འབྲས་ལྗོངས་ཀྱི་གྲོས་ཚོགས་འཐུས་མི་ཞིག་གིས་རྒྱ་གར་དབུས་གཞུང་ནས་༧དཔལ་རྒྱལ་བ་ཀརྨ་པ་མཆོག་འབྲས་ལྗོངས་སུ་གདན་ཞུ་གནང་རྒྱུ་དང་རྒྱ་ནག་གི་མཐའ་མཚམས་ཟེར་རྒྱུའི་ཚབ་ཏུ་བོད་ཀྱི་མཐའ་མཚམས་ཞེས་འབོད་དགོས་པའི་རེ་འདུན་བཏོན་འདུག
ཉེ་ལམ་རྒྱ་གར་གྱི་གྲོས་ཚོགས་གོང་མའི་ལྷན་ཚོགས་འཚོག་མུས་ཡིན་པ་ལྟར། ཁ་སང་ཕྱི་ཚེས་ ༣༠ ཉིན་རྒྱ་གར་བྱང་ཤར་གྱི་འབྲས་ལྗོངས་མངའ་སྡེ་ནས་ཡིན་པའི་གྲོས་ཚོགས་འཐུས་མི་སྐུ་ཞབས་རྡོ་རྗེ་ཚེ་རིང་ལེབ་ཆ་ལགས་ཀྱིས། རྒྱ་གར་གཞུང་གིས་རྒྱ་ནག་གི་མཐའ་མཚམས་ཞེས་པའི་ཐ་སྙད་དེའི་ཚབ་ཏུ་བོད་ཀྱི་མཐའ་མཚམས་ཞེས་འབོད་དགོས་པའི་དགོས་འདུན་བཏོན་ཡོད་འདུག
སྐབས་དེར་སྐུ་ཞབས་རྡོ་རྗེ་ཚེ་རིང་ལགས་ཀྱིས། རྒྱ་གར་དབུས་གཞུང་གིས་རྒྱ་ནག་གི་མཐའ་མཚམས་ཞེས་པའི་ཚབ་ཏུ་བོད་ཀྱི་མཐའ་མཚམས་ཞེས་འདོགས་དགོས་པའི་ཁར། རྒྱ་གར་བྱང་རྒྱུད་ཀྱི་ལ་དྭགས་དང་། ཨ་རུ་ན་ཅལ་མངའ་སྡེ་ནས་འབྲས་ལྗོངས་བར་སྤྱི་ལེ་ ༡༤༠༠ ལྷག་ཡོད་པའི་ས་ཁུལ་དེ་དག་ནི་བོད་ཀྱི་མཐའ་མཚམས་སུ་ཁེལ་ཡོད་པས། རྒྱ་གར་དབུས་གཞུང་དང་དམག་མིའི་སྒྲིག་འཛུགས། མཐའ་མཚམས་དམག་མི་དང་། མཐའ་མཚམས་ལམ་བཟོ་ལྷན་ཚོགས་ཚུད་པའི་ཚོགས་སྡེ་ཁག་གིས་གཞུང་འབྲེལ་ཐོག་ནས་མཐའ་མཚམས་དེ་དག་ལ་བོད་ཀྱི་མཐའ་མཚམས་ཞེས་ངོས་འཛིན་གསལ་བོ་དགོས་རྒྱུ་ཧ་ཅང་གལ་ཆེན་རེད། ཅེས་བརྗོད་འདུག
ཁོང་གིས། རྒྱ་ནག་གཞུང་གིས་ཧིན་བོད་མཐའ་མཚམས་ཁུལ་དུ་གྲོང་ཚོ་གསར་རྒྱག་དང་སྔར་ལས་ལྷག་པའི་འཛུགས་སྐྲུན་གྱི་ལས་གཞི་མང་དག་ཅིག་སྤེལ་མུས་ཡིན་སྟབས། ད་སྔ་བར་རྒྱ་གར་གཞུང་གིས་ཧིན་བོད་མཐའ་མཚམས་ཁུལ་དུ་ནགས་ཚལ་དང་རི་སྐྱེས་སེམས་ཅན་སྲུང་སྐྱོབ་ས་ཁུལ་གྱི་འོག་ནས་མཐའ་མཚམས་དེ་དག་ལ་འགྲོ་འོང་བཀག་སྡོམ་བྱས་ཡོད་ཀྱང་། ད་ལྟ་རྒྱ་གར་གཞུང་གིས་མཐའ་མཚམས་ས་ཁུལ་དུ་དམག་དོན་ཚུད་པའི་འཛུགས་སྐྲུན་གྱི་ལས་གཞི་སྤེལ་དགོས་པའི་རེ་སྐུལ་ཞུས་ཡོད་པ་མ་ཟད། འབྲས་ལྗོངས་ནས་རྒྱ་གར་གྱི་ས་ཁུལ་གཞན་སོགས་རྒྱལ་ཡོངས་འགྲོ་ལམ་མཐུད་(National Highway 10) པའི་འཛུགས་སྐྲུན་གྱི་གང་མགྱོགས་འགྲུབ་ཐབས་བྱེད་དགོས་པའི་སྐུལ་མའང་བཏང་ཡོད་འདུག
དེ་བཞིན། སྐུ་ཞབས་རྡོ་རྗེ་ཚེ་རིང་ལགས་ཀྱིས་འབྲས་ལྗོངས་ཡར་རྒྱས་དང་འབྲེལ་གནད་དོན་ཁག་ཅིག་གླེང་སློང་བྱས་པའི་ནང་། ཕྱི་ལོ་ ༢༠༢༥ ལོའི་ཟླ་ ༥ ཚེས་ ༡༦ ཉིན་འབྲས་ལྗོངས་རྒྱ་གར་གྱི་མངའ་སྡེའི་ངོ་བོར་གྱུར་ནས་ལོ་ངོ་ལྔ་བཅུ་འཁོར་བར་དབུས་གཞུང་གིས་རོགས་སྐྱོར་ཡོང་བའི་རེ་སྐུལ་དང་། ལིམ་བྷོ་(Limboo) དང་། རྟ་མང་གི་ཚོགས་སྡེ་རྣམས་ལ་མངའ་སྡེའི་གྲོས་ཚོགས་ནང་དུ་འཐུས་མིའི་ས་མིག་དམིགས་བཀར་ཟུར་འཇོག་བྱེད་དགོས་པ། ཚོགས་སྡེ་བཅུ་གཉིས་ལ་གདོད་མིའི་གྲལ་རིམ་ངོས་འཛིན་བྱ་རྒྱུ། ༧དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་འབྲས་ལྗོངས་སུ་གདན་འདྲེན་ཞུ་ཐབས་སོགས་ཀྱི་རོགས་སྐྱོར་ཞུས་ཡོད། ད་ལྟའི་ཆར་རྒྱ་གར་ནས་གངས་རིན་པོ་ཆེར་གནས་མཇལ་དུ་འགྲོ་སའི་ལམ་ཡག་པོ་གསུམ་ཡོད་པ་ལས། འབྲས་ལྗོངས་བརྒྱུད་ནས་གངས་རིན་པོ་ཆེར་འགྲོ་སའི་ལམ་དེ་ནི་གནས་སྐོར་བགྲོད་ལམ་ཡག་ཤོས་ཡིན་པས། ལམ་དེའི་རྨང་གཞིའི་འཛུགས་སྐྲུན་དང་འགྲུལ་བཞུད་བདེ་ཐབས་སུ་དབུས་གཞུང་གིས་ཐེ་ཇུས་བྱེད་དགོས་པའི་རེ་སྐུལ་ཞུས་ཡོད།
ཟླ་འདིའི་ཕྱི་ཚེས་ ༡༠ ཉིན་རྒྱ་གར་གྱི་རྩོམ་པ་པོ་ཁུ་ལོ་ཌི་ཨར་པེ་ (Claude Arpi) ལགས་ཀྱིས་རྒྱ་གར་གཞུང་༧གོང་ས་མཆོག་དང་ལྷན་དུ་འབྲེལ་བ་བྱེད་པར་ངོ་གནོང་མི་དགོས་ཞེས་པའི་རྩོམ་ཡིག་ཅིག་སྤེལ་ཡོད་པའི་ཁྲོད། རྒྱ་གར་གྱི་བདེ་འཇགས་ལ་བོད་དོན་ཧ་ཅང་གལ་འགངས་ཆེ་བས། རྒྱ་གར་དང་བོད་བར་གྱི་ས་མཚམས་ཀྱི་ས་ཁམས་ཆབ་སྲིད་ཀྱི་ཐོག་ནས་གནད་འགག་ཅིག་ཏུ་གྱུར་ཡོད་སྟབས། རྒྱ་གར་གྱི་གཞུང་འཛིན་མགོ་ཁྲིད་དང་གྲོས་ཚོགས་འཐུས་མི་ཚོས་བོད་ཀྱི་སྐོར་ལ་གླེང་སློང་སྔར་ལྷག་བྱ་དགོས་པའི་དུས་ལ་བབ་ཡོད་པའི་སྐོར་སོགས་གསལ་ཡོད་པ་རེད།
ཕྱི་ཟླ་ ༧ ཚེས ༢༦ ཉིན་ལའོ་སི་རྒྱལ་ཁབ་ཏུ་རྒྱ་གར་ཕྱི་སྲིད་བློན་ཆེན་ཇེ་ཤར་ཀར་མཆོག་དང་། རྒྱ་ནག་གི་ཕྱི་སྲིད་བློན་ཆེན་ཝང་ཡེ་གཉིས་ཐུག་འཕྲད་བྱས་ཏེ། ཕྱོགས་གཉིས་ཀྱིས་ཧིན་བོད་མཐའ་མཚམས་ས་ཐིག (LAC) ཁུལ་དུ་བདེ་འཇགས་ཡོང་ཐབས་ཀྱི་གནད་དོན་གླེང་སློང་བྱས་པའི་ཁྲོད། ཕྱོགས་གཉིས་ཀྱིས་ཧིན་བོད་མཐའ་མཚམས་ཁུལ་གྱི་དམག་མིའི་གདོང་ཐུག་ཚུད་པའི་དཀའ་རྙོག་དེ་དག་གང་མགྱོགས་ཞི་ཐབས་དང་། མཐའ་མཚམས་ཀྱི་བདེ་འཇགས་དང་བརྟན་བརླིང་སོགས་ལ་དམིགས་ནས། གང་མགྱོགས་ཕྱོགས་གཉིས་ཀྱི་དམག་མི་ཕྱིར་འཐེན་བྱ་རྒྱུ་ཡིན་པའི་ཐག་ཆོད་བྱུང་ཡོད་སྟབས། རྒྱ་གར་གྱི་ཕྱི་སྲིད་བློན་ཆེན་མཆོག་གིས། རྒྱ་ནག་གཞུང་གི་མཐའ་མཚམས་དམག་དོན་མི་སྣ་སོགས་དང་འབྲེལ་འདྲིས་ཀྱིས་ཕྱོགས་གཉིས་ཀྱི་མཐའ་མཚམས་ཀྱི་དཀའ་རྙོག་སེལ་ཐབས་བྱེད་ཀྱི་ཡོད་པ་མ་ཟད། ཕྱོགས་གཉིས་ཀྱིས་ཧིན་བོད་མཐའ་མཚམས་ཁུལ་གྱི་ས་ཐིག་དང་སྔ་གཞུག་ཏུ་བཞག་པའི་དམག་དོན་གྱི་གྲོས་མཐུན་དག་ལ་བརྩི་འཇོག་བྱ་རྒྱུ་ཡིན་སྐོར་གསུངས་འདུག་ཀྱང་། རྒྱ་ནག་ཕྱི་སྲིད་ལས་ཁུངས་ཀྱིས་རྒྱ་དཀར་ནག་གི་ཕྱི་སྲིད་བློན་ཆེན་ཐུག་འཕྲད་ཀྱིས་ཕྱོགས་གཉིས་ཀྱིས་མཐའ་མཚམས་ཀྱི་དམག་དོན་དཀའ་ངལ་སེལ་རྒྱུར་གྲོས་མཐུན་བྱུང་བ་དང་འབྲེལ་བའི་གནས་ཚུལ་གང་ཡང་ཕྱིར་བསྒྲགས་བྱས་མེད་པ་རེད།
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
