དེའི་ཐད་རྒྱལ་སྤྱིའི་ཉེས་དོན་ཁྲིམས་རྩོད་པའི་ (international criminal law attorney and Co-Chair ) ཚོགས་གཙོ་རི་གྷི་ནཱ་(Regina M. Paulose) ལགས་ཀྱིས། ད་བར་བོད་ཀྱི་གནད་དོན་དེ་རྒྱལ་སྤྱིའི་ནང་སྣང་མེད་དུ་བཞག་ནས་དུས་ཡིན་ག་ཙམ་ཕྱིན་ཡོད་ཀྱང་། ད་ལན་གྲོས་ཆོད་འདི་འདྲ་ཞིག་བཞག་པ་དེ་ཨ་རི་གཅིག་པུ་མ་ཡིན་པར་རྒྱལ་སྤྱིའི་སྤྱི་ཚོགས་ཡོངས་ཀྱིས་ལག་ལེན་དུ་བསྟར་དགོས་པའི་ཁར། རྒྱལ་སྤྱིའི་ཁྲིམས་ཁང་ཁག་གིས་བོད་ནང་གི་འགྲོ་བ་མིའི་ཐོབ་ཐང་དང་། ཆོས་དད་རང་དབང་། རིག་གཞུང་སོགས་ལ་བརྩི་འཇོག་བྱ་དགོས། ཞེས་བརྗོད་འདུག
བོད་དང་རྒྱལ་སྤྱིའི་གྲངས་ཉུང་མི་རིགས་མཐུན་ཚོགས་ (Global Alliance for Tibet & Persecuted Minorities ) ཀྱི་ཚོགས་གཙོ་ཚེ་རིང་པ་སངས་ལགས་ཀྱིས། ད་ལན་ཨ་རིའི་ཁྲིམས་རྩོད་པའི་ལྷན་ཚོགས་ཀྱིས་གྲོས་ཆོད་ཨང་ ༥༢ དེ་བཞག་པར་དགའ་ཚོར་ཆེན་པོ་བྱུང་ལ། དེ་ནི་བོད་མི་ཚོས་རྒྱལ་སྤྱིའི་ཁྲིམས་ལུགས་ཐོག་ནས་བོད་ཀྱི་བདེན་དོན་འཐབ་རྩོད་བྱེད་པའི་ལམ་བུ་གསར་པ་ཞིག་ཡིན་པ་མ་ཟད། དེ་ནི་ཨ་རིའི་ཁྲིམས་རྩོད་པའི་ལྷན་ཚོགས་ཀྱི་ལོ་རྒྱུས་ཁྲོད་ཀྱི་གོམ་སྟབས་གསར་པ་ཞིག་ཡིན་པའི་མུར། བོད་ནང་གི་བོད་མི་ཚོས་མྱོང་མུས་ཡིན་པའི་འགྲོ་བ་མིའི་ཐོང་ཐང་གི་གནད་དོན་ཐད་གླེང་སློང་བྱ་དགོས། ཞེས་བརྗོད་འདུག
