བལ་ཡུལ་གྱི་ཐད་འཕུར་གནམ་གྲུ་ཞིག་རི་ལ་བརྡབ་སྐྱོན་བྱུང་སྟེ་གནམ་གྲུའི་ཁ་ལོ་བ་གཅིག་དང་རྒྱ་ནག་མི་སེར་ ༤ བཅས་རྐྱེན་འདས་སུ་ཕྱིན་འདུག
ཁ་སང་ཕྱི་ཚེས་ ༧ ཉིན་གྱི་ཕྱི་དྲོའི་ཆུ་ཚོད་ ༡ །༥༤ ཙམ་ལ་བལ་ཡུལ་གྱི་རྒྱལ་ས་ཀ་ཐ་མན་ཌུ་ནས་སི་ཡ་ཕི་རུ་བྷེ་སི་བསྐྱོད་པའི་ཐད་འཕུར་གནམ་གྲུ་(Dynasty)ཞིག་རི་ཀ་ཐ་མན་ཌུ་ནུབ་བྱང་ཀྱི་སྤྱི་ལེ་ ༡༡ མཚམས་ནས་རི་ལ་བརྡབ་སྐྱོན་བྱུང་སྟེ་གས་ཐོར་བྱུང་ཡོད་ཅིང་། ཐེངས་འདིའི་གནམ་གྲུ་བརྡབ་སྐྱོན་ནང་ཁྱོན་མི་གྲངས་ ༥ རྐྱེན་འདས་སུ་གྱུར་ཡོད་པའི་ཁྲོད། ཐད་འཕུར་གནམ་གྲུའི་ཁ་ལོ་བ་གཅིག་དང་། རྒྱ་ནག་གི་མི་སེར་ ༤ ཡོད་པའི་ནང་བུད་མེད་གཅིག་བཅས་ཚུད་ཡོད་འདུག
ཌེ་ནཱ་ས་ཊི་གནམ་ཐང་གི་བདེ་འཇགས་དོ་དམ་པ་བྷལ་ཀྲི་ཤི་ནཱ་པན་ཊི་ཏ་ (Bal Krishna Pandit) ལགས་ཀྱིས། ཐད་འཕུར་གནམ་གྲུ་དེ་ནི་བལ་ཡུལ་གྱི་རྒྱལ་ས་ཀ་ཐ་མན་ཌུ་ནས་བྱང་ཕྱོགས་སུ་བསྐྱོད་བཞིན་པའི་གནམ་གྲུ་ཞིག་ཡིན་པ་དང་། ཐེངས་འདིའི་འགྲུལ་སྐྱོད་ཁྲོད་དུ་གནམ་གྲུའི་ཁ་ལོ་བ་མི་གྲངས་ ༡ དང་། འགྲུལ་བ་རྒྱ་ནག་གི་མི་སེར་མི་གྲངས་ ༤ བཅས་ཁྱོན་མི་གྲངས་ ༥ ཡོད། ང་ཚོས་གནམ་གྲུ་བརྡབ་སྐྱོན་བྱུང་བའི་རྒྱུ་མཚན་གསལ་བོ་ཤེས་ཀྱི་མི་འདུག ཐོག་མའི་སྙན་ཐོའི་ནང་ཤཱི་ཝ་པུ་རི་རི་རྒྱུད་དུ་གནམ་གཤིས་ལ་དཀའ་ངལ་ཡོད་པ་བསྟན་ཡོད་འདུག ཡིན་ནའང་ཀ་ཐ་མན་ཌུ་ཁུལ་དུ་གནམ་གཤིས་གཙང་མ་རེད། ཅེས་བརྗོད་ཡོད་འདུག
ཀ་ཐ་མན་ཌུའི་གསར་ཁང་གི་གསར་འགོད་པ་ཨན་གྷ་ཌི་དྷ་ཀཱལ་ལགས་ཀྱིས། ང་རང་གནམ་གྲུ་བརྡབ་སྐྱོན་བྱུང་སའི་ཡུལ་དངོས་སུ་ཆུ་ཚོད་གཅིག་གི་རྗེས་སུ་འབྱོར། ཡུལ་དངོས་ཡོངས་སུ་སྨུག་པ་མཐུག་པོ་གཡོགས་འདུག ས་གནས་མི་མང་གིས་ཤིང་ནགས་ཀྱི་གསེང་ནས་གས་གཏོར་བྱུང་བ་མཐོང་ཡོད་འདུག དོན་རྐྱེན་བྱུང་སའི་ཡུལ་དངོས་ཧ་ཅང་འཇིགས་སྣང་སྐྱེས་པ་ཞིག་རེད། ཉེན་རྟོག་པ་རྣམས་ཀྱིས་ཤིང་ནགས་ཁྲོད་དུ་གྲོངས་ཟིན་པའི་ཕུང་པོ་འཚོལ་བཞིན་འདུག ཅེས་བརྗོད་འདུག
ཕྱི་ཟླ་ ༧ ཚེས་ ༢༤ ཉིན་གྱི་སྔ་དྲོའི་ཆུ་ཚོད་ ༡༡ །༡༡ ཙམ་ལ་བལ་ཡུལ་གྱི་རྒྱལ་ས་ཀ་ཐ་མན་ཌུ་ནས་སྤོག་རར་བསྐྱོད་པའི་སཱུར་ཡ་གནམ་གྲུ་(Saurya Aircraft) ཊི་རི་བྷུ་ཝན་རྒྱལ་སྤྱིའི་གནམ་ཐང་(Tribhuvan International Airport in Kathmandu) གི་འབབ་ཐང་ནས་དྲུད་བརྡར་ཤོར་ཏེ་བརྡབ་སྐྱོན་བྱུང་ཡོད་ཅིང་། ཐེངས་འདིའི་གནམ་གྲུ་བརྡབ་སྐྱོན་ནང་མི་གྲངས་ ༡༨ རྐྱེན་འདས་སུ་གྱུར་ཡོད་པའི་ཁྲོད། བྱིས་པ་གཅིག་དང་ཡེ་མན་སྤྱི་མཐུན་རྒྱལ་ཁབ་ཀྱི་མི་གཅིག་ཀྱང་ཚུད་ཡོད་འདུག་ལ། གནམ་གྲུའི་ཁ་ལོ་བ་ཀ་ཐ་མན་ཌུའི་སྨན་ཁང་ཞིག་ཏུ་མྱུར་སྐྱོབ་བྱས་ཡོད་འདུག
ཆེད་མཁས་པ་རྣམས་ཀྱིས་བལ་ཡུལ་དུ་གནམ་གཤིས་ཡག་པོ་མེད་པའི་ཁར། མཁའ་ལམ་ནས་རྒྱང་དུ་ཡག་པོ་མི་མཐོང་བ་དང་རི་རྒྱུད་མང་པོ་ཞིག་ཡོད་སྟབས། བལ་ཡུལ་གྱི་མཁའ་ལམ་ནི་ཡོངས་གྲགས་ཐོག་ཆེས་ཉེན་ཚབས་ཆེ་ཤོས་ཀྱི་ས་ཚིགས་ཤིག་ཏུ་ངོས་འཛིན་བྱེད་ཀྱིན་ཡོད་སྐོར་བརྗོད་ཡོད་འདུག དེ་བཞིན་འདི་ལོའི་ཕྱི་ཟླ་ ༡ ཚེས་ ༡༦ ཉིན་བལ་ཡུལ་གྱི་རྒྱལ་ས་ཀ་ཐ་མན་ཌུ་ནས་སྤོག་རར་བསྐྱོད་པའི་ཡེ་ཊི་མཁའ་ལམ་(Yeti Airlines) འགྲིམ་འགྲུལ་ཁང་གི་ (ATR-72) རྟགས་ཅན་གྱི་གནམ་གྲུ་ཞིག་སྤོག་རའི་གནམ་ཐང་གི་མཁའ་ལམ་ནས་མར་བབ་སྐབས། གནམ་གཤིས་ཡག་པོ་མེད་པ་སོགས་ཀྱི་དབང་གིས། གནམ་གྲུ་བརྡབ་སྐྱོན་བྱུང་ནས་མི་གྲངས་ ༦༨ རྐྱེན་འདས་སུ་གྱུར་ཡོད་འདུག
ཡེ་ཊི་མཁའ་ལམ་འགྲིམ་འགྲུལ་ཁང་གི་ (ATR-72) རྟགས་ཅན་གྱི་གནམ་གྲུའི་ནང་དུ་མཁའ་ལམ་ཞབས་ཞུ་བ་མི་གྲངས་ ༤ ཚུད་པའི་འགྲིམ་འགྲུལ་བ་ ༦༨ ཡོད་པའི་ཁྲོད། སྐྱེས་པ་གྲངས་ ༣༧ དང་བུད་མེད་ ༢༥ བྱིས་པ་དམར་རྗེན་ ༣ ཚུད་པའི་ཕྲུ་གུ་ ༦ ཡོད་འདུག་ལ། དེའི་ནང་བལ་པོ་བ་གྲངས་ ༥༣ དང་། རྒྱ་གར་བ་ ༥། ཨུ་རུ་སུ་ནས་མི་གྲངས ༤། ཀོ་རི་ཡ་ ༢། དེ་བཞིན་ཨོ་གླིང་དང་། ཨར་ཇེན་ཊི་ན། ཧྥ་རན་སི། ཨའེ་ལེན་ཌི་བཅས་ནས་མི་གྲངས་གཅིག་རེ་ཡོད་འདུག
ཕྱི་ལོ་ ༡༩༤༩ ལོར་བལ་ཡུལ་ནང་ཐེངས་དང་པོར་གནམ་གྲུ་འཕུར་སྐྱོད་བྱེད་མགོ་བརྩམས་པ་ནས་བཟུང་ད་བར་གནམ་གྲུའི་བརྡབ་སྐྱོན་ཐེངས་ ༤༢ ལྷག་བྱུང་ཡོད་ཅིང་། ཧི་མ་ལ་ཡའི་རི་རྒྱུད་དུ་ཆགས་པའི་བལ་ཡུལ་རྒྱལ་ཁབ་ནི་གནམ་གྲུའི་མཐུན་རྐྱེན་ལེགས་པོ་མེད་པའི་རྒྱལ་ཁབ་ཅིག་ཏུ་ངོས་འཛིན་བྱེད་ཀྱི་ཡོད་པ་མ་ཟད། འདི་ལོའི་ཕྱི་ཟླ་ ༡ ནང་བྱུང་བའི་གནམ་གྲུ་བརྡབ་སྐྱོན་དེ་ནི་བལ་ཡུལ་ནང་གི་ལོ་ངོ་ ༣༠ རིང་གི་དོན་རྐྱེན་ཆེས་ཆེ་ཤོས་ལ་ངོས་འཛིན་བྱེད་ཀྱིན་འདུག་ལ། ཧི་མ་ལ་ཡའི་རི་རྒྱུད་དུ་ཆགས་པའི་རྒྱལ་ཁབ་ཁག་ཏུ་བྱུང་བའི་མཁའ་ལམ་དོན་རྐྱེན་ཆེ་ཤོས་གཉིས་པ་དེ་ཡིན་འདུག ཕྱི་ལོ་ ༡༩༩༢ ལོར་པ་ཀི་སི་ཐན་དུ་གནམ་གྲུའི་དོན་རྐྱེན་བྱུང་བའི་ཁྲོད་མི་གྲངས་ ༡༦༧ འདས་གྲོངས་སུ་གྱུར་ཡོད་ཅིང་། དེ་ནི་ཧི་མ་ཡ་ལའི་རི་རྒྱུད་རྒྱལ་ཁབ་ཁག་ཏུ་བྱུང་བའི་གནམ་གྲུའི་བརྡབ་སྐྱོན་ཆེས་ཆེ་ཤོས་ཤིག་ཏུ་ངོས་འཛིན་བྱེད་ཀྱི་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
