ཨ་རིའི་ནེའུ་ཡོག་མངའ་སྡེའི་བྷུ་རུག་ལིན་ཁྲིམས་ཁང་གིས་རྒྱ་ནག་གཞུང་དང་གསང་འབྲེལ་བཙུགས་པའི་ཨ་རིའི་ནེའུ་ཡོག་གི་སྤྱི་ཁྱབ་འགན་འཛིན་གཞོན་པ་ཟུར་བ་རྒྱ་རིགས་བུད་མེད་ལིན་དྷ་སན་ལ་ཁྲིམས་བཤེར་བྱེད་ཀྱི་འདུག
Linda Sun, a former aide to New York State Governor Kathy Hochul, New York City, U.S., September 3, 2024. REUTERS/Kent J. Edwards
ཁ་སང་ཨ་རིའི་ནེའུ་ཡོག་མངའ་སྡེའི་ཆེས་མཐོ་ལས་བྱེད་ཟུར་བ་རྒྱ་རིགས་བུད་མེད་ལིན་དྷ་སན་(Linda Sun) ཟེར་བ་ཞིག་གིས། རྒྱ་གཞུང་གི་དངུལ་སྒོར་འབོར་ཆེན་བླངས་ནས་ཨ་རིའི་ནང་རྒྱ་ནག་གི་སོ་ཉུལ་བ་བྱེད་མུས་ཡིན་པ་ཤེས་རྟོགས་རྗེས། ཁོ་མོ་དང་མོའི་ཁྱོ་ག་རྒྱ་རིགས་ཧུ་ཟེར་བ་གཉིས་འཛིན་བཟུང་བྱས་ཏེ། ཁྱོ་ཤུག་གཉིས་ལ་ཞིབ་བཤེར་བྱེད་མགོ་བཙུགས་ཡོད་ཅིང་། ཟླ་འདིའི་ཕྱི་ཚེས་ ༢༥ ཉིན་ཁྲིམས་བཤེར་རིམ་པ་གཉིས་པ་དེ་འཚོག་རྒྱུ་ཡིན་འདུག
ནེའུ་ཡོག་མངའ་སྡེའི་བྷུ་རུག་ལིན་ (Brooklyn) རྫོང་གི་དབུས་ཁྲིམས་ཁང་གིས། རྒྱ་རིགས་བུད་མེད་ལིན་ཟེར་བ་དེས། དེ་སྔ་ཐའེ་ཝན་གྱི་སྐུ་ཚབ་ཚོགས་ཆུང་ཞིག་ཨ་རིར་ཡོང་སྐབས། གསང་ཐབས་ཀྱིས་ཨ་རིའི་ཆེས་མཐོའི་མི་སྣ་དག་དང་ཐུག་འཕྲད་བྱ་རྒྱུར་བཀག་འགོག་དང་། ཨ་རིའི་ནེའུ་ཡོག་གི་གཞུང་འབྲེལ་སྐུ་ཚབ་ཚོགས་ཆུང་ཞིག་ཆེད་དུ་རྒྱ་ནག་ཏུ་བསྐྱོད་རྒྱུར་གོ་སྒྲིག་བྱས་ཡོད་པ་མ་ཟད། རྒྱ་ནག་གཞུང་གིས་མོའི་ཁྱོ་གའི་དངུལ་བྱང་དུ་ཨ་སྒོར་ས་ཡ་གཅིག་ལྷག་ལྡུག་སྟེ། ཁོས་རྒྱ་ནག་ཏུའང་ཚོང་དོན་གྱི་ལས་གནས་གཉེར་གྱིན་ཡོད། ཅེས་དང་། འདི་ལོར་ཁོང་གཉིས་ཀྱིས་རྒྱ་ནག་གིས་སྤྲད་པའི་དངུལ་སྒོར་སྤྱད་ནས། ཧྥ་ར་རི་རླངས་འཁོར་དང་། ཨ་རིའི་ཧ་ཝ་ཡེ་མངའ་སྡེའི་རྒྱལ་ས་ཧོ་ནོ་ལུ་ལུ་ཡི་ཁུལ་དུ་ཨ་སྒོར་ས་ཡ་དྲུག་ཅན་གྱི་ཁང་པ་སོགས་ཉོས་ཡོད་སྐོར་སོགས་བརྗོད་འདུག
ཨ་རིར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མགྲིན་ཚབ་པ་ཕེན་ཡུས་(Liu Pengyu) ཟེར་བས། འདས་པའི་ལོ་ཤས་རིང་ཨ་རིའི་གཞུང་དང་གསར་ཁང་མང་པོ་ཞིག་གིས་ཧོབ་ཚོད་ཀྱིས་རྒྱ་ནག་གི་གསང་ཉུལ་བ་རེད་ཟེར་བ་མང་པོ་ཞིག་ཕྱིས་སུ་བདེན་པ་མིན་པའི་ཁུངས་ལུང་གསལ་པོ་རྙེད་ཡོད། རྒྱ་ནག་གཞུང་གིས་རྒྱ་ནག་ནས་ཡོང་བའི་ཨ་རིའི་མི་སེར་རྣམས་ལ་ཁྲིམས་སྒྲིག་བཞིན་བརྩི་འཇོག་བྱ་རྒྱུའི་རེ་བ་བྱེད་ཀྱི་ཡོད། ང་ཚོས་ཁུངས་ལུང་གང་ཡང་མེད་པའི་ཐོག་ནས་རྒྱ་ནག་ལ་ཟུར་ཟ་དང་སྙོན་འཛུགས་བྱས་པར་དགག་པ་རྒྱག་གི་ཡོད། ཅེས་བརྗོད་འདུག
ཨ་རིའི་གཞུང་ཕྱོགས་ཀྱི་གནས་ཚུལ་ལྟར་ན། ཕྱི་ལོ་ ༢༠༡༨ ནས་ཨ་རིའི་ནང་རྒྱ་ནག་གི་གསང་ཉུལ་གྱི་ལས་དོན་སྒྲུབ་མཁན་ཇེ་མང་དུ་ཕྱིན་ཡོད་པའི་ངོས་འཛིན་འོག ལོ་དེར་ཨ་རིའི་རྒྱལ་སྲིད་བདེ་འཇགས་ལས་ཁུངས་དང་ཨ་རིའི་དབུས་ཞིབ་དཔྱོད་ལས་ཁུངས་(FBI) དང་། རྒྱལ་ཡོངས་ཀྱི་ཁྲིམས་དཔྱོད་ལས་ཁུངས་ཁག་གིས། རྒྱ་ནག་མགོ་འཛུགས་ (China Initiative) ཞེས་རྒྱ་ནག་གིས་ཨ་རིའི་ཚོང་ལས་དང་ཚན་ལས་འཕྲུལ་རིགས་སོགས་ཀྱི་གནས་ཚུལ་རྐུ་འཁྱེར་བྱ་རྒྱུ་མཚམས་འཇོག་ཐབས་ཀྱི་སྲིད་ཇུས་ཤིག་གཏན་འབེབས་བྱས་ཏེ། ད་ལྟའང་ལག་བསྟར་བྱེད་མུས་ཡིན་ཡང་། ཨ་རིའི་ནང་རྒྱ་ནག་གི་གསང་ཉུལ་གྱི་ལས་དོན་དང་འབྲེལ་བའི་དཀའ་ངལ་མུ་མཐུད་འཕྲད་ཀྱིན་ཡོད་འདུག
ཝེ་ཀི་རིག་མཛོད་ལྟར་ན། ཕྱི་ལོ་ ༡༩༨༣ ལོར་རྒྱ་རིགས་བུད་མེད་ལི་དྷ་ཟེར་བ་དེ་རྒྱ་ནག་ཏུ་སྐྱེས་ཤིང་། ཆུང་དུས་ནས་ཕ་མ་དང་འགྲོགས་ཏེ་ཨ་རིར་ཕྱིན། ཕྱི་ལོ་ ༢༠༡༨ ནས་ ༢༠༢༠ བར་མོས་ཨ་རིའི་ནེའུ་ཡོག་གི་སྣ་མང་ལས་རིགས་ལས་ཁུངས་ (Chief diversity officer) ཀྱི་འགན་འཛིན་གཞོན་པ་བྱས། ཕྱི་ལོ་ ༢༠༢༡ ནས་ ༢༠༢༢ བར་ནེའུ་ཡོག་གྲོང་ཁྱེར་གྱི་སྤྱི་ཁྱབ་འགན་འཛིན་ཀའེ་ཐི་ (Kathy Hochul) ཡི་ལས་རོགས་དང་འགན་འཛིན་གཞོན་པའི་ལས་གནས་ཁུར། ཁ་སང་བྷུ་རུག་ལིན་རྫོང་གི་དབུས་ཁྲིམས་ཁང་གིས་མོས་རྒྱ་ནག་དང་གསང་འབྲེལ་བྱས་པ། ཁྲིམས་མཐུན་མིན་པའི་དངུལ་སྒོར་གཡོ་ལེན་བྱས་པ་སོགས་ཚུད་པའི་ནག་ཉེས་དོན་ཚན་བཅུ་ཅན་གྱི་འོག་ནས་ཁྲིམས་བཤེར་ཐོག་མ་དེ་བྱས།
སྤྱིར་འདས་པའི་ལོ་ཤས་གོང་ནས་ཨ་རིའི་ནང་རྒྱ་ནག་གི་སོ་ཉུལ་བ་དང་། ཆེད་དུ་མི་སྣ་མངག་གཏོང་གིས་སྤྱི་ཚོགས་བརྟན་བརླིང་ལ་གནོད་འཚེ་གང་མང་གཏོང་ཐབས། དེ་བཞིན་ཨ་རིར་ཡོད་པའི་བོད་མི་དང་། རྒྱ་ནག་གི་དམངས་གཙོ་དོན་གཉེར་བ་གཙོས། ཕྱི་རྒྱལ་དུ་ཡོད་པའི་བོད་མི་དང་། ཧོང་ཀོང་བ། ཡུ་གུར་བ་སོགས་ལ་སོ་ཉུལ་དང་རྒྱལ་མཚམས་ལས་བརྒལ་བའི་དྲག་གནོན་བྱེད་ཀྱི་ཡོད་ཅིང་། ཟླ་སྔ་མའི་ཕྱི་ཚེས་ ༦ ཉིན་ཨ་རིར་གནས་སྡོད་ལོ་རྒྱུས་རིག་པ་བ་ཝང་ཧྲུ་ཇེན་(Wang Shujun) ཟེར་བའི་རྒྱ་མི་ཞིག་གིས་རྒྱ་ནག་གཞུང་གི་སོ་ཉུལ་བ་བྱེད་ཀྱིན་ཡོད་པ་ཤེས་རྟོགས་བྱུང་སྟེ། ཁོ་ལ་མི་ལོ་ ༢༥ ཡི་བཙོན་འཇུག་ཁྲིམས་ཐག་བཅད་ཡོད།
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
