རྒྱ་གར་བྱང་རྒྱུད་ཀྱི་ཧི་མ་ཅལ་མངའ་སྡེའི་ཀུ་ལུ་མ་ན་ལི་ཁུལ་དུ་དྲག་ཆར་བབས་པའི་རྐྱེན་གྱིས་ཆུ་ལོག་དང་རི་ཉིལ་བྱུང་སྟེ་མི་མང་སྟོང་ཕྲག་མང་པོའི་འཚོ་གནས་ལ་གནོད་སྐྱོན་ཐེབས་བཞིན་ཡོད་འདུག
རྒྱ་གར་བྱང་རྒྱུད་དུ་ཆགས་པའི་ཧི་མ་ཅལ་མངའ་སྡེའི་ནང་ཆར་པ་ཤུགས་ཆེན་བབས་རྐྱེན། ཁ་སང་ཕྱི་ཚེས་ ༡ ཉིན་ཧི་མ་ཅལ་གྱི་རྒྱལ་ས་སིམ་ལ་དང་། ཀུ་ལུ། མན་ཌི་རྫོང་སོགས་སུ་སྤྲིན་པ་འཐོར་ནས། ཆུ་ལོག་བརྒྱུགས་ཏེ་ད་བར་ཉུང་མཐར་མི་གྲངས་ ༥ རྐྱེན་འདས་དང་མི་གྲངས་ ༥༠ ལྷག་བོར་བརླག་ཏུ་གྱུར་བའི་གནས་ཚུལ་འཐོན་མུས་ཡིན་པའི་ཁར། ཁུལ་དེ་དག་གི་ཡུལ་མིའི་ཁང་པ་དང་སྨན་ཁང་། སློབ་གྲྭ་དང་གཞུང་ལམ་སོགས་ལ་གཏོར་སྐྱོན་ཐེབས་མུས་ཡིན་འདུག
དེའི་ཐད་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སུ་ཝིན་ཌར་སུ་ཀར་ (Sukhvinder Singh Sukhu) མཆོག་གིས། ཆུ་ལོག་གི་གནོད་འཚེ་ཐེབས་པའི་རྫོང་ཁོངས་དེ་དག་གི་གཞུང་འབྲེལ་མི་སྣ་དག་ལ་རང་བྱུང་ཁོར་ཡུག་གི་དོན་རྐྱེན་ཁྲོད་ཀྱི་གནོད་འཚེ་ཐེབས་ཡུལ་དག་གཙོས། ཕྱོགས་ཡོངས་ནས་གོ་སྒྲིག་དང་དེ་བཞིན་རྒྱ་གར་དམག་མི་སོགས་ནས་རོགས་པ་ཞུས་ཡོད་པ་མ་ཟད། ཡུལ་མི་རྣམས་ཆུ་གཞུང་དང་གཙང་འགྲམ་སོགས་སུ་འགྲོ་མི་ཉན་པའི་དྲན་སྐུལ་ཞུས་ཡོད་སྐོར་སོགས་གསུངས་འདུག་ལ། ད་ལྟ་ཆུ་ལོག་གི་དབང་གིས་རྫོང་དེ་དག་གི་ལམ་ཚུད་པའི་འཛུགས་སྐྲུན་གྱི་ལས་གཞི་དག་གཏོར་སྐྱོན་དང་། མ་ན་ལི་ཁུལ་གྱི་དྲ་ལམ་ཡང་རེ་ཞིག་ཆད་ཡོད་པ་རེད།
དེ་བཞིན་ཧི་མ་ཅལ་གྱི་ཆུ་ལོག་གི་དོན་རྐྱེན་ནང་མི་གྲངས་ ༥༠ ལྷག་བོར་བརླག་ཏུ་ཕྱིན་པའི་ཁྲོད། རྒྱལ་ས་སིམ་ལའི་ཁོངས་ནས་མི་གྲངས་ ༢༠ དང་། རྫོང་ཁོངས་གཞན་གཉིས་ནས་མི་གྲངས་སུམ་ཅུ་ལྷག་གར་སོང་ཆ་མེད་དུ་གྱུར་ཡོད་པའི་གནས་ཚུལ་འཐོན་མུས་ཡིན་འདུག་ལ། ཆུ་ལོག་དང་རི་ཉུལ་དེ་དག་གིས་ས་མ་ཇི་ཀན་ཌི་ ( Samej Khad) ཆུ་གློག་ས་ཚིགས་དང་། ཅན་དྷི་སྒར་ནས་མ་ན་ལི་བགྲོད་པའི་གཞུང་ལམ་གཙོས། ཁུལ་དེ་ནས་ལ་དྭགས་བགྲོད་པའི་གཞུང་ལམ་དུའང་ས་ཉིལ་བའི་དོན་རྐྱེན་འབྱུང་མུས་ཡིན་འདུག
ལོ་རེའི་ཕྱི་ཟླ་ ༧ པ་ཙམ་ནས་ཟླ་ ༣ ཡས་མས་རིང་རྒྱ་གར་གྱི་མངའ་སྡེ་ཁག་མང་པོ་དང་ལྷག་པར་དུ་བྱང་ཤར་རི་རྒྱུད་ཁུལ་དུ་ཡོད་པའི་མངའ་སྡེ་ཁག་གི་ནང་དུ་ཆར་ཞོད་ཆེ་བའི་རྐྱེན་གྱིས། ཆུ་ལོག་དང་ས་རུད་ཀྱིས་མི་རྒྱུ་གཉིས་ལ་གནོད་འཚེ་ཆེན་པོ་ཕོག་གི་ཡོད། འདས་པའི་ལོ་རིམ་པར་རྒྱ་གར་གྱི་བྱང་ཤར་མངའ་སྡེ་ཨ་སམ་གཙོ་བྱས་པའི་མཱ་གྷ་ལ་ཡ་དང་ཨ་རུ་ན་ཅལ། ཀར་ན་ཌ་ཀ་སོགས་སུ་ཆར་ཞོད་ཀྱིས་གནོད་སྐྱོན་ཆེན་པོ་ཐེབས་ཡོད་ལ། རྒྱ་གར་ཨུ་ཏར་ཁན་ནི་རྒྱ་གར་གྱི་མངའ་སྡེའི་ཁྲོད་ནས་ཆར་ཞོད་ཆེ་ཤོས་འབབ་སའི་མངའ་སྡེ་ཞིག་ཡིན་ཞིང་། ཕྱི་ལོ་ ༢༠༡༣ ལོའི་ཟླ་ ༦ པར་ཨུ་ཏར་ཁན་ནང་དྲག་ཆར་དང་ཆུ་ལོག་གི་གོད་ཆག་ཚབས་ཆེན་བྱུང་བའི་ཁྲོད་དུ་ཉུང་མཐར་མི་གྲངས་ ༥༧༠༠ ལྷག་འདས་གྲོངས་སུ་ཕྱིན་ཡོད་ཅིང་། ལོ་དེའི་རང་བྱུང་གོད་ཆག་ནི་ཕྱི་ལོ་ ༢༠༠༤ ལོའི་རྒྱ་གར་ཤར་ཕྱོགས་ཀྱི་མཚོ་རླུང་གོད་ཆག་ (2004 Tsunami) རྗེས་ཀྱི་རང་བྱུང་གནོད་སྐྱོན་ཆེ་ཤོས་དེར་ངོས་འཛིན་བྱེད་ཀྱི་ཡོད་པ་རེད།
དེ་བཞིན་ད་ལྟ་རྒྱ་གར་གནམ་གཤིས་སྔོན་བརྡའི་ཚན་པར་གཞིགས་ན། འབྱུང་འགྱུར་ཉིན་གྲངས་གསུམ་རིང་ཧི་མ་ཅལ་མངའ་སྡེ་གཙོས་རྒྱ་གར་བྱང་རྒྱུད་ཀྱི་མངའ་སྡེ་ཁག་ཏུ་ཆར་པ་འབབ་རྒྱུ་ཡིན་པ་མ་ཟད། ཨེ་ཤ་ཡའི་ལྷོ་རྒྱུད་རྒྱལ་ཁབ་དག་ཏུའང་ཆར་པ་འབབ་ཉེན་ཡོད་འདུག གཞན་ཡང་། ད་ལྟ་རྒྱ་གར་ཧི་མ་ཅལ་གཞུང་གིས་ཆུ་ལོག་དང་རི་ཉིལ་གྱི་གནོད་འཚེ་ཐེབས་ཁུལ་དུ་མྱུར་སྐྱོབས་དང་། གཞུང་ལམ་སོགས་བསྐྱར་གསོ་ཡི་ལས་དོན་གཉེར་མུས་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
