རྒྱ་ནག་གིས་གླིང་ཆེན་ཨ་ཧྥི་རི་ཁར་ཨ་སྒོར་ཐེར་འབུམ་ ༥༡ གིས་རོགས་སྐྱོར་བྱ་རྒྱུའི་ཁས་ལེན་བྱས་འདུག 

རྒྱ་ནག་གིས་འབྱུང་འགྱུར་མི་ལོ་གསུམ་རིང་གླིང་ཆེན་ཨ་ཧྥི་རི་ཁའི་རྒྱལ་ཁབ་ཁག་ལ་རྒྱ་སྒོར་ཐེར་འབུམ་སུམ་བརྒྱ་དྲུག་ཅུའི་རོགས་རམ་བྱ་རྒྱུ་ཡིན་པའི་ཁས་ལེན་བྱས་འདུག

འདས་པའི་ལོ་ཤས་གོང་ནས་རྒྱ་ནག་གཞུང་གིས་ཨ་ཧྥི་རི་ཁའི་རྒྱལ་ཁབ་ཁག་ཏུ་འཛུགས་སྐྲུན་གྱི་ལས་གཞི་སྤེལ་མུས་ཡིན་པའི་དྲིལ་བསྒྲགས་ཤུགས་ཆེན་དང་། ཕྱོགས་གཉིས་མཉམ་ལས་ཀྱིས་གླིང་ཆེན་ཨ་ཧྥི་རི་ཁར་འཕེལ་རྒྱས་ཆེན་མོ་གཏོང་གི་ཡོད་ལུགས་བཤད་མུས་ཡིན་པ་ལྟར། ཟླ་འདིའི་ཕྱི་ཚེས་ ༤ ནས་ ༦ བར་ཉིན་གྲངས་ ༣ རིང་རྒྱ་ནག་གི་རྒྱལ་ས་པེ་ཅིན་དུ་ཕྱི་ལོ་ ༢༠༢༤ ལོའི་རྒྱ་ནག་དང་ཨ་ཧྥི་རི་ཁའི་མཉམ་ལས་གླེང་སྟེགས་ (Forum on China–Africa Cooperation) ཀྱི་ཚོགས་འདུ་འཚོག་མུས་ཡིན་ཞིང་། ཚོགས་ཆེན་དེའི་ཐོག་ཨ་ཧྥི་རི་ཁའི་རྒྱལ་ཁབ་ལྔ་བཅུ་ལྷག་གི་མགོ་ཁྲིད་ཀྱིས་མཉམ་ཞུགས་བྱས་ཏེ། ཕྱོགས་གཉིས་མཉམ་ལས་ཀྱི་སྟོབས་ཤུགས་ལས་གླིང་ཆེན་ཨ་ཧྥི་རི་ཁའི་རྒྱལ་ཁབ་ཁག་འཕེལ་རྒྱས་སུ་གཏོང་རྒྱུའི་གླེང་སློང་ཤུགས་ཆེན་བྱེད་བཞིན་འདུག

ཚོགས་ཆེན་དེའི་མགོ་འཛུགས་མཛད་སྒོའི་ཐོག་རྒྱ་ནག་གི་སྲིད་འཛིན་ཞི་ཅིན་ཕིན་གྱིས། ཨ་ཧྥི་རི་ཁ་གླིང་ཆེན་གྱི་དུས་ཡུན་རིང་པོ་ནས་ཡོད་པའི་བཟོ་ཚོང་རང་བཞིན་ལྡན་པའི་ལས་འཆར་གྱི་ཕུགས་དམིགས་བཞིན། རྒྱ་ནག་གིས་གླིང་ཆེན་དེར་ཉི་གློག་སོགས་ཚུད་པའི་རང་བྱུང་ཁམས་ཀྱི་སྐྱེས་འཕེལ་ལ་དགེ་མཚན་ཆེན་པོ་ལྡན་པའི་ལས་འཆར་ ༣༠ དང་རྡུལ་ཕྲན་བཟོ་སྐྲུན་སོགས་ཀྱི་ཐད་ལ་རོགས་འདེགས་བྱེད་འདུན་ཆེན་པོ་ཡོད་ལ། རྒྱ་ནག་གིས་འབྱུང་འགྱུར་མི་ལོ་གསུམ་ནང་རྒྱ་སྒོར་ཐེར་འབུམ་ ༣༦༠ (ཨ་སྒོར་ཐེར་འབུམ་ ༥༠།༧༢) ལྷག་བཏང་ནས་རོགས་རམ་བྱ་རྒྱུ་ཡིན་པའི་ཁྲོད། རྒྱ་སྒོར་ཐེར་འབུམ་ ༧༠ ལྷག་ཡུལ་དེར་རྒྱ་ནག་གི་བཟོ་ཚོང་ཁང་འཛུགས་སྐྲུན་དང་དམག་དོན་གྱི་ལས་གཞིའི་ཆེད་དུ་གཏོང་རྒྱུ་ཡིན། ཞེས་བཤད་འདུག་ལ། ལྷན་ཚོགས་དེ་ནི་རྒྱ་ནག་ཝུའུ་ཧན་ནས་ཆེས་ཐོག་མར་མཆེད་པའི་ཏོག་དབྱིབས་གཉན་རིམས་རྗེས་ཕྱོགས་གཉིས་ཀྱི་ཚོགས་ཆེན་ཆེ་ཤོས་དེ་ཡིན་འདུག

ཨ་ཧྥི་རི་ཁ་གླིང་ཆེན་དེ་ནི་འཛམ་གླིང་གི་ཚོང་དོན་དང་དཔལ་འབྱོར་འཕེལ་རྒྱས་ཆེ་ཤོས་སུ་འགྲོ་མུས་ཡིན་པའི་གླིང་ཆེན་ཞིག་ཏུ་ངོས་འཛིན་བྱེད་ཀྱི་ཡོད་ལ་རྒྱ་ནག་གི་ཚོང་ཤག་ཆེ་ཤོས་གཉིས་པ་དེའང་ཡིན་པས། རྒྱ་ནག་གིས་རྒྱུད་གཅིག་ལམ་གཅིག་གི་སྲིད་ཇུས་ཟེར་བ་ཞིག་གི་འོག་ནས། གླིང་ཆེན་དེའི་ཁེན་ཡ་རྒྱལ་ཁབ་ཚུད་པའི་རྒྱལ་ཁབ་ཁག་ཅིག་ལ་ལྕགས་ཟམ་དང་། མེ་འཁོར་འབབ་ཚུགས་སོགས་ཚུད་པའི་ཚོང་དོན་དང་འགྲིམ་འགྲུལ་གྱི་རོགས་རམ་དང་ཚོང་དོན་མ་འཇོག་བྱེད་མུས་ཡིན་པ་དང་བསྟུན། ལྷན་ཚོགས་དེའི་ཐོག་རྒྱལ་ཁབ་ལྔ་བཅུ་ལྷག་གི་མགོ་ཁྲིད་ཀྱིས། གླིང་ཆེན་དེའི་རྒྱལ་ཁབ་ཁག་གིས་རྒྱ་ནག་ལྷན་ཚོང་དོན་དང་། ཞིང་ལས་ཐོན་སྐྱེད། འཛུགས་སྐྲུན་ལས་གཞི། གཏེར་རིགས་སྔོག་འདོན་གྱི་ལས་གཞི་སོགས་ལ་མཉམ་ལས་བྱ་འདུན་ཡོད་པའི་གླེང་སློང་ཆེན་པོ་བྱས་འདུག

དེ་བཞིན་ཨ་ཧྥི་རི་ཁའི་རྒྱལ་ཁབ་ཆེ་གྲས་ཛམ་བྷི་ཡ་ (Zambia) དང་། ཀྲན་ཛ་ནི་ཡ་ (Tanzania)། ཁེན་ཡ་ (Kenya)། ནཡེ་ཇི་རི་ཡ་ (Nigeria) སོགས་ཀྱིས་རྒྱ་ནག་ལྷན་ཚོང་དོན་དང་། འགྲིམ་འགྲུལ་སྐྱེལ་འདྲེན་སོགས་ཀྱི་ཐད་ལ་སྔར་ལས་ལྷག་པའི་མཉམ་ལས་བྱ་འདུན་ཡོད་པའི་མོས་མཐུན་བྱས་འདུག་སྟབས།  ཚོང་དོན་ཆེད་མཁས་པ་མང་པོ་ཞིག་གིས། ད་ལན་གྱི་ལྷན་ཚོགས་ནི་ཏོག་དབྱིབས་གཉན་རིམས་རྗེས་རྒྱ་ནག་གིས་གླིང་ཆེན་ཨ་ཧྥི་རི་ཁ་དང་སྔར་ལས་ལྷག་པའི་འབྲེལ་ལམ་བཙུགས་ནས། ཞི་ཅིན་ཕིན་གྱི་རྒྱུད་གཅིག་ལམ་གཅིག་གི་ལས་གཞི་དང་ཁུལ་དེར་མ་འཇོག་ཆེན་པོ་བྱས་པའི་གལ་གནད་གསལ་སྟོན་བྱེད་པའི་གོ་སྐབས་ཡག་ཤོས་ཤིག་ཡིན་སྐོར་བརྗོད་འདུག་ཀྱང་། རྒྱལ་སྤྱིའི་ཆབ་སྲིད་ཀྱི་གནད་དོན་དབྱེ་ཞིབ་པ་མང་པོ་ཞིག་གིས། རྒྱ་ནག་གཞུང་གིས་ཨ་ཧྥི་རི་ཁར་མ་འཇོག་ཆེན་པོ་བྱས་པ་ནི་རྒྱ་ནག་ནང་ཚོང་དོན་གྱི་ཐད་ནས་གྱོང་གུད་ཐེབས་མུས་ཡིན་པ་དེར་ཁ་གསབ་དང་། ཨ་རི་དང་གདོང་ཐུག་འབྱུང་མུས་ཡིན་པའི་ས་ཁམས་ཆབ་སྲིད་ཀྱི་དཀའ་རྙོག་དེ་དག་སེལ་ཐབས་སླད་དུ་ཡིན་སྐོར་སོགས་བརྗོད་འདུག

ཕྱི་ལོ་ ༢༠༢༢ ལོར་རྒྱ་ནག་གི་མ་འཇོག་ཨ་སྒོར་ཐེར་འབུམ་གཅིག་ལྷག་ཕྱིར་འཐེན་བྱས་ཡོད་ཀྱང་། འདས་པའི་མི་ལོ་ཉེར་གསུམ་རིང་རྒྱ་ནག་གི་ཁུལ་དེའི་རྒྱལ་ཁབ་མང་པོ་ཞིག་ལ་མ་འཇོག་ཆེན་པོ་བྱས་ཡོད་པས། རྒྱལ་ཁབ་དེ་དག་གིས་རྒྱ་ནག་དང་ཚོང་དོན་འབྲེལ་ལམ་ཆེན་པོ་བཟུང་ཡོད་ཀྱང་། འདས་པའི་ལོ་ཤས་གོང་ནས་ཨ་རི་དང་ཡུ་རོབ་མཉམ་འབྲེལ་ཐོག གླིང་ཆེན་དེ་རུ་རྒྱ་ནག་གི་དབང་ཤུགས་ཇེ་ཆུང་དུ་གཏོང་སླད་འཛུགས་སྐྲུན་ལས་གཞི་དང་། ཁུལ་དེའི་ས་གཞི་ལྗང་བསྒྱུར་གྱི་ལས་གཞི་མང་པོར་རོགས་འདེགས་མགོ་བཙུགས་ཡོད། འོན་ཀྱང་། ད་ལན་པེ་ཅིན་སྲིད་གཞུང་གིས་སླར་ཡང་མ་འཇོག་ཆེན་པོ་བྱས་པ་དེས། ཨ་རི་དང་ཡུ་རོབ་ལས་རྣམ་པར་རྒྱལ་ནས་ཁུལ་དེར་འཛུགས་སྐྲུན་གྱི་ལས་དོན་མང་བ་གཉེར་ཐུབ་པའི་ཆེད་དུ་ཡིན་པའི་ཚོད་དཔག་བྱེད་ཀྱི་འདུག རྒྱ་ནག་གིས་ཕྱི་ལོ་ ༢༠༡༥ དང་ ༢༠༡༨ གཉིས་ལ་ཁུལ་དེར་དམག་དོན་གྱི་ཆེད་ཨ་སྒོར་ཐེར་འབུམ་ ༦༠ ལྷག་གིས་རོགས་རམ་བྱས་ཡོད་ཀྱང་། འདི་ལོར་ཨ་སྒོར་ཐེར་འབུམ་ ༥༠ ལས་སྟེར་རྒྱུ་མིན་པའི་ཁས་ལེན་བྱས་ཡོད་པས། ལོ་སྔ་མ་དག་དང་བསྡུར་ན་ཨ་སྒོར་ཐེར་འབུམ་བཅུ་ལྷག་ཉུང་དུ་བཏང་ཡོད་པ་རེད།

ཕྱི་ལོ་ ༢༠༠༠ ཙམ་ནས་རྒྱ་ནག་དང་གླིང་ཆེན་ཨ་ཧྥི་རི་ཁའི་བར་འབྲེལ་ལམ་ཚུགས་ནས་ཕྱིས་སུ་རྒྱུད་གཅིག་ལམ་གཅིག་གི་འཛུགས་སྐྲུན་ལས་གཞི་མང་དག་ཅིག་སྤེལ་མགོ་བཙུགས། ཕྱི་ལོ་ ༢༠༠༠ དང་༢༠༠༦། ༢༠༡༢ ། ༢༠༡༨ ། ༢༠༢༡ ལོར་བཅས་སུ་ཕྱོགས་གཉིས་ཀྱི་མཉམ་འབྲེལ་ཚོགས་ཆེན་ཁག་རྒྱ་ནག་ཏུ་བསྡུས། ད་ལན་གྱི་ལྷན་ཚོགས་དེ་ནི་ཕྱོགས་གཉིས་ཀྱི་མཉམ་འབྲེལ་ལྷན་ཚོགས་ཐེངས་བརྒྱད་པ་དེ་ཡིན་འདུག

གསར་འགོད་པ། དཔལ་ལྡན།