ཨ་རིའི་བོད་དོན་དམིགས་བསལ་འབྲེལ་མཐུད་པ་དང་། ཨ་རིའི་སྲིད་འཛིན་གྱི་དམིགས་བསལ་ཕྱག་རོགས་དང་། མང་གཙོ་དང་འགྲོ་བ་མིའི་ཐོབ་ཐང་ཚན་པའི་འགན་འཛིན་གཉིས་ནས་ནེའུ་ཡོག་ནས་༧གོང་ས་མཆོག་ལ་མཇལ་བཅར་ཞུས།
![](https://tibettimes.net/wp-content/uploads/2024/08/456050060_1112160397577235_6368555575380659208_n.jpeg)
ཁ་སང་ཕྱི་ཚེས་ ༢༡ ཉིན་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐབས་བདུན་པ་ལྕམ་ཨུ་ཛི་ར་ཛེ་ཡ་ (Uzra Zeya ) ལགས་ཆེད་དུ་རྒྱལ་ས་ཝ་ཤིན་ཊོན་ནས་ནེའུ་ཡོག་གྲོང་ཁྱེར་དུ་ཆེད་ཕེབས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་དང་། སྐབས་དེར་ཨ་རིའི་སྲིད་འཛིན་གྱི་དམིགས་བསལ་ཕྱག་རོགས་དང་། མང་གཙོ་དང་འགྲོ་བ་མིའི་ཐོབ་ཐང་ཚན་པའི་འགན་འཛིན་ལྕམ་སྐུ་ཀེ་ལི་ ( Kelly Razzouk) ལགས་ལྷན་བཅར་ཞུས་ཡོད་པ་ཨ་རིའི་གཞུང་འབྲེལ་དྲ་རྒྱར་གསལ་འདུག
དེ་འབྲེལ་གནས་ཚུལ་ནང་། ལྕམ་ཨུ་ཛི་ར་ཡ་ལགས་ཀྱིས། ཨ་རིའི་སྲིད་འཛིན་བྷའེ་ཌན་མཆོག་གི་ཚབ་བྱས་ཏེ། ༧གོང་ས་མཆོག་གི་སྐུའི་འཕྲོད་བཞེས་དྭངས་གསལ་ཡོང་བའི་སྨོན་འདུན་ཞུས་པ་དང་ཆབས་གཅིག ཨ་རིས་བོད་མི་རྣམས་ཀྱི་འགྲོ་བ་མིའི་ཐོབ་ཐང་དང་ཐུན་མོང་མ་ཡིན་པའི་ལོ་རྒྱུས་དང་སྐད་ཡིག རིག་གཞུང་། ཆོས་ལུགས་བཅས་ཉར་ཚགས་སྲུང་སྐྱོབ་དང་གོང་མཐོར་གཏོང་བའི་དམ་འདུན་ལ་འགྱུར་བ་མེད་པར་བརྟན་པོ་གནས་ཡོད་པ་ནན་བཤད་གནང་ཡོད་པ་མ་ཟད། ༧གོང་ས་མཆོག་ནས་ད་སྔ་བར་སྐུ་ཚེ་ཧྲིལ་པོ་འཚེ་མེད་ཞི་བ་དང་བྱམས་སྙིང་རྗེ་གོང་མཐོའི་སླད་བཏང་གནང་བར་དགའ་བསུ་ཞུས་པ་དང་སྦྲགས། ཁོང་གིས་༧གོང་ས་མཆོག་དང་ལྷན་དུ་བོད་ཀྱི་རིག་གཞུང་ཉར་ཚགས་དང་། ཨ་རིས་བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་བཞིན་ཡོད་པ་དང་། ༧གོང་ས་མཆོག་དང་། ༧མགོན་པོ་གང་ཉིད་ཀྱི་སྐུ་ཚབ་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་བར་གྲོས་མོལ་བསྐྱར་མཐུད་ཡོང་བར་རྒྱབ་སྐྱོར་བྱེད་བཞིན་ཡོད་པ་སོགས་ཀྱི་སྐོར་ནས་གླེང་མོལ་གནང་ཡོད་པ་གསལ་འདུག
ཟླ་འདིའི་ཕྱི་ཚེས་ ༢༠ ཉིན་༧གོང་ས་རྒྱལ་བ་རིན་པོ་ཆེ་མཆོག་ཨ་རིའི་ནེའུ་ཡོག་མངའ་སྡེའི་བྱང་ཕྱོགས་སའེ་ར་ཁྱུ་སི་ (Syracuse) ས་གནས་ནས་ནེའུ་ཡོག་གྲོང་ཁྱེར་དུ་ཆིབས་བསྒྱུར་བསྐྱངས་ཡོད་ཅིང་། དེ་རིང་ཕྱི་ཚེས་ ༢༢ ཉིན་ ༧གོང་ས་རྒྱལ་བ་རིན་པོ་ཆེ་མཆོག་ལ་བྱང་ཨ་རིའི་བོད་རིགས་སྤྱི་མཐུན་ཚོགས་པས་ཇི་ལྟར་གསོལ་འདེབས་ཞུས་དོན་བཞིན་ནེའུ་ཡོག་གྲོང་ཁྱེར་གྱི་ (UBS) རྩེད་འགྲན་ར་བར་མགོན་པོ་གང་ཉིད་མཆོག་སྐུ་ཚེ་ཡུན་དུ་བརྟན་ཆེད་མཚོན་དོན་བརྟན་བཞུགས་འབུལ་ལམ་ཞུ་རྒྱུ་དང་། དེ་རྗེས་སུད་སིར་ཆིབས་བསྒྱུར་གནང་སྟེ་ཛུ་རིག་གྲོང་ཁྱེར་ཏུ་དུས་ཡུན་ཐུང་ཙམ་བཞུགས་རིང་སྟེ། ཕྱི་ཚེས་ ༢༥ ཉིན་ (Hallenstadion) ཚོགས་ཁང་དུ་སུད་སི་བོད་རིགས་ཚོགས་པས་གསོལ་འདེབས་ཞུས་དོན་ལྟར་མཚོན་དོན་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཚེས་ ༢༨ ཉིན་བཞུགས་སྒར་དྷ་རམ་ས་ལར་ཆིབས་བསྒྱུར་མཛད་རྒྱུ་ཡིན་འདུག
གཞན་ཡང་། དགའ་ལྡན་ཕོ་བྲང་ཡིག་ཚང་གི་དྲ་རྒྱར་གསལ་བའི་མཛད་འཆར་ལྟར་ན། ཕྱི་ཟླ་ ༩ ཚེས་ ༦ དང་༧ ཉིན་བཞུགས་སྒར་དྷ་རམ་ས་ལར་མོན་གྱི་དད་ལྡན་མི་མང་ལ་སྤྱན་རས་གཟིགས་ཀྱི་བཀའ་དབང་དང་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཟླ་ ༩ ཚེས་ ༡༢ དང་ ༡༣ ཉིན་གྲངས་གཉིས་རིང་ལྷོ་ཤར་ཨེ་ཤ་ཡའི་དད་ལྡན་རྣམས་ལ་ཆོས་འབྲེལ་དང་། ཕྱི་ཟླ་ ༩ ཚེས་ ༡༨ ཉིན་བོད་ཀྱི་བུད་མེད་ལྷན་ཚོགས་དང་། བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག ཌལ་ཧོར་སློབ་ཟུར་བཅས་ནས་བརྟན་བཞུགས་བསྟར་འབུལ། དེ་བཞིན་ཕྱི་ཟླ་ ༩ ཚེས་ ༣༠ ནས་ཉིན་གྲངས་གཉིས་རིང་ཐའེ་ཝན་གྱི་དད་ལྡན་ཆོས་ཞུ་བ་རྣམས་ལ་སྤྱོད་འཇུག་ཆེན་མོའི་ལེའུ་བརྒྱད་པའི་ཆོས་འབྲེལ་བསྩལ་རྒྱུ་ཡིན་པ་བཅས་ཀྱི་མཛད་འཆར་ལ་ད་སྔ་འགྱུར་བ་གང་ཡང་ཕྱིན་མི་འདུག
གསར་འགོད་པ། སྐལ་བཟང་སྦྱིན་པ།