བོད་དོན་རྒྱབ་སྐྱོར་བ་ཞིག་ཧོང་ཀོང་དུ་བཀག་སྡོམ་བྱས་འདུག

བོད་དོན་རྒྱབ་སྐྱོར་བ་ཌ་ཝི་ཌི་ལགས་ཧོང་ཀོང་ནང་འགྲོ་སྐྱོད་བྱ་རྒྱུར་བཀག་སྡོམ་བྱས་རྗེས་སྤྱི་ཚོགས་དྲ་ལམ་སོགས་སུ་ཧོང་ཀོང་ནང་གི་རང་དབང་གི་གནས་བབ་ཐད་སྐྱོན་བརྗོད་བྱེད་མགོ་བཙུགས་སོང་།

David Missal, pictured here with Hong Kong activist Glacier Kwong, unsuccessfully petitioned Germany to sanction China in response to the introduction of new ‘national security’ laws in Hong KongImage: Cmw Boni

རྒྱ་ནག་གཞུང་གིས་བོད་གཙོས་རྒྱ་ནག་གི་བཙན་བཟུང་འོག་ཡོད་པའི་མི་རིགས་ལ་རྒྱབ་སྐྱོར་བྱེད་མཁན་རྣམས་ཀྱི་འགྲོ་འདུག་སོགས་ལ་ཉུལ་ཞིབ་དང་། དཔལ་འབྱོར་གྱི་ཉེས་ཆད་ཟེར་བ་གཅོད་ཀྱིན་ཡོད་པ་ལྟར། ཁ་སང་ཕྱི་ཚེས་ ༩ ཉིན་འཇར་མན་གྱི་བོད་དོན་རྒྱབ་སྐྱོར་བ་ཌ་ཝི་ཌི་(David Missa) ཧོང་ཀོང་ནང་འགྲོ་སྐྱོད་བྱས་བཅུག་མེད་པའི་གནས་ཚུན་ཐོན་འདུག

དེ་འབྲེལ་ཌ་ཝི་ཌི་ལགས་སྒེར་གྱི་ཨེ་སི་(X) སྤྱི་ཚོགས་གླེང་སྟེགས་སྟེང་། ང་རང་ཧོང་ཀོང་དུ་བསྐྱོར་རྒྱུ་བཀག་སྡོམ་བྱས་སོང་། ཆུ་ཚོད་བཅུ་གསུམ་ལྷག་གི་རིང་ཞིབ་དཔྱོད་དང་འདྲི་རྩད་བྱས་པའི་རྗེས། མཚན་དཀྱིལ་ཙམ་ལ་ང་རང་ཧོང་ཀོང་དུ་བསྐྱོད་མི་ཆོག་ཀྱང་། ངའི་འཆར་གཞི་བཞིན་ཝེ་ཐི་ནམ་ལ་འགྲོ་སྐྱོད་ཆོག ཅེས་དང་། ང་རང་རིན་འབབ་མི་དགོས་པའི་ཐོག་ནས་རྒྱ་ནག་ཏུ་བསྐྱོད་ཆོག་ཀྱང་། ཧོང་ཀོང་ནང་བསྐྱོད་མི་ཆོག་པ་རེད། ཅེས་ཁྲིམས་སྒྲིག་དང་འགལ་བའི་འགྲོ་སྐྱོད་ཀྱི་ཐོབ་ཐང་རྡོག་རོལ་དུ་བཏང་བར་སྐྱོན་བརྗོད་བྱས་འདུག

གནད་དོན་དེ་དང་འབྲེལ་ནས་ཧོང་ཀོང་གི་དམངས་གཙོ་དོན་གཉེར་བའི་ཚོགས་གཙོ་རེ་ཝོང་(Ray Wong) གིས། གནད་དོན་དེའི་ཐོག་ནས་ཧོང་ཀོང་ནང་གནས་སྡོད་བྱེད་མཁན་གཅིག་པུའི་རང་དབང་ཇེ་ཆུང་དུ་འགྲོ་མུས་ཡིན་པ་ཤེས་རྟོགས་འབྱུང་གི་ཡོད་པ་ཞིག་མིན་པར། གློ་བུར་དུ་འགྱུར་བ་འགྲོ་མུས་ཡིན་པའི་ཆབ་སྲིད་ལམ་ལུགས་ཁྲོད། ཕྱི་རྒྱལ་མི་རིགས་རྣམས་ཀྱང་བདེ་འཇགས་མེད་པ་རེད། ཅེས་བརྗོད་འདུག་ལ། དེ་བཞིན་སྤྱི་ཚོགས་དྲ་ལམ་སོགས་སུ་གནད་དོན་དེ་ཕྱིར་བསྒྲགས་བྱས་རྗེས། འཛམ་གླིང་ཁྱོན་ཡོངས་ཀྱི་མི་མང་པོ་ཞིག་གིས། “རྒྱལ་ཁབ་གཅིག་ལ་ལམ་ལུགས་གཉིས། “ ཞེས་དང་། “རྒྱ་ནག་ལས་ཧོང་ཀོང་དུ་དམ་དྲག་ཆེ་བ།” རྒྱ་ནག་གིས་ཧོང་ཀོང་བཙན་བཟུང་བྱས་ནས་དམངས་གཙོའི་ལམ་ལུགས་ལ་གཅེས་སྐྱོང་བྱ་རྒྱུའི་དམ་བཅའ་བཞག་ཡོད། ཅེས་སོགས་ཟུར་ཟའི་ཐོག་ནས་སྐྱོན་བརྗོད་མང་པོ་བྱས་འདུག

འཇར་མན་དུ་སྐྱེས་འཚར་བྱས་པའི་བོད་དོན་རྒྱབ་སྐྱོར་བ་ཌ་ཝི་ཌི་ལགས་ནི་འཇར་མན་བོད་དོན་རྒྱབ་སྐྱོར་ཚོགས་པའི་ཚོགས་གཞོན་དང་མགྲིན་ཚབ་པ་ཡིན་ཞིང་། བོད་དོན་རྒྱབ་སྐྱོར་ཚོགས་པ་དེ་ནི་ཕྱི་ལོ་ ༡༩༨༩ ལོར་ཐོག་མར་གསར་འཛུགས་ཀྱིས་བོད་ནང་གི་བོད་མི་རྣམས་ཀྱི་རང་སྲུང་གི་ཐོབ་ཐང་དང་བོད་མིའི་གཞི་རྩའི་འགྲོ་བ་མིའི་ཐོབ་ཐང་གི་གནས་བབ་ཐད་ལ་ལས་དོན་གཙོ་བོ་གཉེར་གྱི་འདུག་ལ། ཁོང་གིས་དེ་སྔ་ཧོང་ཀོང་དང་རྒྱ་ནག་ཏུ་སློབ་གཉེར་བྱས་འདུག

རྒྱ་ནག་ནང་ཏོག་དབྱིབས་རིམས་ནད་མཆེད་རྗེས་དང་། ལྷག་པར་རྒྱ་ནག་གཞུང་གིས་ཏོག་དབྱིབས་གཙང་སེལ་གྱི་སྲིད་ཇུས་ཟེར་བ་ཞིག་གི་འོག རྒྱལ་ཁབ་དེའི་ཚོང་གི་ལྟེ་གནས་ཆེ་ཤོས་ཀྱི་གྲོང་ཁྱེར་བཅུ་ཚུད་པའི་ས་གནས་མང་དག་ཅིག་སྒོ་རྒྱ་བསྡམས་ཏེ། རྒྱ་ནག་གི་ཚོང་དོན་དང་དཔལ་འབྱོར་ལ་གྱོང་གུད་ཚབས་ཆེན་ཐེབས་ཡོད་པ་ལྟར། འདི་ལོའི་ཕྱི་ཟླ་ ༥ ཙམ་ནས་རྒྱ་ནག་དང་ཕྱིའི་རྒྱལ་ཁབ་བར་གྱི་འབྲེལ་ལམ་ཡར་སྐྱེད་བརྗེ་ལེན་ཟེར་བའི་སྲིད་ཇུས་འོག རྒྱ་ནག་གིས་སླར་ཡང་ཨེ་ཤ་ཡ་དང་། ཧྥ་རན་སི་དང་། འཇར་མི་ནི། ཨི་ཊི་ལི། ནེ་ཐ་ལེན་ཌི། སི་པེན་སོགས་ཡུ་རོབ་རྒྱལ་ཁབ་བཅུ་གཉིས་ཀྱི་མི་སེར་རྣམས་ཐོངས་མཆན་རིན་མེད་ཐོག་རྒྱ་ནག་ཏུ་ཉིན་གྲངས ༡༥ རིང་བསྐྱོད་ཆོག་ཅིང་། སྲིད་ཇུས་དེ་ཕྱི་ལོ་ ༢༠༢༥ ཕྱི་ཟླ་ ༡༢ ཚེས་ ༣༡ བར་ལག་བསྟར་བྱ་རྒྱུ་ཡིན་ལུགས་བསྒྲགས་འདུག

གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།