༧གོང་ས་རྒྱལ་བ་རིན་པོ་ཆེ་མཆོག་གིས་ཨ་རིའི་གྲོང་ཁྱེར་གྱི་ནེའུ་ཡོག་ནས་རྒྱ་གར་གྱི་ཀེ་ར་ལའི་མངའ་སྡེ་མི་མང་ལ་རང་བྱུང་གོད་ཆག་གི་རྐྱེན་གྱིས་དཀའ་ངལ་འཕྲད་བཞིན་པར་ཐུགས་གསོ་མཛད་འདུག
༸གོང་ས་རྒྱལ་བ་རིནཔོ་ཆེ་མཆོག་གིས་ཨ་རིའི་གྲོང་ཁྱེར་ནེའུ་ཡོག་ནས། རྒྱ་གར་གྱི་མངའ་སྡེ་ཀེ་ར་ལའི་སྤྱི་ཁྱབ་བློན་ཆེན་པེ་ན་རཱ་ཡི་ཝི་ཇཱེན་ལགས་སུ་ཕྱག་བྲིས་ཤིག་སྩལ་ཏེ། ད་ལྟ་ཀེ་ར་ལའི་ནང་ཆར་དུས་རྐྱེན་གྱིས་ས་རུད་བྱུང་སྟེ་མི་མང་གི་ལུས་སྲོག་དང་རྒྱུ་འབྱོར་བ་སོགས་ལ་གནོད་འཚེའི་དཀའ་ངལ་འཕྲད་བཞིན་པར་ཐུགས་གསོ་མཛད་འདུག
༧མགོན་པོ་གང་ཉིད་མཆོག་གི་གསུང་འཕྲིན་ནང་། ངོས་ཀྱིས་ཁྱེད་རྣམ་པར་སེམས་གསོ་ཞུ་རྒྱུ་ཡིན། དེ་བཞིན་རྐྱེན་ངན་གོད་ཆག་འཕྲད་པའི་ནང་མི་གཉེན་ཉེ་དང་ཤུགས་རྐྱེན་ཐེབས་པའི་མི་ཚང་མར་སྨོན་ལམ་ཞུ་རྒྱུ་ཡིན། མངའ་སྡེའི་གཞུང་དང་འབྲེལ་ཡོད་ལས་ཁུངས་ཚང་མས་ཤུགས་རྐྱེན་ཐེབས་པའི་མི་མང་ལ་རོགས་སྐྱོར་དང་གུན་གསབ་ཀྱི་མཐུན་རྐྱེན་སྦྱོར་བཞིན་པ་ཤེས་རྟོགས་བྱུང་བས་ངོས་རང་དགའ་པོ་བྱུང་། ངས་ཀེ་ར་ལའི་མི་མང་ལ་རྒྱབ་སྐྱོར་གྱི་རྣམ་འགྱུར་སྟོན་ཆེད་ཏཱ་ལའི་བླ་མ་ཡིད་རྟོན་ཐེབས་རྩ་ཁང་བརྒྱུད་ངལ་སེལ་རོགས་སྐྱོར་དང་མྱུར་སྐྱོབ་ཀྱི་བྱ་བའི་ཐད་ཞལ་འདེབས་ཤིག་རྒྱག་གི་ཡིན། ཞེས་གསུངས།
སྲིད་སྐྱོང་སྤེན་པ་ཚེ་རིང་མཆོག་གིས་ཨེག་སི་དྲ་ལམ་བརྒྱུད་ཀེ་ར་ལ་མངའ་སྡེའི་མི་མང་ལ་ཐུགས་གསོ་གནང་བའི་ནང་། ཀེ་ར་ལའི་ནང་ས་རུད་རྐྱེན་གྱིས་མི་རྒྱུ་གཉིས་ལ་གནོད་འཚེ་ཕོག་པར་ང་ཚོས་གདུང་སེམས་མཉམ་སྐྱེད་ཞུ་བཞིན་ཡོད། ང་ཚོའི་སེམས་ཁྱེད་ཅག་དང་ལྷན་དུ་ཡོད། ང་ཚོས་ད་ལྟ་བོར་བརླག་བྱུང་བའི་མི་རྣམས་བདེ་འཇགས་ངང་མྱུར་སྐྱོབ་ཐུབ་པའི་རེ་བ་དང་སྨོན་ལམ་འདེབས་ཀྱིན་ཡོད་ལ། གོད་ཆག་འདིའི་ཁྲོད་གནོད་སྐྱོན་དང་ཤུགས་རྐྱེན་ཐེབས་པ་ཚང་མ་གང་མགྱོགས་རྒྱུན་ལྡན་ཅན་དུ་འགྱུར་བའི་སྨོན་འདུན་ཞུ། ཞེས་གསུངས་འདུག
ཕྱི་ཟླ་ ༧ ཚེས་ ༣༠ ཉིན་རྒྱ་གར་གྱི་མངའ་སྡེ་ཀེ་ར་ལའི་ནང་བདུན་ཕྲག་གཅིག་ཙམ་རིང་ཆར་ཤུགས་དྲག་པོ་མུ་མཐུད་བབས་རྐྱེན་འོག་ས་རུད་བྱུང་སྟེ། མི་གྲངས་ ༢༨༠ རྐྱེན་འདས་དང་མི་གྲངས་ ༢༠༠ ལྷག་གར་སོང་ཆ་མེད་དུ་གྱུར་ཡོད་ཅིང་། ད་སྔ་བར་མི་གྲངས་ ༡༥༩༢ ལྷག་མྱུར་སྐྱོབ་ཐུབ་ཡོད་པ་དང་། མི་གྲངས་ ༨༠༠༠ ངལ་སེལ་ས་ཁུལ་ ༨༢ ནང་གནས་སྤོར་བྱེད་ཐུབ་ཡོད་འདུག་ལ། ཕྱི་ཚེས་ ༣༡ ཉིན་ཀེ་ར་ལ་མངའ་སྡེ་ཁྱོན་ཡོངས་སུ་རྒྱལ་དར་ཕྱེད་ཀ་མར་འབབ་འཇོག་གིས་རྐྱེན་འདས་སུ་ཕྱིན་པ་དང་གནོད་འཚེ་ཕོག་པ་རྣམས་ལ་གདུང་སེམས་མཉམ་སྐྱེད་ཞུས་ཡོད་པ་དང་། རྒྱ་གར་སྲིད་བློན་མུ་དྷི་མཆོག་གིས་རྐྱེན་འདས་སུ་ཕྱིན་པའི་ཤུལ་ལུས་ནང་མིར་ཧིན་སྒོར་འབུམ་ ༢ རེ་དང་གནོད་འཚེ་ཕོག་པའི་མི་རེར་ཧིན་སྒོར་ཁྲི་ ༥ ཡི་གུན་གསབ་སྤྲོད་རྒྱུའི་གསལ་བསྒྲགས་གནང་འདུག་ཅིང་། རྒྱ་གར་དབུས་ནང་སྲིད་མངའ་སྡེ་བློན་ཆེན་ (Nityanand Rai in Rajya Sabha) ལགས་ཀྱིས་ཧིན་སྒོར་ཀ་རོ་ ༡༤༥ ཡིས་ཀེ་ར་ལ་མངའ་སྡེ་གཞུང་ལ་རོགས་སྐྱོར་གནང་རྒྱུ་ཡོངས་བསྒྲགས་བྱས་འདུག
གསར་འགོད་པ། སྐལ་བཟང་སྦྱིན་པ།
