རྒྱ་ནག་གཞུང་གིས་ཨུ་རུ་སུར་མཉམ་འབྲེལ་གྱི་ནུས་པ་སྔར་ལས་ཤུགས་ཆེ་རུ་བཏང་ནས་ནུབ་ཕྱོགས་རྒྱལ་ཁབ་ཁག་གི་སྟོབས་ཤུགས་ལ་རྒོལ་ལན་སློག་འཆར་ཡོད་འདུག
Chinese Premier Li Qiang is in Russia on a four-day trip that also includes a visit to Belarus. Photo: Reuters
རྒྱ་ནག་གི་སྲིད་བློན་ལི་ཆང་ (Li Qiang) གི་ཉིན་གྲངས་བཞི་རིང་གི་གཞུང་འབྲེལ་སྐོར་སྐྱོད་དང་བསྟུན། ཁ་སང་རེས་གཟའ་ལྷག་པའི་ཉིན་ཨུ་རུ་སུའི་རྒྱལ་ས་མོ་སུ་ཁོ་རུ་ཡུལ་དེའི་མགོ་ཁྲིད་པུ་ཌིན་ལ་ཐུག་འཕྲད་བྱས་ཏེ། ཕྱོགས་གཉིས་ཀྱིས་སྔར་ལས་ལྷག་པའི་མཉམ་འབྲེལ་གྱི་ནུས་པ་གོང་མཐོར་བཏང་ནས་འཕེལ་རྒྱས་འགྲོ་བཞིན་པའི་ནུབ་ཕྱོགས་རྒྱལ་ཁབ་ཁག་གི་སྟོབས་ཤུགས་ལ་མདུན་རྒོལ་དང་། རྒྱ་ནག་དང་ཨུ་རུ་སུ་གཉིས་ཀྱི་ཚོང་དོན་དང་དམག་དོན་གྱི་འགྱུར་མེད་འབྲེལ་ལམ་ཟེར་བ་སྲ་བརྟན་ཡོང་རྒྱུར་མཉམ་འབྲེལ་བྱ་རྒྱུ་བསྐྱར་གླེང་བྱས་ཡོད་འདུག
རྒྱ་ནག་གི་སྲིད་བློན་ལི་ཆང་ཟེར་བས། རྒྱ་ནག་དང་ཨུ་རུ་སུའི་མཛའ་མཐུན་གྱི་འབྲེལ་ལམ་ནི་སྲ་བརྟན་དང་སྟོབས་ཤུགས་ལྡན་པ། དེ་བཞིན་ཆེས་འགུལ་དཀའ་བ་ཞིག་ཡིན་པའི་ཁར། རྒྱལ་སྤྱིའི་ཆབ་སྲིད་ཀྱི་འཕོ་འགྱུར་ཁྲོད་རང་ཚུགས་བརྟན་པོས་འགྲེང་ཡོད་ལ། ཉེ་ལམ་ཆེས་འགྱུར་ལྡོག་འགྲོ་མུས་ཡིན་པའི་རྒྱལ་སྤྱིའི་དཀའ་རྙོག་གི་ངོ་གདོང་དུ། ཕྱོགས་གཉིས་ཀྱི་མགོ་ཁྲིད་དག་གི་ཐབས་ཇུས་རང་བཞིན་ལྡན་པའི་ལམ་སྟོན་གྱི་འོག་ནས། མཐུན་གྲོགས་ཨུ་རུ་སུ་དང་ལྷན་མདུན་སྐྱོད་བྱ་རྒྱུའི་གྲ་སྒྲིག་ཨང་གསར་ཡོད། ཅེས་བཤད་འདུག་ལ། དེ་བཞིན་ལི་ཆང་གིས་ཨུ་རུ་སུའི་སྲིད་བློན་མི་ཧཡེ་ལི་ (Mikhail Mishustin) ཟེར་བ་དང་ཐུག་འཕྲད་བྱས་ཏེ། མཉམ་ལས་ཚོང་དོན་དང་། ཚོང་དོན་འཕེལ་རྒྱས། ཕྱི་ནང་འགྲོ་སྐྱོད་ཀྱི་མཉམ་ལས་ཟེར་བ་སོགས་ཚུད་པའི་ཚོང་དོན་གྱི་མ་འཇོག་གྲོས་ཆོད་བཅུ་གཉིས་ལྷག་ལ་མིང་རྟགས་བཀོད་ཡོད་འདུག
ཕྱི་ལོ་ ༢༠༢༢ ཟླ་ ༠༢ ཚེས་ ༢༤ ཉིན་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མགོ་བཙུགས་པ་ནས་རྒྱ་ནག་གཞུང་གིས་ཨུ་རུ་སུར་དམག་དོན་དང་། ལྷག་པར་ཚོང་དོན་གྱི་མ་འཇོག་ཆེན་པོ་བྱས་ཏེ། ཨུ་རུ་སུ་ནི་རྒྱ་ནག་གིས་ནུབ་ཕྱོགས་རྒྱལ་ཁབ་ཁག་ལ་ཁ་གཏད་གཅོག་རོགས་ཀྱི་མཐུན་གྲོགས་བཟང་ཤོས་ཤིག་ཏུ་གྱུར་པར་བརྟེན། འདི་ལོའི་ཕྱི་ཟླ་ ༣ པའི་ནང་ཞི་ཅིན་ཕིན་གྱི་མགྲོན་འབོད་ལྟར་པུ་ཌིན་ཆེད་དུ་རྒྱ་ནག་ཏུ་ཕྱིན་ནས། ཕྱོགས་གཉིས་ཀྱི་འཐབ་ཇུས་རང་བཞིན་ལྡན་པའི་མཐའ་སྲུང་གི་མཉམ་ལས་ཟེར་བ་ཚུད་པའི་ཚོང་དོན་དང་། ཨུ་ཡུ་གཉིས་ཀྱི་ས་ཁམས་ཆབ་སྲིད་ཀྱི་རྩོད་རྙོག་དང་། ཟས་བཅུད་ཡར་སྐྱེད་ཡོང་ཐབས་སོགས་ལ་མཉམ་རུབ་ཀྱི་ནུས་པ་སྤུངས་འཇོག་བྱ་རྒྱུའི་གྲོས་མཐུན་བྱུང་ཡོད་འདུག་ལ། པུ་ཌིན་གྱིས་འདི་ལོའི་ཕྱི་ཟླ་ ༡༠ ཚེས་ ༢༢ ནས་ ༢༤ བར་ཨུ་རུ་སུར་འཚོག་འཆར་ཡོད་པའི་བྷི་རིག་སི་ (BRICS) ཚོགས་ཆེན་ཐོག་ཞི་ཅིན་ཕིན་མགྲོན་འབོད་བྱས་འདུག ལྷན་ཚོགས་དེ་ནི་ཕྱི་ལོ་ ༢༠༠༩ ལོར་རྒྱ་གར་དང་རྒྱ་ནག བྷར་ཛིལ། ཨུ་རུ་སུ། ལྷོ་ཨ་ཧྥི་རི་ཀ་བཅས་ཀྱིས་གོ་ལའི་དཔལ་འབྱོར་དང་རྒྱལ་ཁབ་སོ་སོའི་དཔལ་འབྱོར་འཕེལ་རྒྱས་སུ་དམིགས་ནས་བཙུགས་པ་ཞིག་རེད།
རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་གནས་ཚུལ་ལྟར་ན། ད་ལན་ལི་ཆང་ཟེར་བས་ཡུ་རོབ་ཀྱི་ཤར་རྒྱུད་དུ་ཆགས་པའི་བྷེ་ལ་རུ་སི་ (Belarus) རྒྱལ་ཁབ་ཀྱི་སྲིད་བློན་རོ་མན་ (Roman Golovchenko) དང་ཐུག་འཕྲད་བྱས་ཏེ། ཕྱོགས་གཉིས་ཀྱི་གཏིང་ཟབ་པའི་བསམ་ཚུལ་བརྗེ་རེས་དང་། མཉམ་འབྲེལ་གྱི་མཛའ་བརྩེ་དང་ལས་དོན་ཟེར་བའི་ཐད་ལ་གླེང་སློང་། དེ་བཞིན་རྒྱ་ནག་གི་རྒྱུད་གཅིག་ལམ་གཅིག་གི་འཛུགས་སྐྲུན་ལས་དོན་མཉམ་ལས་ཆེད་ཁུལ་དེར་སྐོར་གཡེང་བྱ་རྒྱུ་ཡིན་ལུགས་བསྒྲགས་འདུག་ལ། བྷེ་ལ་རུ་སི་ཞེས་པའི་རྒྱལ་ཁབ་ནི་རྒྱ་ནག་དང་ཨུ་རུ་སུ་གཉིས་ལ་སྲིད་འབྱོར་གཉིས་ཀྱི་ཐོག་ནས་འབྲེལ་ལམ་བཟང་བ་མ་ཟད། དེ་སྔ་ཨུ་རུ་སུས་རྒྱལ་ཁབ་དེའི་ནང་དམག་མི་འབོར་ཆེན་མངག་གཏོང་བྱས་ཏེ། རྒྱལ་ཁབ་དེ་བརྒྱུད་ཡུ་ཁེ་རིན་གྱི་བྱང་རྒྱུད་དུ་འཐབ་འཁྲུག་བསླངས་ནས་གཏོར་རྒོལ་དྲག་པོ་བྱས་འདུག་ལ། ཉེ་ལམ་རྒྱལ་ཁབ་དེ་དང་ཡུ་ཁེ་རིན་གཉིས་ཀྱི་མཐའ་མཚམས་སུ་ཡུ་ཁེ་རིན་གྱིས་དམག་དཔུང་ཧྲག་བསྡུས་བྱེད་ཀྱི་ཡོད་སྐོར་བརྗོད་དེ། གནམ་ས་གཉིས་ཀྱི་དམག་དོན་མཚོན་ཆ་དང་དྲག་དམག་ཁྲི་དྲུག་ལྷག་ཡུ་ཁེ་རིན་གྱི་མཐའ་མཚམས་སུ་བརྫངས་ཡོད་འདུག
ཕྱི་ལོ་ ༢༠༡༤ ཙམ་ནས་ཨུ་རུ་སུ་དང་ཡུ་ཁེ་རིན་གྱི་དཀའ་རྙོག་དེ་རྒྱལ་སྤྱིའི་དཀའ་རྙོག་ཅིག་ཏུ་གྱུར་ཏེ། ལོ་དེའི་ནང་ཧྥ་རན་སི་དང་འཇར་མ་ནི་གཉིས་ཀྱིས་གཟུ་དཔང་བྱས་ཏེ་ཡུ་ཁེ་རིན་དང་། ཨུ་རུ་སུ། ཡུ་རོབ་ཀྱི་བདེ་སྲུང་དང་མཉམ་ལས་སྒྲིག་འཛུགས་ (OSCE) དབར་ལ་མིན་སི་ཀི་གྲོས་ཆོད་ (Minsk Agreement) ཅེས་པའི་གྲོས་ཆོད་ཐེངས་གཉིས་བཞག་ཡོད་ནའང་། ཕྱོགས་གཉིས་ཀས་གྲོས་ཆོད་ཀྱི་དགོངས་དོན་རྡོག་རོལ་བཏང་བའི་རྐྱེན་གྱིས་ད་བར་ཡུ་ཁེ་རིན་གྱི་དཀའ་རྙོག་དེ་སེལ་ཐུབ་མེད་པ་རེད། ཕྱི་ལོ་ ༡༩༩༡ ལོར་ཨུ་རུ་སུ་མཉམ་འབྲེལ་དུམ་བུར་འཐོར་ཏེ་སྤྱི་མཐུན་རྒྱལ་ཁབ་གསར་པ་མང་པོར་གྱུར་ཡོད་ནའང་། དེ་དག་ཕལ་ཆེ་བ་ཨུ་རུ་སུའི་ཕྱོགས་སུ་མ་བསྡད་པར་ཡུ་རོབ་ཀྱི་ཕྱོགས་གཏོགས་ལྟ་བུར་གྱུར་བ་མ་ཟད། ཨུ་རུ་སུ་མཉམ་འབྲེལ་ནུབ་རྒྱུད་རྒྱལ་ཕྲན་ཕལ་ཆེ་བ་ཡུ་རོབ་མཐུན་ཚོགས་ནང་ཞུགས་ཏེ། ཨུ་རུ་སུའི་ཤུགས་རྐྱེན་ཇེ་ཆུང་དང་ནུབ་གླིང་གི་ཤུགས་རྐྱེན་ཇེ་ཆེར་གྱུར་བ་སོགས་ཀྱིས་ཨུ་ཡུ་གཉིས་ཀྱི་རྩོད་རྙོག་དེ་བྱུང་ཞིང་། དེ་རིང་ཕྱི་ཟླ་ ༨ ཚེས་ ༢༢ ཉིན་ནི་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མགོ་བཙུགས་ནས་ཉིན་གྲངས་ ༩༠༩ པ་དེ་ཡིན་པ་རེད། འདི་ལོའི་ཕྱི་ཟླ་ ༧ ཚེས་ ༣༡ ཉིན་གྱི་ཝེ་ཀེ་རིག་མཛོད་ཀྱི་གྲངས་ཐོ་ལྟར་ན། ད་བར་ཨུ་དམག་གིས་ཉུང་མཐར་ཡུ་ཁེ་རིན་གྱི་མི་དམངས་ཕལ་བ་གྲངས་ ༡༡༥༢༠ ལྷག་དམར་གསོད་བཏང་བའི་ཁྲོད་བྱིས་པ་གྲངས་ ༦༠༠ ལྷག་ཡོད་འདུག དེ་བཞིན་ཁ་སང་ཕྱི་ཚེས་ ༢༢ ཉིན་ཡུ་ཁེ་རིན་གྱི་ཚགས་པར་ཁང་(Ukrainska Pravda)གིས་གནས་ཚུལ་སྤེལ་བའི་ནང་། ཡུ་ཁེ་རིན་གྱིས་འདས་པའི་ལོ་གཉིས་ལྷག་ནང་ཉུང་མཐར་ཨུ་རུ་སུའི་དམག་མི་ ༦༠༥༢༧༠ ལྷག་བསད་པ་དང་། འཐབ་འཁོར་གྲངས་ ༨༥༣༦ ལྷག་ལ་གཏོར་རྒོལ་བཏང་ཡོད་པ་མ་ཟད། ཁ་སང་གཅིག་པུར་ཨུ་དམག་ ༡༡༣༠ ལྷག་འཆི་ལམ་དུ་དེད་ཡོད་སྐོར་བཀོད་འདུག
ཕྱི་ལོ་ ༢༠༢༢ ལོར་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་སྐབས་རྒྱལ་ཁབ་མང་པོ་ཞིག་གིས་ཨུ་རུ་སུར་ཚོང་དོན་གྱི་འབྲེལ་ལམ་བཅད་པའམ་ཚོང་གི་ཉེས་ཆད་མི་ཉུང་བ་ཞིག་བཅད་ཡོད་ཀྱང་། རྒྱ་ནག་གིས་ཨུ་རུ་སུར་སྔར་ལས་ལྷག་པའི་ཚོང་དོན་གྱི་འབྲེལ་ལམ་ཤུགས་ཆེན་བཙུགས་ནས་མ་འཇོག་དང་དཔལ་འབྱོར་འཕེལ་རྒྱས་ཀྱི་ལས་དོན་གཉེར་རོགས་བྱས་ཏེ། ཨུ་སུ་རུའི་མགོ་ཁྲིད་པུ་ཌིན་གྱི་དུས་སྐབས་གསར་པ་ཟེར་བ་སྟེ། ཕྱི་ལོ་ ༢༠༢༢ ལོར་ཨུ་རུ་སུའི་ཅ་དངོས་བརྒྱ་ཆ་ ༣༦།༥ རྒྱ་ནག་ནས་དབོར་འདྲེན་བྱས་ཏེ། ལོ་དེ་གཅིག་པུར་རྒྱལ་ཁབ་དེ་གཉིས་ཀྱིས་ཨ་སྒོར་ཐེར་འབུམ་ ༡༩༠ ལྷག་གི་ཚོང་འབྲེལ་བྱས་ཡོད། ཕྱི་ལོ་ ༢༠༠༨ རྗེས་ནས་རྒྱ་ནག་དང་ཡུ་ཁེ་རིན་གཉིས་བར་ཚོང་གི་འབྲེལ་ལམ་བཟུང་ནས། ཕྱི་ལོ་ ༢༠༡༩ ལོར་རྒྱ་ནག་དེ་ཡུ་ཁེ་རིན་གྱི་ཚོང་འབྲེལ་ཆེ་ཤོས་ཀྱི་རྒྱལ་ཁབ་ཏུ་གྱུར་ཏེ་ཕྱི་ལོ་ ༢༠༢༠ ལོ་གཅིག་པུར་ཨ་སྒོར་ཐེར་འབུམ་ ༡༥།༤ ཚོང་འབྲེལ་བྱས་ཡོད་ཀྱང་། གནད་དོན་དབྱེ་ཞིབ་པ་མང་པོ་ཞིག་གིས། རྒྱ་ནག་གིས་ཡུ་ཁེ་རིན་དང་ཚོང་དོན་གྱི་འབྲེལ་ལམ་གཡུགས་ནས། ཨུ་རུ་སུ་དང་མཉམ་འབྲེལ་བྱས་ཏེ་དམག་དོན་གྱི་ནུས་པ་མཉམ་དུ་སྤུངས་ནས། མ་འོངས་པར་སྔར་ལས་ལྷག་ཨ་རིའི་ལྡོག་ཕྱོགས་སུ་ལངས་སྟེ་ཚོང་དང་དམག་དོན་གྱི་ནུས་པ་བསྐྱེད་རྒྱུའི་དམིགས་ཡུལ་འཛིན་གྱིན་ཡོད་པར་ངོས་འཛིན་བྱེད་ཀྱི་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
