ཧྥ་རན་སིའི་འགྲེམས་སྟོན་ཁང་གཉིས་ཀྱིས་བོད་ཅེས་པའི་ཚབ་ཏུ་ཞི་ཙང་ཟེར་བའི་ཐ་སྙད་བེད་སྤྱོད་བྱས་པར་ངོས་ལེན་མེད་པ་དང་བཅོས་བསྒྱུར་བྱེད་དགོས་པའི་ཞུ་ཡིག་བསྐུར་ཡོད་འདུག
ཧྥ་རན་སིའི་ཚགས་པར་ཁང་ (Le Monde) གིས་དེ་འབྲེལ་གནས་ཚུལ་སྤེལ་བའི་ནང་། ཧྥ་རན་སིའི་རྒྱལ་ས་པེ་རི་སི་རུ་རྟེན་གཞི་བྱས་པའི་བྷེ་རན་ལི་ (Branly) འགྲེམས་སྟོན་ཁང་གིས་བོད་ཀྱི་དངོས་རྫས་དཀར་ཆག་ནང་བོད་ཅེས་པའི་ཚབ་ཏུ་རྒྱ་སྐད་དུ་བསྒྱུར་བའི་ཞི་ཙང་རང་སྐྱོང་ལྗོངས་ (Xizang Autonomous Region) ཟེར་བ་བཏགས་ཤིང་། དེ་བཞིན་གྷུའི་མེ་ཊི་ (Guimet) འགྲེམས་སྟོན་ཁང་གི་བོད་ཀྱི་འགྲེམས་སྟོན་ཁང་གི་ཚབ་ཏུ་ཧི་མ་ལ་ཡའི་འཇིག་རྟེན་ (Himalayan World) ཟེར་བའི་མིང་གསར་པ་ཞིག་བཏགས་ཡོད་པ་གསལ་འདུག
དེ་འབྲེལ་བོད་རིག་པ་བ་དང་རྒྱ་ནག་གི་ཆེད་མཁས་པ་ཁག་ཅིག་མཉམ་འབྲེལ་གྱིས་ཡི་གེ་ཞིག་བསྐུར་བའི་ནང་། ཧྥ་རན་སིའི་འགྲེམས་སྟོན་ཁང་ཁག་གིས་བོད་ཅེས་པའི་ཚབ་ཏུ་ཞི་ཙང་རང་སྐྱོང་ལྗོངས་ཟེར་བ་དང་ཧི་མ་ལ་ཡའི་འཇིག་རྟེན་ཟེར་བ་སོགས་བཏགས་ནས་བསྒྱུར་བཅོས་བཏང་བ་དང་། ཧྥ་རན་སིའི་འགྲེམས་སྟོན་ཁང་ཁག་ཏུ་ལོ་རྒྱུས་བསྐྱར་འབྲི་བྱེད་ཐབས་ཀྱི་ཤུགས་རྐྱེན་བསླེབས་ཡོད་པ་སོགས་ལ་སྐྱོན་བརྗོད་ཡོད། འདི་ནི་སེམས་འཚབ་བྱེད་དགོས་པའི་གནད་དོན་ཞིག་ཡིན་པ་དང་། ང་ཚོའི་ཚན་རིག་དང་རིག་གཞུང་གི་ཚོགས་སྡེ་ཁག་གིས་གནད་དོན་དེ་གལ་ཆེན་ཞིག་ཏུ་བརྩིས་ནས་དམངས་གཙོ་མིན་པའི་ཕྱིའི་རྒྱལ་ཁབ་ཀྱི་ཐེ་ཇུས་ལ་ངོས་ལེན་བྱེད་མི་ཉན་ཞེས་ནན་སྐུལ་སོགས་བྱས་འདུག
ཧྥ་རན་སིའི་ནང་འགྲེམས་སྟོན་ཁག་ཙམ་མིན་པར་ཧྥ་རན་སིའི་གཙུག་ལག་སློབ་ཆེན་ཁག་ཏུའང་། ཁུང་ཙིའི་སློབ་གསོ་ལྟེ་གནས་(Confucius) ཚུད་པའི་རྒྱ་ནག་གི་དྲིལ་བསྒྲགས་བྱེད་སའི་གླེང་སྟེགས་ཇེ་མང་དུ་ཕྱིན་ཡོད་ཅིང་། ཧྥ་རན་སིའི་སློབ་ཆེན་ཁག་དང་སློབ་གསོའི་ལྟེ་གནས་ཁང་མང་པོར་རྒྱ་ནག་གིས་མཐུན་འགྱུར་བྱས་ཏེ་ཞི་ཅིན་ཕིན་གྱི་བསམ་བློ་དང་མཐུན་པའི་ལྟ་བ་ལངས་ཕྱོགས་སྤེལ་བར་རྒྱབ་སྐྱོར་བྱེད་ཀྱི་ཡོད་པ་རེད། ཉེ་བའི་ལོ་ཤས་གོང་ཧྥ་རན་སིའི་སློབ་གཉེར་ཁང་ཁག་གིས་རྒྱ་ནག་གི་ལྟ་བ་དང་ལངས་ཕྱོགས་དྲིལ་བསྒྲགས་དང་ཁྱབ་སྤེལ་སོགས་བྱས་ནས་སློབ་གྲྭ་སོ་སོའི་ལས་གཞིར་འགྱུར་བ་ཐེབས་ཀྱི་ཡོད་པ་མ་ཟད། ལོ་རྒྱུས་ལ་འཁྱོག་བཤད་དང་། ཕྱི་སྡོད་རྒྱ་རིགས་སློབ་ཕྲུག་རྣམས་ལ་སོ་ལྟ་སོགས་བྱེད་ཀྱིན་ཡོད་འདུག དེར་བརྟེན། ཁེ་ན་ཌ་དང་ཨ་རི། ཨོ་གླིང་། ཧྥ་རན་སི། འཇར་མན། སི་པན། ཌེན་མག ནི་ཐར་ལེན་ཌི། སྦེལ་འཇམ། སུ་ཝེ་ཌན་བཅས་རྒྱལ་ཁབ་ ༡༡ གིས་རྒྱལ་ཁབ་རང་རང་ནང་ཡོད་པའི་ཁུང་ཙིའི་སློབ་གསོའི་ལྟེ་གནས་ཁང་སྒོ་བརྒྱབ་ཡོད་པའི་གནས་ཚུལ་ཐོན་ཡོད།
འདི་ལོའི་ཕྱི་ཟླ་ ༨ ཚེས་ ༡༤ ནས་ ༡༦ བར་པེ་ཅིན་དུ་འཚོགས་པའི་རྒྱལ་སྤྱིའི་བོད་རིག་པའི་བགྲོ་གླེང་ཐེངས་ ༧ པའི་སྟེང་བོད་ཅེས་པ་ཞི་ཙང་དུ་མིང་བསྒྱུར་བྱེད་ཐབས་ཤུགས་ཆེན་བྱས་ཡོད་ཅིང་། ཧར་པིན་བཟོ་བཀོད་སློབ་ཆེན་ (Harbin Engineering University) གྱི་མར་ཁེ་སི་རིང་ལུགས་ཀྱི་མཐོ་སློབ་ཀྱི་སློབ་དཔོན་ཝང་ལིན་ཧྥིང་ (Wang Linping) གིས་བོད་ཅེས་པའི་མིང་གིས་ས་ཁམས་ཆབ་སྲིད་དང་འབྲེལ་ནས་འཛམ་གླིང་ནང་འགྲེལ་ལོག་རྒྱག་གི་ཡོད་སྟབས། ཞི་ཙང་ (Xizang) ཟེར་བའི་ཐ་སྙད་དེས་བོད་ཀྱི་དངོས་མིང་མཚོན་པ་སོགས་གཙོ་གླེང་བྱས་ཡོད་འདུག
རྒྱ་ནག་གཞུང་འབྲེལ་གྱི་གསར་འགྱུར་བརྒྱུད་ལམ་ཁག་ཏུ་ཞི་ཙང་ཟེར་བའི་ཐ་སྙད་དེ་བཀོལ་སྤྱོད་ཁྱབ་ཆེན་བྱེད་བཞིན་ཡོད་ཀྱང་། དཔྱད་བརྗོད་པ་ཁག་ཅིག་གིས་བོད་མིང་བསྒྱུར་བཅོས་ཀྱི་མཚོན་པའི་སྐད་ཡིག་འགྱུར་འགྲོས་ཀྱི་སྲིད་ཇུས་དེ་ནི། རྒྱ་ནག་གཞུང་གིས་རྒྱལ་སྤྱིའི་སྟེང་བོད་ལ་ངོས་འཛིན་བྱེད་ཕྱོགས་དང་། བོད་དེ་རྒྱ་ནག་གི་ཆ་ཤས་ཡིན་ཚུལ་གསལ་ཁ་འདོན་ཐབས་བྱེད་བཞིན་ཡོད་སྐོར་བརྗོད་འདུག་ལ། དེ་སྔ་རྒྱ་ནག་གིས་སྲིད་ཇུས་དེ་ལག་བསྟར་བྱས་ཏེ། རྒྱལ་སྤྱིའི་ཐོག་ཤར་ཊུར་ཀི་སི་ཐན་ལ་ཤིན་ཅང་ཟེར་བའི་ཐ་སྙད་བེད་སྤྱོད་བྱས་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
