི་ཡར་ཐོན་གྱི་ཤེས་ཡོན་སྲིད་ཇུས་བཞིན། གངས་ལྗོངས་ཤེས་རིག་ནོར་གླིང་གི་ཤེས་ཡོན་སྲིད་ཇུས་དེའང་ཚད་ལྡན་དང་བོད་ཀྱི་རོང་འབྲོང་མང་ཚོགས་ཀྱི་སློབ་མ་རྣམས་ལ་ཆེས་འཚམ་པའི་ཤེས་ཡོན་སྲིད་ཇུས་ཚད་ལྡན་ཞིག་ཡིན་པ་མ་ཟད། ད་བར་རྭ་རྒྱ་ཤེས་རིག་ནོར་གླིང་གིས་བོད་ནང་གི་རོང་འབྲོག་མང་ཚོགས་ཀྱི་ཤེས་རིག་འཕེལ་རྒྱས་ཀྱི་ཐད་ལ་གོམ་ཁ་ཆེན་པོ་སྤོས་ཡོད་སྐོར་སོགས་བརྗོད་སོང་།
གཞན་ཡང་། གཏམ་བཤད་ལས་རིམ་དེའི་ཐོག་བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས། རྒྱ་ནག་གཞུང་གིས་བོད་ནང་གི་ས་གནས་འདྲ་མིན་དུ་གནའ་ནས་བཅའ་སྡོད་སློབ་གྲྭ་སོགས་ནས། དུས་ཡུན་རིང་པོར་རྒྱ་ནག་གཞུང་གིས་ཐབས་ཇུས་མཁས་པོས་བོད་ཡིག་དང་བོད་ཀྱི་རིག་གཞུང་རྨེག་མེད་གཏོང་ཐབས་ཀྱི་སྲིད་ཇུས་གདིང་མུས་ཡིན་པའི་སྐོར་དང་། བོད་ཀྱི་དུས་བབ་གསར་ཁང་གི་རྩོམ་སྒྲིག་པ་པདྨ་མཚོ་ལགས་ཀྱིས་རྭ་རྒྱ་ཤེས་རིག་ནོར་གླིང་བཙན་གྱིས་སྒོ་བརྒྱབ་བཅུག་དགོས་པའི་རྒྱུ་རྐྱེན་དང་སློབ་གྲྭ་དེའི་བོད་ཀྱི་སྐད་ཡིག་ལ་བཅངས་པའི་རིན་ཐང་སོགས་ཀྱི་སྐོར། བོད་གནས་ལྟ་ཞིབ་ཁང་གི་ཉམས་ཞིབ་པ་ཞི་བདེ་ཟླ་བ་ལགས་ཀྱིས། ཁོང་ཉིད་རྭ་རྒྱ་ཤེས་རིག་ནོར་གླིང་དུ་ཡོད་པའི་སྐབས་ཀྱི་མཐོང་ཐོས་མྱོང་གསུམ་སོགས་འབྲེལ་བའི་སྐོར་ལ་གཏམ་བཤད། དེ་བཞིན་བོད་མི་མང་སྤྱི་འཐུས་ཁག་ཅིག་གཙོས། བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས་ཀྱི་འཐུས་མི་དང་། ཉམས་ཞིབ་པ་སོགས་ཀྱིས་བསམ་ཚུལ་བཤད་རེས་སོགས་གནང་སོང་།
རྭ་རྒྱ་གངས་ལྗོངས་ཤེས་རིག་ནོར་བུའི་སློབ་གླིང་ནི་ཕྱི་ལོ་ ༡༩༩༤ ཟླ་ ༨ པར་མགོ་ལོག་ཁུལ་མི་དམངས་སྲིད་གཞུང་ཟེར་བས་ཆོག་མཆན་སྤྲད་དེ་དངོས་སུ་བཙུགས་ཤིང་། མཚོ་སྔོན་ཞིང་ཆེན་ཡོངས་ཀྱི་ཆེས་ཐོག་མའི་སྒེར་བཙུགས་སློབ་གྲྭ་དེ་ཡིན་འདུག ཕྱི་ལོ་ ༢༠༠༡ ལོའི་ཟླ་ ༤ ཚེས་ ༡༤ ཉིན་ཁུལ་མི་དམངས་སྲིད་གཞུང་གིས་ཆོག་མཆན་སྤྲད་དེ་ཆེད་ལས་མཐོ་འབྲིང་དུ་བསྒྱུར། ཕྱི་ལོ་ ༢༠༠༢ ལོར་འཇིགས་མེད་རྒྱལ་མཚན་སྒེར་བཙུགས་སློབ་གྲྭ་ཞེས་པའི་མིང་ཡང་འཇིགས་མེད་རྒྱལ་མཚན་ཕན་བདེ་སློབ་གྲྭ་ཞེས་པར་བཅོས། ཕྱི་ལོ་ ༢༠༠༣ ལོར་མཚོ་སྔོན་ཞིང་ཆེན་དམངས་སྲིད་ཐིང་ཟེར་བས་དམངས་ཁྲོད་དོ་དམ་རྩ་འཛུགས་ཀྱི་དམངས་ཕན་ལས་ཁུངས་སུ་བདམས། ཕྱི་ལོ་ ༢༠༠༦ ལོའི་ཟླ་ ༣ ཚེས་ ༧ ཉིན་ཀྲུང་ཧྭ་ཆེད་ལས་སློབ་གསོ་སྡེ་ཁག་གིས་ཀྲུང་ཧྭ་ཆེད་ལས་སློབ་གསོའི་མཚོ་སྔོན་ཚོད་ལྟའི་སློབ་གྲྭ་རུ་བསྒྱུར། སློབ་གླིང་དེ་ནི་བོད་ཡུལ་ན་ཆེས་མིང་དུ་གྲགས་པའི་བོད་ཡིག་ཆེད་སྦྱོང་གི་སློབ་གྲྭ་ཡག་ཤོས་ཤིག་ཏུ་ངོས་འཛིན་བྱེད་ཀྱི་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
