༧གོང་ས་རྒྱལ་བ་རིན་པོ་ཆེ་མཆོག་གིས་བོད་མི་རིགས་ཀྱི་རིག་གཞུང་དང་གོམས་གཤིས་སུ་གྱུར་བའི་ནང་པ་སངས་རྒྱས་བའི་ཆོས་ལ་བདག་པོ་རྒྱག་རྒྱུ་གལ་ཆེན་པོ་ཡིན་སྐོར་བཀའ་སློབ་བསྩལ།
ཟླ་འདིའི་ཕྱི་ཚེས་ ༢༥ ཉིན་གྱི་སྔ་དྲོ་སུད་སི་གྲོང་ཁྱེར་ཛུ་རིག་གི་ཧཱ་ལན་སི་ཌེ་ཤོན་(Hallenstadion ) ཚོགས་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་ཡུ་རོབ་ཏུ་གནས་བཞུགས་བོད་མི་ ༡༥༠༠༠ བརྒལ་བར་སྤྱན་རས་གཟིགས་བླ་མའི་རྣལ་འབྱོར་བསྡུས་པའི་བཤད་ལུང་དང་མ་ཎིའི་ལྗགས་ལུང་གི་བཀའ་ཆོས་བསྩལ་བ་དང་། སྐབས་དེར་ཡུ་རོབ་བོད་རིགས་ཐུན་མོང་ནས་༸གོང་ས་རྒྱལ་བ་རིན་པོ་ཆེ་མཆོག་ལ་མཚོན་དོན་བརྟན་བཞུགས་བསྟར་འབུལ་ཞུས་ཡོད།
བརྟན་བཞུགས་སྐབས་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་འདིར་སུད་སི་དང་ཡུ་རོབ་ཁུལ་གྱི་བོད་མི་རྣམས་གཙོས་ཁྱེད་ཚོ་དད་པས་ཀུན་ནས་བསླངས་ཏེ་འཛོམས་པ་རེད། ང་ཚོ་བོད་གངས་ཅན་པ་ཟེར་བ་སངས་རྒྱས་ཀྱི་ཆོས་ལ་དད་པ་དམིགས་བསལ་བ་ཞིག་ཡོད། ངོས་རང་འཛམ་བུ་གླིང་གི་ས་ཁུལ་མང་པོར་སླེབས་ཏེ་ཆབ་སྲིད་ཀྱི་མི་སྣ་སོགས་འདྲ་མིན་མང་པོར་ཐུག་ཡོད། བོད་གངས་ཅན་གྱི་མི་རྣམས་དངོས་གནས་དད་པ་འགྱུར་བ་མེད་པ་ཞིག་རེད། ཆོས་རྒྱལ་སྲོང་བཙན་སྒམ་པོའི་སྐབས་ནས་བཟུང་ནང་པ་སངས་རྒྱས་པའི་ཆོས་ལ་དོ་སྣང་དམིགས་བསལ་བྱས་ཡོད་པ་མ་ཟད་སོ་སོས་དངོས་སུ་ཉམས་ལེན་བྱས་ཡོད། ཆུང་དུས་ནས་མ་ཎི་འདོན་པ་དང་སྐྱབས་འགྲོ་སེམས་བསྐྱེད་འདོན་པ་སོགས་གོམས་གཤིས་ཆགས་བསྡད་ཡོད།
ངོས་རང་ལ་ཆ་བཞག་ནའང་སྐྱེས་སའི་ཕ་ཡུལ་དུ་སངས་རྒྱས་ཀྱི་ཆོས་ལ་ཡོངས་གྲགས་སུ་རྒྱ་ཆེར་བལྟས་མེད་ཀྱང་ཧ་ཅང་དད་པ་ཡོད་པ་ཞིག་རེད། དེ་ནས་རིམ་བཞིན་ནང་ཆོས་ལ་སློབ་གཉེར་བྱུང་བ་རེད། སངས་རྒྱས་ཆོས་ཀྱི་གཞི་ལམ་འབྲས་གསུམ་གྱི་རྣམ་གཞག་ཧ་ཅང་ཟབ་ཚགས་པོ་རེད། འདི་འདྲའི་འགྲེལ་བཤད་ཞིབ་ཚགས་པོ་དེ་སེམས་ཁམས་རིག་པར་རོགས་པ་བྱེད་ཀྱི་ཡོད་ཅིང་། ཚན་རིག་དང་མཐུན་པ་ཞིག་རེད། བར་སྐབས་ངོས་རང་ཆོས་པའི་གཟུགས་བརྙན་ཞིག་ཆགས་ཡོད་དུས། ཚན་རིག་པ་མང་པོ་ངོས་རང་ལ་ཐུག་ཏུ་ཡོང་གི་འདུག སེམས་ཁམས་རིག་པའི་ཐོག་ནས་སེམས་ཀྱི་ཞི་བདེ་བསྐྲུན་པར་སངས་རྒྱས་བའི་གཞུང་ནས་གསུངས་ཡོད་པར་དམིགས་བསལ་དོ་སྣང་བྱེད་ཀྱི་འདུག དེང་སང་འཛམ་བུ་གླིང་དུ་ཆོས་ཞེས་པ་སོ་སོས་དད་པ་བྱ་རྒྱུ་ཞིག་ཡིན་མིན་གང་ཡིན་ཡང་། གཙོ་བོ་སེམས་པ་བཟང་པོ་བྱ་རྒྱུ་དེར་ཚང་མས་དོ་སྣང་བྱེད་བསྡད་ཀྱི་འདུག ང་ཚོ་བོད་རིགས་ཚོས་ཡ་རབས་སྤྱོད་བཟང་གི་རྩ་བ་སངས་རྒྱས་ཆོས་ཀྱི་མཉམ་གཞག་ཐོག་དམིགས་བསལ་དོ་སྣང་བྱེད་བཞིན་ཡོད། ཅེས་གསུངས་སོང་།
༧མགོན་པོ་གང་ཉིད་མཆོག་ནས། བར་སྐབས་བོད་མི་ཚོར་ཧ་ཅང་དཀའ་ངལ་བྱུང་བ་རེད། དེང་སང་གུང་ཁྲན་རིང་ལུགས་ཀྱིས་སྒྲིག་སྲོལ་ཧ་ཅང་དམ་པོ་བྱས་ཡོད་ཀྱང་། བོད་མིའི་ཆོས་དད་ཀྱི་སེམས་ཤུགས་ཁྱོན་ནས་བརླག་རྒྱུ་མི་འདུག ང་ཚོས་ཆུང་དུས་ནས་སངས་རྒྱས་ཆོས་ལ་སྐྱབས་སུ་འགྲོ་རྒྱུ་གོམས་བསྡད་པ་རེད། ངོས་རང་ཆུང་དུས་གཙུག་ལག་ཁང་སོགས་སུ་ཕྲུ་གུ་ཆུང་ཆུང་རྣམས་ཀྱི་ཨ་ར་པ་ཙ་བགྲང་བཞིན་ཡོད་པར་མཐོང་སྟེ་ཡིད་དབང་འཕྲོག་ནས་ལད་ཟློས་བྱེད་ཀྱི་ཡོད། ང་ཚོ་བོད་མི་ཚང་མར་ཆོས་དང་རིག་གཞུང་གི་བག་ཆགས་ཡོད་བསྡད་པ་ཞིག་རེད། བར་སྐབས་དེ་ལ་ནང་པའི་ཆོས་དང་བོད་ཀྱི་ཆོས་ཟེར་ནས་སྤྱིར་བཏང་བཞིན་བཞག་པ་རེད། དེང་སྐབས་ཚན་རིག་པ་མང་པོ་ཞིག་གིས་ནང་ཆོས་ཀྱི་སེམས་ཁམས་རིག་པའི་ཐོག་དམིགས་བསལ་དོ་སྣང་བྱེད་བཞིན་འདུག ནང་ཆོས་ཀྱི་སེམས་ཁམས་རིག་པ་དང་བསྟུན་ནས་བློ་མ་ཤེས་པ་ཤེས་སུ་འཇུག་པ་དང་། མ་འདུལ་བ་འདུལ་བར་བྱེད་པའི་རྨད་དུ་བྱུང་བ་གསལ་བོ་ཆགས་ཡོད། འདི་འདྲའི་ཆོས་ལུགས་ཀྱི་དད་པ་དེས་འཛམ་བུ་གླིང་དུ་ཕན་ཐོགས་པ་ཞིག་ཏན་ཏན་རེད། བར་སྐབས་རྒྱ་ནག་ནང་དུའང་ནང་པའི་ཆོས་ལ་ཧ་ཅང་དམ་དྲག་བྱས་ཡོད་ཀྱང་། གཞི་ནས་ཆོས་ལ་དད་པ་ཤུགས་ཆེ་རུ་འགྲོ་བཞིན་འདུག ཅེས་གསུངས་སོང་།
ཡང་མགོན་པོ་གང་ཉིད་མཆོག་ནས། བོད་པ་མཚོན་ན་ཆོས་རྒྱལ་སྲོང་བཙན་སྒམ་པོ་དང་ཁྲི་སྲོང་ལྡེའུ་བཙན་སྐབས་ནས་བཟུང་སངས་རྒྱས་ཀྱི་ཆོས་དེ་བོད་པའི་གོམས་གཤིས་སུ་འཇགས་པ་རེད། བོད་པ་ཡོངས་ཀྱིས་སངས་རྒྱས་ཀྱི་ཆོས་ལ་དད་པ་རྩེ་གཅིག་ཏུ་ཡོད་པ་ཧ་ཅང་ཡག་པོ་རེད། ང་ཚོ་བཙན་བྱོལ་བ་ཆགས་ཏེ་སྡོད་བཞིན་ཡོད་ཀྱང་། བོད་པ་བཙན་བྱོལ་བ་གང་དུ་ཡོད་པའི་སྐྱེས་ཕོ་མོ་སུ་ཡིན་རུང་ཆོས་ལ་དད་པ་འགྱུར་བ་མེད་པ་ཞིག་རེད། ང་ཚོའི་ཆོས་ཀྱི་དད་པ་དེ་ཡ་རབས་སྤྱོད་བཟང་དང་འབྲེལ་ཡོད། གལ་སྲིད་ཆོས་ལ་དད་པ་མེད་ཀྱང་ཡ་རབས་སྤྱོད་བཟང་ཉམས་ལེན་ཡག་པོ་བྱེད་དགོས་པར་བཤད་ཀྱི་ཡོད། འཛམ་བུ་གླིང་དུ་ད་སྔ་ཆོས་ལ་དམིགས་བསལ་དོ་སྣང་མེད་མཁན་ཚོས་ཀྱང་ལྟ་གྲུབ་ཐོག་འགྲེལ་བཤད་རྒྱག་རྒྱུ་ཡོད་པར་དམིགས་བསལ་དོ་སྣང་བྱེད་བཞིན་འདུག བོད་པར་མཚོན་པ་ཡིན་ན་ནང་ཆོས་ནི་བོད་པ་རང་ཉིད་ཀྱི་གཅེས་ནོར་ཆགས་ཡོད་པས། ང་ཚོས་བདག་པོ་རྒྱག་རྒྱུ་གལ་ཆེན་པོ་རེད། ཆོས་ལ་བདག་པོ་རྒྱག་ཟེར་བ་དེ་ཅ་ལག་ནང་བཞིན་བདག་པོ་རྒྱག་རྒྱུ་དེ་འདྲ་མ་རེད། སོ་སོའི་བསམ་བློའི་ནང་ཆོས་ཀྱི་སྐྱབས་འགྲོ་དང་ལས་འབྲས་སོགས་ཀྱི་འགྲོ་སྟངས་ཤེས་དགོས། ཆོས་ཀྱི་སྙིང་པོ་ཡ་རབས་སྤྱོད་བཟང་རེད། གལ་ཏེ་ཆོས་ཁས་མ་བླངས་ནའང་སོ་སོའི་མི་ཚེ་ཡ་རབས་སྤྱོད་བཟང་ཐོག་བསྐྱལ་རྒྱུ་བྱུང་ན་ཆོས་ཀྱི་དོན་དག་ཚང་ཡོད། ཁ་ནས་ཆོས་མང་པོ་བཤད་དེ་ཆོས་ཕྱོགས་ཀྱི་གྲུབ་མཐའི་འཐེན་འཁྱེར་བྱས་ཏེ་སེམས་ཞི་ཞིང་དུལ་བ་མེད་ཚེ། དེ་ནི་ཆོས་འབག་ཏུ་གྱོན་པའི་སྲོལ་ཞིག་ཆགས་ཡོད། ཕན་ཐོགས་གང་ཡང་མེད་པ་རེད། ང་ཚོ་བོད་པ་ཧ་ཅང་ཡག་པོ་རེད། ད་ལྟ་བར་ཚང་མས་ཧུར་ཐག་བྱས་པ་རེད། ད་དུང་ཡང་ཧུར་ཐག་བྱེད་དགོས། ཅེས་གསུངས་སོང་།
༧གོང་ས་མཆོག་ནས། སངས་རྒྱས་ཀྱི་ཆོས་ལྟ་གྲུབ་དང་འབྲེལ་ཡོད་པར་བརྟེན། བློ་སྦྱོང་གཙོ་བོ་རིགས་གང་འཚམ་ཤེས་དགོས་ཀྱི་ཡོད། བློ་སྦྱོང་ཡོད་པ་དང་བློ་སྦྱོང་མེད་པའི་ཆོས་འབྲེལ་ལ་ཁྱད་པར་ཡོད། ཆོས་ཤེས་པའི་ཐོག་ནས་དད་པ་བྱས་ཚེ་སེམས་འདུལ་བར་ཧ་ཅང་ཁྱད་པར་ཡོད། ནང་ཆོས་ཉམས་ལེན་བྱེད་པར་བོད་པའི་གོམས་གཤིས་ཆགས་ཡོད་པས། དེས་རིག་གཞུང་ཞིག་མཚོན་ཐུབ་ཀྱི་ཡོད། མི་རིགས་ཀྱི་ཆ་ནས་བཤད་ན་ཆོས་དད་དེས་མི་རིགས་ཀྱི་རྣམ་པ་མཚོན་ཐུབ་པ་ཞིག་རེད། བོད་པའི་གོམས་གཤིས་དང་རིག་གཞུང་ཡང་ནང་ཆོས་དང་འབྲེལ་ཡོད། བོད་ཀྱི་ཆོས་དང་རིག་གཞུང་ཟེར་བའི་གོམས་གཤིས་ཡག་པོ་དེ་བདག་པོ་རྒྱག་རྒྱུ་ཧ་ཅང་གལ་ཆེན་པོ་རེད། ཆོས་ཀྱི་ནང་ནས་སེམས་པ་བཟང་པོ་བྱ་རྒྱུ་དེ་ཆོས་ཀྱི་སྙིང་པོ་རེད། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཟེར་བའི་བསམ་བློ་དེ་ཡོད་ན་སེམས་བསྐྱེད་ལ་ཕན་ཐོགས་ཆེན་པོ་རེད། ཞེས་དང་། བོད་པའི་རིག་གཞུང་དང་གོམས་གཤིས་ལབ་དུས་ཆོས་དད་དགོས་པ་གལ་ཆེན་པོ་རེད། སྔོན་མ་ངོས་རང་པེ་ཅིང་དུ་ཡོད་དུས། མའོ་ཙེ་ཏུང་གིས་ཆོས་ཟེར་བ་དུག་རེད་ཅེས་བཤད་མྱོང་། མའོ་ཙེ་ཏུང་ད་ལྟ་ཡོད་ན་ནང་པའི་ཆོས་ལ་དོ་སྣང་ཏན་ཏན་བསླེབས་ཀྱི་རེད། ཁོས་རྒྱུ་མཚན་ལ་བསམ་བློ་བཏང་མི་འདུག ཅེས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
